എല്ലാം കഴിഞ്ഞു വീട്ടിലെത്തിയപ്പോൾ സമയം 6 മണി. വീട്ടിൽ ആ സമയം അപ്പച്ചൻ ഉണ്ടായിരുന്നു. എന്നെ കണ്ടതും അപ്പച്ചൻ അടുത്ത് വന്നു. വിശേഷങ്ങളൊക്കെ ചോദിച്ചു. പിന്നെ അവരോടു സംസാരിച്ചു. അന്ന് രാത്രി തന്നെ ഞങ്ങൾ അവിടെ നിന്നും പുറപ്പെട്ടു. പോരുമ്പോൾ അപ്പച്ചൻ എനിക്ക് ഒരുമ്മ തന്നത് കണ്ടു രണ്ടുപേരും അത്ഭുതപ്പെട്ടു.. പിന്നെ യാത്ര പറഞ്ഞു വീട്ടിലെ കാറിൽ ഡ്രൈവരെയും കൂട്ടി ഞങ്ങൾ എയർപോർട്ടിലേക്കു.
“”എന്തൊരു സ്നേഹമാണെടാ നിന്റെ അപ്പച്ചന് നിന്നോട് അതിനു നല്ല ഭാഗ്യം വേണം “” മിയ എന്നോട് പറഞ്ഞു..
ആ സമയം ആവണി പുറത്തേക്കു നോക്കിയിരിക്കുകയായിരുന്നു. ഞാൻ മിയയോട് ആവണിയെ കാണിച്ചു കൊണ്ട് മിണ്ടാതിരിക്കാൻ പറഞ്ഞു.
മൂന്ന് ദിവസത്തെ യാത്ര ഞങ്ങളെ നന്നേ തളർത്തിയിരുന്നു. റൂമിലെത്തി കിടന്നതു മാത്രമേ ഓർമ്മയുള്ളൂ.. ഉറങ്ങി എഴുന്നേറ്റപ്പോഴേക്കും വൈകുന്നേരമായി.. വിശപ്പ്‌ വന്നു മുട്ടാൻ തുടങ്ങിയിരിക്കുന്നു. സ്വിഗിയിൽ ഫുഡ്‌ ഓർഡർ ചെയ്തു ഞങ്ങൾ ഫ്രഷ് ആയി. അപ്പോഴാണ് ആവണിയുടെ മുഖത്തു നല്ല സങ്കടം കണ്ടത്. എന്താണെന്നു ഞാനും മിയയും ചോദിച്ചു.
“”ഈ മൂന്നു ദിവസം ഞാൻ നല്ലോണം ആസ്വദിച്ചു.. പെട്ടെന്ന് അതൊക്കെ വിട്ടു പോന്നപ്പോൾ…..”””
“”അത്രേയുള്ളൂ.. സാരമില്ല. ഞങ്ങൾ എപ്പോഴും നിന്റെ കൂടെയല്ലേ”” ഞാൻ ആവണിയെ നോക്കി പറഞ്ഞു.
മിയയും അവളെ സമാധാനിപ്പിച്ചു. അവളുടെ തലയിൽ തലോടി കൊണ്ടു മിയ അടുക്കളയിലേക്ക് പോയി. ആ സമയം നോക്കി ഞാൻ ആവണിയെ പിടിച്ചു അവളുടെ നെറ്റിയിൽ ഒരുമ്മ കൊടുത്തു.
“” നീ വിഷമിക്കുന്നത് കാണുന്നത് എനിക്കിഷ്ടമല്ല. എപ്പോഴും സന്തോഷമായിട്ടിരിക്കണം “” എന്റെ വാക്കുകൾ കേട്ടു അവൾ സമാധാനത്തോടെ ഇരുന്നു. ഞാൻ എഴുനേറ്റു അടുക്കളയിൽ പോയി നോക്കി. അവിടെ മിയ ഗ്യാസിൽ ചായയും വെച്ചുകൊണ്ട് ഒരു ഭാഗത്തു നിന്നു കരയുന്നു. ഇനി ഇവളെന്തിനാണാവോ.. ഞാൻ ആലോചിച്ചു കൊണ്ട് അങ്ങോട്ട്‌ ചെന്ന്..
“”നിനക്കിനിയെന്താ “” എന്നെ കണ്ടതും അവൾ അടുത്ത് വന്നു എന്നെ കെട്ടിപിടിച്ചു.
