പാവമാ എന്റെ അനു, മുൻശുണ്ഠി ഉണ്ടെന്നൊഴിച്ചാൽ, പൊന്നു പോലത്തെ മനസ്സാ അവളുടേത്.. അവളെ നീ ഒരിക്കലും വിഷമിപ്പിക്കല്ല്, എന്റെ അപേക്ഷയാണ്.!” അവൾ പെട്ടെന്ന് എന്റെ കൈയിൽ പിടിച്ചുകൊണ്ടു പറഞ്ഞു
എനിയ്ക്കു എന്ത് പറയണമെന്നറിയാതെ ഞാൻ കുഴങ്ങി,
അവൾ എന്റെ കൈയിൽ നിന്നും പിടി വിട്ടുകൊണ്ട് മാറി പോവാനൊരുങ്ങി
” ആ പിന്നെയൊരു കാര്യം, അവള് കുറച്ചു നാളായി എന്റെ വീട്ടിൽ വരുമ്പോൾ അമ്മച്ചിയുടെ കൂടെ കൂടി കുറെ നോൺ-വെജിറ്റേറിയൻ വിഭവങ്ങൾ ഉണ്ടാക്കാൻ പഠിക്കുന്നത്, ഞാനും കരുതി അവളൊട്ടു കഴിക്കുന്നതുമില്ല, ഇതാർക്കുവേണ്ടിയാണ് എന്ന്, ഇപ്പോഴാണ് ആർക്കുവേണ്ടിയാണ് എന്ന് മനസിലായത്,
എന്റെ പൊന്നു സുനി, അവൾ ഇപ്പൊ നിന്നെ ഒരുപക്ഷെ അല്ല ഉറപ്പായും അവളുടെ ജീവനേക്കാൾ അധികം സ്നേഹിക്കുന്നുണ്ട്, എനിക്കവളെ അറിയാവുന്നതുകൊണ്ടാണ് ഞാനിതു പറയുന്നത്, നീ ഭാഗ്യം ചെയ്തവനാടാ, അവളേ പോലൊരു പെണ്ണിനെ കിട്ടാൻ..!”
ഇത്രയും പറഞ്ഞു താര തിരിഞ്ഞു നടന്നു.!
ഞാൻ എന്ത് ചെയ്യണമെന്നറിയാതെ അടുത്തുകണ്ട ബെഞ്ചിലേക്ക് ഇരുന്നുപോയി, എന്റെ വയറും ഹ്രദയുമായുള്ള പോരാട്ടത്തിൽ വയറു ദയനീയമായി പരാജയപ്പെടുന്നത് ഞാൻ തിരിച്ചറിഞ്ഞു,
എനിയ്ക്കു അവളുടെ ഓരോ ചേഷ്ടകളും പറഞ്ഞറിയിക്കാൻ പറ്റാത്ത എന്തെല്ലാമോ വികാരങ്ങളാണ് ഇത്രയും നാളും നൽകിയത്, പക്ഷെ ഇപ്പോൾ എല്ലാ അർത്ഥത്തിലും ഞാൻ അനുവിന്റെ മുന്നിൽ തോറ്റുപോകുന്നതായി എനിയ്ക്കു തോന്നി
ഞാൻ എന്ത് ചെയ്യണമെന്നറിയാതെ കുഴങ്ങി, അപ്പോഴേക്കും കൂട്ടുകാരികളുടെ കൂടെ പോയ അനു തിരിച്ചു വന്നിരുന്നു, ഏറ്റവും പുറകിലുള്ള ബെഞ്ചിൽ ഞാൻ തരിച്ചിരിക്കുന്നത് കണ്ടു അവൾ വേഗം അങ്ങോട്ടേയ്ക്ക് ഓടി വന്നു,
എന്റെ മുഖത്തെ ഭാവമില്ലായ്മ കണ്ടു അവളാകെ പരവശയായി, അവൾ മെല്ലെ എന്റെ തലയിൽ അവളുടെ തണുത്ത കൈവെച്ചു നോക്കി.!
” പനിയില്ല, പിന്നെ എന്ത് പറ്റി .?”
