ഇങ്ങനെയൊക്കെ ഉണ്ടാവുമെന്നറിയാവുന്നതിനാല് ആലീസ് വരുന്ന വഴിയില് ആഹാരം കഴിപ്പിചിട്ടാണ് പോന്നത് .. അത് കൊണ്ടെല്ലാരും ഒരു വിധത്തില് അവനെ ആശ്വസിപ്പിച്ചു കിടന്നുറങ്ങി .
പിറ്റേന്ന് പത്തു മണിയോടെയാണ് എല്ലാവരും തന്നെ എഴുന്നേറ്റത് .. അച്ചുവിനുള്ള കാപ്പി ബീന അകത്തേക്ക് കൊണ്ട് പോകുന്നത് കണ്ടു . കാപ്പി കുടിക്കുന്നതിനിടെ ആരും മിണ്ടുന്നത് പോലുമില്ല .. എന്തോ നടക്കാന് പോകുന്നപോലെയൊരു ഫീല് ജോജിക്കുണ്ടായി .
കാപ്പി കുടി കഴിഞ്ഞു അല്പ നേരത്തിനുള്ളില് എല്ലാവരും ഹാളില് കൂടി .പിള്ളേരെ നോക്കാന് സെലീനയെ ഏല്പ്പിച്ചു പുറത്തേക്ക് വിട്ടു
‘ ജെസി ..നീ പോയി അച്ചൂനെ ഇങ്ങു വിളിച്ചോണ്ട് വാ ‘ ആലീസ് പറഞ്ഞിട്ട് സോഫയില് മാത്തച്ചന്റെ അങ്ങേയറ്റത്ത് ഇരുന്നു .ജെസ്സിയുടെ ഒപ്പം ബീനയും അകത്തേക്ക് കയറി
ജോജി കണ്ടു … ആ …രൂപം …പാറി പറന്ന മുടിയും കുഴിഞ്ഞ കണ്ണുകളും ഒക്കെ കൂടി ..ഒന്ന് കൂടി നോക്കാനാവാതെ അവന് കണ്ണ് തിരിച്ചു
അച്ചുവിനെ അലീസിന്റെയും മാത്തച്ചന്റെയും നടുക്കാണ് അവരിരുത്തിയത് .. അവളുടെ ഒരു കൈ എടുത്തു മുറുകെ പിടിച്ചു കൊണ്ട് ആലീസ് ഒന്ന് ശ്വാസം വലിച്ചു വിട്ടു
‘ എന്നാ കോലമാടി കൊച്ചെ …ഇത് ..ങേ .. ഇങ്ങനെ നീ തുടങ്ങിയാല് പിന്നെ പിള്ളേരുടെ കാര്യം എങ്ങനാ … അവനെയങ്ങു ദൈവം വിളിച്ചു .. നീയും കൂടി മിണ്ടാതേം തിന്നാതെം ഓരോന്ന് വരുത്തി വെച്ചെച്ചും ..ങേ .. ആണ്ടിന് വരാന് ഇരുന്നതാ ഞങ്ങള് ..നിന്റെ ഇവിടുത്തെ അവസ്ഥ കേട്ടപ്പ ഓടിയിങ്ങു പോന്നതാ …’
ഒരു കൈ കൊണ്ട് അച്ചുവിന്റെ മുടി മാടിയൊതുക്കി , മറു കയ്യാല് അവളുടെ കൈത്തലം അമര്ത്തി പിടിച്ചു ആലീസ് പതുക്കെ തുടങ്ങി
” നീയെന്നാ ഭാവിച്ചായാലും ഞങ്ങളൊരു തീരുമാനം അങ്ങെടുത്തു …ആണ്ടു കഴിഞ്ഞു പറയാന്നും ഒക്കെ വെച്ചിരുന്നതാ …ഇതിപ്പോ നീയായിട്ടു പറയിപ്പിച്ചതാ …നീ ഇങ്ങനെ ഒറ്റക്ക് ഇവിടെ നിക്കണ്ട …”
അച്ചു പകച്ചു അവരെ നോക്കി ..
