സ്ഥലത്തിൽ നിന്നും വരുമാനം ഉണ്ട്.. എന്നാലും ഞാൻ കാരണം എന്തോ ആയി എന്നൊക്കെ പറയുമ്പോൾ.. പിന്നെ ഒന്നും നേരിട്ടു പറയില്ല എന്നൊരു വലിയ അനുഗ്രഹം ഉണ്ട്…
എല്ലാം അമ്മയോട് ആണ് പറയുക..
അമ്മ അതും കേട്ട് കണ്ണീരു ഒലിപ്പിച്ചു ഇരിക്കും..
ഒരു ദിവസം അച്ഛൻ ഒരു കൂട്ടുകാരനോട് പറയുന്നത് കേട്ടു ആണ് ഞാൻ വീട്ടിലേക്കു കയറി ചെന്നത്..
“നല്ല നിലയിൽ ആയിരുന്നു. ഇളയവൻ ജനിച്ചതോടെ എല്ലാം പോയി..”
ഇത് കേട്ട് ഞാൻ അവിടെ കാലുകൾ ഉറച്ചതുപോലെ നിന്ന് പോയി… അപ്പോൾ
“ആഹാ ഇതായിരിക്കും അല്ലെ ഇളയവൻ? “
എന്ന് ചോദിച്ചു അയാൾ ഞാൻ എന്തോ കുറ്റം ചെയ്തത് പോലെ എന്നെ നോക്കി.. മലയാളികൾ അങ്ങനെ ആണല്ലോ…
അപ്പൊ കല്യാണത്തിന്റെ കാര്യം ആണ് പറഞ്ഞു വന്നത്…
എല്ലാവർക്കും ഡ്രസ്സ് എടുത്തപ്പോൾ എനിക്കും എടുത്തു..
ജീവിതത്തിൽ ഓർമ വച്ച നാള് മുതൽ അമ്മയും അമ്മയുടെ ചേച്ചിയും ഒക്കെയാണ് എനിക്ക് ഡ്രസ്സ് വാങ്ങി തരുന്നത്..
അതിനു ശേഷം ഇപ്പോഴാണ് അച്ഛൻ എനിക്ക് ഡ്രസ്സ് എടുത്തത്.. അതെനിക്ക് നേരിട്ടു തന്നു..
എന്റെ കണ്ണ് നിറഞ്ഞുപോയി… എന്നെ പരിഗണിക്കാൻ തുടങ്ങിയോ എന്ന ചിന്ത സന്തോഷം ഉണ്ടാക്കി..
എന്നാൽ റൂമിൽ എത്തി പാക്കറ്റ് തുറന്നു നോക്കിയ എനിക്ക് ആ സന്തോഷം ഒക്കെ പോയി..
ഏട്ടന് മൂവായിരം രൂപയുടെ ഒക്കെ ലൂയിസ് ഫിലിപ്പ്, വാൻഹുസെൻ ഒക്കെ വാങ്ങുന്ന അച്ഛൻ എനിക്ക് വാങ്ങിയിരിക്കുന്നത് 520 രൂപയുടെ ഷർട്ട്..
അതും, എന്റെ സൈസ് 38 ആണ്.. നല്ല ശരീരം ഉള്ളതുകൊണ്ട് 40ഉം പാകം ആകും..
അച്ഛൻ വാങ്ങിയത് 42 സൈസ്.. പള്ളിയിൽ അച്ചൻ വെള്ള ഡ്രെസ്സ് ഇട്ടതു പോലെ..
സങ്കടം തോന്നി…
അവനു പള്ളിയിൽ ഇടാൻ ഫുൾ സ്യൂട്ട്.. മറ്റു സാധനങ്ങൾ എല്ലാം… ഞാൻ വെറും ശശിയും..
പിന്നെ ആരോടും പരാതി ഇല്ലായിരുന്നു.. ദൈവം ഒന്നും തന്നില്ലെങ്കിലും നാണംകെട്ടു ക്ഷമിക്കാൻ ഉള്ള കഴിവ് നന്നായി തന്നിട്ടുണ്ട്..
കല്യാണം ഒക്കെ കിടിലൻ ആയി നടന്നു.. പള്ളിയിൽ പോകാനൊന്നും പറ്റിയില്ല.. തിരക്ക് ആയിരുന്നു..
പിന്നെ നിങ്ങൾ വിചാരിക്കും അമ്മയുടെ പേര് സീതാദേവി എന്നല്ലേ പിന്നെ എങ്ങനെ പള്ളിയിൽ വച്ച് കല്യാണം വന്നു എന്ന്?
അച്ഛൻ ക്രിസ്ത്യാനി ആണ്.. അമ്മ നായരും. അച്ഛന്റെ ഒപ്പം ഇറങ്ങി വന്നവൾ ആണ് അമ്മ..