അവൾ എന്റെ അടുത്തേയ്ക്കു നീങ്ങി നിന്നുകൊണ്ട് ചോദിച്ചു, എനിയ്ക്കു ഇനിയും പിടിച്ചു നില്ക്കാൻ പറ്റിയില്ല, എന്റെ കണ്ണ് പെട്ടെന്ന് നിറഞ്ഞൊഴുകി.,
ഇതുകണ്ട് അനു പെട്ടെന്ന് എന്റെ സൈഡിലായി ബെഞ്ചിലേയ്ക്കിരുന്നു.,
ഞാൻ അറിയാതെ അവളുടെ തോളത്തേയ്ക്കു ചാഞ്ഞു,
എന്റെ കണ്ണുകൾ അപ്പോഴും നിറഞ്ഞൊഴുക്കുന്നുണ്ടായിരുന്നു,
അവൾ മെല്ലെ എന്റെ മുടിയിഴകളിലൂടെ കയ്യോടിച്ചു,
ഞാൻ ഇനിയും ഇങ്ങനെ ഇരുന്നാൽ പൊട്ടിക്കരയുമെന്നു എനിയ്ക്കു തോന്നിപോയി,
ഞാൻ മെല്ലെ അവളുടെ മടിയിലേക്കു ചാഞ്ഞു,
അവൾ എന്നെ ഒരു ‘അമ്മ തന്റെ കുട്ടിയെ എന്നവണ്ണം അവളുടെ മടിയിലേക്കു കിടത്തി, ഞാൻ എന്റെ കാലുകൾ മടക്കി ബെഞ്ചിൽ കയറ്റിവെച്ചു, ഒരു കുഞ്ഞി കുട്ടിയെ പോലെ ചുരുണ്ടു കൂടി അവളുടെ മടിയിൽ കിടന്നു..!
അവൾ മെല്ലെ മെല്ലെ എന്റെ തലമുടിയിലൂടെ വിരലുകൾ ഓടിച്ചു, അവളുടെ ആ തണുത്ത വിരലുകൾ എന്റെ തലയിലൂടെ അരിച്ചിറങ്ങിയപ്പോൾ എനിയ്ക്കു എന്തെല്ലാമോ തോന്നി.!
അവൾ, അവളുടെ തല മെല്ലെ എന്റെ തലയുടെ അടുത്തേയ്ക്കു അടുപ്പിച്ചു
” എന്ത് പറ്റിയട, എന്റെ വാവയ്ക്കു.? ഏഹ് എന്താ പറ്റിയേ.!?”
അവൾ മെല്ലെ എന്റെ പുറം തടവിക്കൊണ്ട്, എന്റെ മുടിയിഴയിലൂടെ കയ്യോടിച്ചു കൊണ്ട് ചോദിച്ചു,
എനിയ്ക്കു പിന്നെ ഒട്ടും പിടിച്ചു നില്ക്കാൻ പറ്റിയില്ല,
അവളെ അമർത്തി പിടിച്ചുകൊണ്ടു,
ഞാനവളുടെ മടിയിൽ തേങ്ങി തേങ്ങി കരഞ്ഞു,
എനിയ്ക്കറിയില്ല എന്തിനെന്നു പക്ഷെ, ഒട്ടൊന്നു കരഞ്ഞപ്പോൾ എനിയ്ക്കു മനസ്സിന് വല്ലാത്തൊരു കുളിർമ തോന്നി,
അവളപ്പോഴും എന്നെ ഒരു അമ്മ കുട്ടിയെ താലോലിക്കുന്ന പോലെ മെല്ലെ മെല്ലെ തലോടുന്നുണ്ടായിരുന്നു,
ഞാൻ മെല്ലെ മെല്ലെ അവളുടെ തഴുകലിൽ അറിയാതെ മയങ്ങി പോയി,
സത്യം പറയാമല്ലോ എന്റെ ഇത്രയും നാളത്തെ ജീവിതത്തിൽ അന്ന് മയങ്ങിയത് പോലെ ഞാൻ ഇത് വരെയും, ഇന്നുവരെയും മയങ്ങിയിട്ടില്ല ,
ഇതുവരെ അത്രയും സുരക്ഷിതത്വം എനിയ്ക്കു ഒരിക്കലും പിന്നീട് അനുഭവിക്കാൻ സാധിച്ചട്ടില്ല, പിന്നീട് ഒരിക്കൽ പോലും.!
ടീച്ചറുടെ ശബ്ദം കേട്ടാണ് ഞാൻ എണീറ്റത്, ഞാൻ അപ്പോഴും അനുവിന്റെ മടിയിൽ ആയിരുന്നു, ഏറ്റവും പുറകിലത്തെ ബെഞ്ചായതിനാലും, ടീച്ചർ പെട്ടെന്ന് കേറിവന്നത് കൊണ്ടും ഞങ്ങളെ കണ്ടിരുന്നില്ല, ഞാൻ വേഗം എണീറ്റു, അനു പെട്ടെന്ന് എണീറ്റ് പാവാടയെല്ലാം നേരെയിട്ടു, കരഞ്ഞു കലങ്ങിയ എന്റെ കണ്ണുകൊണ്ടു അനു ഒന്നുകൂടി എന്നെ നോക്കി
” എന്തെ ഇപ്പൊ വിഷമമെല്ലാം മാറിയോ ?.” അവൾ ചിരിച്ചുകൊട്നു ചോദിച്ചു, എന്നെ കൊല്ലുന്ന ആ ചിരി
ടീച്ചർ വന്നു നാടകമെല്ലാം പിന്നെയും തകൃതിയായി റിഹേഴ്സൽ നടത്തി, ഇതിനിടയിൽ ഞാനും അസാമാന്യമാം വിധം അഭിനയിച്ചു ജീവിച്ചു,.
