” എന്നാ കൈയ്യും കുത്തി നടന്നോ…. ”
എൻ്റെ ചൊറിയലിന് പക്ഷെ അതേ നാണയത്തിൽ മറുപടി കിട്ടി… അതോടെ ഞാൻ സൈലൻ്റായി…. എനിയും എന്തിനാ ചോദിച്ചു വാങ്ങുന്നേ…
പിന്നെ മുന്നോട്ടേക്ക് ഞങ്ങൾ രണ്ടും ഒന്നും മിണ്ടിയില്ല… കുറച്ച് കഴിഞ്ഞ് ബസ്
സ്റ്റാൻഡ് പരിസരത്തെത്തിയതും ഞാൻ അവളോട് വണ്ടി നിർത്താൻ പറഞ്ഞു…
” എന്താടോ… ”
വണ്ടി ഒതുക്കി കൊണ്ടവള് ചോദിച്ചു… അതോടെ ഞാൻ വണ്ടീന്നെറങ്ങി പെട്ടെന്ന് ചാവി വലിച്ചെടുത്തു…
” വാ ഒരു ടിക്കറ്റിൻ്റെ ബാക്കി പൈസ വാങ്ങാനുണ്ട്… ”
ഞാൻ ചാവി കൈയ്യിലിട്ട് കറക്കി തിരിച്ചുകൊണ്ടവളെ നോക്കി പറഞ്ഞു…എന്നിട്ട് തിരിഞ്ഞു നടന്നു…
” ഡോ വണ്ടീടെ ചാവി താ… താൻ എങ്ങോട്ടാ ഈ പോകുന്നെ… ”
വണ്ടി സ്റ്റാൻ്റിലിട്ട് അവളെന്റെ പുറകെ നടന്നുകൊണ്ട് ചോദിച്ചു…പക്ഷെ ഞാൻ മൈൻ്റ് ചെയ്യാൻ പോയില്ല…പിന്നെ മുന്നോട്ട് നടന്നതും നമ്മുടെ പിള്ളാരൊക്കെ പറഞ്ഞ ബസ്സിന്റെ അടുത്ത് കൂടി നിന്നത് കണ്ടു….അത് കണ്ടതും ദിവ്യ സ്വിച്ചിട്ടത് പോലെ നിന്നു…മുഖത്ത് എന്തൊക്കെയോ ഭാവങ്ങൾ…
” നിന്ന് നവരസം കാണിക്കാതെ വാടീ… ”
അവളുടെ മുഖം കണ്ട് ഞാൻ ശബ്ദം ഉയർത്തി പറഞ്ഞു… എന്നിട്ട് അവന്മാരുടെ അടുത്തേക്ക് നടന്നു…അതോടെ പെണ്ണ് നൂല് പൊട്ടിയ പട്ടം കണക്കെ എൻ്റെ പിന്നാലെ പോന്നു…
” ആ മോനെ എത്തിയോ… ഇതാണ് ആള്…. പാവങ്ങളുടെ പോൾ വോക്കർ…. ”
നന്ദു അടുത്തുള്ള ഡ്രൈവറ് ചെക്കനെ പിടിച്ച് മുന്നോട്ട് തള്ളി കൊണ്ട് പറഞ്ഞു… പ്രായം അത്ര ഒന്നുമില്ല എന്ന് തോന്നുന്നു…
” ആ മോനെ നമസ്കാരം…ഞാൻ അർജ്ജുൻ… സ്നേഹം ഉള്ളവര് അജ്ജൂന്ന് വിളിക്കും… വീട്ടിലും നാട്ടിലും ഒക്കെ അത്യാവശ്യം നല്ല മോശമല്ലാത്ത ചീത്തപേരാണ്… പരിചയപ്പെട്ടതിൽ സന്തോഷം… പിന്നെയീ കൂടിക്കാഴ്ച നടത്തിയത് ഈ കൊച്ചുമായി ബന്ധപ്പെട്ട ഒരു പ്രശ്നത്തിലാണ്… ഇന്നലെ മോൻ കാണിച്ച എല്ലാ തെണ്ടിതരവും ഇവള് പറഞ്ഞു അതൊന്ന് ചോദിക്കാൻ വന്നതാ… ”
ഞാൻ അവനെ നോക്കി കളിയാക്കുന്ന രീതിയിൽ പറഞ്ഞു… പിന്നെ
പുറകിൽ നിന്ന ദിവ്യയെ പിടിച്ച് മുന്നിലേക്കിട്ടു…അത് അവളിൽ ഒരു ഞെട്ടലുണ്ടാക്കി എന്നത് എന്നെ അവള് നോക്കിയ നോട്ടത്തിൽ മനസ്സിലാക്കി…
