“… അത് നല്ല ഐഡിയ ആണ് ആശാനേ. ഞാൻ ഒന്നുകൂടി നോക്കിയിട്ട് നല്ല സ്കൂട്ടി ഏതാണെന്നു പറയാം. അല്ല ഈ കാര്യം ദേവു ചേച്ചിക്ക് അറിയോ…”
“… ഇല്ലടാ. ഞാൻ അവളോട് ഒന്നും പറഞ്ഞിട്ടില്ല…”
“… ഹ്മ്മ്… ഹ്മ്മ്…. എടാ സർപ്രൈസ് കുട്ടാ…” കളിയാക്കികൊണ്ട് എന്റെ കവിളിൽ ഒരു തോണ്ട്.
“…അയ്യോ… സോറി ആശാനേ പെട്ടെന്നൊരു ആവേശത്തിൽ…” എന്റെ കവിളിൽ തോണ്ടിയ ശേഷമാണ് കിച്ചുവിന് ബോധം വന്നത്.
“… അവന്റെ ഒരു സർപ്രൈസ് കുട്ടൻ. പോടാ പോയി പണി ചെയ്യടാ…” കവിളിൽ തടവികൊണ്ട് ഞാൻ കിച്ചുവിനെ നോക്കി കണ്ണുരുട്ടി. അവൻ അപ്പോഴേക്കും സ്ഥലം കാലിയാക്കി.
വൈകുന്നേരം കൊണ്ട് തന്നെ കിച്ചു തന്റെ റിസെർച് പൂർത്തിയാക്കി നല്ലൊരു സ്കൂട്ടി suggest ചെയ്തു. എനിക്കും അത് ഇഷ്ട്ടപെട്ടതിനാൽ പിറ്റേന്ന് ഷോറൂമിൽ പോയി സംസാരിച്ചു അഡ്വാൻസ് കൊടുത്തു. വണ്ടി ഡെലിവെറി ആവാൻ ഒരാഴ്ച പിടിക്കും. പിന്നെ അതിന് വേണ്ടിയുള്ള കാത്തിരിപ്പ് ആയിരുന്നു.
“…നമ്മൾ ഇത് എങ്ങോട്ടാ പോവുന്നെ…” രാവിലെ താറിൽ കേറിയപ്പോ തന്നെ ദേവു ചോദ്യം തുടങ്ങി.
“…എങ്ങോട്ട് ആണെന്ന് ഒക്കെ അവിടെ എത്തുമ്പോൾ നീ മനസ്സിലാക്കിയാൽ മതി. പിന്നെ പോകുന്ന വഴിക്ക് ഒരു ലഗേജ് എടുക്കാൻ ഉണ്ട്…” ഒരു കള്ള ചിരിയോടെ ഞാൻ ഡ്രൈവ് തുടർന്നു.
“…ജോലിക്ക് പോവേണ്ട എന്നെകൊണ്ട് ലീവും എടുപ്പിച്ച് കൊച്ചിനെ സ്കൂളിലും വിടാതെ ഇത് എങ്ങോട്ട പോവുന്നത് എന്ന് ചോദിച്ചാൽ ഉത്തരം ഇല്ല…” പിറു പിറുത്തുകൊണ്ട് ദേഷ്യത്തോടെ ദേവു പുറത്തേക്ക് നോക്കി ഇരുന്നു.
ഇടക്ക് കിച്ചുവിന്റെ അടുത്ത് വണ്ടി ചവുട്ടിയതും അവൻ വണ്ടിക്ക് പിന്നലെ ഡോർ തുറന്ന് ഉള്ളിൽ കേറി.
“…കല്ലു മോളെ വാ… വാ…” വണ്ടിക്ക് പിന്നിൽ കയറി മുന്നിൽ ദേവുവിന്റെ മടിയിൽ ഇരിക്കുന്ന കല്ലുവിന്റെ നേർക്ക് കൈ നീട്ടിയതും കിച്ചു മാമ എന്നും വിളിച്ചോണ്ട് അവൾ നേരെ അവന്റെ നേർക്ക് ചാടി.
