💫Evil on earth✨ – 1അടിപൊളി  

കുഞ്ഞിനെ കൊഞ്ചിച്ചുകൊണ്ടവൾ അവന്റെ കവിളിൽ പിടിച്ചു വലിച്ചു…അവളുടെയാ പ്രവർത്തി ഇഷ്ടപ്പെട്ടവണ്ണമവൻ  കൈകാലുകളിട്ടടിച്ചു

ഇതെല്ലാം കണ്ടുകൊണ്ടുനിന്ന ഡാനിയേൽ വേറൊന്നും പറയാതെ ബെഡിലിരുന്നു

“ഏതായാലും നന്നായി ഇച്ചായ…ഇനി ചിലപ്പോ ഇവന്റെ കാര്യങ്ങൾ അന്വേഷിച്ചാരും വരാൻ സാധ്യത ഇല്ലല്ലോ…അതോണ്ടിനി ആ പേടി വേണ്ട..”

“അതാണ് പേടിക്കേണ്ടത് നൈല…”

ആലോചനയിൽ മുഴുകിയിരുന്ന ഡാനിയേൽ പറഞ്ഞു…അവനെന്താ അങ്ങനെ പറഞ്ഞെതന്നറിയാനായി നൈലയവനെ നോക്കി

“ഇവന്റമ്മയെയവർ കൊന്ന് കളയുകയാ ചെയ്തത്…അതെന്തായാലും വെറുതെ ആവില്ലല്ലോ…എന്റേയൂഹം ശെരിയാണേൽ അവർ വന്നതീ കുഞ്ഞിനു വേണ്ടിയാകും

അവൻ പറയുന്നത് കേട്ട നൈല ആർക്കുമിവനെ വിട്ടുകൊടുക്കില്ലെന്ന മട്ടിൽ കുഞിനെ ചേർത്തു പിടിച്ചു

അത് കണ്ട ഡാനിയേൽ ഒരു ചിരിയോടെ അവളെ കെട്ടിപ്പിച്ചു

“നീയെന്തിനാ പേടിക്കുന്നെ…ഇത് പാലക്കൽ കുര്യചന്റെ വീട..ഇവിടവന്ന് ഒരുത്തനും നമ്മുടെ കുഞ്ഞിനെ തൊടില്ല..“

——————————————-

23വർഷങ്ങൾക്ക് ശേഷം…..

Present day…….

അമേരിക്കയിലെതന്നെ ഏറ്റവും പ്രശസ്തമായ ഒരു വർത്തമാന പത്രത്തിന്റെ ഹെഡ് ഓഫീസ്

നഗരത്തിന്റെ ഒത്തനടുവിലായി തലയെടുപ്പോടെ ഉയർന്നു നിൽക്കുന്ന പത്തുനിലകെട്ടിടം

അതിനു താഴെയായി വിശാലമായൊരു അണ്ടർഗ്രൗണ്ട് പാർക്കിംഗ്

സമയം പത്തുമണിയോടടുക്കുന്നതനുസരിച്ച് അവിടേക്കുള്ള ആളുകളുടെയെണ്ണം വർധിച്ചു തുടങ്ങി… ഒപ്പം തിരക്കുകളും… എല്ലാവരും അവരവരുടെ ജോലികളിൽ മുഴുകി

ഇതേ സമയമാ കെട്ടിടത്തിനു മുൻപിലുള്ള റോഡരികിൽ പഴയൊരു അംബാസിഡർ വന്നു നിന്നു

അതിൽ നിന്നൊരു ചെറുപ്പക്കാരൻ ഡോറ് തുറന്നു പുറത്തിറങ്ങി… പഴകി തേഞ്ഞു കീറലുകൾ കൊണ്ടു സമൃദ്ധമായ ഒരു കറുത്ത ഡെനിം ഷർത്തും പാന്റുമായിരുന്നു വേഷം

അലസമായി മുൻപിലേക്ക് നീണ്ടു വളർന്ന ചെമ്പൻ മുടി… മുഖമാകെ കറുത്ത കുറ്റി താടികൾ അതിനേക്കാൾ അല്പം കൂടി കനത്തിൽ വെട്ടിയൊതുക്കിയ മീശയും

ഇതേ സമയം വിലകൂടെയൊരു ആഡംബര കാർ അവനെ മറികടന്നു മുൻപിലേക്ക് പോയി അവന്റെ കാറിനും കുറച്ചു കൂടി അകലത്തിൽ നിർത്തി

ആ വണ്ടിയുടെ ഭംഗി ആസ്വദിച്ചു കൊണ്ടവൻ

പോക്കറ്റിൽ നിന്നുമൊരു സിഗരറ്റെടുത്തു ചുണ്ടോടു ചേർത്തു

അത് കത്തിക്കാനായി ഒരു ലൈറ്റർ അവൻ സ്വന്തം പോക്കറ്റിൽ തിരഞ്ഞു.. കിട്ടിയില്ല… ശേഷം കാറിനുള്ളിലും പരതി..