” നിങ്ങളെന്താ കളിക്കുവാണോ…ഇന്നലെ ഈ പെണ്ണ് സ്പീഡിൽ മാനത്ത് നോക്കി വണ്ടി ഓടിച്ച് വന്ന് ബസ്സിനുള്ളിൽ കേറാൻ നോക്കിയതിന് ഞാനെന്തോ പെഴച്ചു… മര്യാദയ്ക്ക് എല്ലാം പോയിക്കോണം അല്ലേൽ വിവരം. അറിയും… ”
എൻ്റെ സംസാരം കേട്ടതും അവൻ ഭീഷണി സ്വരത്തിൽ ചീറി…
” ആഹാ…വിവരം അറിയിക്കാൻ നീയാരാടാ വിവരാവകാശ കമ്മീഷനാ… ”
അവൻ്റെ ചീറല് കേട്ട് നന്ദു കോളറിൽ കേറി പിടിച്ചുകൊണ്ട് പറഞ്ഞു…
” ഡാ നന്ദു വേണ്ട വിട്ടേടാ… വിട്… ”
ഞാൻ ബലമായി അവൻ്റെ കൈ പിടിച്ചു മാറ്റി… പിന്നെ തൊട്ടടുത്ത നിമിഷം ആ ഡ്രൈവറ് ചെക്കൻ്റെ കരണം നോക്കി ഒന്ന് കൊടുത്തു…അത് കണ്ട് ബസ്സിലുണ്ടായിരുന്ന യാത്രക്കാരായ കോളേജ് പിള്ളേരും മറ്റ് യാത്രക്കാരും പിന്നെ നമ്മുടെ ദിവ്യയും ഞെട്ടിപ്പോയി…
” ഇത് എന്തിനാണ് തന്നേന്ന് നിനക്ക് മനസ്സിലായോ… ”
ഞാൻ അടികൊണ്ട് കിറുങ്ങിയ അവനെ നോക്കി ചോദിച്ചു… അതിനവൻ ഇല്ലെന്ന് തലയാട്ടി…
” ഇപ്പൊ വരുമ്പൊ വരെ സ്കൂൾ പിള്ളേര് സൈക്കിളും കൊണ്ട് ഓവർട്ടേക്ക് ചെയ്യ്തു പോയ ഇവളെ കൊണ്ട് നീ സ്പീഡിൽ പോയെന്ന് എൻ്റെ മുഖത്ത് നോക്കി കള്ളം പറഞ്ഞതിന്… ”
ഞാൻ അവനെ നോക്കി ചിരിച്ചുകൊണ്ട് പറഞ്ഞു… എന്നിട്ട് ഞാൻ ദിവ്യയുടെ നേരേയ്ക്ക് തിരിഞ്ഞു
” അപ്പൊ ആചാര വെടി പൊട്ടിച്ച സ്ഥിതിക്ക് ഇന്നലെ ഇവൻ ചൊല്ലിയ സംസ്കൃത പദ്യങ്ങൾക്കുള്ള സമ്മാനദാനം അങ്ങ് കൊടുത്തേക്ക് മോളെ… ”
ഞാൻ അവളെ നോക്കി ചിരിച്ചു കൊണ്ട് പറഞ്ഞു…
” ഏഹ് … ”
എന്റെ പ്രവർത്തി കണ്ട് തരിച്ച് നിന്ന ദിവ്യ ചോദ്യം മനസ്സിലാക്കാതെ എന്നെ നോക്കി പുരികമുയർത്തി ചോദിച്ചു…
” അവൻ്റെ കരണം നോക്കി പൊട്ടികടി… ”
ഞാൻ ഇത്തവണ കാര്യം വ്യക്തമാക്കി തന്നെ പറഞ്ഞു…പക്ഷെ പറഞ്ഞത് ഇത്തിരി ശബ്ദത്തോടെ ആയിരുന്നു… അതിൻ്റെ ഞെട്ടലിൽ തൊട്ടടുത്ത നിമിഷം അവൻ്റെ കരണത്ത് അവളുടെ കയ്യിൽ നിന്നൊരു പടക്കം പൊട്ടി… ( എവരി ആക്ഷൻ ദേർ ഈസ് എ ഇക്വവൽ ആൻ്റ് ഓപ്പസിറ്റ് റിയാക്ഷൻ എന്നാണല്ലോ നമ്മുടെ ന്യൂട്ടൻ അണ്ണൻ പറഞ്ഞത്… ) അതന്നെ ഇപ്പൊ നടന്നത്…