ഒരു ഇരുനില വീടിന്റെ മുന്നിൽ കാർ നിർത്തിയപ്പോൾ ആണ് സ്ഥലമെത്തിയെന്ന് മനസിലായത്. ഡോർ തുറന്നു ഞങ്ങൾ ഇറങ്ങി.. ഞാൻ ബാഗുകൾ എടുത്തു പുറത്തേക്കു വച്ചപ്പോഴേക്കും മിയ ഡ്രൈവർക്കു ഗൂഗിൾ പേ ചെയ്തു. അകത്തു നിന്നും മാക്സിയുടുത്ത ഒരു സ്ത്രീ ഞങ്ങളെ നോക്കി പുറത്തേക്കു വന്നു. ഒറ്റ നോട്ടത്തിൽ മിയയുടെ അമ്മയാണെന്ന് മനസിലായി. Taxi പുറത്തേക്കു പോയി. ഞങ്ങളെ അമ്മ ചിരിച്ചു കൊണ്ടുതന്നെ വരവേറ്റു.. മിയ അമ്മയെ കെട്ടിപിടിച്ചു. അകത്തേക്ക് കയറിയ ഞാൻ വീടിനകം നോക്കി. നല്ല ഭംഗി ആയി വച്ചിരിക്കുന്നു എല്ലാം.. നല്ല ശാന്തമായ അന്തരീക്ഷം. ഞാനും ആവണിയും അവിടെ കണ്ട സോഫയിൽ ഇരുന്നു. മിയ അമ്മയുടെ കൂടെ അകത്തേക്ക് പോയി. ആവണി എന്റെ കയ്യിൽ പിടിച്ചു.
“”ഒരു പക്ഷെ നീ അങ്ങനെ പോയിരുന്നെങ്കിൽ എനിക്ക് സഹിക്കാൻ കഴിയില്ലായിരുന്നു “”
“”കുറച്ചു ദിവസത്തെ കാര്യമല്ലേയുള്ളു പെണ്ണെ. അതിനിങ്ങനെ ടെൻഷൻ അടിക്കുന്നതെന്തിനാ “”
“”എനിക്കറിയില്ല.. നിന്നെ പിരിഞ്ഞിരിക്കാൻ എനിക്ക് കഴിയില്ല ഒരു നിമിഷം പോലും “”
“”എന്താ പെട്ടെന്ന് എന്നെ കൊണ്ടുവരാൻ തീരുമാനിച്ചത് “”
“”അത് മിയയുടെ പ്ലാൻ ആണ്. ഞാൻ അങ്ങോട്ട്‌ നിന്റെ കാര്യം പറയാൻ നിന്നപ്പോഴേക്കും അവൾ തന്നെ എന്നോട് പറഞ്ഞു. സത്യത്തിൽ ഞാൻ അത്ഭുതപെട്ടുപോയി””
ഞാൻ ഒന്നും പറഞ്ഞില്ല. ചിരിച്ചുകൊണ്ട് അവളുടെ കൈ വിടുവിച്ചു.
“”ഇവിടുന്നു ഇങ്ങനെയൊന്നും വേണ്ട “” അവൾക്ക് ഞാൻ പറഞ്ഞത് മനസിലായി. കുറച്ചു കഴിഞ്ഞു മിയയും അമ്മയും വെള്ളം കൊണ്ടു വന്നു തന്നു..
ആവണിയെ മിയ നല്ലോണം അമ്മയ്ക്ക് ഫോണിലൂടെ തന്നെ പരിചയപെടുത്തിയിരുന്നു.. പിന്നെ ഞാൻ ഓഫീസിലെ അവരുടെ ബെസ്റ്റി ആണെന്നും നാളെ എല്ലാവരും എന്റെ വീട്ടിൽ പോകുമെന്നൊക്കെ പറഞ്ഞു. ഒരുമിച്ചു താമസിക്കുന്ന കാര്യം വീട്ടിൽ പറയാൻ പറ്റില്ലല്ലോ..
