💖മംഗല്ല്യധാരണം – 11 35അടിപൊളി 

“… അയ്യോ അമ്മ കഴിച്ചോ. പായ എവിടെ ഇരിക്കുന്നു എന്ന് പറഞ്ഞാൽ മതി ഞാൻ എടുത്തോളാം…” പാതിയിൽ കഴിപ്പ് നിർത്തി എഴുനേൽക്കാൻ തുനിഞ്ഞ അമ്മയെ തടഞ്ഞു.

അമ്മ പറഞ്ഞ പ്രകാരം അമ്മയുടെ മുറിയിൽ ഇരുന്ന പായും തലയണയും എടുത്ത് മുറിയിലേക്ക് പോയി. വാതിൽ തുറന്നപ്പോ ആദി ഉറക്കം ആയി. പാവം ക്ഷീണം കാണും. കൊണ്ടുവന്ന പായ തട്ടികുടഞ്ഞു നിലത്ത് വിരിച്ചു.

“…എന്താ നീ കാണിക്കുന്നേ…” പായ കുടയുന്ന സൗണ്ട്കേട്ട് ആദി ഉണർന്ന് എന്നോട് ചോദിച്ചു.

“…താഴെ കിടക്കാൻ പായ വിരിക്കുകയാ…”

“… മാറി കിടക്കാൻ എനിക്ക് പകർച്ചവ്യാധി ഒന്നും ഇല്ല. ഇങ്ങനെ മാറി കിടക്കാൻ ആയിരുന്നെങ്കിൽ അ ഹോസ്പിറ്റലിൽ തന്നെ കിടന്നാൽ മതിയായിരുന്നല്ലോ😡…”

“… ആദിക്ക് കാൽ വയ്യാതിരിക്കയല്ലേ രാത്രി എന്റെ കാലോ മറ്റോ തട്ടി ഒരു ബുദ്ധിമുട്ട് ഉണ്ടാവേണ്ട എന്ന് കരുതിയ താഴെ കിടക്കാം എന്ന് വച്ചേ…”

“…നീ ഒപ്പം കിടന്ന് വല്ലതും ഉണ്ടാവുന്നെങ്കിൽ ഞാൻ അങ്ങ് സഹിച്ചു…”

“… എന്റെ പൊന്നോ ഇതിന്റെ പേരിൽ ഇനി ഒരു പ്രശ്നം ഉണ്ടാക്കണ്ട. ഞാൻ താഴെ കിടക്കുന്നില്ല പോരെ…”

പായും തലയണയും സൈഡിലേക്ക് മാറ്റിവച്ചു കട്ടിലിൽ ആദിയെ കെട്ടിപ്പിടിച്ച് ആ നെഞ്ചിൽ തല വെച്ച് കിടന്നു. ആദി എന്റെ നെറുകയിൽ തലോടികൊണ്ടിരുന്നു.

“… എന്തിനാടി ചിരിക്കണേ…” ആദിയെ കെട്ടിപിടിച്ചു കിടന്ന ഞാൻ കുണുങ്ങി ചിരിക്കുന്നത് മനസ്സിലാക്കി അവൻ ചോദിച്ചു.

“… അല്ല ചില മനുഷ്യരുടെ മാറ്റം ആലോചിച്ചു ചിരിച്ചത. പണ്ട് അറിയാതെ പോലും തന്റെ ദേഹത്ത് തൊടരുത് എന്ന് പറഞ്ഞവർ ഇപ്പൊ എന്റെ ചൂട് പറ്റാതെ ഉറങ്ങാൻ പറ്റില്ല എന്നായി…” അതിന് ആദി എന്നെ ഒന്നുകൂടി ചേർത്ത് പിടിച്ചു മൂർദ്ധാവിൽ ചുംബനം നൽകി.

“… ചാരു നീ ഉറങ്ങിയോ…” ഏറെ നേരത്തിന് ശേഷം ആദി ചോദിച്ചു. ഞാൻ അതിന് ഇല്ല എന്ന് മൂളി.

“… എന്താ നീ ആലോചിക്കുന്നേ…” ആദി പിന്നയും തിരക്കി.

