അടുത്ത കുറച്ചു ദിവസങ്ങളിൽ രാഹുൽ വളരെ മാന്യനായി അഭിനയിക്കാൻ തുടങ്ങി. അമ്മയോടും ഗ്രേസിനോടും അവൻ നല്ല രീതിയിൽ സംസാരിച്ചു. ലതികയ്ക്ക് അത് വലിയ സന്തോഷം നൽകി. “കണ്ടോ ഗ്രേസ്, അവൻ പാവമാണ്. നിനക്ക് അവനെ തെറ്റിദ്ധരിച്ചതാണ്,” ലതിക ഇടയ്ക്കിടെ പറയുമായിരുന്നു.
എന്നാൽ ഒരു രാത്രി, ഗ്രേസ് തന്റെ മുറിയിൽ ഉറങ്ങാൻ കിടക്കുമ്പോൾ പുറത്ത് എന്തോ ഒരു ശബ്ദം കേട്ടു. അവൾ എഴുന്നേറ്റു വാതിൽ തുറന്നു നോക്കി. ഇടനാഴിയിലെ ലൈറ്റുകൾ അണഞ്ഞിരുന്നു. ഇരുട്ടിൽ ആരോ നിൽക്കുന്നതുപോലെ അവൾക്ക് തോന്നി.
”രാഹുൽ? നീയാണോ അവിടെ?” അവൾ വിളിച്ചു ചോദിച്ചു.
മറുപടിയൊന്നുമുണ്ടായില്ല. പെട്ടെന്ന് ഒരു നിഴൽ അവളുടെ മുറിക്ക് മുന്നിലൂടെ മിന്നിമറഞ്ഞു. ഗ്രേസിന്റെ ഉള്ളിൽ പണ്ട് മുതലേയുള്ള പോലീസുകാരി ഉണർന്നു. അവൾ പതുക്കെ ശബ്ദമുണ്ടാക്കാതെ ആ നിഴലിന് പിന്നാലെ നടന്നു. അത് നേരെ പോയത് രാഹുലിന്റെ മുറിയിലേക്കാണ്.
രാഹുൽ തന്റെ മുറിയിൽ കസേരയിലിരുന്നു ചിരിക്കുകയായിരുന്നു. അവൻ ലാപ്ടോപ്പിൽ എന്തോ നോക്കുന്നുണ്ടായിരുന്നു. ഗ്രേസ് വാതിലിൽ തട്ടി.
”എന്താ മാഡം, ഉറക്കം വരുന്നില്ലേ?” രാഹുൽ ചോദിച്ചു. അവന്റെ കണ്ണുകളിൽ ഒരു വല്ലാത്ത തിളക്കമുണ്ടായിരുന്നു.
”രാഹുൽ, നീ എന്തെങ്കിലും ഒപ്പിക്കാൻ നോക്കുന്നുണ്ടെങ്കിൽ അത് വേണ്ട. നിന്റെ കളികൾ എന്റെ അടുത്ത് നടക്കില്ല,” ഗ്രേസ് താക്കീത് നൽകി.
”ഞാൻ എന്ത് ചെയ്യാനാണ് മാഡം? ഞാൻ ഇവിടെയിരുന്ന് പഠിക്കുകയായിരുന്നു. നിയമപുസ്തകങ്ങൾ മറിച്ചു നോക്കുമ്പോൾ ചില രസകരമായ കാര്യങ്ങൾ കണ്ടു. ഒരാളെ മാനസികമായി തളർത്താൻ ശാരീരികമായ ഉപദ്രവം തന്നെ വേണമെന്നില്ലല്ലോ, അല്ലേ?”
ഗ്രേസിന് എന്തോ ഒരപകടം മണത്തു. രാഹുൽ സമാധാനമായി ഇരിക്കുകയല്ല, മറിച്ച് തനിക്കെതിരെ എന്തോ വല നെയ്യുകയാണെന്ന് അവൾക്ക് ഉറപ്പായി. ഈ വീട്ടിലെ താമസം അത്ര എളുപ്പമാകില്ലെന്ന് അവൾക്ക് മനസ്സിലായി.