ആവണിയുടെ കാര്യങ്ങൾ അറിയാവുന്ന അമ്മ അവളെ നല്ലോണം പരിപാലിക്കുന്നത് കണ്ട ഞാൻ ഒരുപാട് സന്തോഷിച്ചു. മുകളിൽ രണ്ടു റൂമികളിലായി ഞങ്ങൾ കിടക്കാൻ പ്ലാൻ ചെയ്തു. റൂമിൽ പോയി ഫ്രഷ് ആയി വന്ന ഞങ്ങൾ അമ്മയോടൊത് ഒരുപാട് സംസാരിച്ചു. മിയ അവളുടെ കുട്ടികാലത്തെ കുറെ ആൽബങ്ങൾ കാണിച്ചു തന്നു. പിന്നെ എല്ലാവരും ഒരുമിച്ചു ഭക്ഷണം ഉണ്ടാക്കി കഴിച്ചു. ആ സമയം മിയയുടെ അച്ഛൻ കയറി വന്നു. ആളൊരു ബാങ്ക് ജീവനക്കാരനാണ്. അദ്ദേഹം വളരെ നല്ല രീതിയിൽ തന്നെ എന്നോട് സംസാരിച്ചു. രാത്രി ഞങ്ങൾ കുറെ നേരം ഇരുന്നു സംസാരിക്കുകയും ചെയ്തു. അടുത്ത ദിവസം രാത്രി 2 മണിക്ക് എന്റെ വീട്ടിലേക്കു പുറപ്പെട്ടു. പോരുമ്പോൾ അമ്മ ആവണിയെ കുറെ നേരം കെട്ടിപിടിച്ചു ഉമ്മ നൽകുന്നുണ്ടായിരുന്നു.
ദീർഘ ദൂരയാത്ര കഴിഞ്ഞു രാവിലെ 8 മണിക്ക് എന്റെ വീട്ടിൽ എത്തി. എന്റെ വീട് കണ്ടതും രണ്ടു പേരുടെയും തലകറങ്ങി.. വീടും പരിസരവും അത്ഭുദത്തോടെ നിരീക്ഷിച്ചു കൊണ്ടിരുന്ന അവരെ വിളിച്ചു ഞാൻ വീടിനകത്തേക്ക് കയറി. അമ്മച്ചി വന്നു ഞങ്ങളോട് ഇരിക്കാൻ പറഞ്ഞു. ഇവർ കൂടെ വരുന്നത് ഞാൻ പറഞ്ഞിട്ടില്ലായിരുന്നു. അത് അമ്മച്ചിയുടെ മുഖത്തു കാണാം. എന്നാലും രണ്ടുപേരെയും അമ്മച്ചിക്ക് നല്ലോണം അറിയാമായിരുന്നു. അവർ മൂന്നുപേരും കൂടി ഒരു ഭാഗത്തു ഇരുന്നു സംസാരിക്കാൻ തുടങ്ങി. ഞാൻ എന്റെ ബാഗ് എടുത്തു റൂമിൽ പോകാൻ തുടങ്ങി.
“”നീയെന്താ ഒറ്റയ്ക്ക് പോകുന്നെ.. ഇവരെയും കൊണ്ടുപോയി റൂം കാണിച്ചു കൊടുക്ക്‌..”” അമ്മച്ചി എന്നോടായി പറഞ്ഞു.
“”നിങ്ങൾ പോയി കുളിച്ചു വാ. ഇത്രെയും ദൂരം യാത്ര ചെയ്തതല്ലേ. “” അവരെ രണ്ടുപേരെയും നോക്കി അമ്മച്ചി പറഞ്ഞു.
അങ്ങനെ ബാഗും തൂകി രണ്ടു പേരും എന്റെ പിന്നാലെ സ്റ്റെപ് കയറി.. മുകളിൽ കയറിയ ഞാൻ അവർക്കു എന്റെ അടുത്തുള്ള റൂം കാണിച്ചുകൊടുത്തു. അവർ റൂമിലേക്ക്‌ പോയി. ഞാൻ എന്റെ റൂമിലേക്കും. കുളിച്ചു ഫ്രഷ് ആയ ഞാൻ ഡ്രസ്സ്‌ ചേഞ്ച്‌ ചെയ്തു. കുറച്ചു നേരം മൊബൈലൊക്കെ നോക്കി കിടന്നു. അപ്പോഴേക്കും അവർ വന്നു ഡോറിൽ തട്ടി. ഞാൻ വാതിൽ തുറന്നു കൊടുത്തു. രണ്ടുപേരും എന്റെ റൂം കണ്ടു അന്തംവിട്ടുനിൽക്കുന്നു..
“”ഇതൊക്കെ നീ വരച്ചതാണോ “” ചുവരിലെ പെയിന്റിംഗിൽ നോക്കി ആവണി ചോദിച്ചു..
“”അതെ.. ഇവിടെ വെറുതെ ഇരിക്കുന്ന സമയത്തു ഇങ്ങനെ ഓരോ ഭ്രാന്തുണ്ട് “”
“”സൂപ്പറാണല്ലോ മോനെ. “” മിയ എന്നെ അഭിനന്ദിച്ചു.
“”വാ എനിക്ക് വിശക്കുന്നുണ്ട് വല്ലതും കഴിക്കാം “” ഞാൻ അവരോടായി പറഞ്ഞു.
“”എനിക്കും വിശക്കുന്നുണ്ട് “” മിയ പറഞ്ഞു.
