“…അച്ഛാ ഈ അമ്മക്ക് ഒന്നും അറിയില്ല അല്ലെ…” കുഞ്ഞി പല്ലുകൾ കാട്ടി കല്ലു ചിരിക്കാൻ തുടങ്ങി.
“…ദേ കല്ലു മിണ്ടാതിരുന്ന് കഴിച്ചില്ലെങ്കിൽ നീ എന്റേന്ന് വാങ്ങും കേട്ടോ 😡…” ദേവു കല്ലുവിനോട് തട്ടിക്കേറി.
“… ഹാ നിനക്ക് ഡ്രൈവിംഗ് അറിയാത്തതിന് നീ എന്തിനാ മോളോട് ചൂടാവുന്നെ…” ഞാൻ പിന്നെയും കളിയാക്കാണെന്ന് മനസ്സിലായതും ദേവു കഴിപ്പ് മതിയാക്കി പാത്രവും എടുത്ത് അടുക്കളയിലേക്ക് പോയി. കല്ലുവിനെ നോക്കി ഒന്ന് കണ്ണ് ചിമ്മിയ ശേഷം ഞാനും പാത്രവുമായി അടുക്കളയിലേക്ക് പോയി.
“… നമ്മുടെ കാര്യം ആർക്കും അറിയണ്ടല്ലോ. എല്ലാർക്കും കളിയാക്കാന ഉത്സാഹം…” കലപില സൗണ്ട് ഉണ്ടാക്കി സിങ്കിലേ പാത്രങ്ങൾ കഴിക്കുന്ന ദേവു സ്വയം എന്തൊക്കെയോ പറഞ്ഞോണ്ട് ഇരുന്നു.
“…നീ ആ പാത്രങ്ങൾ ഒക്കെ നശിപ്പിക്കൊ…” ഞാൻ അത് ചോദിച്ചതും ദാഹിപ്പിക്കുന്ന നോട്ടം എന്റെ മേലേക്ക് പാഞ്ഞു. ഒരു നിമിഷം ഞാൻ ഭസ്മം ആയിപോവോ എന്ന് തോന്നി. ശേഷം വീണ്ടും അവൾ തന്റെ ജോലിയിൽ തുടർന്നു.
“… ഹാ ഞാൻ ഇങ്ങനെ തമാശക്ക് ഓരോന്ന് പറയുന്നെന്നു കരുതി നീ ഇങ്ങനെ ഡെസ്പ് ആകല്ലേ…” ദേവുവിനെ സമാധാനിപ്പിക്കാൻ നോക്കി.
“…അല്ലെങ്കിലും മറ്റുള്ളവരെ കുത്തി നോവിക്കുന്നത് ആണെല്ലോ നിങ്ങളുടെ തമാശ…” ചങ്കിൽ കത്തി കുത്തും പോലെയാണ് എന്നിൽ ആ വാക്കുകൾ വന്ന് പതിച്ചത്. പുഞ്ചിരിയോടെ നിന്ന എന്റെ മുഖം മങ്ങി.
“…സോറി ഞാൻ അങ്ങനെ ഉദ്ദേശിച്ച് പറഞ്ഞത് അല്ല…” എന്റെ പ്രതികരണം ഒന്നും കിട്ടാതെ തിരിഞ്ഞ് നോക്കുമ്പോഴാണ് ദേവു എന്റെ മുഖം ശ്രെദ്ധിച്ചത്. അപ്പോഴാണ് അവൾ പറഞ്ഞതിന്റെ പൊരുൾ അവൾക്ക് പിടികിട്ടിയത്.
“…എനിക്ക് സൈക്കിൾ ഒക്കെ ചവിട്ടാൻ അറിയാം അപ്പൊ പെട്ടെന്ന് സ്കൂട്ടി പഠിക്കാൻ പറ്റില്ലേ…” വിഷയം മാറ്റികൊണ്ട് ദേവു ചോദിച്ചു.