പൊടുന്നനെ നിരാശ നിറഞ്ഞൊരു മുഖത്തോടെയവൻ തനിക്കു മുൻപിൽ നിർത്തിയിരുന്ന കാറിനടുത്തേക്ക് നടന്നു

ആ കാറിന് പിന്നിലെ BMW എന്നെഴുതിയ ലോഗിയിൽ വിരലുകൾക്കൊണ്ടൊന്നു തഴുകിയ ശേഷം മുൻപിലെ ഡോറിനടുത്തേക്ക് നടന്നു

കറുത്ത കൂളിംഗ് ഷീറ്റുകൊണ്ടു മറച്ചയാ കാറിനുള്ളിൽ എന്താണെന്ന് വെളിയിൽ നിന്ന് നോക്കുന്നവർക്ക് കാണാൻ സാധിക്കില്ലായിരുന്നു

അവനാ ഡോറിനു മുൻപിലെത്തിയപ്പോളേക്കും ആ വിൻഡോ ഗ്ലാസ്സ് താഴേക്ക് താഴ്ന്ന് പോയി

കോട്ടും സ്യൂട്ടും ധരിച്ചൊരു മധ്യവയസ്കൻ ആയിരുന്നു ഡ്രൈവിംഗ് സീറ്റിൽ

“മാച്ച് ബോക്സ്‌ ഉണ്ടോ സർ…?

കാറിനുമുകളിൽ ഒരു കൈ വച്ചു കുനിഞ്ഞുകൊണ്ടവൻ ചോദിച്ചു

അയാൾ അവനെയും അവന്റെ ചുണ്ടിൽ കടിച്ചു പിടിച്ചിരുന്ന സിഗരിറ്റിനെയും ഒന്ന് നോക്കി.. പിന്നെ ഡാഷ് ബോർഡ് തുറന്നൊരു ലൈറ്റ്ർ എടുത്തവനു കൊടുത്തു

അവനത് നിറഞ്ഞൊരു ചിരിയോടെ വാങ്ങി സിഗരിറ്റിനു നേരെപിടിച്ചു കത്തിച്ചു

“എന്താ കാണണമെന്ന് പറഞ്ഞത്…?

മുൻപിലേക്ക് നോക്കിക്കൊണ്ടയാൾ ചോദിച്ചു.. തീരെ താല്പര്യമില്ലാത്ത ഭാവത്തോടെ.. എന്നാൽ അവനൊന്നും കേൾക്കാത്ത മട്ടിൽ നിന്ന് സിഗരറ്റിൽ നിന്ന് ഒരു പുകയെടുത്തു…

പിന്നെ പതിയെ വാ തുറന്നു പുക പുറത്തേക്ക് ഊതി അത് വായുവിൽ ഇല്ലതാവുന്നത് നോക്കി നിന്നു

“രണ്ടു വർഷം മുൻപ് ഇതുപോലൊരു രാവിലെ ഞാൻ സാറിനെ കാണാൻ വന്നത് ഓർമ്മ ഉണ്ടോ…?

അവൻ അയാളെ നോക്കി ചോദിച്ചു.. എന്നാൽ അയാളൊന്നും മിണ്ടിയില്ല..

“അന്ന് സാറിന്റെ വണ്ടി ഇതല്ലായിരുന്നു…

വേഷവും…”

ഒരു ചെറുചിരിയോടവൻ പറഞ്ഞു നിർത്തി…അമർഷം നിറഞ്ഞൊരു മുഖത്തോടെ കാറിൽ നിന്നയാൾ അവനെ നോക്കി

“നിനക്കെന്താ പറയാനുള്ളത്…ഞാൻ നിന്നെപോലെയല്ല… ഒരുപാട് തിരക്കുകൾ ഒണ്ട്…ഇല്ലാത്ത നേരം നോക്കി ആണ് നിനക്ക് വേണ്ടി ഞാനിപ്പോ വന്നത്.. അതുകൊണ്ട് പറയാൻ ഉള്ളത് എന്താണെങ്കിലും അത് വളച്ചുകെട്ടലുകളില്ലാതെ പറയാൻ നോക്ക്..”

