ആ തീരുമാനം കേട്ടപ്പോൾ ഏറ്റവും കൂടുതൽ ആഗ്രഹിച്ചതും സന്തോഷിച്ചതും തനുവാണ്. സ്വന്തം വീടുവിട്ട് മറ്റൊരു നാട്ടിലേക്ക് പഠിക്കാൻ പോകുമ്പോൾ, തന്റെ പ്രിയ കൂട്ടുകാരി ജാനുവിന്റെ വീട്ടിൽ അവളോടൊപ്പം താമസിച്ച് പഠിക്കാമല്ലോ എന്നതായിരുന്നു അവളുടെ മനസ്സിൽ നിറയെ. ആ വലിയ ആഗ്രഹമാണ് ഇപ്പോൾ ഈ മഴയത്ത്, ഈ ചെറിയ ബസ് സ്റ്റോപ്പിൽ വന്നു നിൽക്കുന്നത്.
അവർക്കൊപ്പം കൊച്ചിയിലെ ക്യാമ്പസ് കാലം തൊട്ടേ കൂട്ടായി നടക്കുന്ന ആ രണ്ട് ആൺകുട്ടികളും(അതുൽ, നീരജ് ) ചിരിച്ചുകൊണ്ട് ജാനകിയോട് കുശലാന്വേഷണങ്ങൾ തുടങ്ങി.
“ഇനി ഇവിടെ നിൽക്കണ്ട, കാറ്റടിച്ച് നല്ല തണുപ്പുണ്ട്. ബാക്കി വിശേഷങ്ങളൊക്കെ നമുക്ക് വീട്ടിൽ പോയിട്ട് പറയാം. വാ… അച്ഛനും അമ്മയും നിങ്ങൾക്കായി കാത്തിരിപ്പുണ്ട്.”
ജാനകി അവരെ നോക്കി പറഞ്ഞു…..
ശേഷം വിശേഷങ്ങൾക്ക് വിരാമമിട്ട് മഴ തോർന്ന, നനഞ്ഞ പാടവരമ്പിലൂടെ അവർ ജാനകിയുടെ വീട് ലക്ഷ്യമാക്കി നടന്നു തുടങ്ങി…..
ഇരുവശത്തും കാറ്റിലാടുന്ന നെൽച്ചെടികളും, നനഞ്ഞ മണ്ണിന്റെ ഗന്ധവും ആ അന്തരീക്ഷത്തെ കൂടുതൽ മനോഹരമാക്കിയിരുന്നു. കൂട്ടുകാർ അവർക്ക് പിന്നിലായി ഓരോരോ തമാശകൾ പറഞ്ഞ് നടക്കുന്നുണ്ട്. ഏറ്റവും മുന്നിലായി നടക്കുകയായിരുന്ന ജാനകിയുടെ മുഖത്ത് ചെറിയൊരു ആശങ്കയുണ്ടായിരുന്നു. അവൾ നടത്തത്തിന്റെ വേഗതയൊന്ന് കുറച്ച്, തനുവിന്റെ അടുത്തേക്ക് ചേർന്നു നടന്നു.
“തനു…”
ജാനകി പതിയെ വിളിച്ചു,
“നിനക്ക് എന്റെ തറവാട് ഇഷ്ടപ്പെടുമോ എന്നൊന്നും എനിക്കറിയില്ല കേട്ടോ. നിന്റെ കൊച്ചിയിലെ ആ വലിയ ബംഗ്ലാവിലെ പോലത്തെ ആഡംബരങ്ങളും സൗകര്യങ്ങളൊന്നും ഞങ്ങളുടെ വീട്ടിലുണ്ടാവില്ല…”
അവളുടെ ആ വിമുഖത കണ്ടതും തനു ചിരിച്ചുകൊണ്ട് അവളുടെ തോളിലൂടെ കയ്യിട്ടു.
“അതൊന്നും സാരമില്ലെടീ ജാനു… അതൊന്നും ഞാൻ നോക്കുന്നില്ലല്ലോ,”
വളരെ കൂളായി അവൾ മറുപടി പറഞ്ഞു.
