” എൻ്റെ പൊന്ന് ടീച്ചറെ ഇങ്ങളാള് കൊള്ളാലോ… ”
ഞാൻ ചേട്ടത്തിയെ നോക്കി അഭിനന്ദനാർഹം ഒന്ന് പൊക്കി…
” ഇതൊക്കെ എന്ത്…അപ്പൊ രാത്രി ഹോസ്പിറ്റലിൽ വച്ച് മൊത്തം ക്ലിയർ ആയിരിക്കണം… ഇനി അബദ്ധം കാണിച്ചു കൊളം ആകരുത്…പിന്നെ എന്നെ കൊണ്ടൊന്നും വയ്യ… ”
ചേട്ടത്തി എന്നെ നോക്കി കൈകുപ്പി ഒരു ചിരിയോടെ പറഞ്ഞു… അതിന് ഞാനും ചിരിയോടെ ഒരു തംസപ്പ് കാണിച്ചു… അതോടെ ഞങ്ങൾ രണ്ടാളും വീണ്ടും എല്ലാവരുടേം അടുത്തേക്ക് നീങ്ങി…അപ്പോഴൊന്നും ദിവ്യയെ അവിടൊങ്ങും കണ്ടില്ല…പക്ഷെ അതിന് ശേഷം ദേവു ആയിട്ട് ഞാൻ ഇത്തിരി അകലം പാലിച്ചു… എന്തായാലും അവർ അങ്ങനെ പറഞ്ഞത് താമശയാണോ കാര്യത്തിൽ ആണോന്ന് നമുക്ക് അറിയില്ലല്ലോ… അതോടെ ഞാൻ മാക്സിമം പിള്ളാരോടായി സംസാരം…ഒടുക്കം അവിടെ നിന്നെ ഇറങ്ങാറായപ്പോൾ ആയിരുന്നു പിന്നെ ദിവ്യയെ കണ്ടത്…എൻ്റെ മാതാശ്രീയുടെ ഒപ്പമായിരുന്നു കക്ഷി പുറത്തേക്ക് വന്നത്…അല്ലെങ്കിലും അമ്മയ്ക്ക് അവളേയും അവൾക്ക് അമ്മയേയും കിട്ടിയാൽ വേറെ ആരേം വേണ്ടാന്ന് തോന്നി പോകും അവരുടെ അറ്റാച്ച്മെന്റ് കണ്ടാൽ… ഇടയ്ക്ക് എന്നെ അവളൊന്ന് പാളി നോക്കിയപ്പോൾ ഞാനും തിരിച്ച് അതേ സമയം നോക്കി അതോടെ അവൾ പുച്ചയെ പോലെ നോട്ടം മാറ്റി…അത് കണ്ടെനിക്ക് ചിരി വന്നെങ്കിലും അടക്കിവെച്ചു…അങ്ങനെ അവിടെ നിന്നും വൈകിട്ട് ആവറായപ്പൊ യാത്ര തിരിച്ചു…പോകുമ്പോൾ ചേട്ടത്തി ഒക്കെ സെറ്റാക്കണം എന്ന് ഒരിക്കൽ കൂടി ഓർമ്മിപ്പിച്ചിരുന്നു…അതിന് ഞാൻ ഡബിൾ ഓക്കെ എന്ന് മറുപടി നൽകി എല്ലാവരോടും ഒരിക്കൽ കൂടി യാത്ര പറഞ്ഞ് അവിടെ നിന്നും തിരിച്ചു…
അങ്ങനെ വീട്ടിലെത്തിയതും ക്ഷീണം കാരണം ഒന്ന് ചെറുതായി മയങ്ങി…പിന്നെ എഴുന്നേൽക്കുന്നത് ഹോസ്പിറ്റലിൽ പോകാറായപ്പോൾ ആയിരുന്നു…എഴുന്നേറ്റതും ആദ്യം കണ്ടത് ചേട്ടത്തിയുടെ മിസ്ക്കോൾ ആണ്…അതിന് താഴെ കോൾ എടുക്കാതത്ത് കൊണ്ട് മെസേജ് അയച്ചിട്ടുണ്ടായിരുന്നു…
