അനുരാഗലോലം

ഇത് കണ്ടപ്പോൾ എനിക്ക് പെട്ടെന്ന് സങ്കടമായി, ഞാനവനെ തോണ്ടി, എന്റെ തോണ്ടലിന്റെ അർഥം മനസിലായെന്നോണം അവൻ പിന്നെ ഒന്നും എതിർത്ത് പറഞ്ഞില്ല

“ആ അപ്പൊ അതിനൊരു പരിഹാരമുണ്ട്, ഇനിയും പരിഹാരമില്ലാത്ത ഒരു കാര്യം കൂടിയുണ്ട്, എന്തായാലും ഞാൻ നാളെ വരെ സമയം കൊടുത്തിട്ടുണ്ട്, നിങ്ങളും എല്ലാവരും നാളെ ഡയലോഗെല്ലാം പടിചോണ്ടു വരണം , അപ്പൊ നാളെ കാണാം, ഇന്ന് ഉച്ചവരെയെ ക്ലാസ്സോള്ളു,.” ടീച്ചർ ഇത്രയും പറഞ്ഞു വേഗം പുറത്തേയ്ക്കു പോയി

എനിയ്ക്കടകം ആർക്കും ഒന്നും മനസിലായില്ല, എന്തായാലും എന്തോ പ്രശ്നമുണ്ട്

ഞാൻ താരയെ നോക്കി അവളുടെ മുഖവും വാടിയിരിക്കുന്നു, ഞാൻ മെല്ലെ അവളെ ആശ്വസിപ്പിക്കാനായി അവളുടെ അടുത്തേയ്ക്കു പോവാനായി ഭാവിച്ചപ്പോഴേക്കും, പെട്ടെന്ന് ഷമീർ എന്റെ കയ്യിൽ കേറി പിടിച്ചു

“എന്താടാ..?” ഞാൻ അവനെ നോക്കി

അവൻ പെട്ടെന്ന് കണ്ണുകൊണ്ടു അങ്ങോടു നോക്ക് എന്ന് കാണിച്ചു

ഞാൻ അവൻ കാണിച്ച ഭാഗത്തേയ്ക്ക് നോക്കിയപ്പോൾ എന്നെ തന്നെ ദേഷ്യപ്പെട്ടു നോക്കുന്ന അനുവിനെ ആണ് കണ്ടത്

ഞാൻ പെട്ടെന്ന് ഒരു വളിച്ച ചിരി ചിരിച്ചു

അവൾ എന്നെ നോക്കി പുരികം വളച്ചു എന്താ ഭാവം എന്ന അർത്ഥത്തിൽ തലയനക്കി

ഞാൻ പെട്ടെന്നാണ് താരയെ സമാധാനിപ്പിക്കാൻ പോയാലുള്ള പൊല്ലാപ്പ് ഓർത്തത്, ഞാൻ ഒന്നുമില്ല എന്നർത്ഥത്തിൽ തോള്കൊണ്ടു കാണിച്ചു.!

പിന്നെ ഒന്നും മിണ്ടാതെ പഴയെപ്പടി ബെഞ്ചിലേക്ക് ഇരുന്നു, എന്റെ ഇടതുവശമായി ഷമീറും വന്നിരുന്നു നിർത്താതെ ചിരി തുടങ്ങി , എനിയ്ക്കല്ലേ എന്റെ അവസ്ഥ അറിയൂ ! അവനോടും ഒന്നും പറയാൻ പറ്റാതെ ഞാൻ മിണ്ടാതിരുന്നു , അവൻ മെല്ലെ എന്റെ തോളത്തു തട്ടി

