” എന്താ ഞാൻ പറഞ്ഞത് വിശ്വാസം വരുന്നില്ലെ…പക്ഷെ നീ വിശ്വസിച്ചാലും ഇല്ലെങ്കിലും സത്യം ആണ് ഞാൻ പറഞ്ഞത്…നീ സ്നേഹിക്കുന്നതിലേറെ എത്രയോ മടങ്ങ് നിന്നെ എൻ്റെ കുഞ്ഞ് പെങ്ങൾ സ്നേഹിക്കുന്നുണ്ട്…അത് ഇന്നലെ ഞാൻ അറിഞ്ഞു…അവളുടെ വായിൽ നിന്ന് തന്നെ… “
ചേട്ടത്തി ഒരു ചിരിയോടെ എന്നെ നോക്കി പറഞ്ഞതും പൂർണമായും വിശ്വാസം വരാത്ത പോലെ ഞാൻ ചേട്ടത്തിയെ നോക്കി…
” അപ്പോൾ അവളെന്നോട് അന്ന് പറഞ്ഞതും…ഞാൻ എല്ലാം തുറന്ന് പറഞ്ഞപ്പോൾ ഒരു മറുപടി പോലും തരാതെ നിന്നതും ഒക്കെ എന്തിനാ… ”
സ്വഭാവികമായും ഉള്ളിലുള്ള എൻ്റെ സംശയം ഞാൻ ചേട്ടത്തിയോട് ചോദിച്ചു…
” നിനക്ക് എൻ്റെ കൊച്ചിനെ അറിയില്ല…അവളുടെ സ്വഭാവത്തെ പറ്റിയും അറിയില്ല… കുഞ്ഞുനാൾ മുതലേ അവളുടെ സാധനങ്ങൾ അത് എന്ത് തന്നെ ആയാലും… ആര് തന്നെ ആയാലും…അത് മറ്റൊരാൾ തൊടുന്നത് പോലും അവൾക്ക് ഇഷ്ടമല്ല…അത് പോലെ തന്നെയാണ് നിൻ്റെ കാര്യവും…അവളേറ്റവും ഇഷ്ടപ്പെടുന്ന നിന്നെ അന്ന് കോളേജിൽ അങ്ങനെ കണ്ടപ്പൊ അവൾക്ക് ദേഷ്യം വരാതിരിക്കുവോ…. അപ്പോഴൊന്നും എനിക്കറിയില്ലായിരുന്നു നിങ്ങടെ കാര്യം… പക്ഷെ എനിക്ക് സംശയം ഉണ്ടായിരുന്നു.. പക്ഷെ ഇന്നലെ ആ മൊതലിൻ്റെ വായിൽ നിന്നും എല്ലാം പുറത്ത് വന്നു… ”
ചേട്ടത്തി പറയുന്നത് ഒരു കൊച്ച്കുട്ടി മുത്തശ്ശി പറയുന്ന കഥ കേൾക്കുന്ന കൗതുകത്തോടെ ഞാൻ കേട്ടു…
” പിന്നെ അവൾക്കും നിനക്കവളെ ഇഷ്ടമാണെന്ന് സംശയമുണ്ടായിരുന്നു… അതുകൊണ്ട് നിന്നെ ഒന്ന് ചൂട് പിടിപ്പിക്കാനും നിന്റെ വായിൽ നിന്ന് ഇഷ്ടമാണെന്ന് കേൾക്കാനും വേണ്ടിയാണ് അവളിത്തിരി വെയിറ്റ് ഇട്ട് നിന്നത്…പക്ഷെ നീ രാത്രി അങ്ങനെ വരുമെന്ന് സ്വപ്നത്തിൽ പോലും ആ പെണ്ണ് കരുതിയില്ല…അതാ ഒരു വാക്ക് പോലും മറുപടി പറയാൻ അതിന് പറ്റാത്തത്…ഒരു പൊട്ടി പെണ്ണാടാ എൻ്റെ കുഞ്ചൂസ്സ്…കുഞ്ഞുങ്ങളുടെ സ്വഭാവവും പരിഭവവും ഉള്ള ഒരു പാവം പെണ്ണ്…ഇപ്പൊ നീ അവളെ ശ്രദ്ധിക്കുന്നില്ല അവളെ നോക്കുന്നില്ലാ എന്നൊക്കെ പറഞ്ഞ് ഇന്നലെ എന്നെ കെട്ടിപിടിച്ച് ഒരുപാട് കരഞ്ഞു…ഒരു തരത്തിൽ പറഞ്ഞാ ചുരുങ്ങിയ കാലയളവിൽ തന്നെ നീ എന്ന് പറഞ്ഞാൽ ആ പെണ്ണിന് വട്ടാ…ഇതുവരെ ആരോടും അവൾക്ക് ഇങ്ങനെ തോന്നിട്ടില്ല… ”