അത് കൊണ്ടാണ് എതിർത്ത് ഒന്നും പറയാത്തത് എന്ന് മനസിലായില്ലേ?
കാര്യങ്ങൾ അങ്ങനെ ആണ്..
അപ്പോൾ കല്യാണത്തിന് എനിക്ക് പോകാൻ കഴിഞ്ഞില്ല.. എന്നാൽ ഒരു ഫോട്ടോ എടുക്കാൻ പോലും എന്നെ വിളിച്ചില്ല എന്നതാണ് സത്യം…
ഞാൻ പാചകക്കാരോട് കൂടെ കൂടി.. ബിരിയാണി ആയിരുന്നു..
എല്ലാം കഴിഞ്ഞു ഒരു മൂലയ്ക്ക് ഒരു കസേര ഇട്ടു ഇരിക്കുമ്പോൾ ആണ് ആതിര അങ്ങോട്ടു വന്നത്…
“എനിക്കൊരു കാര്യം പറയാനുണ്ട്….”
“എന്താ?”
ഞാൻ അല്പം പേടിയോടെ ചോദിച്ചു.. പെണ്ണുങ്ങൾ എന്റെ അടുത്ത് സംസാരിക്കാറില്ല..
“ഏട്ടന്റെ ഫോൺ നമ്പർ ഒന്ന് തരുമോ?”
ഞാൻ അകെ വിറച്ചു.. ഇവൾ എന്തിനാണ് എന്റെ നമ്പർ ചോദിക്കുന്നത് എന്ന് ആലോചിച്ചു..
എന്നാലും ഞാൻ നമ്പർ കൊടുത്തു.. അവളുടെ കയ്യിലും അന്നത്തെ കാലത്തെ സെറ്റപ്പ് ഫോൺ ആണ്.. നോക്കിയ N90..
അവളൊക്കെ ഭാഗ്യം ഉള്ളവൾ ആണ് അല്ലെങ്കിലും..
“ഞാൻ വിളിക്കാം.. ഒരു കാര്യം പറയാൻ ഉണ്ട്…”
എന്ന് പറഞ്ഞു അവൾ മെല്ലെ തിരിഞ്ഞു നടന്നു…
കാണാൻ നല്ല ഭംഗി ആണ് ഈ പെണ്ണിനെ.. ശരീര സൗന്ദര്യം അത്രക്കൊന്നും ഇല്ല.. എന്നാലും മുഖം ലക്ഷ്മി ദേവിയുടെ പോലെ ആണ്..
വലിയ വിശ്വാസിയും ആണ്.. അവൾക്കു എന്താ പറയാനുള്ളത് എന്ന് ആലോചിച്ചു എനിക്ക് ടെൻഷൻ കൂടി വന്നു..
അന്ന് പിന്നെ അതൊന്നും ആലോചിക്കാൻ സമയം കിട്ടിയില്ല.. നല്ല തിരക്ക് ആയിരുന്നു.
രാത്രി പുറത്തു പണി എല്ലാം കഴിഞ്ഞു ഇരിക്കുമ്പോൾ ഏട്ടത്തി അവിടെ വന്നു.
ഞാൻ ഒന്ന് ചിരിച്ചു..
അവൾ ചിരിച്ചില്ല… അത് പിന്നെ ഏട്ടന്റെ അല്ലെ ഭാര്യാ എന്ന് ഞാൻ ചിന്തിച്ചു..
“ജീവ് എന്നല്ലേ പേര്?”
അവൾ എന്നോട് ചോദിച്ചു..
“അതെ ഏട്ടത്തി…”
“മ്മ്മ്… “
എന്ന് പറഞ്ഞു എന്നെ ഒന്ന് ഇരുത്തി നോക്കിയിട്ടു അവർ അകത്തേക്ക് പോയി.. സുന്ദരി ആണ്.
എന്നാലും ഇവർ എന്നോട് ഇനി മിണ്ടാൻ പോലും വരില്ല എന്ന് ഉറപ്പായിരുന്നു..
രണ്ടു ദിവസം കൂടി നല്ല തിരക്ക് ആയിരുന്നു..
അപ്പോഴേക്കും എന്റെ ഒരു കൂട്ടുകാരൻ ബാംഗ്ലൂരിൽ നിന്ന് വിളിച്ചു.. എന്റെ പണി പോയി എന്ന സന്തോഷ വാർത്ത വിളിച്ചു പറഞ്ഞതാണ്..
ലീവ് നീട്ടിയപ്പോൾ അതും കാരണം സുബ്മിറ്റ് ചെയ്യാൻ പറ്റിയില്ല.. അവർ ടെർമിനറ്റ് ചെയ്തു..
