” സെമിനാറോ ?? ” ഞാൻ സംശയത്തോടെ നോക്കി.
“ആ… മറ്റേ ബുക്ക് ഇല്ലേ, അത് ക്ലാസ്സിൽ ഇരുന്നു വായിച്ചത് സാർ പൊക്കി.. അതിൻ്റെ പണിഷ്മെന്റ് ”
” ഓ.. അത് പൊക്കിയോ.. അല്ല എന്തിനാ വേണ്ടാത്ത പണിക്ക് പോയത്?? ”
“ഏയ്.. വായിച്ചു തുടങ്ങിയപ്പോ നല്ല രസം, അപ്പൊ അങ്ങിരുന്നു തീർത്തു… ആ… ബസ് വരുന്നുണ്ടേ… ഞാൻ പോട്ടെ…..” അവൾ പറഞ്ഞു നിർത്തി റോഡിലേക്ക് നിന്നു.
” ടൗണിലേക്ക് ആണേൽ പോരേ… ഞാനും അങ്ങോട്ടാ…”
” ഇല്ല… നാളെ ആവട്ടെ… ഇന്നിപ്പോ ബസ് വന്നില്ലേ…”, അവൾ ശബ്ദം താഴ്ത്തി പറഞ്ഞു..
ഞാൻ പതുക്കെ വണ്ടി എടുത്ത് ഓഫീസിൽ പോയി… അവിടെ എല്ലാവരും എങ്ങനെ ഉണ്ട്, നടക്കാൻ ബുദ്ധിമുട്ടുണ്ടോ അങ്ങനത്തെ ഓരോരോ കാര്യങ്ങൾ ചോദിച്ചു. അപ്പോഴേക്കും ബോസ് വന്നു. പുള്ളിയോട് എം.ടെക്കിനു പോവുന്ന കാര്യവും റിസൈന് ചെയ്യുന്ന കാര്യവും പറഞ്ഞു. പുള്ളിക്ക് ഇത്തിരി വിഷമം ആയെന്നു തോന്നുന്നു. രണ്ടു മൂന്നു വര്ഷം ആയിട്ട് ഇവിടെ ഉള്ള ആളല്ലേ..ഇനിയൊരാൾ വന്നു എല്ലാം പഠിച്ചു വരാൻ സമയം എടുക്കുമല്ലോ.. ഏതായാലും ഉച്ചക്ക് ടീം ലഞ്ച് പുറത്തു നിന്നാവാം എന്നും പറഞ്ഞു പുള്ളി പോയി. ഞാനും തിരിച്ചു എൻ്റെ കാബിനിലേക്ക് വന്നു. ചെറിയ ഓഫീസ് ആണ്. ഞങ്ങൾ 5 .പേരുണ്ട്. അക്കൗണ്ട്സിലെ ചേട്ടൻ ആണ് സീനിയർ. പിന്നെ എക്സ്പീരിയൻസ് ഉള്ളത് എനിക്കാണ്. ഡിസൈനിങ്ങിനും ഡ്രോയിങ്ങിനും ഒക്കെ വേണ്ടി മറ്റുള്ളവർ. പിന്നെ പണി എടുക്കാൻ ഉള്ളവർ ഉണ്ട്.. അവർ ഓഫീസിലേക്ക്
വല്ലപ്പോഴുമേ വരൂ… അവർക്ക് സൈറ്റ് പറഞ്ഞു കൊടുത്താൽ അവിടെ പോയി അവർ പണി തുടങ്ങിക്കോളും. ഞാൻ ചേട്ടന്റെ അടുത്തെത്തി ഓരോ സൈറ്റിന്റേയും കാര്യങ്ങൾ ചോദിച്ചു മനസ്സിലാക്കി. വേറെ പണി ഒന്നും ഇല്ലാത്തത് കൊണ്ട് കമ്പനി വണ്ടിയുടെ താക്കോൽ എടുത്ത് കൊണ്ട് പുറത്തേക്കിറങ്ങി. ഒരു 2013 മോഡൽ ബൊലേറോ ആണ്. നല്ല വണ്ടി ആണ്. സാധങ്ങൾ കൊണ്ട് പോവാനും അത്യാവശ്യം കേറ്റവും ഓഫ് റോഡിനും ഒക്കെ പറ്റും, എ സി യും ഉണ്ട്. പതുക്കെ വണ്ടിയിൽ കേറി ക്ലച്ചിൽ കാലു വെച്ചപ്പോൾ പിന്നേം മുട്ടിനു വേദന. അങ്ങനെ ഓഫീസിലെ വേറൊരു പയ്യനെ കൂടി വിളിച്ചു സൈറ്റിൽ ഒക്കെ ഒന്ന് പോയി വന്നു. വരുന്ന വഴിക്ക് കാറിൽ ഇരുന്നു ഞാൻ ഈ ആഴ്ച കൂടിയേ കാണൂ എന്ന് പറഞ്ഞപ്പോൾ അവനു സങ്കടം വന്നു. അവന്മാർ ചെയ്യുന്ന മണ്ടത്തരങ്ങൾ ഒക്കെ എങ്ങനെ എങ്കിലും സോൾവ് ആക്കുന്നത് ഞാൻ ആണ്. പിന്നെ എന്റെ അത്രക്ക് ബോസും ആയിട്ട് അവർ കമ്പനിയും ആയിട്ടില്ല. അന്നത്തെ ടീം ലഞ്ച് ഒക്കെ കഴിഞ്ഞു ഓഫീസിൽ വന്നിരുന്നു.
