“വാ മോളെ കയറി വാ. ഇനി ഇതാണ് മോളുടെ വീട്. ഇനിയുള്ള കാലം മുഴുവൻ മോള് ജീവിക്കാൻ പോകുന്ന വീട് ”
സുധിയുടെ അച്ഛൻ പറഞ്ഞു.
. സുധിയുടെ അമ്മ ആരതി ഉഴിഞ്ഞു അവരെ അകത്തേക്ക് കയറ്റി.
ആ വലിയ വീട്ടിൽ ശ്യാമയ്ക്ക് എന്തോ അപരിചിതത്വം പോലെ തോന്നി. അത് മനസ്സിലാക്കിയ സുചിത്ര പറഞ്ഞു.
“പേടിക്കേണ്ട. ഇതാണ് ഞങ്ങളുടെ വീട്. അല്ല . നമ്മുടെ വീട്. ഇനി മുതൽ ഇതു ശ്യാമയുടെ കൂടെ വീടാണ്. ശ്യാമയുടെ സ്വന്തം വീട്. അങ്ങനെയേ കാണാവൂ. കേട്ടല്ലോ..? വാ ഞാൻ ആദ്യം തന്നെ അപ്പു ഏട്ടന്റെ റൂം കാണിച്ചു തരാം. എന്നിട്ട് എന്റെ റൂമും. അപ്പു ഏട്ടന്റെ റൂം എന്ന് പറഞ്ഞാൽ ശ്യാമയുടെ റൂം. പക്ഷെ കല്ല്യാണം വരെ എന്റെ റൂമിൽ എന്റെ കൂടെ കിടന്നാൽ മതി. പക്ഷെ ഓരോ സ്വപ്നം കണ്ടിട്ട് എന്നെ ഒന്നും ചെയ്യരുത്. ”
അങ്ങനെ പറഞ്ഞിട്ട് സുചിത്ര ചിരിച്ചു. ശ്യാമയ്ക്ക് അത് കേട്ട് നാണം വന്നു. ആ സമയം സുധിക്ക് ഒരു ഫോൺ വന്നത് കൊണ്ട് പുറത്തായിരുന്നു ഉള്ളത്.
സുധിയുടെ റൂമിൽ കയറിയപ്പോൾ ശ്യാമ ഞെട്ടി പോയി. അവിടെ ശ്യാമയുടെ ഒരു പെൻസിൽ ഡ്രോയിങ് വരച്ചു വെച്ചിരിക്കുന്നു. അതും ഒരുപാട് പേരുടെ നടുവിലൂടെ ആരുടെയോ കൈ പിടിച്ചു നടന്നു പോകുന്ന ശ്യാമയുടെ ചിത്രം. കൂടെ അന്ന് എടുത്ത ഫോട്ടോകൾ ഫ്രെയിം ചെയ്തു ചുറ്റും നിരത്തി വെച്ചിരിക്കുന്നു.
ശ്യാമ ആ പെൻസിൽ ഡ്രോയിങ്ങിൽ തന്നെ നോക്കി നിന്നു. അത് കണ്ട് സുചിത്ര പറഞ്ഞു.
“എല്ലാത്തിന്റെയും തുടക്കം ഈ ചിത്രത്തിൽ നിന്നാണ്.”
അത് കേട്ട് ഞെട്ടി ശ്യാമ സുചിത്രയെ നോക്കി.
“പേടിക്കേണ്ട. ഈ പെണ്ണിന്റെ കാര്യത്തിൽ ഉള്ള തുടക്കം ആണ് പറഞ്ഞത്. ബാക്കിയൊക്കെ ഏട്ടൻ തന്നെ പറയും. പോരെ..?”
ശ്യാമ ആ മുറി മുഴുവനും നോക്കി. അപ്പോൾ ഒരു ഷെൽഫ് തുറന്ന് സുചിത്ര പറഞ്ഞു.
