പിന്നെ വാക്കിംഗ് സ്റ്റിക്കും കുത്തി നടന്ന് ബാത്റൂമിലേക്ക് പോയി. അവിടെ നിന്നും മുഖം കഴുകിയശേഷം തിരിച്ച് റൂമിലേക്ക് വന്നു.
തന്റെ ഹെൽമെറ്റ് എടുത്തു നോക്കി. അതിൽ രഹസ്യമായി പിടിപ്പിച്ചിരുന്ന ക്യാമറ അഴിച്ചെടുത്തു. ബാഗിൽ സൂക്ഷിച്ച് വച്ചു. പിന്നെ അവിടെ കയറി കിടന്നു.
താഴെ എത്തിയശേഷം ശ്യാമ അമ്മയ്ക്ക് ഭക്ഷണം കൊടുത്തു നേരെ ബാത്റൂമിലേക്ക് പോയി. അവിടെ പൈപ്പ് തുറന്നു വച്ച് പൊട്ടിക്കരഞ്ഞു. വെറും അന്യനായ ഒരാൾക്ക് ഇങ്ങനെയൊക്കെ ചെയ്തു കൊടുക്കേണ്ടി വന്നതിൽ ശ്യാമയ്ക്ക് വല്ലാത്ത വിഷമം തോന്നി. അതിനുശേഷം കുളിച്ചു വേഷം മാറി അമ്മയുടെ അടുത്തേക്ക് പോയി.
” മോളുടെ ഏത് കൂട്ടുകാരിയുടെ ഏട്ടൻ ആണ് അത്..? ” അമ്മ ചോദിച്ചു.
” അമ്മ എന്താ ഇപ്പോൾ അങ്ങനെ ചോദിക്കാൻ..? ”
” ഏയ് ഒന്നുമില്ല. വെറുതെ ചോദിച്ചെന്നേയുള്ളു. ”
“അത് എന്റെ കൂടെ കോളേജിൽ പഠിച്ച ഒരു കൂട്ടുകാരിയാ. അവളുടെ ഏട്ടന അത്?”
” ആണോ..? പക്ഷെ എവിടെയോ കണ്ട മുഖ പരിചയം തോന്നുന്നു. ”
” അമ്മ എങ്ങനെ കാണാനാ.. എത്രയോ വർഷമായി ഈ വീട്ടിൽ നിന്നും പുറത്തേക്ക് ഇറങ്ങിയിട്ട്. ആകെ പോകുന്നത് ഹോസ്പിറ്റലിൽ ആണ്. പിന്നെങ്ങനെ പരിചയമുണ്ടാകാനാ. ചിലപ്പോൾ ഹോസ്പിറ്റലിൽ നിന്നും കണ്ടിട്ടുണ്ടാകും. അല്ലാതെ എങ്ങനെ കാണാനാ.”
