മൈസൂര് പോയി വരുന്ന കൂട്ടുകാരികൾ അവിടുത്തെ കാഴ്ചകളൊക്കെ ക്ലാസിലിരുന്ന് പറയുമ്പോ അംബിക വേദനയോടെയാണ് അതെല്ലാം കേൾക്കുക..മൈസൂർ പാലസിനെ പറ്റിയും, വൃന്ദാവൻ ഗാർഡനെ പറ്റിയും, മൃഗശാലയെ പറ്റിയുമൊക്കെ കൂട്ടുകാർ വർണിച്ച് പറയുമ്പോ കരഞ്ഞ് പോയിട്ടുണ്ട്.. കോളേജിൽ പഠിക്കുമ്പോഴും ഒരു യാത്ര പോവാൻ അംബികക്ക് പറ്റിയില്ല.. പിന്നെ ജോലി കിട്ടിക്കഴിഞ്ഞും, അതിന് ശേഷം കല്യാണം കഴിഞ്ഞിട്ടും ഒരു യാത്രക്കുള്ള അവസരം ഒത്ത് വന്നില്ല.. പിന്നെ അംബികക്കും അതിനുള്ള താൽപര്യം പോയി..
എന്നാലും കൂട്ടുകാരികൾ വർണിച്ച് പറഞ്ഞ മൈസൂരെന്ന സ്ഥലം കാണാൻ അംബികക്ക് ഉള്ളിൽ ഒരാഗ്രഹമുണ്ടായിരുന്നു.. ഇപ്പോൾ ഒരവസരം വന്നപ്പോ ആദ്യം അവളോർത്തും മൈസൂരാണ്..
സുരേഷ് എല്ലാവരുമായി സംസാരിച്ചു..അതിൽ നിത്യക്ക് മൈസൂർ തീരെ താൽപര്യമില്ലായിരുന്നു..അവൾ കോളേജിൽ പഠിക്കുമ്പോ പലവട്ടം പോയതാണ്..എന്നാലും മാഡം ഒരു താൽപര്യം പറഞ്ഞതല്ലേ, അത് തന്നെ മതി എന്ന് പറഞ് സുരേഷ് അവളെ സമാധാനിപ്പിച്ചു..വേണുവിനും സുകുമാരനും പിന്നെ ഇന്ന സ്ഥലം എന്നില്ല.. ഇത് വരെ ടൂറ് പോയിട്ടില്ലാത്ത അവർക്ക് എവിടെപ്പോയാലും ഒരുപോലെയാണ്..
മൈസൂരെന്ന് കേട്ടപ്പോ മുസ്തഫാക്ക് ആവേശമായി.. അവന്റെ മൂത്താപ്പാക്ക് അവിടെ ഹോട്ടൽ ബിസിനസാണ്..മൂത്താപ്പ രണ്ട് വർഷം മുൻപ് മരിച്ചെങ്കിലും അയാളുടെ മകൻ അബ്ബാസാണിപ്പോ എല്ലാം നോക്കി നടത്തുന്നത്..മൈസൂരിൽ രണ്ട് ഹോട്ടലുകളുണ്ട് ഇപ്പോ അബ്ബാസിന്.. അവിടെ നാലഞ്ചേക്കർ തോട്ടവും അതിലൊരു വീടും ഉണ്ട്.. മുസ്തഫ പലവട്ടം ആ വീട്ടിൽ പോയി താമസിച്ചതാണ്..
അബ്ബാസിന്റെ ഭാര്യയുടെ പ്രവസത്തിനായി അവരിപ്പോ നാട്ടിലുണ്ട്..ആ വീട് ഒഴിഞ്ഞ് കിടക്കുകയാണ്.. രണ്ട് ദിവസം താമസിക്കാൻ മൈസൂർ ചാമുണ്ഡേശ്വരി ക്ഷേത്രത്തിലേക്ക് പോകുന്ന വഴിയിലുള്ള അബ്ബാസിന്റെ വീട് മുസ്തഫ പറഞ്ഞ് റെഡിയാക്കിയിട്ടുണ്ട്.. അവിടെയാണ് ഈ സംഘം രണ്ട് ദിവസം താമസിക്കുക..
