എന്നാൽ അവർക്ക് മലയാളം അറിയാം. അത് എങ്ങനെ എന്ന് എനിക്കും കൃത്യമായി അറിയില്ല. ഞാൻ അവരെ കാണുന്നതിന് മുൻപ് തന്നെ അവർക്ക് കുറച്ചൊക്കെ മലയാളം അറിയാം. ബാക്കി ഉള്ളത് ഞാനും അവരെ പഠിപ്പിച്ചു.
അവർ കുറച്ചു നാൾ കേരളത്തിൽ ഉണ്ടായിരുന്നിരിക്കണം. എന്തായാലും കഥയിൽ ചോദ്യം ഇല്ല. അതൊക്കെ നമുക്ക് വഴിയേ അറിയാം.
“ഞാൻ ഇവിടെ തന്നെ ഉണ്ട്.” ആ സമയം ഇന്ദു വാതിലിന്റെ മറവിൽ നിന്ന് പറഞ്ഞു.
ഫരി ഇന്ദുവിന്റെ അടുത്തേക്ക് പോയി. അവളേയും കൂട്ടി എന്റെ അടുത്തേക്ക് വന്നു.
“എന്റെ കൂടെ വന്നതാ. ഇവർക്ക് വേണ്ടത് എന്താണെന്ന് വെച്ചാൽ ചെയ്തു കൊടുക്കണം. ”
ഞാൻ ഇന്ദുവിന്റെ മുഖത്തു പോലും നോക്കാതെ പറഞ്ഞു. എന്നാൽ അത് അവൾക്ക് സങ്കടം ആയി. അവളുടെ കണ്ണ് നിറഞ്ഞു. പക്ഷെ വേഗം തന്നെ അവൾ അത് തുടച്ചു.
എന്നിട്ട് ആതുവിനെ നോക്കികൊണ്ട് പറഞ്ഞു
“മോളെ ബേഗൊക്കെ വാങ്ങി മുറിയിൽ കൊണ്ട് പോയി വെക്ക്.”
അങ്ങനെ പറഞ്ഞ ശേഷം വീണ്ടും തുടർന്നു.
“മുകളിലെ കി.” എന്ന് പറഞ്ഞു നിർത്തിയ ശേഷം ഒന്ന് ശങ്കിച്ചു കൊണ്ട് പറഞ്ഞു.
“മുകളിൽ കിച്ചുവിന്റെ മുറി മാത്രമേ വൃത്തി ആക്കിയത് ഉള്ളൂ. അത് എന്നും വൃത്തിയാകും. മോള് ഇവർക്ക് താഴെയുള്ള വല്യമ്മയുടെ മുറി കാണിച്ചു കൊടുക്ക്. ”
അത് കേട്ടിട്ടും ഞാൻ അവളെ നോക്കാനോ എന്തെങ്കിലും മിണ്ടാനോ നിന്നില്ല.
അവളുടെ കരച്ചിൽ ഒന്നും എന്റെ മനസ്സ് ഇളക്കിയിരുന്നില്ല. . എന്റെ ഫരിയുടേയും ഗൽബിയുടേയും കരച്ചിൽ ആണ് ഞാൻ തല്ക്കാലം എല്ലാം ക്ഷമിക്കാൻ കാരണം. അവർ കരയുന്നത് എനിക്ക് സഹിക്കാൻ ആകില്ല. അവരാണ് ഇന്ന് എനിക്ക് ഏറ്റവും പ്രീയപ്പെട്ടവർ. അവർ പറഞ്ഞാൽ ഞാൻ എന്തിനും തയ്യാറാക്കും.
” ചേച്ചി ബേഗ് ഇങ്ങ് താ ചേച്ചി ഞാൻ എടുക്കാം. ” ആതു ഗൽബിയുടെ അടുത്ത് പോയി പറഞ്ഞു.
ഗൽബി എന്നെ നോക്കിയിട്ട് പറഞ്ഞു.