” നിന്നെ കൊണ്ടോകാനാ ഞങ്ങള് വന്നെ ‘
ആലീസിന്റെ തീരുമാനം കേട്ട് ജോജി ഒന്നാശ്വസിച്ചു.
‘ പിന്നെ ..നീയിങ്ങനെ ജീവിതകാലം മുഴുവന് അവനെയും വിചാരിച്ചു ജീവിക്കാനും ഞങ്ങള് സമ്മതിക്കുകേല … ആണ്ടു കഴിയനോന്നും നിക്കുന്നില്ല …നീ കല്യാണം കഴിക്കണം …അത് ഞങ്ങള് കൂട്ടായിട്ടെടുത്ത തീരുമാനം ആണ് ‘
ജോജി ആകെ അന്ധാളിച്ചു ..ഇത് വരെ അങ്ങനൊരു സംസാരം അവന്റെ മുന്നില് വെച്ചുണ്ടായില്ല … സമ്മതിക്കില്ലാന്നു കരുതിയാവാം
‘ ഞാനെങ്ങോട്ടും ഇല്ല … എന്നെ വേണ്ടെങ്കില് ഇറക്കി വിട്ടേരെ … ഞാനെങ്ങോട്ടെങ്കിലും പൊക്കോളാം ..സ്വത്തും പണവും പോകൂന്ന് കരുതിയാണേല് നിങ്ങടെ അഞ്ചു പൈസ എനിക്ക് വേണ്ട”
അലീസിന്റെ കൈ കുതറി തെറിപ്പിച്ച് എഴുന്നേല്ക്കാന് തുടങ്ങിയ അച്ചുവിനെ മാത്തച്ചന് കൂടി മുറുകെ പിടിച്ചു ..
” മോളെ … നിന്നെ വിഷമിപ്പിക്കാന് പറഞ്ഞതല്ല …നിന്നെ കൂടെപ്പിറപ്പായെ ഞങ്ങള് കണ്ടിട്ടുള്ളൂ” ഫിലിപ്പ് പതുക്കെ പറഞ്ഞു
എതിര്ത്തൊരു വാക്ക് ഇതേവരെ പറയാത്ത ചേച്ചിയമ്മ പൊട്ടിത്തെറിച്ചപ്പോള് ജോജി ആകെ വല്ലാതായി . എന്നാല് അത് മുന്കൂട്ടി കണ്ട മറ്റുള്ളവരത് വക വെച്ചെയില്ല.
” നീയെങ്ങോട്ട്പോകും …നിന്റെ വീട്ടിലേക്കോ … അവിടുന്നു ഇറക്കി വിട്ടതല്ലേ നിന്നെ …ഈ കുഞ്ഞുങ്ങളുടെ ഭാവി ഒന്നാലോചിക്ക് നീ “
അച്ചു ആകെ പതറി. എല്ലാത്തിനും ജോഷി ഉണ്ടായിരുന്നു .. ഒന്നിനും തനിച്ചു പുറത്ത് പോയിട്ട് പോലുമില്ല ..ജോക്കുട്ടന് ഉണടായിരുന്നപ്പോള് അവന് കാണുമായിരുന്നു .. അവള് നിസഹായതയോടെ ജോജി ഇരിക്കുന്നിടത്തെക്ക് നോക്കി .. ഒരു താങ്ങ് കിട്ടുമോയെന്നറിയാന്
‘ ജോക്കുട്ടാ ..ഒന്ന് പറയെടാ മോനെ …ചേച്ചിയമ്മേനെ ഇറക്കി വിടല്ലന്നു … ആര്ക്കും ഒരുപദ്രവവും ഉണ്ടാക്കാതെ ഞാനിവിടെ കഴിഞ്ഞോളാം..ഒന്ന് പറയടാ കുട്ടാ..” ജോജിയെ നോക്കി അച്ചുവത് പറഞ്ഞപ്പോള് അലീസിന്റെ കൈകള് അയഞ്ഞു , മാത്തച്ച്നറെയും…അച്ചു ഓടി അവന്റെ അരികിലെത്തി .