ഈ അബ്ബാസിനും, മുസ്തഫാന്റെ പ്രായമാണ്.. ചെറുപ്പത്തിലേ ബാപ്പാന്റെ കൂടെ മൈസൂരിലെത്തി ഹോട്ടൽ ബിസിനസ് തുടങ്ങിയതാണവൻ.. ഇപ്പോൾ അവിടുത്തെ ഒരു നാട്ടുകാരൻ തന്നെയാണ് അബ്ബാസ്.. തനി കേരളാ ഫുഡ് കിട്ടുന്ന അവന്റെ ഹോട്ടലിൽ നല്ല കച്ചവടമാണ്.. മൈസൂരിൽ ആദ്യമായി ബ്രോസ്റ്റും, കുഴിമന്തിയും, അൽഫാമുമൊക്കെ തുടങ്ങിയത് അവന്റെ ബാപ്പയാണ്..ആ ഹോട്ടൽ ബിസിനസ് കൊണ്ട് അവർ നന്നായി സമ്പാദിച്ചിട്ടുമുണ്ട്..മൈസൂരിൽ തന്നെ നാലഞ്ചേക്കർ സ്ഥലം വാങ്ങി അതിലൊരു വീടും വെച്ചിട്ടുണ്ട്.. തൊടിയിൽ പലവിധ കൃഷികളും ചെയ്യുന്നുണ്ട്..
മൈസൂരിലെ കച്ചവടക്കാർക്കിടയിൽ ഒരു പ്രമാണി തന്നെയാണ് ഇന്ന് അബ്ബാസ്.. മറ്റൊരു സംസ്ഥാനത്ത് പോയി പിടിച്ച് നിൽക്കാൻ വേണ്ടി അൽപം ഗുണ്ടായിസവും അവനുണ്ട്.. ബിസിനസ് മേഖലയിൽ കുറച്ച് ശത്രുക്കളും അബ്ബാസിനുണ്ട്..
✍️… ,”എനിക്കീ മാഡം വരുന്നത് തീരെ പിടിച്ചിട്ടില്ല സുകൂ… ആ സുരേഷ് സാറിന്റെ പണിയാണത്… അയാൾക്കിതെന്തിന്റെ കേടായിരുന്നു…?”..
“ശരിയാ വേണൂ… പെമ്പ്രന്നോത്തിയുടെ ചീത്ത കേൾക്കാതെ നാലെണ്ണം കീറാലോന്നോർത്താ ഞാനീ ടൂറിന് വരാന്ന് തന്നെ സമ്മതിച്ചത്… ഈ മാഡം കൂടെയുണ്ടായാ നടന്നത് തന്നെ…”..
ബസിറങ്ങി ഓഫീസിലേക്ക് നടക്കുകയാണ് സുകുമാരനും വേണുവും.. രണ്ടാൾക്കും അമ്പതിന് മേൽ പ്രായമുണ്ട്..ബസിറങ്ങി ഒന്നര കിലോമീറ്റർ നടക്കണം വില്ലേജോഫീസിലേക്ക്.. ഇവർക്കും പിന്നെ അംബികക്കും മാത്രമേ ഓഫീസിൽ സ്വന്തമായി വണ്ടിയില്ലാത്തതുള്ളൂ..
“ഏത് മാഡമുണ്ടായിട്ടും കാര്യമില്ല… ഞാനടിക്കും… നമ്മളെന്തിനാന്നേ അവരെ പേടിക്കുന്നത്… ?”..
വേണു കൂസലില്ലാതെ പറഞ്ഞു..
“ എന്നാലും മാഡം ഒപ്പമുണ്ടാകുമ്പോ എങ്ങിനെയാ വേണൂ… ?”..