ചേട്ടത്തി ദിവ്യയ്ക്ക് എന്നോടുള്ള സ്നേഹം എൻ്റെ മുന്നിൽ ഒരു പുസ്തകം പോലെ തുറന്നു വച്ചപ്പൊ സന്തോഷത്താൽ വാക്കുകൾ ഒന്നും പുറത്ത് വരുന്നുണ്ടായിരുന്നില്ല…അല്ലെങ്കിലും ചില നിമിഷങ്ങൾ നമ്മുക്ക് വാക്കുകളാൽ വർണിക്കാൻ പറ്റുവോ…കൂടുതൽ ഒന്നും പറയാതെ ഞാൻ ചേട്ടത്തിയുടെ കൈയ്യിൽ കയറി പിടിച്ചു…പറയാൻ ഒന്നേ ഉണ്ടായിരുന്നുള്ളൂ…
” ചേട്ടത്തിക്ക് എന്നോട് ദേഷ്യം ഉണ്ടോ…ഞാൻ… ”
എനിക്കപ്പോൾ അറിയേണ്ടത് അത് മാത്രമായിരുന്നു…ഒരു അനുജനെ പോലെ കണ്ട് എല്ലാം സ്വാതന്ത്ര്യവും തന്ന് ഞാൻ അത് മുതലെടുത്തോ എന്ന ചിന്ത പുള്ളിക്കാരിയുടെ മനസ്സിൽ ഉണ്ടോ എന്ന്…
” നീ എന്താടാ അങ്ങനെ പറഞ്ഞെ…ഈ ചേട്ടത്തി മനസ്സ് കൊണ്ട് ഏറ്റവും കൂടുതൽ ആഗ്രഹിച്ച ഒന്നായിരുന്നു ഇത്…എൻ്റെ കുഞ്ഞനുജത്തി ഒരുപാട് ഇരുണ്ടു മൂടിയ അവസ്ഥയിലൂടെ കടന്ന് പോയിട്ടുണ്ട്…അതിലെ ഏറ്റവും വലിയ വേദനയായിരുന്നു അവളുടെ അമ്മയുടെ വിയോഗം…അതിൽ നിന്നൊക്കെ മാറി പെണ്ണ് ഇത്രയേറെ സന്തോഷിച്ച് കാണുന്നത് ഈ അടുത്ത കാലത്താ…അതിന് കാരണം നീ അല്ലേടാ മോനേ…സന്തോഷേ ഉള്ളൂ… ഇരുണ്ട് മൂടിയ എൻ്റെ കുഞ്ഞിൻ്റെ ജീവിതം തെളിയാൻ കേവലം ഒരു വെളിച്ചം പോരാ… അതിന് സൂര്യനെ പോലെ കത്തി ജ്വലിക്കുന്ന പ്രകാശം വേണം…നിന്നെ പോലെ…. ”
ചേട്ടത്തി സന്തോഷത്താൽ കണ്ണിൽ നിന്നും വന്ന കണ്ണുനീർ തുടച്ച് കൊണ്ട് എൻ്റെ നെറ്റിയിൽ വാൽസല്യത്തോടെ തലോടി…അത് മാത്രം മതിയായിരുന്നു എനിക്ക് മരണം പോലും ഇനി ദിവ്യയ്ക്ക് മേൽ ദ്രിഷ്ഠി പത്തിപ്പിക്കുമ്പോൾ എന്നെ കൂടി തടുക്കണം എന്ന് എന്നെ തന്നെ ബോധ്യപ്പെടുത്താൻ…ഞാൻ ഇരിപ്പിടത്തിൽ നിന്നും എഴുന്നേറ്റു…അത് കണ്ട് ചേട്ടത്തിയും…
” ചേട്ടത്തി എനിക്ക് സന്തോഷം കൊണ്ട് വാക്കുകൾ പോലും കിട്ടുന്നില്ല…ഒരുപാട് സന്തോഷം ഉണ്ട്…ഇനി അവളോടൊപ്പം ഞാനുണ്ടാവും എപ്പോഴും…ഒരാപത്തിനും അവളെ ഞാൻ വിട്ടുകൊടുക്കില്ല… അങ്ങനെ നടക്കണം എങ്കിൽ ആദ്യം ചേട്ടത്തിക്ക് ഈ അനിയനെ നഷ്ടപെടണം… അത്ര മാത്രേ എനിക്ക് പറയാനുള്ളൂ…പൊന്ന് പോലെ ഞാൻ നോക്കും… “
ഞാൻ ചേട്ടത്തിയെ നോക്കി എൻ്റെ ഹൃദയം പറഞ്ഞു തന്ന വാക്കുകൾ എൻ്റെ ഉറപ്പായി നൽകി…