” ഒക്കെ ആ പെണ്ണിനെ പറഞ്ഞ് മനസ്സിലാക്കി വെച്ചിട്ടുണ്ട്…നിന്നോടിന്ന് ഒക്കെ പറയും എന്ന് വെല്ലു വിളിച്ചാണ് പോയത്… പെട്ടെന്ന് ചെല്ലാൻ നോക്ക്…അവളവിടെ പാർക്കിംഗിൽ ഉണ്ടാവും… “
” പെണ്ണിന് നിന്നെ നഷ്ടപ്പെടും എന്ന് തോന്നിയത് കൊണ്ടാ…അതോണ്ട് ഉറപ്പായും അവൾ പറയും…”
” സോ ആൾ ദി ബെസ്റ്റ്… ”
ചേട്ടത്തിയുടെ മെസേജ് വായിച്ചതും സന്തോഷം മൂത്ത് പിന്നെ ഒരു അങ്കമായിരുന്നു… ചാടിതുള്ളി ഫ്രഷായി ഞാൻ പതിവിലും ഇച്ചിരി നേരത്തെ തന്നെ വീട്ടിൽ നിന്ന് ഇറങ്ങി…മനസ്സ്മൊത്തം പ്രതീക്ഷകളായിരുന്നു എൻ്റെ ദിവ്യയെ കുറിച്ചോർക്കുമ്പോൾ…അങ്ങനെ ഹോസ്പിറ്റൽ എത്താറാവുമ്പൊ ഒടുക്കത്തെ ഒരു മഴ…ഒരുവിധം നനഞ്ഞാണ് ഞാൻ പാർക്കിംഗിൽ എത്തിയത്… പ്രതീക്ഷിച്ച പോലെ അവിടെ ദിവ്യയെ കണ്ടതും ആ മഴ പോലും എനിക്ക് ശുഭലക്ഷണം ആയി തോന്നി…പക്ഷെ സന്തോഷം പുറത്ത് കാണിക്കാതെ മികച്ച നടനുള്ള അവാർഡ് വാങ്ങും എന്ന ലക്ഷ്യത്തോടെ ഞാൻ വണ്ടി അവൾകരികിൽ പാർക്ക് ചെയ്ത് അവളെ മൈൻ്റ് ചെയ്യാതെ അൽപം മാറി കുടയില്ലാതെ എങ്ങനെ പോകും എന്ന തരത്തിൽ നിന്നു…അത് കണ്ടതും അവൾ ഒടുക്കം മെല്ലെ മെല്ലെ എൻ്റെ അടുത്തേക്ക് നടന്നു വന്നു…ഈ സമയം എൻ്റെ നെഞ്ച് പെരുമ്പറ കൊട്ടുന്നുണ്ടെന്ന് എനിക്കല്ലെ അറിയൂ…
” അതേ… ”
എൻ്റെ അടുത്തെത്തിയതും അവളെന്നെ പതിഞ്ഞ സ്വരത്തിൽ വിളിച്ചു പക്ഷേ ഞാനത് കേൾക്കാത്ത പോലെ നിന്നു…
” അതേ…ഞാൻ ഒരു കാര്യം പറഞ്ഞോട്ടെ… ”
വീണ്ടും ദയനീയ ഭാവത്തിൽ അവളെന്നെ വിളിച്ചു…
” ഞാനൊക്കെ കണ്ണീ കണ്ട പെണ്പിള്ളേരുടെ കൈയ്യിൽ കേറി പിടിക്കുന്ന കൂട്ടത്തിൽ ഉള്ളതാ… അതുകൊണ്ട് സംസാരിക്കാൻ ഒന്നും നിൽക്കേണ്ട…പറയാൻ ഉള്ളതൊക്കെ എനിക്കായിരുന്നു…അത് ഞാൻ പറഞ്ഞല്ലോ…അത് കഴിഞ്ഞു… ”
