നന്ദു വാക്കുകളാൽ എൻ്റെ ശൗര്യത്തെ ഇഞ്ചിഞ്ചായി കീറി മുറിച്ചു…
” അയ്യോ ഒന്നും പറയല്ലേ തെറ്റെൻ്റെ ഭാഗത്താ….എന്നെ കുറച്ച് നാളിയിട്ട് ഒരുത്തൻ ശല്ല്യം ചെയ്യുന്നുണ്ടായിരുന്നു…അപ്പൊ അവൻ്റെ കൈയ്യീന്ന് രക്ഷപെടാൻ ഞാൻ അറിയാതെ പറഞ്ഞതാ.. ”
നന്ദുവിൻ്റെ വാക്കുകൾ കേട്ടവൾ അവനേയും എന്നേയും മാറി മാറി നോക്കി പറഞ്ഞു…അതോടെ നന്ദു എന്നെ കലിപ്പായി ഒന്ന് നോക്കി…
” വെറുതെ തൻ്റെ പേരും കോളേജും പറഞ്ഞെന്നേ ഉള്ളൂ…അത് കേട്ട് അവൻ വിശ്വസിച്ച് പോകും എന്നാ കരുതിയെ…പക്ഷെ നമ്പറൊക്കെ തപ്പി പിടിച്ച് വിളിക്കൂന്ന് ഞാൻ കരുതിയില്ല…ഒക്കെ ഈ പൊട്ട ബുദ്ധിയിൽ തോന്നിപോയതാ….സോറി….ഒരായിരം വട്ടം സോറി….ഇനി എൻ്റെ ഭാഗത്ത് നിന്ന് ഒരു ശല്ല്യവും ഉണ്ടാവില്ല… ”
ഇടറിയ ശബ്ദത്തോടെ ഒരേങ്ങലടിയുടെ അകമ്പടിയിൽ അവളതും പറഞ്ഞ് തിരിഞ്ഞോടി….അത് കണ്ടപ്പൊ ഞാനും നന്ദുവും വല്ലാതായി…എന്തോ അരുതാത്തത് ചെയ്യ്ത പോലെ എൻ്റെ ഉള്ള് കിടന്ന് പിടഞ്ഞു….
” ഡാ കണ്ടോ…ഞാൻ അപ്പോളെ പറഞ്ഞില്ലേ…പാവം ശാപം കിട്ടുവെടാ നാറി….എന്തിനാ നീ അതിനെ…. ”
അവളുടെ പോക്ക് കണ്ട് നന്ദു എന്നെ നോക്കി സങ്കടത്തോടെ പറഞ്ഞു…
” ഡാ ഞാൻ പെട്ടന്ന് അങ്ങനൊക്കെ കേട്ടപ്പോൾ…ദേഷ്യം കണ്ട്രോൾ ചെയ്യാൻ പറ്റിയില്ലടാ എനിക്ക്… ”
ഞാൻ അവനെ നോക്കി നിസ്സഹായതയോടെ അതിലേറെ കുറ്റബോധത്തോടെ പറഞ്ഞു…
” ദേഷ്യം എന്നെ കൊണ്ടൊന്നും പറയിപ്പിക്കണ്ട…ഞാൻ അപ്പോഴേ പറഞ്ഞതല്ലേ സംഭവം ഇങ്ങനെ വല്ലതും ആയിരിക്കുമെന്ന്… പിന്നെ നീ വേറെ ഒരു കാര്യം കൂടി ചിന്തിക്കണം ഇതുപോലെ തന്നെയാ നീ കോളേജിൽ വച്ച് ആതിരയോട് ഇപ്പൊ പോയവളുടെ പേര് പറഞ്ഞതും…അത് ചെയ്യ്ത നിനക്ക് എന്ത് യോഗ്യത ഉണ്ട് ഇങ്ങനെ കാട്ടിക്കൂട്ടാൻ…ആ ബോധമെങ്കിലും നിനക്ക് വേണ്ടേ…. ”
നന്ദു എന്നെ നോക്കി കടുപ്പത്തിൽ പറഞ്ഞു…പക്ഷെ ആ വാക്കുകൾ എൻ്റെ ഹൃദയത്തെ കീറിമുറിക്കാൻ തക്ക മൂർച്ച ഉള്ളതായിരുന്നു….അവൻ പറഞ്ഞത് ശരിയാണ് അവള് ചെയ്യ്ത പോലെ ഒരുപക്ഷെ അത് തന്നെ താനും ചെയ്യ്തതാണ് ഒരുപക്ഷെ അവളെക്കാൾ മുന്നേ….എന്നിട്ടും ഞാൻ… കുറ്റബോധത്താൽ എൻ്റെ ഉള്ള് നീറി പൊകഞ്ഞു…
” ഡാ എനിക്കവളോട് മാപ്പ് പറയണം…. ”
ഞാൻ ഇടറിയ ശബ്ദത്തോടെ നന്ദുവെ നോക്കി പറഞ്ഞു…
” മ്മ് വാ…. ”
എൻ്റെ മുഖഭാവം കണ്ടതുകൊണ്ടാവണം അവനെൻ്റെ കൈപിടിച്ച് ഹോസ്പിറ്റലിൻ്റെ അകത്തേക്കു നടന്നു…പക്ഷെ അവളെ എങ്ങും കണ്ടില്ലാർന്നു….