” എന്റെ പൊന്നളിയ, ഈ പ്രേമമെന്നു പറഞ്ഞാൽ ഇതൊക്കെ ഉണ്ടാവും, എന്നാലും ഓള് അന്നേ ഇത്രപെട്ടെന്ന് ഇങ്ങനെ പടമാക്കുമെന്നു കിനാവിൽപോലും ഞാൻ കരുതീല..” അവൻ പിന്നെയും എന്നെനോക്കി ചിരിച്ചോണ്ടിരുന്നു, ഞാനും ഒരു പൊട്ടനെ പോലെ ആ ചിരിയിൽ പങ്കുചേർന്നു,
വൈകിട്ടത്തെ ഫുട്ബോൾ കളിയ്ക്കു നിൽക്കാതെ ഞാൻ വേഗം ഓടി വീട്ടിലെത്തി, ചേച്ചിയോട് കുറച്ചു സംശയങ്ങൾ ചോദിക്കാനുണ്ട്.! ഞാൻ എത്തിയപ്പോഴേക്കും ടിവിയുടെ ഫ്രണ്ടിൽ തന്നെ എന്തോ പരിപാടിയും കണ്ടുകൊണ്ടു പ്ലേറ്റിൽ നിന്നും എന്തോ കൊറിച്ചുകൊണ്ട് അവളിരുപ്പുണ്ടായിരുന്നു,

ഞാൻ ഓടി റൂമിൽ കയറി ഡ്രെസ്സും മാറി ഒരു കുളിയും കുളിചെന്ന് വരുത്തി, ഡ്രസ്സ് മാറി അവളുടെ അടുത്ത് പോയി സെറ്റിയിൽ ഇരുന്നു ,
എന്നെ കണ്ടതും അവൾ പെട്ടെന്ന് റിമോട്ടെടുത്തു കയ്യിൽ പിടിച്ചു, ഞാൻ ഒരു ചിരിയും ചിരിച്ചു അവളുടെ അടുത്തേയ്ക്കു നീങ്ങിയിരുന്നു

” എടി എനിയ്ക്കു റിമോട്ടൊന്നും വേണ്ടാ, അത് നീയെടുത്തോ, അല്ലേലും നീയെന്റെ സ്വന്തം ചേച്ചിയല്ലേ..!” ഞാൻ അവളുടെ പ്ലേറ്റിലിരുന്ന ചക്ക വറുത്തത് എടുത്തു കൊണ്ടു, ഇനി അവളെന്താ പറയാൻ പോവുന്നതെന്നറിയാനായി ഒളികണ്ണിട്ടു നോക്കി,

അവൾ എന്നെ ഒന്ന് നോക്കി, പിന്നെ ഒരു പുച്ഛം ചിരി ചിരിച്ചു

” പറയാനാനുള്ള കാര്യം പറയടാ തവളേ, നീ കിടന്നു ഉരുളാതെ കാര്യത്തിലേക്കു വാ, എന്തേലും കാര്യം സാധിക്കാനുണ്ടാവും അല്ലാണ്ട്, ഇങ്ങനെ നീ പതപ്പിക്കില്ലാലോ..” അവൾ എന്നെ നോക്കി പിന്നെയും ചിരിച്ചു

ഞാൻ കാര്യം ഏതാണ്ട് ചോദിക്കാമെന്നുള്ള അവസ്ഥ ആയപ്പോൾ , അവളുടെ അടുത്തേയ്ക്കു നീങ്ങിയിരുന്നു, ‘അമ്മ വരുന്നുണ്ടോന്നു ഒന്നുകൂടി അടുക്കളയിലേക്കു നോക്കി ഉറപ്പാക്കി

” അതേ, എടി ഇത് എനിയ്ക്കുള്ള ഡൌട്ട് അല്ല, എന്റെ ഒരു ഫ്രെണ്ടിനാണ്,” ഞാൻ ഒന്ന് കൂടി മുരടനക്കി തുടർന്നു

