ചുറ്റും നിന്ന പിള്ളേരൊക്കെ ഇതുകണ്ട് “വൗ…” എന്ന് പറഞ്ഞ് വായ പൊളിച്ചു.
അമ്മായിമാരും അമ്മാവന്മാരും മുഖത്തോട് മുഖം നോക്കി കള്ളച്ചിരി ചിരിക്കുന്നു!
എല്ലാവരുടെയും മുന്നിൽ വെച്ചുള്ള ഈ സഡൻ PDA (Public Display of Affection) കണ്ട് ഞാനാകെ വിയർത്തു കുളിച്ചുപോയി. എന്റെ അവസ്ഥ കണ്ട് അനു യാതൊരു കൂസലുമില്ലാതെ, ഭയങ്കര നാണമുള്ള ഒരു കുലവധുവിനെപ്പോലെ എന്റെ തൊട്ടടുത്ത് വന്നിരുന്നു. ശേഷം എന്റെ കയ്യിൽ അവളുടെ വിരലുകൾ കോർത്തുപിടിച്ചു.
അവളുടെ ആ തണുത്ത നഖങ്ങൾ എന്റെ ഉള്ളങ്കയ്യിൽ അമർന്നതും എന്റെ ഉള്ളിലുണ്ടായ ആ അനുഭൂതി… ഹോ പറഞ്ഞറിയിക്കാൻ കഴിയാവുന്നതിലും അപ്പുറമായയിരുന്നു….
എല്ലാവരുടെയും ശ്രദ്ധ പതിയെ മാറി തുടങ്ങി. ആ ഗ്യാപ്പിൽ, അനു എന്റെ കയ്യിലെ പിടി ഒന്നുകൂടി മുറുക്കി. ശേഷം എന്റെ ചെവിയോട് ചേർന്ന്, മറ്റാരും കേൾക്കാത്ത ശബ്ദത്തിൽ പതുക്കെ മന്ത്രിച്ചു:
“Good boy… പുറത്ത് എല്ലാവരുടെയും മുന്നിൽ ഇങ്ങനെ അനുസരണയോടെ അടങ്ങിയിരിക്കുന്നതാ നിനക്ക് നല്ലത്. You belong to me!”
അത് കേട്ടതും, ഞാൻ വീണ്ടും എയറിലായി. ഉമ്മ തന്നത് സ്നേഹം കൊണ്ടല്ല, എന്റെ മേലുള്ള അവളുടെ അധികാരം കുടുംബക്കാരെ കാണിക്കാനാണെന്ന് എനിക്ക് കൃത്യമായി മനസ്സിലായി. ഞാൻ ഒരക്ഷരം മിണ്ടാതെ, തൊണ്ടയിലെ വെള്ളം വറ്റി, എന്റെ കയ്യിൽ പിടിച്ചിരിക്കുന്ന ആ കൊടും ഭീകരിയെ നോക്കി ഒരു അവിടെത്തന്നെ ഇരുന്നു…..
________________________________________________
{അങ്ങനെ ദിവസങ്ങളും മാസങ്ങളും കടന്നുപോയി…
അനു… അല്ല,അനു ചൈതന്യ എന്ന ഈ യക്ഷിയുടെ ബുദ്ധിയും പ്ലാനുകളും എനിക്ക് വിചാരിക്കാൻ കഴിയുന്നതിനും അപ്പുറമായിരുന്നു.
ഈ ചുരുങ്ങിയ മാസങ്ങൾ കൊണ്ട് തന്നെ അവൾ എന്റെ വീട്ടിലെ എല്ലാവരുടെയും ഹൃദയം കീഴടക്കിയിരുന്നു. പകലുകളിൽ അവരെ ജീവന് തുല്യം സ്നേഹിക്കുന്ന, സ്നേഹം വാരിവിതറുന്ന നല്ലൊരു മരുമകൾ! എന്നാൽ രാത്രിയായാൽ റൂമിലിരുന്ന് അവരെ മുഴുവൻ പുച്ഛിക്കുകയും കുറ്റം പറയുകയും ചെയ്യുന്ന ഒരു കൊടും ഭീകരി.
