ഞാൻ പിന്നെ മറുത്തൊന്നും പറയാൻ നിന്നില്ല.. നേരെചൊവ്വേ ഒരു ചായപോലും ഉണ്ടാക്കാൻ അറിയാത്ത ഞാനൊക്കെ എന്ത് പറയാനാ
“നീ അത് വിട്.. ഇന്ന് എന്റെ കൊറച്ചു ഫ്രഡ്സ് വരുന്നുണ്ട്…”
ചേച്ചി : അതിന്…?
എന്നെ മൈൻഡ് ചെയ്യാതെ ചെയ്യുന്ന ജോലിയിൽ തന്നെ ശ്രദ്ധ കൊടുത്തുകൊണ്ട് ചേച്ചി പറഞ്ഞു
“അതിന് ഒന്നുമില്ല… അമ്മുവും കാണും കൂടെ..”
അവളുടെ പേര് പറഞ്ഞതെ ചേച്ചി എന്നെ ഇടം കണ്ണിട്ടൊന്ന് നോക്കി.. പിന്നെ വല്യ ഭാവ വ്യത്യാസം ഒന്നുമില്ലാതെ പാചകത്തിൽ ശ്രദ്ധിച്ചു
ചേച്ചി : വരട്ടെ… എനിക്കുമോന്ന് കാണാമല്ലോ നിന്റെ അമ്മുവിനെയൊന്ന്
“അതാ എനിക്ക് പറയാൻ ഉള്ളെ… ഞാൻ ഒരുവിധത്തിൽ കരക്കടിപ്പിച്ചു കൊണ്ടുവരുന്ന തോണിയാ അത്..നീയൊരു പ്രേമവിരോധി ആണെന്ന് കരുതി ഇതിലും ഉടക്കൊന്നും വെക്കരുത്…”
ചേച്ചി : ഓ ഞാനായിട്ട് ഒടക്കാനും ഒടിക്കാനും വരുന്നില്ല… പിന്നെ നിന്റെ അമ്മുവും കുമ്മുവുമൊക്കെ വരുന്നത് കൊള്ളാം.. എന്റെ മെക്കിട്ടേങ്ങാനും കേറാൻ വന്നാൽ… തൂക്കി എടുത്തു വെളിയിൽ കളയും എല്ലാത്തിനെയും..
ഒരു ഭീഷണി സ്വരത്തിൽ ചേച്ചി പറഞ്ഞു
“എടി ചേച്ചി അവരൊന്നും നീ കരുതുന്നത് പോലെ പ്രശ്നക്കാർ ഒന്നുമല്ല… എല്ലാം പാവങ്ങളാ..”
ചേച്ചി : നിന്റെ കൂട്ടുകാരല്ലേ… മനസിലാവും… മോൻ ചെല്ല്.. എനിക്ക് പിടിപ്പത് പണിയുള്ളതാ
ചേച്ചി അതും പറഞ്ഞെന്നെ ഹാളിലേക്ക് തള്ളി വിട്ടു
എന്തായാലും ഇവിടുത്തെ കാര്യം ഓക്കേ ആയി.. ഇനി വരുന്നതുങ്ങളുടെ കാര്യം എന്താവോ എന്തോ
ചേച്ചി : ടാ ഒന്ന് നിന്നെ..
ഓരോന്നാലോചിച്ചു നടക്കുമ്പോ ആണ് ചേച്ചി പിന്നിൽനിന്ന് വിളിച്ചത്
“എന്നാ….?
ചേച്ചി : നീ ഒന്ന് പുറത്തു പോണം.. കൊറച്ചു സാധനങ്ങൾ വാങ്ങാൻ ഒണ്ട്
“ഓ അതാണോ… എന്താ വാങ്ങേണ്ടേ..?
ഗ്യാസ് ഓഫ് ചെയ്ത് ചേച്ചി റൂമിലേക്ക് പോയി
കൊറച്ചു കഴിഞ്ഞു ഒരു പേപ്പറിന്റെ കഷ്ണവുമായി വന്നു
വാങ്ങാൻ ഉള്ള സാധനങ്ങളുടെ ലിസ്റ്റ് ആയിരുന്നത്
“ഇത് ഒരുപാടൊണ്ടല്ലോ..നീയെന്താ ഇവിടെ പച്ചക്കറിക്കട തുടങ്ങാൻ പോണോ..?