“വേണ്ട. ഞാൻ എടുത്തോളാം”
” ശരി. എന്നാൽ വാ ഞാൻ മുറി കാണിച്ചു തരാം.”
ആതു പറഞ്ഞു. എന്നിട്ട് അവിടെയുള്ള ഒരു മുറി ചൂണ്ടി കാണിച്ചിട്ട് പറഞ്ഞു.
“അതാണ് വല്യമ്മയുടെ മുറി. ഞാൻ വൃത്തിയാക്കി വെച്ചതാ. ചേച്ചി വാ. ചേച്ചിക്ക് ഞാൻ ആ മുറി കാണിച്ചു തരാം….”
ഞാൻ ഗൽബിയെ നോക്കി. .
എന്റെ നോട്ടത്തിന്റെ അർത്ഥം മനസ്സിലാക്കിയ അവൾ ആതുവിന്റെ കൂടെ നടന്നു.
“കുടിക്കാൻ എന്തെങ്കിലും എടുക്കെട്ടെ..? കി……” അങ്ങനെ പറഞ്ഞു നിർത്തികൊണ്ട് ഇന്ദു ചോദിച്ചു
“ഇത് എന്റെ വീടാണ്. എന്റെ മാത്രം. എന്തെങ്കിലും വേണമെങ്കിൽ ചോദിച്ചു വാങ്ങിക്കോ.”
അതും പറഞ്ഞു. ഞാൻ ഫരിയെ നോക്കിയ ശേഷം. മുകളിലേക്ക് നടന്നു.
അത് കേട്ട് ഇന്ദുവിന്റെ കണ്ണ് വീണ്ടും നിറഞ്ഞു. അപ്പോൾ ഫരി ഇന്ദുവിനോട് പറഞ്ഞു.
“ഇപ്പോൾ ഒന്നും വേണ്ട ഇന്ദു. ഞങ്ങൾ വരും വഴി കഴിച്ചിട്ട വന്നത്. ഇപ്പോൾ ഒന്ന് കുളിച്ച് ഫ്രഷ് ആകണം എന്നിട്ട് കിടന്ന് ഉറങ്ങണം. അത്രയേ വേണ്ടൂ. ”
“എന്നാൽ ചേച്ചി ചെന്ന് ഫ്രഷ് ആയി വാ. ആദ്യമായി ഈ വീട്ടിൽ വന്നതല്ലേ. അതും എന്റെ കിച്ചുവിന്റെ വീട്ടിൽ. കിച്ചുവിന്റെ കൂടെ. അപ്പോൾ എന്തെങ്കിലും തരാതെ എങ്ങനെയാ ഉറങ്ങാൻ വിടുന്നത്.” ഇന്ദു പറഞ്ഞു.
ഫരി ഇന്ദുവിനെ നോക്കി. ഇന്ദുവിന്റെ കണ്ണ് നിറഞ്ഞിരുന്നു. ഫരിക്ക് ഇന്ദുവിന്റെ കണ്ണുനീർ കണ്ട് സഹിക്കാൻ ആയില്ല.
അപ്പോൾ അടുക്കളയിൽ നിന്നും ഇന്ദുവിന്റെ ഫോൺ ബെൽ മുഴങ്ങി.
ഇന്ദു അടുക്കളയിലേക്ക് പോയി. ഫരി ഞാൻ നടന്നു പോയ വഴിയിലൂടെ മുകളിലേക്കും. മുകളിൽ എന്റെ റൂമിലേക്ക്.
കാത്തു ആയിരുന്നു ഇന്ദുവിന്റെ ഫോണിൽ. ആരാണ് കാത്തു എന്നല്ലേ..? എന്റെ ചേച്ചി കാർത്തിക തന്നെ.
ഫോൺ എടുത്ത ഉടനെ കാത്തു ചേച്ചി ഇന്ദുവിനോട് ചോദിച്ചു.
“എടി. കിച്ചു വന്നിട്ടുണ്ടോ..?”
“ആ ചേച്ചി. ഉണ്ട്. കിച്ചു വന്നിട്ടുണ്ട്.?”