പുറത്തേക്ക് അങ്ങനെ പറഞ്ഞെങ്കിലും, തനു അത്ര നിസ്സാരക്കാരിയായിരുന്നില്ല. കൊച്ചിയിലെ വലിയൊരു സമ്പന്ന കുടുംബത്തിന്റെ പശ്ചാത്തലമാണ് അവളുടേത്. പണത്തിന്റെ അഹങ്കാരവും തന്നിഷ്ടവും അവളുടെ സ്വഭാവത്തിൽ നന്നായി കലർന്നിരുന്നു. ആരെയും തന്റെ ചൊൽപ്പടിക്ക് നിർത്തണമെന്ന വാശിയും, മറ്റുള്ളവരെ തന്റെ കീഴിൽ മാത്രം കാണാൻ ആഗ്രഹിക്കുന്ന പ്രകൃതവുമാണ് അവളുടേത്.
ക്യാമ്പസിലായാലും പുറത്തായാലും അവളുടെ വാക്കുകൾക്ക് അപ്പുറം ആരും കടക്കുന്നത് അവൾക്ക് ഇഷ്ടമല്ലായിരുന്നു. എന്നാൽ, ആ വലിയ അഹങ്കാരിയുടെ മുന്നിൽ യാതൊരു നിബന്ധനകളുമില്ലാതെ ഇടം പിടിച്ച ഒരേയൊരാൾ ജാനകിയായിരുന്നു. ലോകത്ത് തനു തന്റെ ഒരേയൊരു ആത്മാർത്ഥ സുഹൃത്തായി കണക്കാക്കിയിരുന്നത് ജാനുവിനെ മാത്രമാണ്. അവളുടെ മുന്നിൽ മാത്രം തനുവിലെ ആ അധികാരഭാവം അലിഞ്ഞില്ലാതാകും.
പക്ഷെ തനു കൂളായി മറുപടി പറഞ്ഞെങ്കിലും, ജാനകിയുടെ വീട് എങ്ങനെയുള്ളതായിരിക്കും എന്ന ചിന്ത അവളുടെ മനസ്സിലൂടെ പാഞ്ഞുപോകുന്നുണ്ടായിരുന്നു. ജാനകിയുടെ കുടുംബം അത്യാവശ്യം സാമ്പത്തികമുള്ളവരാണെന്ന് തനുവിന് അറിയാം. എങ്കിലും ആ തറവാട് തന്റെ നിലവാരത്തിന് ഒത്തതാണോ എന്നൊരു സംശയം അവൾക്കുണ്ടായിരുന്നു.
പാടവരമ്പിലൂടെ നടക്കുമ്പോഴും അവളുടെ ഉള്ളിലിരുപ്പ് മറ്റൊന്നായിരുന്നു: ‘ഇനിയിപ്പോ എന്തെങ്കിലും ആവട്ടെ… കാണാൻ കൊള്ളാത്ത വല്ല പട്ടിപ്പുരയോ പഴയ കുടിലോ മറ്റോ ആണെങ്കിൽ അവിടെ നിൽക്കേണ്ട കാര്യമില്ലല്ലോ. അവിടുന്ന് മാറി വേറെ നല്ലൊരു ഫ്ലാറ്റോ വീടോ എടുത്ത് അങ്ങോട്ട് താമസം മാറ്റാം. അത്രേയുള്ളൂ.’ ആ ചിന്തയിൽ അവൾ വീണ്ടും പഴയ അഹങ്കാരിയായ തനുവായി മാറിത്തുടങ്ങി…..
പാടവരമ്പിലൂടെയുള്ള നടത്തത്തിനിടയിലാണ് തൊട്ടടുത്ത കണ്ടത്തിൽ ആവേശകരമായ ചെളിപുരണ്ട ഫുട്ബോൾ മത്സരം നടക്കുന്നത് അവരുടെ ശ്രദ്ധയിൽപ്പെട്ടത്.