“…ഞാൻ ഇപ്പൊ ഒന്നിനെ പറ്റിയും ആലോചിക്കുന്നില്ല. ഇപ്പൊ എന്റെ മനസ് ശൂന്യമാണ്. ഞാൻ ഏറെ കൊതിച്ചതാ ഇതുപോലെ ആദിയുടെ ഹൃദയസ്പന്ദനവും കേട്ട് കിടക്ക എന്നുള്ളത്. അത് നടന്നതിന്റെ സന്തോഷത്തിലാ ഞാൻ…” പിന്നെ ആദി ഒന്നും ചോദിച്ചില്ല. ആദിയുടെ നെഞ്ചിൽ തലവെച്ചു ഉറക്കത്തിലേക്ക് വീണു.

ഇന്ന് ചാരുവാണ് എന്നെ വിളിച്ചെഴുനേൽപ്പിച്ചത്. ഓഫീസിൽ ഒന്നും പോണ്ടല്ലോ സുഖായിട്ട് ഉറങ്ങാം എന്ന് വിചാരിച്ച സമ്മതിക്കണ്ടേ. പല്ലുതേപ്പും കാപ്പി കുടിയും മരുന്നും കഴിഞ്ഞ് വീണ്ടും കട്ടിലിൽ തന്നെ ഇരുപ്പായി.

“… നീ ഇത് എവിടെ പോയതാ. മനുഷ്യൻ ഇവിടെ ഒറ്റക്ക് ഇരുന്ന് മടുത്തു…”

“…താഴെ പണി ഉണ്ടായിരുന്നു. അതുമാത്രമല്ല എപ്പോഴും ആദിയുടെ കൂടെ തന്നെ ഇരുന്നാൽ അമ്മ എന്ത് പറയും…”

“… എനിക്ക് എന്റെ അമ്മയെ കുറിച്ച് നല്ലപോലെ അറിയാം അമ്മ ഒന്നും പറയില്ല. അതോ ഞാൻ അമ്മയുടെ അടുത്ത് സംസാരിക്കാണോ…”

“… അയ്യോ വേണ്ടേ. ഞാൻ എപ്പോഴും ഇവിടെ കാണും പോരെ…” തൊഴു കൈയോടെ ചാരു എന്നെ നോക്കി പറഞ്ഞു.

“… ഇങ്ങോട്ട് വന്നത് അബദ്ധം ആയെന്ന് തോന്നുന്നു. താഴെ അമ്മുവിന്റെ മുറിയിൽ തന്നെ കിടന്നാൽ മതിയായിരുന്നു…”

“… ആരെങ്കിലും നിർബന്ധിച്ചോ…” പുറത്തേക്ക് വന്ന ചിരി അടക്കിപിടിച്ചു ചാരു പറഞ്ഞു.

“… എടി ദുഷ്ട്ടേ. അല്ലെങ്കിലും എനിക്ക് ഇത് തന്നെ കിട്ടണം. ഞാൻ കൂടുതൽ ഒന്നും പറയുന്നില്ല…”

“… ഞാൻ എപ്പോഴും ആദിയുടെ കൂടെ തന്നെ ഇല്ലേ. പിന്നെ അമ്മ താഴെ ഒറ്റക്ക് എല്ലാ പണിയും ചെയ്യണ്ടേ ഞാൻ ഇവിടെ ഉള്ളപ്പോ ആ പാവത്തിനെ എന്തിനാ കഷ്ടപ്പെടുത്തുന്നെ…” ഇതിനുള്ള മറുപടി എന്റെ പക്കൽ ഇല്ലായിരുന്നു.

ഉച്ചവരെ ഞങ്ങൾ ഓരോ കാര്യങ്ങളും കഥകളും പറഞ്ഞിരുന്നു. ഉച്ചക്ക് പുള്ളികാരി പോയി ചോറുമായി വന്നു.

“…നീ എപ്പോഴാ ആഹാരം കഴിക്കണേ…” ചോർ കൈ കഴുകാൻ പോകവേ ഞാൻ അവളോട് തിരക്കി.

“…ആദി കഴിച്ച് കഴിഞ്ഞ് ഞാൻ താഴെ പോയി കഴിക്കും…”

“…ഓ അങ്ങനെ ആണല്ലേ…”

“… അആഹ് അയ്യോ…. അമ്മേ… അആഹ്…” കഴിക്കാൻ ഇരുന്നപ്പോ വലതുകൈയിൽ പിടിച്ചു ഞാൻ നിലവിളിച്ചു.