” എപ്പോ വന്നു?? “, അവൾ ചോദിച്ചു.
” കുറച്ചു നേരം ആയി… നീയെങ്ങനെയാ ജനലിൽ തട്ടിയത്?? “, കാര്യം ആ സൈഡിലെ മതിലും വീടും ആയി അര മീറ്റർ ക്ലിയറൻസ് ഉള്ളൂ.. എന്നാലും കയ്യെത്തിച്ചാൽ ജനലിൽ തട്ടാൻ പറ്റില്ല… വല്ല കമ്പും എടുത്ത് തട്ടിയതാവാനേ വഴി ഉള്ളൂ..
” അത് ഞാൻ ഒരു വടിയെടുത്തു അടിച്ചതാ… ” അവൾ പറഞ്ഞു.
” പേരക്ക വേണോ? ” എൻ്റെ നേരെ നീട്ടിക്കൊണ്ട് ചോദിച്ചു.
” നീ ഇങ്ങോട്ട് വാ…” ഞാൻ വീട് ചുറ്റി വരാൻ ആംഗ്യം കാട്ടിക്കൊണ്ട് പറഞ്ഞു.
” ഏയ്.. നേരം സന്ധ്യ ആവാറായി, കുളിച്ചു വിളക്ക് കത്തിക്കണം… ” അവൾ ചുമൽ കൂച്ചിക്കൊണ്ട് പറഞ്ഞു.
” ഓ… ഇപ്പൊ വേറേതോ വീട്ടിലെ വിളക്ക് കത്തിക്കേണ്ട പെണ്ണായിരുന്നു.. എന്നിട്ട് കണ്ടില്ലേ?? “
ഞാൻ വെറുതെ കളിയാക്കി പറഞ്ഞു..
” മ്..പിന്നെ… ഒന്ന് പോയെ അവിടുന്ന്… രക്ഷപ്പെട്ടു എന്ന് പറഞ്ഞാ മതിയല്ലോ !! ” അവൾ ചിരിച്ചോണ്ട് എന്നാൽ ഇത്തിരി കെറുവിച്ചു കൊണ്ട് പറഞ്ഞു.
ഒരു സങ്കടമോ കരച്ചിലോ ഒക്കെ പ്രതീക്ഷിച്ച എനിക്ക് സന്തോഷം ആയി.. അവൾ ആ കാര്യം ഒക്കെ മറന്നു തുടങ്ങിയിട്ടുണ്ട്. അതൊന്നും ആലോചിച്ചു ഇരുന്നിട്ട് കാര്യം ഇല്ലാന്ന് മനസ്സിലാക്കിക്കാണും..
” പിന്നേ.. ആ ബുക്ക് കൊള്ളായിരുന്നു ട്ടോ… എനിക്കിഷ്ടായി ” അവൾ പറഞ്ഞു.
” ആ.. എനിക്ക് തോന്നി നിന്റെയീ മുഖം ഒക്കെ കണ്ടപ്പോ.. അതൊക്കെ വിട്ടൂ എന്ന്…” ഞാൻ പറഞ്ഞു.
” എന്നാ ശെരി… പണി ഉണ്ട്. നാളെ കാണാം.. ” അവൾ ടാറ്റാ കാണിച്ചു നടന്നു.
ഞാനും ജനൽ ഒക്കെ അടച്ചു എന്റെ കാര്യങ്ങൾ ഒക്കെ നോക്കി നടന്നു.
ദിവസങ്ങൾ അങ്ങനെ പോയി…അതിനിടയിൽ ഞാൻ ചെയ്യാൻ ഉള്ള കാര്യങ്ങൾ ഒക്കെ ചെയ്ത തീർത്തു.. ഡ്രസ്സ് ഒക്കെ പാക്ക് ചെയ്തു.. സർവീസിന് കൊടുത്ത ബൈക്ക് തിരിച്ചു കിട്ടി.. എനിക്ക് പോവാനുള്ള തീയതി അടുത്തു. സാധാരണ സംസാരങ്ങളും കളിയാക്കലും ഒക്കെ ആയി ഗൗരിയോട് ഉള്ള സംസാരം നടക്കുന്നുണ്ട്. പക്ഷേ കഴിഞ്ഞ രണ്ടു മൂന്നു ദിവസങ്ങളായി ഗൗരിയെ കണ്ടിട്ടില്ല.