രാഹുൽ തന്റെ മനസ്സിൽ പറഞ്ഞു: ഇത് തുടക്കം മാത്രമാണ് ഗ്രേസ്. നീ എന്നെ ജയിലിനുള്ളിലാക്കി അപമാനിച്ചു. ഇനി ഈ വീടിനുള്ളിൽ നിന്റെ ഓരോ നിമിഷവും എന്റെ നിഴലിലായിരിക്കും.
***************************************************
രാഹുലിന്റെ മനസ്സിൽ പകയുടെ കനൽ എരിയുകയായിരുന്നു. ഗ്രേസിനെ എങ്ങനെയും ലതികയുടെ മുന്നിൽ നാണംകെടുത്തണം എന്ന ലക്ഷ്യത്തോടെ അവൻ ഒരു കുരുക്ക് തയ്യാറാക്കി. എന്നാൽ ഗ്രേസ് ആന്റണി വെറുമൊരു പോലീസുകാരി മാത്രമല്ല, അനുഭവങ്ങൾ കൊണ്ട് പഴുത്ത ഒരു സ്ത്രീയാണെന്ന് അവൻ മറന്നുപോയി.
രാഹുൽ ആവിഷ്കരിച്ച പ്ലാൻ ലളിതമായിരുന്നു. ഗ്രേസിന്റെ മുറിയിലുണ്ടായിരുന്ന വിലപ്പെട്ട ചില ഫയലുകളും ലതികയുടെ ബാങ്ക് രേഖകളും അപ്രത്യക്ഷമായാൽ, സ്വാഭാവികമായും സംശയം ഗ്രേസിലേക്ക് തിരിയും. തന്റെ സ്വകാര്യ ജീവിതത്തിലെ പ്രശ്നങ്ങൾ കാരണം ഗ്രേസ് മാനസികമായി തളർന്നിരിക്കുകയാണെന്നും അതുകൊണ്ട് അവൾ ഇത്തരം അവിവേകങ്ങൾ കാണിക്കുന്നു എന്നും അമ്മയെ വിശ്വസിപ്പിക്കാനായിരുന്നു അവന്റെ നീക്കം.
അന്ന് ഉച്ചയ്ക്ക് ലതിക ബാങ്കിലായിരുന്ന സമയത്ത്, രാഹുൽ പതുക്കെ ഗ്രേസിന്റെ മുറിയിൽ കടന്നു. അവൾ കുളിക്കാൻ പോയ തക്കം നോക്കി അവളുടെ ബാഗിൽ നിന്നും പ്രധാനപ്പെട്ട ചില രേഖകൾ അവൻ എടുത്തു മാറ്റി. അവ തന്റെ അലമാരയുടെ ഉള്ളിൽ ഒളിപ്പിച്ചു വെച്ച ശേഷം അവൻ ഒന്നുമറിയാത്തവനെപ്പോലെ മുറിയിലേക്ക് മടങ്ങി.
വൈകുന്നേരം ലതിക വന്നപ്പോൾ രാഹുൽ മനഃപൂർവ്വം ഒരു നാടകം തുടങ്ങി. “അമ്മേ, എന്റെ ചില സർട്ടിഫിക്കറ്റുകൾ കാണാനില്ല. അമ്മ എടുത്തോ?” അവൻ പരിഭ്രമം അഭിനയിച്ചു.
ലതിക അത് അന്വേഷിക്കാൻ തുടങ്ങിയപ്പോൾ, രാഹുൽ പതുക്കെ ഗ്രേസിന്റെ മുറിയിലേക്ക് വിരൽ ചൂണ്ടി. “മാഡം വന്ന ശേഷം ഇവിടെ പലതും അങ്ങോട്ടും ഇങ്ങോട്ടും മാറുന്നുണ്ട്. ഒന്ന് ചോദിച്ചു നോക്കിയാലോ?”
എന്നാൽ ഗ്രേസ് അപ്പോൾ മുറിയിൽ നിന്നും പുറത്തേക്ക് വന്നു. അവളുടെ മുഖത്ത് ഭയമോ പരിഭ്രമമോ ഉണ്ടായിരുന്നില്ല. മറിച്ച്, ഒരു പുഞ്ചിരിയോടെ അവൾ രാഹുലിനെ നോക്കി.