ഇടയ്ക്കു ഓരോ ഭാഗം തെറ്റുമ്പോൾ അകെ സഹിക്കാൻ പറ്റാതെ ആയതു അനുവിന്റെ നഖം കൊണ്ടുള്ള പിച്ചലാണ്, വൈകിട്ട് ആയപ്പോഴേക്കും എന്റെ കൈ പിച്ചുകൊണ്ടു തണർത്തു ഒരു പരുവം ആയിരുന്നു,
പക്ഷെ ഈ വേദനയിലും എത്രയോ വലുതാണ് അവളെനിക്ക് തരുന്ന സ്നേഹമെന്നത് എനിയ്ക്കു ഒരു വേറെ പ്രത്യേക സുഖം തന്നെ നൽകി
അന്ന് തിരിച്ചു ഞാൻ വീട്ടിലെത്തിയപ്പോൾ എന്റെ മനസ്സിലെ ഇന്നലെയുണ്ടായ സംശയങ്ങൾ എല്ലാം തന്നെ വഴിമാറിയിരുന്നു, പതിവുപോലെ കുളിയെല്ലാം കഴിഞ്ഞു ടി.വി.കാണാൻ ചെന്നിരുന്ന എന്റെ കൈയിലെ പിച്ചിയ പാടുകണ്ടു എന്റെ ഡിറ്റക്റ്റീവ് ചേച്ചി കാര്യം തിരക്കി, ഒഴിഞ്ഞു മാറാൻ ഒരുപാട് ശ്രമിച്ചെങ്കിലും അവസാനം എല്ലാം തുറന്നു പറയേണ്ട വന്നു, എല്ലാം കേട്ടിരുന്നു അവൾ വെറുതെ ഒന്ന് ചിരിക്കുക മാത്രം ചെയ്തു , ഈ പെണ്ണുങ്ങളുടെ മനസ്സിലിരിപ്പ് ആർക്കാണ് മനസിലാവുക , എന്തിനാ ചിരിക്കുന്നത് എന്ന എന്റെ ചോദ്യത്തിനവൾ
” നമുക്ക് നോക്കാമെടാ, കേട്ടിടത്തോളം അവൾ അസ്തിക്കാണ്, ഇനിയിപ്പോ പ്രായത്തിന്റെ എടുത്തു ചാട്ടവും ആവാം , എല്ലാം കണ്ടിരുന്നു കാണാം..”! എന്ന സാ മട്ടിലുള്ള ഒരു മറുപടിയും തന്നു.,
പിന്നീട് കലോത്സവത്തിനുള്ള കട്ട പ്രാക്ടീസായിരുന്നു മൊത്തത്തിൽ, ഒറ്റയ്ക്കുള്ള നിമിഷങ്ങൾ കുറവായിരുന്നെങ്കിലും ഞാനും അവളും തട്ടേലും, അല്ലാതെയും ലാവിഷായി പ്രണയിച്ചു നടന്നു, ക്ലാസ്സിലെ ബാക്കിയെല്ലാവർക്കും അറിയാവുന്നതുകൊണ്ട് , അവരുടെ വക കട്ട സപ്പോർട്ടും ഉണ്ടായിരുന്നു
അവസാനം കലോത്സവത്തിന് ഒരാഴ്ച മാത്രമുള്ളപ്പോൾ, ഞങ്ങൾക്കു രജിത ടീച്ചർ വഴി ഒരാഴ്ചത്തെ പ്രാക്ടീസ് ലീവ് ഒത്തുകിട്ടി,
ഞങ്ങൾക്ക് മാത്രമല്ല യുവജനോത്സവത്തിനുള്ള എല്ലാവര്ക്കും കിട്ടി,
ഞങ്ങളുടെ സ്കൂളും യുവജനോത്സവത്തിനുള്ള ഒരു വേദി ആയതുകൂടി കാരണമായിരുന്നു ഈ ലീവ്,
സ്റ്റേജ് കെട്ടലും, മറ്റുള്ള പരുപാടികളൂം തകൃതിയായി നടന്നപ്പോൾ ഒച്ചപ്പാടും ബഹളം കാരണം ഞങ്ങൾക്ക് പ്രാക്ടീസ് ചെയ്യൽ അകെ ബുദ്ധിമുട്ടാക്കിയിരുന്നു ,