” അത് എനിക്കറിയാടാ മോനെ…പിന്നെ തൽക്കാലം അത് നമ്മൾ മാത്രം അറിഞ്ഞാ മതി…പിന്നെ ഞാൻ ഇതൊന്നും സംസാരിച്ചത് അവൾ അറിയേണ്ടാ… അവള് തന്നെ വന്ന് പറയട്ടെ നിന്നോട്… ”
” ഹാ പറയില്ല….പിന്നെ അവളിങ്ങോട്ട് പറയാൻ വരട്ടെ ഞാൻ കൊടുക്കുന്നുണ്ട്… പിന്നെ ഞാൻ ഒരു പ്ലാനിടട്ടെ നാളെ അവളെ കൊണ്ട് പറയിപ്പിക്കാൻ എന്നോട് ഒപ്പം നിൽക്കണം… “
നിശ്ചയത്തിൻ്റെ കാര്യം ഓർമ്മ വന്നതും ഞാൻ ചേട്ടത്തിയെ നോക്കി പറഞ്ഞു
” ഞാനെൻ്റെ വിവാഹ നിശ്ചയത്തിൻ്റെ അന്ന് തന്നെ വേണമല്ലെ നിങ്ങടെ കുട്ടികളിക്ക് കൂട്ട്നിൽക്കാൻ… മ്മ്…നടക്കട്ടെ… ”
ചേട്ടത്തി ഒരു ചിരിയുടെ അകമ്പടിയോടെ എനിക്ക് മറുപടി തന്നതും പിന്നെ സംസാരം അതിനെ പറ്റി നീണ്ടു…ഒടുക്കം ബ്രേക്ക് തീർന്നതും ചേട്ടത്തി സ്റ്റാഫ്റൂമിലും ഞാൻ പിള്ളാരുടെ അടുത്തും പോയി…അവന്മാരോട് കാര്യം പറഞ്ഞപ്പൊ എല്ലാറ്റിനും സന്തോഷം…
” മൈരെ ചെലവെട് ചെലവെട്… ”
” അങ്ങനെ പൂച്ചയ്ക്കും പപ്സോ… ”
” കീരിയും പാമ്പും ഇണചേർന്നാൽ എന്ത് ജീവി ഉണ്ടാവും ”
എന്ന് തുടങ്ങിയ കമൻ്റുകൾ പലവഴിക്കായി വന്നുതുടങ്ങി…പക്ഷെ അവന്മാരുടെ കളിയാക്കലിന് പോലും ഒരു സുഖമുണ്ടായിരുന്നു… പ്രണയത്തിന്റെ തുവൽ സ്പർശം കൊണ്ടുള്ള സുഖം…
അങ്ങനെ അവന്മാരുടെ കളിയാക്കലും ഒക്കെ കഴിഞ്ഞ് അന്ന് വീട്ടിൽ എത്തിയത് ഒരുപാട് സന്തോഷത്തോടെയാണ്…വീട്ടിലെത്തിയതും ചെടിക്ക് വെള്ളം നനയ്ക്കുന്ന എൻ്റെ മാതാശ്രീയെ കെട്ടിപിടിച്ചൊരുമ്മയും നൽകി ഉമ്മറത്തിരിക്കുന്ന അച്ഛനൊരു സലാം നൽകി വീട്ടിനുള്ളിലേക്ക് ചാടിക്കേറി…മുറിക്കുള്ളിൽ എത്തിയതും ബെഡ്ഡിലേക്ക് ഒരൊറ്റ വീഴ്ച്ച…അടുത്തുള്ള തലയണയും കെട്ടിപിടിച്ച് ചേട്ടത്തി പറഞ്ഞ വാക്കുകളെ വീണ്ടും ഓർത്തിരുന്നു…
” അതെ അവൾക്കെന്നെ ഇഷ്ടമാണ്…ദിവ്യയ്ക്ക് എന്നെ ഇഷ്ടമാണ്… ”
ഞാൻ സന്തോഷം ആ ആരോടെന്നിലാതെ പറഞ്ഞു… ഒരുമാതിരി പാണ്ടിപടയിലെ പ്രകാശ് രാജിന്റെ അവസഥയായിരുന്നു എനിക്ക്…വരുന്നെടാ റൊമാൻസ് വരുന്നെടാ… ഞാൻ തലയാണയും കെട്ടിപിടിച്ച് നാളെ അവളെ കൊണ്ട് എങ്ങനെ പറയിപ്പിക്കും എന്ന് ആലോചിച്ച് ഒടുക്കം മയക്കത്തിലേക്ക് വഴുതി വീണു…അല്ലേലും കട്ടില് കണ്ടാ ഞാൻ ശവാ….