അങ്ങനെ പോവുന്നതിന്റെ തലേന്നായി.. അച്ഛൻ വരുന്നുണ്ട് കൂടെ. താമസം ഒക്കെ അവിടെ ചെന്ന് നോക്കണം… ഞാൻ കുറെ പറഞ്ഞു, ഞാൻ ഒറ്റക്ക് പൊയ്ക്കോളാമെന്നു… സമ്മതിച്ചില്ല !!
അങ്ങനെ പോവാനുള്ള ദിവസം ആയി… വൈകുന്നേരം ആറരക്കാണ് ട്രെയിൻ. രാവിലെ അഞ്ച് മണിക്ക് തിരുവനന്തപുരത്തെത്തും… അച്ഛൻ പണ്ടത്തെ പോലീസ് ചിട്ട അനുസരിച്ചു നാലര കഴിഞ്ഞപ്പോളെ വീട്ടിൽ നിന്നിറങ്ങി. കഷ്ടി മുക്കാൽ മണിക്കൂറേ റെയിൽവേ സ്റ്റേഷനിലേക്ക് ഉള്ളൂ… എന്നാലും ലേറ്റ് ആവണ്ട എന്നും പറഞ്ഞാണ് നേരത്തെ ഇറങ്ങിയത്.
ബസിൽ കേറി ടൗണിൽ പോവണം. പിന്നെ അവിടുന്ന് വേറെ ബസ് കേറിയിട്ട് വേണം റെയിൽവേ സ്റ്റേഷനിൽ പോവാൻ. ഇവിടുന്നു ഈ സമയത്തു ടൗണിലേക്ക് തിരക്ക് കുറവാണ്… അവിടുന്ന് ഇങ്ങോട്ട് ഉള്ളതിനാണ് തിരക്ക്.. ഞാൻ ബസിൽ കേറി ഡ്രൈവർ സൈഡിലെ ഒരു വിൻഡോ സീറ്റിൽ കേറി ഇരുന്നു. ബസ് എടുത്തു… ഒരു എക്സൈറ്റ്മെൻറ് ഒക്കെ തോന്നുന്നുണ്ട്.. ഇതെന്റെ ലൈഫിൽ കുറെ മാറ്റം ഉണ്ടാക്കും.. ഞാൻ മനസ്സിൽ പറഞ്ഞു.
ബസ് രണ്ടു സ്റ്റോപ്പ് കഴിഞ്ഞു. ഓപ്പോസിറ്റ് ഒരു ബസ് വരുന്നുണ്ട്. അതിനു സൈഡ് കൊടുക്കാൻ വേണ്ടി ഞങ്ങളുടെ ബസ് നിർത്തിയതാണ്. വെറുതെ ആ ബസിലേക്ക് നോക്കിയപ്പോൾ കണ്ടു, ഡ്രൈവറുടെ തൊട്ടു ബാക്കിലെ സീറ്റിൽ ഗൗരി.. മുഖത്തു കുറച്ചു ക്ഷീണം ഉണ്ട്.. എന്നാലും ഒരു ചെറിയ ചിരി ഉള്ള ചുണ്ടുകൾ. മുടി നെറുകയിൽ നിന്ന് വഴഞ്ഞു ബാക്കിലേക്ക് എന്തോ ചെയ്തു കെട്ടി വെച്ചിട്ടുണ്ട്. ഒരു കുഞ്ഞു കറുത്ത പൊട്ട്. വേറെ ഒന്നും ഇല്ല. കാതിൽ ഒരു ചെറിയ തൂങ്ങൽ ഉള്ള കമ്മൽ. ഇതെല്ലാം ഒറ്റ നോക്കിൽ ഞാൻ ശ്രെദ്ധിച്ചു. അവളും ഈ ബസിലേക്ക് നോക്കുന്നുണ്ട്, വായിനോക്കി…
അപ്പോഴാണ് എന്നെ കണ്ടത്… മുഖത്തു പെട്ടെന്ന് നല്ല സന്തോഷം… എങ്ങോട്ടാ എന്ന് കൈകൊണ്ട് ആംഗ്യം കാണിച്ചു.
ഞാൻ മടിയിൽ ഇരുന്ന എന്റെ ബാക് പാക്ക് കുറച്ചു ഉയർത്തി വിമാനം പറക്കുന്ന പോലെ ഒരു ആംഗ്യം കാട്ടി…