” ഡാ അവള് വല്ല ഡ്യൂട്ടിയിലും ആയിരിക്കും… തൽക്കാലം നമ്മുക്ക് റൂമിൽ പോവാം… കുറച്ചു കഴിഞ്ഞാ അവള് കൺസൾട്ടൻസിയിൽ വരും. അപ്പൊ പറയാം…പിന്നെ പിള്ളേരോടൊന്നും ഇപ്പൊ കേറിയപാടെ പറയാൻ നിൽക്കണ്ട… ”
കുറച്ചു നേരത്തെ തിരച്ചിലിന് ഫലമില്ലാതായപ്പൊ നന്ദു എന്നെ നോക്കി പറഞ്ഞു…അതിന് ഞാൻ തലകുലുക്കി.. പിന്നെ നേരെ റൂമിലേക്ക് വിട്ടു…
” എന്താടാ രണ്ടും വൈകിയത്.. വല്ല ബാറിലും കയറിയുള്ള വരവാണോ… ”
റൂമിലേക്കെത്തിയതും ഞങ്ങളെ നോക്കി ശ്രീ ചോദിച്ചു… അതിന് നന്ദു ഒരു പുഞ്ചിരി സമ്മാനിച്ചു…ഞാൻ പുഞ്ചിരിക്കാൻ ശ്രമിച്ചെങ്കിലും എനിക്കതിന് കഴിഞ്ഞില്ല…കാരണം മനസ്സ് മുഴുവനും ഒരു കാർമേഘത്താൽ മൂടപ്പെട്ടത് പോലെയായിരുന്നു…
” എന്താടാ നിനക്ക് പറ്റിയെ… ”
എൻ്റെ ഭാവത്തിൽ തളംകെട്ടിയ മൂകത കണ്ട് അഭി ചോദിച്ചു…പക്ഷെ അതിന് ഞാൻ ഒന്നും മിണ്ടിയില്ല… അപ്പോഴേക്കും അതുവിന് ഒരു കോള് വന്നു…അവൻ അത് എടുത്ത് ചെവിടോടടുപ്പിച്ചു…
” എന്താടി പറ…. ”
” ആ ഉണ്ട് കൊടുക്കാം… ”
ആരാണെന്നോ എന്താണെന്നോ അറിയില്ല… അതുവിൻ്റെ ഫോണിൽ കൂടെയുള്ള സംസാരം മാത്രം കേൾക്കാം…
” ഡാ നിനക്കാ…ശ്രദ്ധയാ…. ”
എൻ്റെ നേരെ ഫോണ് നീട്ടിക്കൊണ്ട് അതു പറഞ്ഞു… അതോടെ ഞാൻ ഒന്ന് ഞെട്ടി…. ഓരായിരം ചോദ്യങ്ങൾ മനസ്സിലാലോജിച്ച് ഫോണ് വാങ്ങി ചെവിടോടടുപ്പിച്ചു…ഇനി തല്ലിയ വിവരം അറിഞ്ഞ് വിളിക്കുന്നതായിരിക്കുവോ… ??
