ശ്യാമ വീണ്ടും ഞെട്ടി. എങ്കിലും ധൈര്യം സംഭരിച്ചു ചോദിച്ചു.
“അതിന് ആ പെണ്ണിനെ സുധി കണ്ടിട്ടുണ്ടോ? അവളെ സുധി എങ്ങനെ തിരിച്ചറിയും. ”
“അത് നിസ്സാരം ആണ്. അതിനുള്ള വഴി എനിക്കറിയാം . അതവിടെ നിൽക്കട്ടെ. ചിലപ്പോൾ അവൾ തന്നെ ആയിരിക്കും. ഇവിടെ വന്നു ഒപ്പ് ഇട്ടു കൊടുത്തത്. അവളുടെ അഡ്ഡ്രസ്സും ഫോൺ നമ്പറും ഇവിടുന്ന് കിട്ടും. അത് വെച്ച് ഞാൻ അവളെ കണ്ടെത്തും. അല്ലാതെയും വഴിയുണ്ട്. ”
” ശരി…. തല്ക്കാലം കരൾ ഒന്നും മുറിച്ചു വിൽക്കേണ്ട. എന്തെങ്കിലും വഴിയുണ്ടോ എന്ന് ഞാൻ ഒന്ന് നോക്കട്ടെ. ആ ബില്ല് ഇങ്ങ് താ.. .”
“ഏയ്.. അതൊന്നും വേണ്ട. എനിക്ക് വേണ്ടി ഇവിടെ ഒപ്പ് ഇട്ടുകൊടുത്ത ഞാൻ അറിയാത്ത ഞാൻ കണ്ടിട്ടില്ലാത്ത എന്റെ ഭാര്യ വരും ഈ ബില്ല് അടക്കാൻ. ഇപ്പോൾ എനിക്ക് ആവശ്യം താമസിക്കാൻ ഒരു സ്ഥലം ആണ്. ശ്യാമയ്ക്ക് എന്നെ ഒന്ന് സഹായിക്കാൻ പറ്റുമോ? എനിക്ക് ഒരു വീട് വാടകയ്ക്ക് ശരിയാക്കി തരാമോ. ഇവിടെ ഇപ്പോൾ എനിക്ക് വേറെ ആരേയും അറിയില്ല.”
.”
ഓരോന്നും എന്റെ തലയിൽ ആണല്ലോ വന്നു വീഴുന്നത്. ഇയാളോട് ഇപ്പോൾ എങ്ങനെ പറയും. ഞാൻ തന്നെയാണ് ഒപ്പ് ഇട്ടു കൊടുത്തതെന്ന്. പിന്നെ വീട് അതും കൂടെ എന്റെ ജോലിയും. എല്ലാം കൂടെ ഇനി എന്ത് ചെയ്യും. തല്ക്കാലം വീട്ടിലേക്ക് കൂട്ടാം. അവിടെ മുകളിലുള്ള മുറിയിൽ താമസിപ്പിക്കാം. വാടക തരാം എന്നല്ലേ പറഞ്ഞത്. ആ വാടകയ്യെങ്കിലും കിട്ടിയാൽ വീട്ടിലെ കാര്യങ്ങൾ നടക്കും. ഏതായാലും ഇയാൾ എന്റെ ജോലി കൊണ്ട് പോകും.
എന്നാൽ മൂന്നു മാസത്തെ വിശ്രമം പറഞ്ഞതിനാൽ അതുവരെ എങ്കിലും തനിക്ക് ആ ജോലി കിട്ടും. അതുവരെ എന്റെ വീട്ടിൽ വിശ്രമിക്കാൻ പറയാം. അല്ലാതെ ഇപ്പോൾ ഒഴിവാക്കിയാൽ ഉറപ്പായും ഇയാൾ തന്റെ ജോലിയിൽ കയറുകയും തന്നെ കണ്ടു പിടിക്കുകയും ചെയ്യും. അതോടെ തന്റെ കാര്യം പോക്കാ. . ഇതാകുമ്പോൾ കാര്യങ്ങൾ പറഞ്ഞു മനസ്സിലാക്കാൻ സാവകാശം കിട്ടും. സൗകര്യവും. ഇയാൾ നല്ല മനസ്സോടെ ജോലി വേണ്ടെന്ന് വെച്ചാൽ ഇനിയും തനിക്കു ആ ജോലി കിട്ടും. അത് മാത്രമല്ല ഒരുപക്ഷെ പോലീസ് അന്വേഷിച്ചു വന്നാൽ തല്ക്കാലം പേടിക്കാതെ കഴിയാം. ശ്യാമ അങ്ങനെ പലതും ആലോചിച്ചു കൊണ്ടിരിക്കുമ്പോൾ.
” എന്താണ് വലിയ ആലോചനയിൽ ആണല്ലോ..? ഇത് ശ്യാമ നേരത്തെ എന്നോട് ചോദിച്ച ചോദ്യം ആണ്. ഇപ്പോൾ അത് ഞാൻ തിരിച്ചു ചോദിക്കുന്നു. എന്താണ് വലിയ ആലോചനയിൽ ആണല്ലോ? ”
“അത് ഞാൻ വാടക വീടിനെ കുറച്ചു ആലോചിച്ചതാ… ഒരു വീടുണ്ട്.. വാടക കൃത്യമായി തരാമെങ്കിൽ ശരിയാക്കി തരാം.”
“വാടക കൃത്യമായിതന്നെ തരാം. പക്ഷെ അതിനു ഒരു മാസത്തെ സമയം തരണം. ”
“അതെന്തിനാ ഒരു മാസത്തെ സമയം.?”
“അത് ജോലിക്ക് കയറി കഴിഞ്ഞാൽ ഒരുമാസം വേണ്ടേ ശമ്പളം കിട്ടാൻ? അതിനാണ്. അതിന് മുൻപ് എന്തെങ്കിലും വഴിയുണ്ടെങ്കിൽ നോക്കാം.”
“ഈ അവസ്ഥയിൽ ജോലിക്ക് പോകാൻ പറ്റുമോ..?”
“ജോലിക്ക് പോകുന്നത് പോയിട്ട് .. നേരാം വണ്ണം ഭക്ഷണം കഴിക്കാൻ കൂടെ പറ്റില്ല. കണ്ടില്ലേ എന്റെ കൈ.? അല്ല!!! എവിടെയാ വീട്.. ഇവിടെ അടുത്താണോ?”
“അല്ല. ഇവിടുന്ന് കുറച്ചു പോകണം ”
“ആരുടെ വീടാണ്…? വലിയ വാടക ആകുമോ?”
“വാടക ഒക്കെ നോക്കിയിട്ട് പറയാം. എന്തായാലും കൂടുതൽ ഒന്നും വാങ്ങില്ല. അതോർത്ത് പേടിക്കേണ്ട.”
“ശ്യാമയുടെ വീടിന്റെ അടുത്താണോ? എങ്കിൽ ശ്യാമയെ എന്നും കാണുകയും കുറച്ചു സമയം ഇതുപോലെ സംസാരിക്കുകയും ചെയ്യാമല്ലോ. അത് ഇപ്പോൾ ഒരു ആശ്വാസമാണ് ”
ശ്യാമയ്ക്ക് അത് കേട്ടപ്പോൾ എന്തോപോലെ തോന്നിയെങ്കിലും അതൊന്നും പുറത്തു കാണിച്ചില്ല.
“വീട് . എന്റെ വീട് തന്നെയാണ്. എന്റെ വീടിന്റെ മുകളിൽ ഒരു റൂം ഉണ്ട് .. കുളുമുറിയും കക്കൂസും എല്ലാം മുകളിൽ തന്നെയുണ്ട്. ഞാൻ അമ്മയോട് കൂടെ ഒന്ന് സംസാരിച്ചു നോക്കട്ടെ..?”