ഞാൻ രണ്ടുപേരെയും വിളിച്ചു താഴേക്കു പോയി. അപ്പോഴേക്കും അമ്മച്ചിയും പണിക്കു നിൽക്കുന്ന ചേച്ചിയും കൂടി ഭക്ഷണം ടേബിളിൽ റെഡി ആക്കി വച്ചിരുന്നു. രണ്ടുപേരെയും ഇരുത്തി അമ്മച്ചി അവരെ വയറു നിറച്ചു കഴിപ്പിച്ചു. പിന്നെ ആവണിയും മിയയും അമ്മച്ചിയും കൂടി ഇരുന്നു കുറെ നേരം സംസാരിച്ചു. ആവണിയോട് അവളുടെ കാര്യങ്ങളൊക്കെ ചോദിച്ചു മനസിലാക്കി. അമ്മച്ചിക്ക് ആവണിയോട് ഒരു വാത്സല്യം തോന്നി തുടങ്ങി. അത് ആ പെരുമാറ്റത്തിൽ നിന്നും മനസിലാവും.
പിന്നെ ഞാൻ അവരെയും വിളിച്ചു ഞങ്ങളുടെ തോട്ടത്തിലേക്കു പോയി. അവിടെ കൊക്കോ, പാഷൻ ഫ്രൂട്ട്, റംബുട്ടാൻ തുടങ്ങി നിരവധി കൃഷികൾ അവർക്കു കാണിച്ചു കൊടുത്തു.
“”എനിക്ക് മംഗോസ്റ്റിൻ ഭയങ്കര ഇഷ്ടമാ.. ഇപ്പോൾ പഴുത്തിട്ടുണ്ടാവുമോ”” ആവണി എന്നോട് ചോദിച്ചു..
“”അങ്ങനെയാണെങ്കിൽ എനിക്കും വേണം “” മിയയും പറഞ്ഞു..
ഞാൻ അവർക്കു മംഗോസ്റ്റിൻ പഴുത്തത് നോക്കി പറിച്ചു കൊടുത്തു. രണ്ടുപേരും കൊതിയോടെ കഴിക്കുന്നത്‌ ഞാൻ നോക്കി നിന്നു. പിന്നെ റംബുട്ടാൻ പക്ഷെ അത് അത്രയ്ക്ക് പഴുത്തിട്ടില്ലായിരുന്നു. കൊക്കോ പറിക്കാൻ പോയ മിയയുടെ ദേഹത്ത് കൂടി ഉറുമ്പ് ചറപറാ കടിച്ചു. അവളുടെ ആക്ഷൻ കണ്ടു ഞാനും ആവണിയും ചിരിച്ചു മടുത്തു.. ആ ചിരിയിൽ മിയയും പങ്കുചേർന്നു. അങ്ങനെ പല കാഴ്ചകളും കണ്ടു നടക്കുന്നതിനിടയിൽ നിറഞ്ഞു നിൽക്കുന്ന മാമ്പഴ മരത്തിന്റെ ഇടയിൽ ഉള്ള ഒരു കുളം അവർ കണ്ടു. രണ്ടുപേരും അങ്ങോട്ടേകോടി.. അവിടെ നിന്നും കുറെ ഫോട്ടോ എടുത്തു. കുറച്ചു കഴിഞ്ഞു അവർക്ക് അതിൽ കുളിക്കണമെന്ന് പറഞ്ഞു. ഞാൻ വീട്ടിലെ പണിക്കു നിൽക്കുന്ന ചേച്ചിയെ വിളിച്ചു കുറച്ചു ഡ്രെസ്സും മറ്റു കാര്യങ്ങളും കൊണ്ടു വരുത്തി. അവർ രണ്ടുപേരും ആഘോഷിച്ചു കുളിച്ചു. കുറെ നേരം അത് തുടർന്ന്. പിന്നെ നാണത്തോടെ നനഞ്ഞ തുണിയുമായി അവർ എന്റെ മുന്നിലേക്ക്‌ വരാൻ മടിച്ചു.. അത് മനസിലാക്കിയ ഞാൻ അവിടെ നിന്നും മാറിക്കൊടുത്തു.. അവർ ഡ്രസ്സ്‌ മാറ്റി വന്നു. അടുത്തതായി ഞങ്ങൾ മീൻ വളർത്തുന്ന കുളം കാണിച്ചു. അതിലേക്കു രണ്ടു പേരും തീറ്റയെറിഞ്ഞപ്പോൾ മീനുകൾ കൂട്ടത്തോടെ വന്നു വെള്ളം തെറിപ്പിച്ചു. അതൊക്കെ ഫോട്ടോയെടുത്തു ഗാലറി നിറച്ചു രണ്ടുപേരും..