എല്ലാവരുടെയും മുന്നിൽ ഞങ്ങൾ ലോകത്തെ ഏറ്റവും മികച്ച, എല്ലാം തികഞ്ഞ ഭാര്യയും ഭർത്താവുമാണ്. എന്നാൽ ഞങ്ങളുടെ ആ മണിയറയുടെ വാതിലടഞ്ഞാൽ… അവിടെ അവൾക്ക് ദാഹിക്കാൻ തുടങ്ങും!
ആദ്യത്തെ കുറച്ച് ആഴ്ചകളിൽ രാത്രികളിൽ മാത്രമായിരുന്നു അവളുടെ ഈ ചോരകുടി. എന്നാൽ പിന്നീടുള്ള ദിവസങ്ങളിൽ കാര്യങ്ങൾ മാറിമറിഞ്ഞു.
അവൾ ഹോസ്പിറ്റലിലേക്ക് പോകാതെ ലീവെടുത്ത് വീട്ടിൽ തന്നെ ഇരിക്കാൻ തുടങ്ങി.
ഷോപ്പിൽ പോകാൻ നിന്ന എന്നെ അവൾ അതിന് അനുവദിച്ചതുമില്ല. വീട്ടിൽ ബാക്കിയുള്ളവരൊക്കെ പണിക്ക് പോയിക്കഴിയുമ്പോൾ ആ വലിയ വീട്ടിൽ ഞാനും അവളും മാത്രമാവും.
പിന്നെ അവൾക്ക് ഇഷ്ടമുള്ളപ്പോഴൊക്കെ അവൾ എന്റെ അടുത്തേക്ക് വരും. ആ സമയം എന്റെ ചോര കൊടുക്കാൻ ഞാൻ വിസമ്മതിച്ചാൽ, അവൾ ഓരോന്ന് പറഞ്ഞ് എന്നെ പേടിപ്പിക്കാൻ തുടങ്ങും…
ആദ്യമൊക്കെ അവൾ കഴുത്തിൽ കടിച്ചു ചോര കുടിക്കുമ്പോൾ എനിക്ക് വലിയ അസ്വസ്ഥതയും വേദനയും ഉണ്ടാകുമായിരുന്നു. എന്നാൽ പിന്നീട് അത് പതിയെ മാറിത്തുടങ്ങി. അവൾ എന്റെ ചോര വലിച്ചുകുടിക്കുമ്പോൾ യാതൊരു പ്രതിരോധവുമില്ലാതെ, വെറുമൊരു ജീവച്ഛവം പോലെ കിടക്കാനേ എനിക്ക് കഴിഞ്ഞിരുന്നുള്ളൂ.
പല ദിവസങ്ങളിലും അവൾ ചോര കുടിച്ച് മയങ്ങിക്കഴിഞ്ഞ ശേഷം, ഞാൻ ആരും കാണാതെ ഇരുട്ടിലിരുന്ന് കണ്ണ് നിറച്ചിട്ടുണ്ട്….
എന്തുകൊണ്ട് എനിക്ക് മാത്രം ഇങ്ങനെ സംഭവിക്കുന്നു എന്നോർത്ത് എന്റെ നെഞ്ച് നീറിപ്പുകഞ്ഞു. പക്ഷേ എന്റെ കണ്ണുനീരിനോ സങ്കടങ്ങൾക്കോ അവളുടെ മുന്നിൽ യാതൊരു വിലയുമില്ലായിരുന്നു. അവൾക്ക് എന്നോടോ ആ വീട്ടിനോടോ യാതൊരു സ്നേഹവുമില്ല, അവൾക്ക് അവിടെ വേണ്ടത് ഒരൊറ്റ കാര്യം മാത്രമാണ്… എന്റെ ചൂടുള്ള ചോര! അത് കിട്ടാനായി അവൾ എന്തും ചെയ്യും.