നല്ല കാര്യം.. എന്നും പറഞ്ഞു ഞാൻ ചെയ്ത കാര്യം പൂർത്തി ആക്കി..
അമ്മയുടെ അടുത്ത് ചെന്ന് കാര്യം പറഞ്ഞു..
അമ്മ സങ്കടത്തോടെ അച്ഛനോട് പറഞ്ഞു അവന്റെ പണി പോയി എന്ന്..
“കളക്ടർ ഉദ്യോഗം ഒന്നും അല്ലല്ലോ.. അല്ലെങ്കിലും അവനെക്കൊണ്ട് ആർക്കും ഒരു ഗുണവും ഇല്ല…”
ഇത്ര ദിവസം കിടന്നു മരിച്ചു പണി എടുത്ത എന്നെപ്പറ്റിയുള്ള അഭിപ്രായം ആണ്..
അമ്മ എന്നെ നോക്കിയപ്പോൾ ഞാൻ കണ്ണടച്ച് കാണിച്ചു..
ഇതൊന്നും എന്നെ ബാധിക്കുന്ന കാര്യം അല്ല.. എന്നുള്ള രീതിയിൽ ഏട്ടത്തി അവിടെ ഇരിക്കുന്നുണ്ടായിരുന്നു..
***
ഒരു ദിവസം രാത്രി ഞാൻ ഒരു കുളത്തിന്റെ കരയിൽ ഇരിക്കുകയായിരുന്നു..
അവിടെ ഇരുന്നു എല്ലാവരും എന്നെ സ്നേഹിക്കുന്നത് സ്വപ്നം കാണൽ പതിവാണ്…
എന്റെ ഫോൺ ശബ്ദിച്ചപ്പോൾ ഞാൻ അതെടുത്തു ചെവിയിൽ വച്ചു..
“ഹലോ ഏട്ടാ….”
ഒരു നേർത്ത ശബ്ദം.. ശബ്ദത്തിന്റെ ഉടമയെ എനിക്ക് മനസിലായി..
ആതിര..
“ഹായ്.. ഹലോ.. എന്താ?”
ഞാൻ ഒന്ന് തപ്പി…
“ഏട്ടനോട് ഒരു കാര്യം പറയാൻ ഉണ്ടെന്നു പറഞ്ഞില്ലേ?”
“‘മ്മ്മ് എന്താ അത്?”
“എനിക്ക് ഏട്ടനെ ഇഷ്ടമാണ്…”
“ങേ? എന്താ??”
സത്യത്തിൽ ഞാൻ ഞെട്ടിപോയി..
ഇതുവരെ എന്നെ ഒരു പെണ്ണും കാര്യമായി പരിഗണിച്ചിട്ടില്ല.. അപ്പൊ ധാ ഒരു സുന്ദരി ഇങ്ങോട്ടു ഇഷ്ട്ടം ആണെന്ന് പറയുന്നു…
“എനിക്ക് ഏട്ടനെ ഇഷ്ടമാണ് എന്ന്…”
അവൾ അത് പറഞ്ഞു ഒന്ന് ചിരിച്ചു..
ഞാൻ പെട്ടെന്ന് സാധാരണ ജീവ് തന്നെ ആയി..
“എന്റെ മോളെ.. എന്ത് കണ്ടിട്ടാണ് എങ്ങനെയൊക്കെ ഇഷ്ടപ്പെടുന്നത്? ആർക്കും വേണ്ടാത്തവൻ ആണ് ഞാൻ…”
“ഇപ്പൊ എന്റെ മോളെ എന്ന് വിളിച്ചില്ലേ? അത് മനസ്സിൽ നിന്നല്ലേ വന്നത്…? ആ മനസ് മതി എനിക്ക്….”
അവൾ മെല്ലെ പറഞ്ഞപ്പോൾ എന്റെ രോമങ്ങൾ ഒക്കെ എണീറ്റ് നിന്നു..
“എന്നാലും നീ എന്തറിഞ്ഞിട്ടാ?”
“എനിക്ക് എല്ലാം അറിയാം.. വീട്ടിലെ അവസ്ഥയും അറിയാം… എല്ലാവരും അകത്തു തിരക്കിൽ ആയപ്പോൾ പുറത്തു നിന്ന് വിറകു കീറുന്നതും അതുപോലെ ഏട്ടന്റെ അച്ഛനൊക്കെ വിലകൂടിയ ഡ്രസ്സ് ഇട്ടപ്പോൾ ഏട്ടൻ ഇട്ട വില കുറഞ്ഞ അയഞ്ഞ ഷർട്ടും ഒക്കെ കണ്ടാൽ എല്ലാവർക്കും മനസിലാകും….”
അവൾ ഒന്ന് നിർത്തി…