“”എന്താടീ “”
“”അവളുടെ കാര്യം ഒന്നാലോചിച്ചു പോയതാ.. വേറൊന്നുമില്ല.. പാവമല്ലേ അവൾ. “” മിയ എന്നിൽ നിന്നും വിട്ടുമാറി കൊണ്ടു പറഞ്ഞു.
“”അതൊക്കെ ജീവിതത്തിൽ പറഞ്ഞിട്ടുള്ളതല്ലേ. നീ വിഷമിക്കണ്ട. എല്ലാം ദൈവം കാണുന്നില്ലേ “”
ഞാൻ അവളെ സമാധാനിപ്പിച്ചു കൊണ്ടു റൂമിൽ പോയി കിടന്നു. ആവണി ഒരു ഭാഗത്തിരുന്നു മൊബൈലിൽ കളിക്കുന്നു. ഈശ്വര രണ്ടുപേർക്കും തമ്മിൽ പിരിയാൻ പറ്റില്ല. അത്രെയും നല്ല ഫ്രണ്ട്ഷിപ്പിലാണ് പോകുന്നത്. എന്റെ കാര്യം പരസ്പരം അറിഞ്ഞാൽ എന്തായാലും ആ കൂട്ടുകെട്ടിനു കോട്ടം തട്ടും. എങ്ങനെ ഇതൊന്നു പരിഹരിക്കും. ആലോചിച്ചിട്ട് എത്തും പിടിയും കിട്ടുന്നില്ല.
കുറച്ചു കഴിഞ്ഞു മിയ ചായ കൊണ്ടു വന്നു. അത് കുടിച്ചപ്പോഴേക്കും ഓർഡർ ചെയ്ത ഫുഡ്‌ വന്നു. മൂന്നാളും ആർത്തിയോടെ കഴിച്ചു..
അന്നത്തെ ദിവസം വലിയ മാറ്റങ്ങളൊന്നുമില്ലാതെ കഴിഞ്ഞു. രാവിലെ എന്നും കിട്ടുന്നത് പോലെ രണ്ടു ഉമ്മകൾ കിട്ടി. കുളിച്ചൊരുങ്ങി ഓഫീസിൽ എത്തി. എല്ലാവരേം കുറച്ചു ദിവസമായില്ലേ കണ്ടിട്ട്. അതിന്റെ വിശേഷങ്ങളും കാര്യങ്ങളും പറഞ്ഞു വർക്ക്‌ തുടങ്ങി. ആവണി തൊട്ടടുത്തിരുന്നു എന്തൊക്കെയോ പറഞ്ഞു.
“”ടാ നിന്റെ വീട്ടിലെ ആ ഒരു ദിവസണ്ടല്ലോ മറക്കില്ല. എന്തൊരു രസമായിരുന്നു “”
“”എന്നാ നീയൊരു കാര്യം ചെയ്യ്. എന്റെ കൂടെ പോര്. അപ്പോൾ നിനക്ക് എന്നും ആ രസം കിട്ടുമല്ലോ “”
“”പിന്നെ ഞാനല്ലാതെ ആരാ നിന്റെ കൂടെ വരാ.. വേറെ ആരെങ്കിലും കണ്ടുവച്ചിട്ടുണ്ടോ മോനെ “”
“”പൊന്നുമോളെ ഇല്ല “” ഉള്ളിൽ മിയയെ ആലോചിച്ചു ഞാൻ പറഞ്ഞു.
“”ഇങ്ങനെ ഓഫീസിൽ വന്നിരിക്കുമ്പോൾ ആണ് നിന്നെ ഒന്ന് ഫ്രീ ആയി കിട്ടുക “” ആവണി എന്നെ നോക്കി പറഞ്ഞു.
“” റൂമിൽ എന്താ പ്രശ്നം. എന്നും രാവിലെ ഒരുമ്മ കിട്ടുന്നുണ്ട്. ചിലപ്പോൾ സംസാരിക്കാറുമുണ്ട് “”
“”എനിക്കതു പോരെങ്കിലോ.. എപ്പോഴും നിന്നോട് സംസാരിക്കണം. മിയ ഉണ്ടെങ്കിൽ അത് പറ്റില്ലല്ലോ “”
“”ഉം. ശരിയാവും “”
“”ടാ ഞാൻ അവളോട്‌ പറയട്ടെ നമ്മുടെ റിലേഷൻ “”
അത് കേട്ടതും ഞാൻ ഞെട്ടികൊണ്ട് അവളുടെ മുഖത്തേക്ക് നോക്കി.