ലിസ്റ്റ് കണ്ട് ഞാൻ ചോദിച്ചു
ചേച്ചി : വേണേൽ വാങ്ങിയാൽ മതി.. അല്ലേ നിന്റെ ഫ്രഡ്സ് വന്നു പച്ചവെള്ളം കുടിച്ചിട്ട് പൊക്കോട്ടെ
ഓ.. ഇത് അവർക്ക് വേണ്ടി ഉള്ളതായിരുന്നല്ലേ
“ശെരി ശെരി… ഞാൻ പോയിട്ട് വരാം..”
ഞാൻ പുറത്തേക്ക് നടന്നു
ചേച്ചി : നിനക്ക് പൈസ വേണ്ടേ..അവിടെപ്പോയി ചിരിച്ചു കാണിച്ചാലൊന്നും സാധനം കിട്ടുകേല
ജോലി ഉള്ളതിന്റെ അഹങ്കാരം കാണിക്കുവാണോ ചേച്ചി… അതും ഈ എന്നോട്
“ഇതൊക്കെ വാങ്ങാൻ ഉള്ള കാശൊക്കെ എന്റേൽ ഉണ്ടെടി ഭൂതമേ..”
അവളെ ഇടക്ക് സ്നേഹം കൂടുമ്പോൾ ഇതുപോലെ ഓരോന്ന് വിളിക്കും.. എന്തോ ചേച്ചിക്ക് അത് കേൾക്കുമ്പോൾ കലി ഇളകും
ചേച്ചി : അത് നിന്റെ മറ്റവളെ പോയി വിളിക്കെടാ..
“കൊറച്ചു കഴിഞ്ഞു വരുന്നുണ്ട്.. നേരിട്ടങ് വിളിച്ചാൽ മതി..”
അതും പറഞ്ഞു ഞാൻ പുറത്തേക്ക് ഓടി.. അല്ലെങ്കിൽ ഇന്നിവിടെ അടി നടക്കും
വാങ്ങാൻ ഒരുപാട് സാധനങ്ങൾ ഉള്ളത്കൊണ്ട് ഞാൻ കാറെടുത്താണ് ഇറങ്ങിയത്.. അല്ലേലും സ്കൂട്ടിയിൽ ഇത്രയും സാധനങ്ങൾ വച്ച് ഞാൻ എങ്ങനെ വരാനാണ്
കടയിലെ തിരക്ക് കാരണം വിചാരിച്ചതിലധികം സമയമെടുത്തു
ഒരു കടയിൽ കിട്ടാത്തത് വാങ്ങാൻ അടുത്തതിൽ കേറണം.. അവിടെ ആണേൽ ഞാൻ ഉദ്ദേശിച്ച സാധനം കാണാത്തുമില്ല
ഇനി വാങ്ങാതെയെങ്ങാനും തിരിച്ചു പോയാൽ ചേച്ചിയെന്നെ കൊന്ന് കൊലവിളിക്കും
ഒടുക്കം തപ്പി പെറുക്കി എല്ലാ സാധനങ്ങളും വാങ്ങി… അങ്ങനെ പേഴ്സും കാലിയായി
വലിയ ഡയലോഗൊക്കെ അടിച്ചത് കിട്ടുന്ന പോക്കറ്റ് മണിയിൽ നിന്ന് ഞാൻ സ്വരുക്കൂട്ടി വെച്ച കൊറച്ചു പൈസ കണ്ടാണ്.. അങ്ങനെ അതും തീർന്നു
മര്യാദക്ക് അവൾടെ കയ്യീന്ന് പൈസയും വാങ്ങി പോന്നാൽ മതിയാരുന്നു….
രാവിലത്തെ ട്രാഫിക്കിലൂടെ വലിഞ്ഞു വലിഞ്ഞു ഫ്ലാറ്റിൽ എത്തിയപ്പോ തന്നെ സമയം കൊറേ എടുത്തു
ഒന്നാമത് കാറും എടുത്താണ് പോന്നത്.. അപ്പൊ പിന്നെ പറയണ്ടല്ലോ
മൂന്നാല് കവറും പിടിച്ചു എന്റെ ഫ്ലാറ്റിനടുത്ത് എത്തിയപ്പോ തന്നെ കേട്ടു ഉച്ചത്തിൽ ഉള്ള ആരുടെയൊക്കെയോ സംസാരവും ചിരിയും