“…ആഹ് നശിപിച്ച്. ഞാൻ നിന്നോട് പറഞ്ഞിട്ടില്ലേ എന്നെ മാമ എന്ന് വിളിക്കരുത് എന്ന്. എനിക്ക് നിന്റെ അച്ഛന്റെ അത്ര പ്രായം ഇല്ലടി. ഇനി ചേട്ട എന്നെ വിളിക്കാവും കേട്ടോ…” ഇവൻ എന്ത് തേങ്ങയ പറയുന്നത് എന്ന് മനസ്സിലാവാതെ കല്ലു കിച്ചു പറയുന്നതിന് എല്ലാം തലയാട്ടി.
“…നിങ്ങളുടെ ലഗേജ് കയറിയ സ്ഥിതിക്ക് ഞാൻ അവനോട് തന്നെ ചോദിച്ചോളാം…” എന്നെ പുച്ഛത്തോടെ നോക്കിയ ശേഷം ദേവു കിച്ചുവിന്റെ നേർക്ക് തിരിഞ്ഞു.
“…കിച്ചു നമ്മൾ ഇത് എങ്ങോട്ടാ പോവുന്നെ. സത്യം പറഞ്ഞോണം…” കിച്ചുവിനെ നോക്കി പേടിപ്പിച്ചോണ്ട് ആണ് ദേവു ചോദിച്ചത്. അവൻ പേടിച്ച് സെന്റർ മിറർ വഴി എന്നെ നോക്കിയതും. പറയരുതെന്ന് ഞാൻ തലയാട്ടി ആംഗ്യം കാണിച്ചു.
“…എനിക്ക് അറിയില്ല ചേച്ചി. ആശാൻ വരാൻ പറഞ്ഞു ഞാൻ വന്നു എനിക്ക് അത്രെ അറിയൂ…” തൊണ്ടയിലെ ഉമിനീർ ഇറക്കികൊണ്ട് കിച്ചു പറഞ്ഞൊപ്പിച്ചു.
“…ആശാനും ശിഷ്യനും എല്ലാരും കണക്കാ. കല്ലു ഇനി നിനക്ക് എന്തെങ്കിലും അറിയോ…” അവളും കൈ മലർത്തിയതും പിണക്കം നടിച്ച് കൈയ്യും കെട്ടി വിൻഡോ വഴി പുറത്തേക്ക് നോക്കി ഇരുന്നു. ദേവുവിന്റെ പരിഭവം കണ്ട് പുറത്തേക്ക് വന്ന ചിരി ഞാൻ ചുണ്ടിനുള്ളിൽ ഒതുക്കി.
“…ഇവിടെ എന്തിനാ വന്നേ…” ഷോറൂമിന് മുന്നിലായി വണ്ടി നിന്നതും ദേവു എന്നോട് ചോദിച്ചു.
“…വാ ഇറങ്ങ് പറയാം…” ഞാൻ താറിൽ നിന്നും ഇറങ്ങിയതും കിച്ചുവും ദേവുവും ഇറങ്ങി.
ഞങ്ങളെ കണ്ടതും മാനേജർ പുറത്തേക്ക് വന്ന് എനിക്ക് ഹാൻഡ് ഷേക് തന്ന് ഞങ്ങളെ ഉള്ളിലേക്ക് ക്ഷണിച്ചു. ഉള്ളിൽ ഒരു ടേബിളിന് മുന്നിൽ ഞങ്ങളെ ഇരുത്തി മാനേജർ കുറച്ചു ഡോക്യുമെന്റ്സ് കൊണ്ട് വന്നു. എന്നിട്ട് അതിലുള്ള കാര്യങ്ങൾ വിവരിക്കാൻ തുടങ്ങി. ഞാൻ അതെല്ലാം മൂളിക്കേട്ട് പുള്ളി പറഞ്ഞ ഇടതെല്ലാം ഒപ്പിട്ടു. ശേഷം കിച്ചുവിനെ കണ്ണ് കാണിച്ചതും അവന്റെ കൈയിൽ ഉണ്ടായിരുന്ന ചെറിയ ബാഗിൽ നിന്നും പണം എടുത്ത് ടേബിളിൽ വച്ചു. തനിക്ക് ചുറ്റും എന്താ നടക്കുന്നത് എന്ന് അറിയാതെ ദേവു എല്ലാരേയും മിഴിച്ചു നോക്കുവാ.