അയാളത് പറയുമ്പോഴും അവന്റെ മുഖത്തെ ചിരി മാഞ്ഞിരുന്നില്ല

“ചൂടാവല്ലേ സാറെ… എനിക്കറിയാം സാറിന്റെ തിരക്കുകൾ.. ഈ തിരക്കുകൾ ഉണ്ടാവാൻ ഞാനും ഒരു കാരണക്കാരൻ ആണല്ലോ…?

“എബി പ്ലീസ്… എന്താണ് പറയാൻ ഉള്ളത്… എനിക്കിന്നൊരു മീറ്റിംഗ് ഉള്ളതാണ്… സമയം വൈകുന്നു..?

അയാൾ അവനോട് പറഞ്ഞു.. ഒരു നിമിഷം ആലോചനയിലാണ്ട അവൻ പറഞ്ഞു തുടങ്ങി

“DK ഇനിയില്ല….”

“What….?

അതും പറഞ്ഞയാൾ ഡോർ തുറന്നു പുറത്തു ചാടി… അപ്രതീക്ഷിതമായി ഡോർ തുറന്നത് കണ്ട എബി പിറകിലേക്ക് മാറി.. പിന്നെയത് പ്രതീക്ഷിച്ചത് പോലെ അവനൊന്നു ചിരിച്ചു..

“Dk… അവൻ മരിച്ചോ… എപ്പോ.. എങ്ങനെ..?

തുടരാത്തുടരേ ചോദ്യങ്ങളുടെ ഒരു കൂമ്പാരം തന്നെ അവന്റെ മുൻപിലേക്ക്  വന്നപ്പോഴും അവൻ ചിരിച്ചുകൊണ്ട് സിഗററ്റിന്റെ പുക ഉള്ളിലേക്കെടുക്കുന്ന തിരക്കിലായിരുന്നു

“ഹാ പറഞ്ഞു തീർന്നില്ല സാറെ… അതിനുമുന്പേ തോക്കിൽ കേറി വെടി വക്കല്ലേ…”

അവൻ അയാളോട് പറഞ്ഞു…ഒരു നിമിഷം അയാൾ നിശബ്ദതനായി… എങ്കിലും എന്താണ് സംഭവിച്ചതെന്നറിയാനുള്ള ഒരു ത്വര ആയാളിൽ കാണാമായിരുന്നു

“DK മരിച്ചില്ല… പക്ഷെ മരിക്കുന്നതിനേക്കാൾ പരിതാപകരമായ ഒരവസ്ഥയിലാക്കി അവനെ….”

എബിയുടെ വാക്കുകളിൽ നിന്നുമൊന്നും മനസിലാവാതെ അയാൾ അവനെ നോക്കി

“മനസിലായില്ലല്ലേ… സാറിനോർമ്മ ഉണ്ടോ 2 വർഷം മുൻപേ സാറിന് മുൻപിൽ വന്നു ഞാൻ പറഞ്ഞത്…?

ഉണ്ടെന്നയാൾ തലകുലുക്കി…

—-———————-

2വർഷം മുൻപൊരു പകൽ….

“സർ എനിക്ക് ഒരു പ്രധാനപ്പെട്ട കാര്യം പറയാനുണ്ട്…”

“ഇപ്പൊ പറ്റില്ല.. താൻ പോയിട്ട് പിന്നെ വാ… നൂറുക്കൂട്ടം പണിയുണ്ട് ഇവിടെ അതിനിടക്ക് ആണ്….”

തലക്ക് കൈയും കൊടുത്തു കസേരയിൽ കുനിഞ്ഞിരുന്നുകൊണ്ട് ജോൺ പറഞ്ഞു…

“സാറിന്റെ തലവേദനക്ക് കാരണം വാൾട്ടർ ഷാ മർഡർ കേസ് അല്ലെ..?

അതുവരെ തലകുനിച്ചിരുന്ന ജോൺ ഒരു പുച്ഛചിരിയോടെ തലയുയർത്തി മുൻപിൽ നിൽക്കുന്ന പയ്യനെ നോക്കി… ഇരുപത്തിരണ്ടിനടുത്ത് മാത്രം പ്രായം തോന്നിക്കുന്ന ഒരു ചെറുക്കൻ… താഴെ തട്ടിലാണ് ജീവിതം എന്ന് എടുത്തു കാണിക്കാൻ മാത്രം ഉതകുന്ന വസ്ത്രധാരണം

+4

0