ഞാൻ ഒരാണിൻ്റെ മുഴുവൻ ഗൗരവും ശബ്ദത്തിൽ കലർത്തി അവളുടെ മുഖത്ത് നോക്കാതെ പറഞ്ഞു…അതോടെ കുറച്ചു നിമിഷത്തേക്ക് അവിടെ ശക്തമായ മഴയുടേയും ഇടിയുടേയും ശബ്ദം മാത്രം കേൾക്കാം…
” അപ്പൊ എൻ്റെ ഇഷ്ടമോ… ”
അവളുടെ വായിൽ നിന്നും വന്ന വാക്കുകൾ ഒരു നിമിഷം എന്നെ അവൾക്ക് മുഖം മുഖം തിരിച്ചു…
” എന്ത്… ”
” നിന്റെ ഇഷ്ടം നീ പറഞ്ഞു…അപ്പൊ എൻ്റെ ഉള്ളിൽ ഉള്ള നിന്നോടുള്ള ഇഷ്ടം ഞാൻ എവിടെ പറയണം… “
എന്നെ മുഖം ഉയർത്തി നോക്കി ദിവ്യ അത് പറഞ്ഞപ്പൊ ഒരു നിമിഷം ഞാൻ അവളുടെ നോട്ടത്തിൽ സ്വയം അലിഞ്ഞ് ഇല്ലാതായി…കിളി പോയീന്ന് സിംപിൾ ആയി പറയാം…
” സത്യാ… ഒരുപാട് ഇഷ്ടാ…ൻ്റെ ജീവനാ…എനിക്കറിയാർന്നു എന്നെ ഇഷ്ട്ടാന്ന് അത് ഈ വായീന്ന് കേൾക്കാൻ വേണ്ടിയാ ഞാൻ ഇത്ര ദിവസം വിട്ടു നിന്നത്…പിന്നെ അന്ന് കോളേജിൽ വെച്ച് അങ്ങനെ കണ്ടപ്പൊ സങ്കടോം…ദേഷ്യോം…ഒക്കെ ഉണ്ടായി…അതാ ഞാൻ അന്ന് സംസാരിക്കാൻ വന്നപ്പൊ കൈയിൽ പിടിച്ചപ്പൊ അങ്ങനെ പറഞ്ഞെ… അറിയാതെ പറഞ്ഞു പോയതാ…അപ്പൊ തന്നെ എൻ്റെ കരണം നോക്കി ഒന്നു തന്നൂടാർന്നോ…കാരണം കോളേജിൽ അന്ന് എല്ലാവരുടേയും മുന്നിൽ വെച്ച് ആ നെഞ്ചിൽ കെടന്ന് തേങ്ങിയ പെണ്ണാണ് അത് പറഞ്ഞത് എന്നുള്ളത് കൊണ്ട്… ”
അവൾ കണ്ണിൽ നിന്നും വന്ന കണ്ണുനീർ തുടച്ച് എന്നെ നോക്കി സങ്കടഭാവത്തിൽ പറയുന്നത് കണ്ട് ഉള്ള് നീറി പുകഞ്ഞെങ്കിലും ഞാൻ ഒന്നും പ്രതികരിക്കാതെ അവളന്ന് രാത്രി നിന്നത് പോലെ നിന്നു…
