ഇതെന്റ ബെസ്റ്റ് ഫ്രണ്ട് അനുരാധ ഞങ്ങള് അനൂന്ന് വിളിക്കും” “ഹായ്” ആദർശ് ചിരിച്ച് കൊണ്ട് അനൂ നോടായി പറഞ്ഞു. ഷേക്ക് ഹാന്റ് കൊടുക്കാനായി ഞാൻ കൈ നീട്ടിയതോടെ ആദർശ് എന്റെ കൈ ചേർത്ത് പിടിച്ചതോടെ കൃഷ്ണ ആദർശിനോട് പറഞ്ഞു. “ഇത് ആദിത്യൻ ഞങ്ങളെല്ലാം ആദീന്ന് വിളിക്കും. ഈ അനൂനെ കെട്ടാൻ പോണത് ഇവനാ” “ആണോ, കൺഗ്രാറ്റ്സ്. ആദി എന്താ ചെയ്യുന്നേ?” ആദർശ് എന്നോട് ചോദിച്ചു. “ഞങ്ങൾക്ക് ഫാമിലി ബിസിനസ്സാ. പ്ലാസ്റ്റിക്ക് ഐറ്റംസ് ഉണ്ടാക്കുന്ന ഒരു കമ്പനിയുണ്ട്. അത് മാനേജ് ചെയ്യാ ഞാൻ”
“ദാറ്റ്സ് ഗ്രേറ്റ്. ഉടനെ കൂടാൻ പറ്റ്വോ ഞങ്ങൾക്ക് നിങ്ങളുടെ രണ്ട് പേരുടെയും കല്യാണം?” ആദർശ് ചിരിച്ച് കൊണ്ട് എന്നോടും അനുനോടുമായി ചോദിച്ചു. “ഒരു കൊല്ലം കഴിഞ്ഞുണ്ടാകും” ആദർശിനോടായി അനു പറഞ്ഞു. ക്യാമറമാൻ ഫോട്ടോയെടുക്കാമെന്ന് പറഞ്ഞതോടെ ഞാൻ ആദർശിന്റെ അരികിലായും അനു കൃഷ്ണയുടെ അരികിലായും നിന്ന് ഫോട്ടോയെടുത്തു. ശേഷം ഞങ്ങൾ സദ്യ കഴിക്കാനായി ഹാളിന്റെ താഴെയുള്ള നിലയിലേയ്ക്ക് പോയി. നടക്കുന്നതിനിടെ അനു പറഞ്ഞു: “ആദി, കൃഷ്ണേം ആദർശും നല്ല ചേർച്ചയുണ്ടല്ലെ?” “ആ… രണ്ട് പേരും നല്ല മാച്ചാണ്” അനു പറഞ്ഞതിനെ ഞാൻ പിന്താങ്ങി. ഒഴിവുള്ള കസേരകളിൽ തൊടടുത്തായി ഇരുന്ന ഞങ്ങൾക്ക് തൂശനിലയിൽ നല്ല ആവി പറക്കുന്ന ചോറും 8 കൂട്ടം കറികളും വിളമ്പി.അവസാനം പേപ്പർ ഗ്ലാസിൽ പായസവും കിട്ടിയതോടെ അത് കുടിച്ച് കഴിക്കൽ അവസാനിപ്പിച്ച ഞങ്ങൾ കൈ കഴുകാനായി വാഷ് റൂമിലേയ്ക്ക് നടന്നു. അവിടെ എന്റെ തൊട്ടടുത്ത് നിന്ന് കൈ കഴുകി കൊണ്ടിരുന്ന അനു എന്നോട് പറഞ്ഞു: “ആദി, നമ്മളവർക്കായിട്ട് വാങ്ങിച്ച ആ രണ്ട് ഗോൾഡ് റിംഗുകള് കൊടുത്തില്ലാ ലോ ഡാ” “ശ്ശോ… ഇങ്ങോട്ടെയ്ക്ക് വരുന്ന വഴിയൊക്കെ ഗൂഗിൾ മാപ്പ് തെറ്റിച്ചതോടെ ഞാനാകെ ടെൻഷനായി അതോടെ റിംഗിന്റെ കാര്യമൊക്കെ മറന്ന് പോയി. എന്തായാലും നീ ഇപ്പോ ഓർത്തത് നന്നായി അല്ലേൽ നമ്മളതും കൊണ്ട് വീട്ടിലോട്ട് പോയെനെ” ഞാൻ ചിരിച്ച് കൊണ്ട് പറഞ്ഞു. “എന്നാ വാ നമ്മുക്കത് കാറിൽ നിന്ന് എടുത്ത് കൊടുത്തിട്ട് അവരുടെ കൂടെ ഒരു സെൽഫി എടുക്കാ”ന്ന് പറഞ്ഞ് അനു എന്റെ ഇടത്തെ കൈയ്യിൽ പിടിച്ചിട്ട് കാർ പാർക്കിംഗിലേയ്ക്ക് നടന്നു. കാറിൽ നിന്ന് റിംഗ് അടങ്ങിയ ബോക്സ് ഇട്ട് വച്ച കവർ എടുത്ത് അനൂന്റെ കൈയ്യിൽ കൊടുത്ത ഞാൻ പറഞ്ഞു: “അനു കുട്ടിയുടെ ഗിഫ്റ്റാന്ന് പറഞ്ഞ് കൊടുത്താ മതിട്ടോ അവർക്ക്” “അങ്ങനെ എനിക്ക് മാത്രം ഈ ഗിഫ്റ്റിന്റെ ക്രെഡിറ്റ് വേണ്ടാട്ടോ മോനെ. നമ്മള് ഒരുമിച്ച് പോയല്ലെ ഇത് വാങ്ങിച്ചത് അപ്പോ നമ്മള് രണ്ടു പേരുടെയും ഗിഫ്റ്റാ ഇതെന്ന് പറഞ്ഞ് കൊടുക്കാ ആദി കുട്ടാ നമുക്ക്” പെണ്ണ് കൊഞ്ചി പറഞ്ഞിട്ട് എന്റെ വലത്തെ കൈയ്യിൽ ചുറ്റി പിടിച്ചു. “എന്നാ അനു കുട്ടി പറഞ്ഞ പോലെ നമ്മുടെ രണ്ട് പേരുടെയും ഗിഫ്റ്റാ ഇതെന്ന് പറഞ്ഞ് കൊടുക്കാം”ന്ന് പറഞ്ഞ് ഞാൻ പെണ്ണിന്റെ നെറ്റിയിൽ എന്റെ നെറ്റി പതിയെ ഒന്ന് മുട്ടിച്ചു. അതോടെ പെണ്ണിന് സന്തോഷമായി അവളാ പാൽ പല്ല് കാണിച്ച് പുഞ്ചിരിച്ചിട്ട് “നമ്മുക്കിത് കൊണ്ട് പോയി കൊടുത്തിട്ട് വരാം” ന്ന് അനു പറഞ്ഞതോടെ ഞാൻ അവളെയും ചേർത്ത് പിടിച്ച് ഹാളിനകത്തേയ്ക്ക് കയറി. ഹാളിലെ കസേരകളെല്ലാം ഒഴിഞ്ഞ് കിടപ്പുണ്ടായിരുന്നു. സ്റ്റേജിനടുത്തേയ്ക്ക് നടന്ന ഞങ്ങൾ സ്റ്റേജിലേയ്ക്ക് നോക്കിയപ്പോൾ കണ്ടത് അവിടെ ആദർശിനെയും കൃഷ്ണയേയും പല പോസിൽ നിർത്തി വെഡ്ഡിംഗ് ഫോട്ടോഗ്രാഫർമാർ ഫോട്ടോയെടുക്കുന്നതായിരുന്നു.
സ്റ്റേജിലേയ്ക്ക് കയറുമ്പോൾ ഞാൻ അനൂന്റെ കൈ വിട്ട് അവളോട് ആദ്യം കയറാൻ പറഞ്ഞു. തൊട്ടു പിറകെയായി ഞാനും സ്റ്റേജിലേയ്ക്ക് കയറി. ഞങ്ങളെ കണ്ടതോടെ കൃഷ്ണയും ആദർശും ചിരിച്ച് കൊണ്ട് അടുത്തേയ്ക്ക് വിളിച്ചു. അവർക്കരികിൽ നടന്നെത്തിയ ഞാനും അനുവും കൈയ്യിലിരുന്ന സ്വർണ്ണ മോതിരമുള്ള കവർ കൃഷ്ണയുടെ കയ്യിൽ ഏൽപ്പിച്ചിട്ട് അനു പറഞ്ഞു: