“മോൻ എന്തിനാ അവിടെ വെറും നിലത്ത് ഇരുന്നത്.. മുകളിൽ കസേരയിൽ കയറി ഇരുന്നു കൂടായിരുന്നോ…?”
ആ ശബ്ദം കേട്ട ഭാഗത്തേക്ക് സുധി ഒന്ന് നോക്കി. എവിടെയോ കണ്ടു മറന്ന മുഖം പോലെ തോന്നി സുധിക്ക് ശ്യാമയുടെ അമ്മയെ കണ്ടപ്പോൾ. സുധി ഒന്ന് ചിരിച്ചു.. എന്നിട്ടു പറഞ്ഞു.
“ഇതാണ് സുഖം… അതാണ് ഇവിടെ ഇടുന്നത്.”
“എന്താ മോന്റെ പേര്..?” ശ്യാമയുടെ അമ്മ ചോദിച്ചു.
“സുധി…. സുധീഷ് ചന്ദ്രൻ.. എല്ലാവരും സുധീന്ന് വിളിക്കും ..”
അമ്മ ആ പേര് കേട്ട് ഒന്ന് ഞെട്ടി. സുധിയുടെ മുഖത്തു കുറച്ചു സമയം നോക്കി . പിന്നെ ഒന്നും മിണ്ടാതെ അകത്തേക്ക് തിരിച്ചു പോയി.
“ഇവിടെ ഇരിക്ക്. ഞാൻ മുകളിലെ റൂം വൃത്തിയാക്കിയിട്ട് വരാം. എന്നിട്ട് മുകളിലേക്ക് പോകാം.” ശ്യാമ പറഞ്ഞു.
വീടിന്റെ പുറത്ത് കൂടെ ആയിരുന്നു. മുകളിലക്കുള്ള വഴി. ആരെങ്കിലും വാടകയ്ക്ക് വന്നാൽ കൊടുക്കാൻ ആയി തന്നെ മുൻപ് പണിയിച്ചതാണ് അങ്ങനെ ഒരു റൂം. ഒരു റൂമും ഒരു ഹാളും. റൂമിനോട് ചേർന്ന് അറ്റാച്ചിട് ബാത്രൂം.
ശ്യാമ റൂം വൃത്തിയാക്കി വന്ന ശേഷം സുധിയോട് പറഞ്ഞു.
” ഇനി മുകളിലേക്ക് പോകാം. മുറി വൃത്തി ആക്കിയിട്ടുണ്ട്. ”
“വാടക എത്രയാണെന്ന് പറഞ്ഞില്ലല്ലോ?”
“വാടക കൂടുതൽ ആയാൽ വേറെ എവിടെയെങ്കിലും പോകാൻ ഉണ്ടോ…? ഉണ്ടെങ്കിൽ വാടക നോക്കേണ്ട.. ഒരു വണ്ടി വിളിച്ചു തരാം.”
ശ്യാമ അങ്ങനെ പറഞ്ഞ ഉടനെ സുധി പറഞ്ഞു.
“. ശ്യാമ എന്നെ ഒന്ന് പിടിച്ച് സഹായയിച്ചാൽ എനിക്ക് പോയി കിടക്കാമായിരുന്നു. വല്ലാത്ത ക്ഷീണം ഉണ്ട്.”
ശ്യാമ വേഗം തന്നെ സുധിയെ പിടിച്ചു. സ്റ്റെപ് കയറാൻ സുധി വിഷമിച്ചു. അതിലേറെ ശ്യാമയും. ഇങ്ങനെ ഒന്നും വരുമെന്ന് ശ്യാമ ഒരിക്കലും കരുതിയേ ഇല്ല.
മുകളിൽ റൂമിൽ സുധിയെ കൊണ്ട് പോയി കിടത്തിയ ശേഷം. സുധിയുടെ ബേഗ് അവിടെ വെച്ചു. ശ്യാമ പറഞ്ഞു.
“ഞാൻ ചായ കൊണ്ട് വരാം. അതും കുടിച്ചു കുറച്ചു സമയം ഉറങ്ങിക്കോ. ”
“ശ്യാമേ… എനിക്ക് വേറെ വഴി ഇല്ലാഞ്ഞിട്ടാണ് ശ്യാമയെ ഇങ്ങനെ ബുദ്ധിമുട്ടിക്കുന്നത്. ശ്യാമയ്ക്ക് ബുദ്ധിമുട്ട് ഉണ്ടെന്ന് എനിക്ക് അറിയാം.. ”
“സാരമില്ല. ഒന്നോ രണ്ടോ മാസം അല്ലേ.. എന്ത് ബുദ്ധിമുട്ട് ഉണ്ടെങ്കിലും ഞാൻ സഹിച്ചോളാം…”
“അപ്പോൾ അത് കഴിഞ്ഞാൽ ഞാൻ ഇവിടുന്ന് പോകണം എന്നാണോ?”
“അങ്ങനെ അല്ല. രണ്ടാഴ്ച കഴിഞ്ഞാൽ കാലിന്റെ കെട്ട് അഴിക്കില്ലേ..? അപ്പോൾ ഒറ്റയ്ക്കു നടക്കാലോ. പിന്നെ ഇവിടുന്ന് പോകണമെങ്കിൽ പോകാം..”
അതും പറഞ്ഞു ശ്യാമ താഴേക്ക് പോയി.
സുധി ഒരു കൈകൊണ്ട് തന്റെ ബേഗ് തുറന്നു നോക്കി. അതിൽ നിന്ന് തന്റെ പേഴ്സ് എടുത്തു നോക്കി. പേഴ്സിൽ കുറച്ചു രൂപ ഉണ്ടായിരുന്നു എന്നല്ലാതെ മറ്റൊന്നും ഉണ്ടായിരുന്നില്ല.
പിന്നെ ഫോൺ എടുത്തു നോക്കി. അത് ഓൺ ചെയ്യാൻ ശ്രമിച്ചു. എന്നാൽ അത് ഓൺ ആയില്ല. ചാർജ് തീർന്നതോ അതോ വീഴ്ചയിൽ കംപ്ലയിന്റ് ആയതോ? അറിയില്ല ഒന്ന് ചാർജ് ചെയ്തു നോക്കാം. പിന്നെ കുറച്ചു ഡ്രെസ്സും ഒരു ഫയലും ആണ് ആ ബേഗിൽ ഉണ്ടായിരുന്നത്. എന്നാൽ ആ ഫയൽ പെട്ടന്ന് നോക്കിയാൽ കാണാത്ത രീതിയിൽ ആണ് ബേഗിൽ സൂക്ഷിച്ചു വെച്ചിരുന്നത്.
സുധിക്ക് ഒന്ന് കുളിക്കണം എന്ന് തോന്നി. പക്ഷെ ഇവിടെ നിന്ന് ഇറങ്ങി നടക്കാൻ കഴിയാതെ എങ്ങനെ കുളിക്കാൻ പോകും. അതിനും ശ്യാമയെ വിളിക്കാൻ പറ്റുമോ..
സുധി ഒരു കൈകൊണ്ട് തന്റെ ഷർട്ടിന്റെ കുടിക്ക് അഴിക്കാൻ നോക്കികൊണ്ടിരിക്കുകയായിരുന്നു അപ്പോഴാണ് ശ്യാമ ചായയുമായി അവിടെ വന്നത്. ശ്യാമ ചായ അവിടെ വെച്ചു സുധിയുടെ ഷർട്ട് മെല്ലെ അഴിച്ചു കൊടുത്തു.
ശ്യാമയ്ക്ക് സുധിയെ നോക്കാൻ ചമ്മൽ തോന്നി. അരയ്ക്ക് മുകളിൽ തന്റെ നഗ്നത കാണിച്ചു നിൽക്കുന്ന ഒരു പുരുഷന്റെ മുന്നിൽ പത്തിരുപത്തിമൂന്ന് വയസ്സ് പ്രായം ഉള്ള താൻ എങ്ങനെ നോക്കും. അതും ഒരാളുടെ ഭാര്യ ആയിരുന്നവൾ.