” അന്ന് രാത്രി വീട്ടിൽ വന്ന് പറയും എന്ന് സ്വപ്നത്തിൽ പോലും ഞാൻ വിചാരിച്ചില്ല…ആകെ പേടിച്ച് പോയി…പിന്നെ ഒരുപാട് കൊതിച്ച എന്നെ ഇഷ്ടമാണെന്നുള്ള വാക്കുകൾ കൂടി കേട്ടപ്പോൾ ആകെ ഞാൻ നിന്ന് ഉരുകുകയായിരുന്നു…അന്ന് രാത്രി എന്നോട് പറഞ്ഞില്ലെ എന്നെ ഒരുപാട് ഇഷ്ടാണ് അർദ്ധനാരീശ്വര ക്ഷേത്രത്തിൽ വെച്ച് ഭഗവാനോട് ജീവിത കാലം മുഴുവനും കൂടെ വേണം എന്ന ആഗ്രഹത്തെ പറ്റി പ്രാർത്ഥിച്ചു എന്ന്…ഞാനും പ്രാർത്ഥിച്ചിരുന്നു അന്ന്..വെറുമൊരു ആഗ്രഹമല്ല നീയിലെങ്കിൽ ഈ ജീവിതമേ വേണ്ടെന്ന്….അത്രയ്ക്ക് ഇഷ്ടപ്പെട്ട് പോയി…എപ്പോഴാണെന്നോ…എന്തിനാണെന്നോ… ഒന്നും അറിയില്ല…തൻ്റെ കൂടെ ഉണ്ടാവുമ്പോ സന്തോഷിക്കുമ്പോലെ ഞാൻ വെറെ ഒരിക്കലും സന്തോഷിച്ചിട്ടില്ല എൻ്റെ മരിച്ചുപോയ അമ്മയാണെ സത്യം… ”
പറഞ്ഞ് തീർന്നതും ഒരു തേങ്ങലായിരുന്നു…മഴ കാരണം ഒരാൾ പോലും അങ്ങോട്ട് വന്നില്ല…അവളുടെ തേങ്ങലിൻ്റെ ശബ്ദം പോലും ഞാനല്ലാതെ മറ്റൊരാളും കേൾക്കരുതെന്ന് മഴയ്ക്കും വാശിയുള്ളത് പോലെ തകർത്ത് പെയ്യുകയായിരുന്നു…എൻ്റെ പെണ്ണിന് എന്നോടുള്ള അണപ്പൊട്ടിയ സ്നേഹം കണ്ടപ്പൊ ലോകത്ത് ഇപ്പൊ ഏറ്റവും ഭാഗ്യവാൻ ഞാനാണ് എന്ന് എനിക്ക് തോന്നി…അല്ലെങ്കിൽ ഒരു ചുരുങ്ങിയ കാലയളവിൽ ഞാൻ സ്നേഹിക്കുന്നത്തിൻ്റെ എത്രയോ ഇരട്ടി മടങ്ങ് എന്നെ സ്നേഹിക്കുന്ന ഒരു പാതിയെ എനിക്ക് കിട്ടുമോ…. അതുകൊണ്ട് തന്നെ കൂടുതൽ എനിക്കും പിടിച്ചു നിൽക്കാൻ ആവുമായിരുന്നില്ല…എൻ്റെ മുന്നിൽ നിന്ന് തേങ്ങുന്ന ദിവ്യയുടെ താഴ്ന്ന മുഖം ഞാൻ കൈക്കുള്ളിൽ കോരിയെടുത്തു…അപ്പോഴും ആ കലങ്ങിയ കണ്ണുകളിൽ എന്നോടുള്ള അളവില്ലാത്ത സ്നേഹം എനിക്ക് കാണാർന്നു…
” എന്നെ ഇങ്ങനെ സ്നേഹിച്ച് വീർപ്പ്മുട്ടിക്കല്ലെടോ…എപ്പോഴോ ഞാനും എൻ്റെ ഈ ശൂർപ്പണഖയെ ഇഷ്ടപെട്ടുപോയി…താൻ അല്ലാതെ വേറെ ആരാടോ എൻ്റെ മനസ്സിൽ… ഒരുപാട് ഇഷ്ടാ…താൻ പറഞ്ഞപോലെ എൻ്റെ ജീവനാ… കരയല്ലടോ…ഞാൻ ഉണ്ടാവും എപ്പോഴും കൂടെ…ഇത് നമ്മുടെ കഥയാണ് ഈ ശൂർപണഖയെ പ്രണയിച്ച പൊട്ടകണ്ണൻ്റെ കഥ…. ”