“”ഇപ്പോൾ ആരോടും നീ പറയണ്ട.. ഞാൻ പറഞ്ഞോളാം സമയമാകുമ്പോൾ “” കുറച്ചു ദേഷ്യത്തിൽ ഞാൻ പറഞ്ഞു..
“”അതിനെന്താ നീ ചൂടാവുന്നെ. ഞാൻ പറഞ്ഞു എന്നല്ലേയുള്ളു “”
“”ചൂടായതല്ലെടീ ഇതെന്റെ ടോൺ ആണ് “” മുഖത്തു ചിരി വരുത്തി ഞാൻ പറഞ്ഞു.
“”ഉം നിന്റെ ഇഷ്ടം “”
അപ്പോഴേക്കും പിയൂൺ വന്നു ആവണിയെ മാം വിളിക്കുന്നുണ്ടെന്നു പറഞ്ഞു. അവൾ എണീറ്റ് പോയി. ആ സമയം മിയ അടുത്ത് വന്നു.
“”നിന്നെ എപ്പോഴാടാ ഒന്ന് ഫ്രീ ആയിക്കിട്ടുക. ഒറ്റക്കൊന്നു സംസാരിക്കാൻ കൊതിയാവുന്നു “”
“”എന്തിനാ”” കളിയാക്കി ഞാൻ ചോദിച്ചു.
“”അവളുണ്ടാവുമ്പോൾ എനിക്ക് സംസാരിക്കാൻ കഴിയില്ലെടാ “”
“”എന്നാ അവളെയങ്ങു തട്ടിയാലോ “” ഞാൻ ഒരു തമാശ പറഞ്ഞു.
“”എങ്കിൽ നിന്നെയും കൊല്ലും ഞാൻ. അവളെ ഒഴിവാക്കേണ്ട. പക്ഷെ എനിക്ക് നിന്നോടിങ്ങനെ ഫ്രീ ആയിട്ട് ഇരുന്നു സംസാരിക്കണം “”
“”അതൊക്കെ നമുക്ക് സമയം കിട്ടും. ഇപ്പോൾ മോൾ ചെല്ല് ആവണി വരുന്നുണ്ട് “”
അത് കേട്ടതും മിയ പോയി. ആവണി വന്നു അടുത്തിരുന്നു.
“”മാം എന്ത് പറഞ്ഞു “”
“”അത് അന്ന് പ്രൈസ് പറഞ്ഞിരുന്നല്ലോ. അതുമായിട്ട് ബന്ധപെട്ടു സംസാരിക്കാൻ വിളിച്ചതാ “”
“”പൈസ കിട്ടിയിട്ട് എന്ത് ചെയ്യും “”
“”എന്ത് ചെയ്യാൻ നിനക്ക് തരും. “”
“”എനിക്കോ “” ഞാൻ കണ്ണ് വലുതാക്കി ചോദിച്ചു.
“”അതെ. നീയല്ലേ പണിയെടുത്തത്. അതുകൊണ്ട് ഞാനും മിയയും അത് തീരുമാനിച്ചത് ആണ് “”
“”ആണോ. എന്നാൽ അതൊന്നും വേണ്ട “”
“”അങ്ങനെ പറയണ്ട അതൊക്കെ നിന്റെ അക്കൗണ്ടിൽ വന്നിരിക്കും “”
“അതൊക്കെ ഞാൻ മിയയോട് പറഞ്ഞു ക്ലിയർ ആക്കിക്കോളാം. “”
“”എനിക്ക് പൈസയൊന്നും വേണ്ടെടാ. ഈ ചെക്കന്റെ കൂടെ ജീവിക്കാൻ ദൈവം സഹായിച്ചാൽ മതി “”
അവളുടെ ആ സംസാരത്തിൽ നിഷ്കളങ്കത നിറഞ്ഞിരുന്നു. ഒന്നും മിണ്ടാതെ ഞാൻ മൗനം പാലിച്ചിരുന്നു.
ഓഫീസ് കഴിഞ്ഞു റൂമിലെത്തി. കുറച്ചു കഴിഞ്ഞ് മിയക്കു ഒരു call വന്നു അവൾ പുറത്തു പോയി സംസാരിച്ചു. അപ്പോൾ ആവണി വന്നു എന്റെ അടുത്തിരുന്നു.