” ഹലോ അർജ്ജുനാ എന്താ…. ”
ഞാൻ കാര്യം എന്താണെന്നറിയാൻ വേണ്ടി ചോദിച്ചു…
” എടോ ഞാനാ ശ്രദ്ധ…താൻ എനിക്കൊരു ഹെൽപ്പ് ചെയ്യോ…ഞാൻ ഇന്ന് ലീവാ…ദിവ്യ വരുന്ന വഴി ഏതോ ബസ്സുകാരുമായി എന്തോ ഇഷ്യു ഉണ്ടായി ആകെ കരച്ചിലും പിടിച്ചലുമായിരുന്നു…ഇപ്പൊ വിളിച്ചിട്ട് ഫോണെടുക്കുന്നില്ല…താൻ ഒന്ന് പോയി കാര്യം അന്വേഷിച്ച് അവളോട് ഒന്ന് സമാധാനായിട്ടിരിക്കാൻ പറയുവോ…തനിക്കല്ലേ കൊറച്ചേലും അവളെ ആ കൂട്ടത്തിൽ അറിയുന്നത്… ”
ശ്രദ്ധ ഒറ്റ ശ്വാസത്തിൽ ഫോണിലൂടെ ഗൗരവപൂർവം പറഞ്ഞപ്പോൾ ഞാനാകെ തരിച്ചുപോയി…
” അത് പിന്നെ ഞാൻ… “
മറുപടി എന്ത് പറയും എന്നറിയാതെ ഞാൻ വിക്കി…
” അയ്യോ ബുദ്ധിമുട്ടാണേൽ വേണ്ട…പെണ്ണ് ഇമോഷണൽ അയാൽ വലിയ സീനാ അതോണ്ട് പറഞ്ഞതാ…എന്നാ താൻ അവള് കൺസൾട്ടൻസിയിൽ ഉണ്ടേൽ ഒന്നെന്നെ വിളിക്കാൻ പറയുവോ… ”
എൻ്റെ മുറിച്ചു മുറിച്ചുള്ള മറുപടി കേട്ട് ശ്രദ്ധ പറഞ്ഞു…
” പ്രശ്നമൊന്നുമില്ല ഞാൻ സംസാരിക്കാം… ”
ഞാൻ അത്രയും മാത്രം പറഞ്ഞ് ഫോൺ അതുവിന് കൊടുത്ത് പുറത്തേക്ക് നടന്നു…പക്ഷെ എങ്ങും അവളെ കണ്ട് കിട്ടിയില്ല…അതോടെ അവസാന പ്രതീക്ഷ എന്നോണം ഞാൻ നേഴ്സിംഗ് റൂമിൻ്റെ അടുത്തേക്ക് പോയി…അവിടെ എത്തിയതും ഞാൻ ഫോണെടുത്ത് അവളുടെ നമ്പറിലേക്ക് വിളിച്ചു… റിംഗ് അടിയുന്ന ശബ്ദം ഞാൻ പുറത്ത് നിന്ന് കേട്ടു…
” ഹലോ ഞാൻ നേഴ്സിംഗ് റൂമിൻ്റെ പുറത്തുണ്ട്…ഒന്ന് പുറത്ത് വാ…… ”
ഫോണവളെടുത്തതും അത്രയും മാത്രം പറഞ്ഞ് ഞാൻ കട്ടാക്കി…അടുത്ത നിമിഷം തന്നെ കരഞ്ഞ് കലങ്ങിയ കണ്ണ് തുടച്ച് അവള് എൻ്റെ അടുത്തേക്ക് വരുന്നത് കണ്ടു…ആ കണ്ണീരിനാൽ പടർന്ന കണ്മഷിയും ചുവന്ന് തുടുത്ത കവിളും കണ്ടെൻ്റെ ഉള്ളിൽ ചെറുതായി ഒരു നീറ്റലനുഭവപ്പെട്ടു…
” പ്ലീസ് എനി എന്നെ തലല്ലേ…വേദനിച്ചിട്ടാ…. അറിയാതെ പറ്റിപ്പോയി… ”
എൻ്റെ അടുത്തെത്തിയതും എന്തേലും പറയാൻ തുടങ്ങും മുന്നേ സങ്കടപൂർവ്വം അവള് പറഞ്ഞു…
” ഡോ….അറിയാതെ പറ്റിപോയതാ…അപ്പോഴത്തെ ദേഷ്യത്തിൽ എത്ര വലിയ തെറ്റാ ഞാൻ ചെയ്യ്തേന്ന് എനിക്ക് മനസ്സിലാക്കാൻ എൻ്റെ കൂട്ടുകാരൻ്റെ സഹായം വേണ്ടി വന്നു….അല്ലേലും ദേഷ്യം കണ്ട്രോൾ ചെയ്യാൻ എനിക്ക് ഒരിക്കലും പറ്റാറില്ലായിരുന്നു…തന്നോടും ഞാൻ പലപ്പോഴായി അത് കാണിച്ചിട്ടുണ്ട്…പക്ഷെ ഇന്ന് ഞാൻ ചെയ്യ്തത് കേവലം ഒരു മാപ്പിൽ ഒതുങ്ങില്ല…പക്ഷെ പറായാതെ നിന്നാ ചെലപ്പൊ ചങ്കിൻ്റെ ഉള്ളിലെ നീറ്റല് കാരണം എനിക്ക് ഒന്ന് കണ്ണടയ്ക്കാൻ പോലും പറ്റില്ല… ”
ഞാൻ ഇടറിയ ശബ്ദത്തിൽ അവളെ നോക്കി പറഞ്ഞു…
” അയ്യോ അതൊന്നും… ”
” വേണ്ട താൻ ഒന്നും പറയണ്ട…ഞാൻ തെറ്റ് ചെയ്യ്തെന്ന പൂർണബോധ്യം ഇപ്പോളെനിക്കുണ്ട്…സോറി…അറിയാതെ ആണേലും തൻ്റെ ദേഹത്ത് കൈവച്ച് പോയി… വാക്കുകൾ കൊണ്ട് വേദനിപ്പിച്ചു പോയി… ക്ഷമിക്കണം…താൻ വേണേൽ ഇപ്പൊ ഇവിടെ വച്ചെന്നെ തിരിച്ച് തല്ലണെമെങ്കിൽ തല്ലിക്കോ… ”