അപ്പോഴാണ് രാവിലെ സുജിത്തിനെ വിളിച്ചു റെഡി ആയി ഇരിക്കാൻ പറഞ്ഞ കാര്യം ഓർമ വന്നത്.
ഓ..നേരം ഇത്ര ആയി..ഇനി ഇപ്പൊ വിളിച്ചാൽ തെറി കേൾക്കും… എന്നാലും വിളിക്കാം എന്ന് വെച്ച് ഡയല് ചെയ്തു.
അവൻ രാവിലെ എന്നെ കാത്തു നിന്ന് കാണാതായപ്പോൾ അവിടെ ഉള്ള വേറെ ഫ്രണ്ട്സിന്റെ കൂടെ സിനിമക്ക് പോയെന്ന് പറഞ്ഞു. പതിനൊന്നരയുടെ സിനിമ ആണ്.. അപ്പോൾ കഴിയേണ്ട സമയം ആയി.. ഞാൻ പിക്ക് ചെയ്യാൻ വരാം എന്നും പറഞ്ഞു ഫോൺ വെച്ചു. സ്കൂട്ടർ എടുത്ത് അവനെ പിക്ക് ചെയ്ത് വീട്ടിൽ വന്നു.. ബൈക്ക് അവൻ സർവീസ് നു കൊടുക്കാമെന്നു പറഞ്ഞു താക്കോൽ വാങ്ങി ഹെൽമെറ്റും എടുത്ത് പോയി. അപ്പോൾ അത് ഓക്കേ ആയി. ഇനി കുറച്ചു സർട്ടിഫിക്കറ്റുകൾ ഉണ്ടാക്കാൻ ഉണ്ട്… മെഡിക്കൽ ഫിറ്റ്നസ്, സ്വഭാവ സർട്ടിഫിക്കറ്റ് ഒക്കെ.. അത് നാളെ എങ്ങാനും ചെയ്യാം… എല്ലാത്തിന്റെയും ടെമ്പ്ലേറ്റ് പെൻഡ്രൈവിൽ സേവ് ചെയ്തു വെച്ചു.
വൈകുന്നേരത്തെ ചായക്കുള്ള സമയം ആയിട്ടുണ്ട്. ഇനിയിപ്പോ തിരിച്ചു ഓഫീസിൽ പോവണോ???
വേണ്ട.. നാളെ പോവാം…
യൂട്യൂബ് ഓപ്പൺ ചെയ്ത് പതുക്കെ ബെഡിലേക്ക് കിടന്നു. കുറേ പുതിയ ബൈക്ക് ഒക്കെ വരുന്നുണ്ട്.. അതിന്റെ ഒക്കെ ഡീറ്റൈൽസും റിവ്യൂ ഒക്കെ നോക്കി സമയം പോയി..
ഠിം…ഠിം… ജനലിൽ ഒരു തട്ട് കേട്ടാണ് നോക്കിയത്. സൈഡ് മതിലിനോട് ചേർന്ന ജനൽ ആണ്. തുറന്നു നോക്കിയപ്പോ ഒരു പേരക്കയും കയ്യിൽ പിടിച്ചു ഗൗരി..