“ഇങ്ങ് വന്നു പറഞ്ഞേ. എന്റെ ഏട്ടത്തിക്ക് ഇതിൽ ഏത് ഡ്രെസ്സ് വേണം. എന്തായാലും സാരി ഉടുക്കേണ്ട. വേറെ എന്ത് വേണം. ചൂരിദാർ, ഷോട്സ്, ട്രൗസർ, പാന്റ്, പാവാടയും ബ്ലൗസും, പിന്നെ ലോങ്ങ് സ്കെർട്ട്. എല്ലാം ഉണ്ട്. എല്ലാം ഏട്ടത്തിക്ക് വേണ്ടി വാങ്ങി വെച്ചതാ.”
ശ്യാമ അതിൽ തന്നെ നോക്കി നിന്നുപോയി. അതിൽ ഒരുപാട് ഡ്രസ്സുകൾ അടുക്കി വെച്ചിരിക്കുന്നു. ശ്യാമ സുചിത്രയെ നോക്കി.
“എന്നെ നോക്കേണ്ട. ഇതൊക്കെ ഏട്ടന്റെ സെലക്ഷൻ ആണ്. എന്റെ ഏട്ടന് ഈ പെണ്ണിനോട് പ്രേമം തോന്നി തുടങ്ങിയത് മുതൽ ഈ ശ്യാമ പെണ്ണിന് വേണ്ടി വാങ്ങി വെച്ചത്. വേഗം കുളിച്ച് ഇതിൽ നിന്നും ഒന്ന് എടുത്തു ഉടുക്കാൻ നോക്ക്. എല്ലാവരും ഈ പെണ്ണിനെ കാത്ത് നിൽക്കുന്നുണ്ടാകും.”
അതും പറഞ്ഞു സുചിത്ര ഒരു തോർത്ത് എടുത്തു കൊടുത്തിട്ട് പറഞ്ഞു.
“കുളിയും ഒരുങ്ങലും മാത്രമേ ഈ റൂമിൽ ഉള്ളൂ. കല്ല്യാണം വരെ എന്റെ കൂടെ കിടന്നോണം. അതുവരെ എനിക്ക് ഈ ശ്യാമ പെണ്ണിനെ കെട്ടിപിടിച്ചു കിടക്കണം ” അങ്ങനെ പറഞ്ഞു കൊണ്ട് ചിരിച്ചു.
താൻ അപ്പു ഏട്ടന്റെ കൂടെ കിടന്നത് ചേച്ചി അറിഞ്ഞോ..? അതുകൊണ്ട് തന്നെ കളിയാക്കിയതാണോ.? ഏയ് അതായിരിക്കില്ല. അതൊന്നും അപ്പു ഏട്ടൻ ചേച്ചിയോട് പറയില്ല. ശ്യാമ മനസ്സിൽ പറഞ്ഞു
” അതേ എന്താ ആലോചിച്ചു നിൽക്കുന്നത്…?. ബാക്കി വേണ്ടതൊക്കെ ബാത്റൂമിൽ ഉണ്ട്. പോയി കുളിച്ചു വാ . അപ്പോഴേക്കും ഞാനും ഒന്ന് കുളിച്ചു വരാം. ”
അതും പറഞ്ഞു സുചിത്ര വാതിൽ ചാരി പുറത്തേക്ക് പോയി.
അപ്പോഴാണ് സുധി അവിടെ എത്തിയത്. സുധിയെ കണ്ട ഉടനെ ശ്യാമ വന്നു കെട്ടിപിടിച്ചു. എന്നിട്ട് കരഞ്ഞു.
“ഈ പെണ്ണിനെ കൊണ്ട് തോറ്റല്ലോ.!! എന്തിനാ എന്റെ ശ്യാമ കുട്ടി കരയുന്നത്.?” സുധി ചോദിച്ചു.
“ഏയ്! ഒന്നും ഇല്ല. സന്തോഷം കൊണ്ടാ. ഞാൻ വേഗം കുളിച്ച് വരാം. ”
“അപ്പോൾ എന്നെ കുളിപ്പിക്കുന്നില്ലേ..?”