” ചിലപ്പോൾ അങ്ങനെയുമായിരിക്കും. എന്നാലും ആ മുഖം.. എനിക്ക് നല്ല പരിചയം തോന്നുന്നുണ്ട്. അയാൾ എപ്പോഴാ ഇവിടുന്ന് പോകുക. ”
” അത് അമ്മേ.. അയാൾ മുകളിലെ മുറി വാടകയ്ക്ക് തരുമോ എന്ന് ചോദിച്ചു. തരാം എന്ന് ഞാൻ പറഞ്ഞു പോയി. ഒരുപക്ഷേ സ്കൂളിലെ ജോലി എനിക്ക് നഷ്ടമാകും. അപ്പോൾ ഒരു വരുമാനവും ആകുമല്ലോ. അതാ ഞാൻ സമ്മതിച്ചത്. അമ്മയ്ക്ക് ഇഷ്ടമല്ലെന്നുണ്ടോ? ”
” അതെന്താ സ്കൂളിലെ ജോലി പോകാൻ..? ”
” അറിയില്ല. എനിക്ക് പകരം പുതിയ ആരെയോ എടുക്കുന്നുണ്ടെന്ന് സുന്ദരൻ സാർ പറഞ്ഞു.. ”
” എന്നാൽ നിനക്ക് ആ മുതലാളിമാരെ കണ്ട് ഒന്നു പറഞ്ഞു നോക്കിക്കൂടെ.? ”
” അത് വേണ്ടമ്മേ.. നമുക്ക് വേറെ ജോലി നോക്കാം.. പുതിയ ആൾ വരും വരെ ആ ജോലിക്ക് തന്നെ പോകാം. അപ്പോഴേക്കും വേറെ ജോലി നോക്കാം. ”
” ഈ നാട്ടിൽ വേറെ എന്ത് ജോലി കിട്ടാൻ ആണ്.. മോളെ ? ”
” അതൊക്കെ എന്തെങ്കിലും കിട്ടും.. അമ്മ മരുന്നു കഴിച്ച് കിടന്നു ഉറങ്ങിക്കോ… എനിക്ക് അടുക്കളയിൽ കുറച്ചു ജോലിയുണ്ട്. അത് വേഗം തീർത്തു ഞാൻ വരാം. ”
അതും പറഞ്ഞു ശ്യാമ അടുക്കളയിലേക്ക് പോയി. ഭക്ഷണം കഴിച്ച് പാത്രങ്ങളെല്ലാം കഴുകി വെച്ച്. അമ്മയുടെ അടുത്തേക്ക് പോയി. അന്ന് അവൾ അമ്മയുടെ അടുത്ത് കിടന്നു.
ശ്യാമ പിറ്റേന്ന് രാവിലെ എഴുന്നേറ്റ്. ചായയും കടിയും ഉണ്ടാക്കി അതും എടുത്ത് മുകളിലേക്ക് പോയി.. സുധി അപ്പോഴേക്കും എഴുന്നേറ്റ് ഫ്രഷായി കട്ടിലിൽ ചാരി ഇരിക്കുകയായിരുന്നു.
” ഗുഡ് മോർണിംഗ് ശ്യാമേ.. ഇന്നലെ എന്നോട് ദേഷ്യം തോന്നിയല്ലേ..? ശ്യാമ എനിക്കൊരു വണ്ടി വിളിച്ചു തരാമോ ഞാൻ ഇവിടുന്നു പോയി കൊള്ളാം.. ഞാൻ ശ്യാമയ്ക്കൊരു ബുദ്ധിമുട്ടാക്കുന്നില്ല. ”
” ഏയ്!! എനിക്കൊരു ബുദ്ധിമുട്ടുമില്ല. ആ സമയം ഞാൻ വേറെ എന്തൊക്കെയോ ചിന്തിച്ചു പോയി. അതാ ഞാൻ ഒന്നും മിണ്ടാതെ താഴേക്ക് പോയത്.”
” എന്താണ് ഇങ്ങനെ ചിന്തിക്കാൻ..? ഞാൻ തെറ്റായി എന്തെങ്കിലും..? ”
” ഏയ് ഒന്നുമില്ല. ഞാൻ എന്റെ ഭർത്താവിനെ കുറിച്ച് ചിന്തിച്ചതാ. അപ്പോൾ എനിക്ക് സങ്കടം വന്നു. ”
” ശ്യാമയുടെ വിവാഹം കഴിഞ്ഞതാണോ..? എന്നിട്ട് അതിനെക്കുറിച്ചൊന്നും പറഞ്ഞില്ലല്ലോ.? എന്നിട്ട് ആൾ എവിടെ? ”
” ആൾ ഇപ്പോഴില്ല. മൂന്ന് കൊല്ലം മുൻപ് പോയി.”
” എവിടെ പോയി…? ശ്യാമയെ ഉപേക്ഷിച്ചു പോയതാണോ.?”
” എന്നെ മാത്രം ഉപേക്ഷിച്ചില്ല . ഞങ്ങളെ എല്ലാവരെയും ഉപേക്ഷിച്ചു. ഈ ലോകത്ത് നിന്നേ പോയി. പനി ആയിരുന്നു…?”