“…സൈക്കിൾ ബാലൻസ് ഉണ്ടെങ്കിൽ വലിയ പാട് ഇല്ല. മറ്റന്നാൾ ഞായർ നിനക്ക് ലീവ് അല്ലെ അന്ന് പഠിക്കാം…” ഞാൻ പറഞ്ഞു.
“…അച്ഛാ എന്നെയും പഠിപ്പിക്കൊ…” പെട്ടെന്ന് ആണ് അടുക്കളയിലേക്ക് കല്ലു കടന്നു വരുന്നത്.
“…പിന്നെന്താ ആദ്യം അമ്മ പഠിക്കട്ടെ. അതുകഴിഞ്ഞു മോളെ പഠിപ്പിക്കാട്ടോ…” അതിന് കല്ലു പുഞ്ചിരിച്ചോണ്ട് തലയാട്ടി.
“…ഞായറാഴ്ച വണ്ടി പഠിപ്പിക്കുന്ന ആശാന് ദക്ഷിണ തരാൻ മറക്കരുത് കേട്ടോ…” അതും പറഞ്ഞ് കല്ലുവിനെയും എടുത്തോണ്ട് ഞാൻ ഹാളിലേക്ക് നടന്നു.
ഞായറാഴ്ച രാവിലെ തന്നെ കുളിച്ച് ചുരിതാർ ഇട്ട് ദേവു ഡ്രൈവിംഗ് പഠിക്കാൻ തയ്യാറായി നിന്നു. ഞാൻ എത്തിയതും ദേവു അവളുടെ കൈയിലെ ദക്ഷിണ എനിക്ക് നേരെ നീട്ടി ഞാൻ ഇരുകൈയും നീട്ടി അത് സ്വീകരിച്ചു.
“…ഇനി അനുഗ്രഹം വാങ്ങിച്ചോളൂ…” എന്ന് പറഞ്ഞ് ഞാൻ രണ്ടടി പിന്നിലേക്ക് നിന്നു. സംഭവം എന്താന്ന് അറിയാതെ എന്നെയും വീടിന്റെ മുറ്റത്ത് ഇരിക്കുന്ന കല്ലുവിനെയും ദേവു മാറി മാറി നോക്കി.
“… എന്താ ഇങ്ങനെ നോക്കി നിക്കുന്നെ കാലിൽ വീണു അനുഗ്രഹം വാങ്ങിച്ചോളൂ…” കാരണവരെപോലെ ഗൗരവത്തിൽ ഞാൻ പറഞ്ഞു.
“… കാലിൽ വീഴാനോ അതൊന്നും പറ്റില്ല…”
“… ഇതൊക്കെ ഉള്ളതാ. ഗുരുവിന്റെ പൂർണ അനുഗ്രഹം ഉണ്ടെങ്കിൽ പെട്ടെന്ന് വണ്ടി പഠിക്കാം…”
“…എന്നുപറഞ്ഞു കാലിൽ വീഴാനൊന്നും എന്നെ കിട്ടില്ല…”
“… പെട്ടെന്ന് പഠിക്കണം എങ്കിൽ മതി. അവസാനം എന്നെ നല്ലപോലെ പഠിപ്പിച്ചില്ല എന്ന് പറഞ്ഞൊന്നും ഇങ്ങോട്ട് വരരുത്…” ഞാൻ വലിയ താല്പര്യം ഇല്ലാത്ത മട്ടിൽ പറഞ്ഞു.
കുറച്ചു നിമിഷം ചിന്തിച്ചശേഷം ദേവു എന്റെ കാലിൽ തൊട്ടു. ഞാൻ കണ്ണടച്ച് ദേവുവിന്റെ തലയിൽ കൈവച്ചു ശേഷം ഒളിക്കണ്ണിട്ടു കല്ലുവിനെ നോക്കി. അവൾ ആണെങ്കിൽ വായും പൊത്തി ചിരിക്കുന്നുണ്ട്. ഞാൻ കല്ലുവിനെ നോക്കി കണ്ണടച്ച് കാണിച്ചു.