” എടി അവനെ ഇന്ന് ഒരു പെണ്ണ് ഇഷ്ടമാണെന്നു പറഞ്ഞു, പെണ്ണ് കാണാനൊക്കെ സുന്ദരിയാണ്,

പക്ഷെ ഇത്തിരി ഓവർ പൊസ്സസ്സീവ് അല്ലെന്നു അവനൊരു ഡൌട്ട്, അല്ല മറ്റുള്ള പെൺപിള്ളേരോട് സംസാരിക്കുന്നതു പോലും അവൾക്കു ഇഷ്ടമല്ലത്രേ, അവനാണേൽ പ്രേമിച്ചു ഒരു പരിചയവുമില്ല, അവനാണേൽ അവളോട് പ്രണയമുണ്ടോ എന്ന് പോലും ഒരു പിടിയുമില്ലാത്ത അവസ്ഥ..!”

ഞാൻ ഇത്രയും പറഞ്ഞു അവളുടെ മുഖത്തേയ്ക്കു നോക്കി,

അവൾ ആ ഉണ്ട കണ്ണ് വെച്ച് എന്നെ സൂക്ഷിച്ചു നോക്കി, പിന്നെ ചെറുതായൊന്നു ചിരിച്ചു

” എനിയ്ക്കു ഇതിനെ പറ്റി അത്ര ആധികാരികമായി പറയാൻ അറിഞ്ഞുകൂടാ, എന്നാലും ഒന്ന് പറയാം, ഞങ്ങൾ പെണ്ണുങ്ങൾ ഒരാളെ ആത്മാർത്ഥമായി സ്നേഹിക്കുകയാണേൽ, അയാൾ ഞങ്ങളുടെ മാത്രമായിരിക്കും, തിരിച്ചും അങ്ങനെ തന്നെ..!” അവൾ പെട്ടെന്ന് ഒന്ന് നിർത്തി

“അല്ലേ ഇനിയിപ്പോ നിന്റെ ആ ഫ്രണ്ടിന്റെ പേര് സുനിൽ എന്നെങ്ങാനും ആണേൽ, അമ്മയോട് പറഞ്ഞു ഞാൻ ഇപ്പൊ തന്നെ നിന്റെ പുറം പൂരപ്പറമ്പാക്കും..!” അവൾ എന്നെ പെട്ടെന്ന് ഭീഷണിപ്പെടുത്തി

” ഒന്ന് പോയെടി, എന്നെയൊക്കെ ആര് പ്രേമിക്കാനാ, ഇത് ക്ലാസ്സിലുള്ള വേറൊരുത്തനാ..!” ഞാൻ പെട്ടെന്ന് അവിടെന്നു തടിതപ്പാനായി നോക്കി

” ആ ആയാൽ കൊള്ളാം, എന്തായാലും നീയാ ഫ്രണ്ടിനോട് പറഞ്ഞേരെ, നല്ല പെൻകുട്ടിയാണേൽ വിടാണ്ട് പിടിച്ചോളാൻ..” ഇതും പറഞ്ഞു ഒരു ചിരിയും പാസ്സാക്കി അവൾ പിന്നെയും ടിവിയിലേയ്ക്ക് മറിഞ്ഞു

ഞാൻ എന്ത് തീരുമാനിക്കണമെന്നറിയാതെ കുഴങ്ങി, ഇനിയെന്തായാലും വരുന്നത് വഴിയേ നേരിടാമെന്നു ഉറച്ചു ഞാൻ എന്റെ റൂമിലേയ്ക്ക് വിട്ടു, നാളെത്തേയ്ക്കുള്ള നാടക ഡയലോഗെല്ലാം പഠിക്കാൻ ഇപ്പൊ ഒരു പ്രത്യേക ആവേശം.. അത് വായിച്ചു ഞാൻ എന്തൊക്കെയോ സ്വപ്നങ്ങളും കണ്ടു അന്നത്തെ ദിവസം എങ്ങനെയോ തള്ളി നീക്കി

പിറ്റേന്ന് ഞാൻ നേരത്തെയെ ക്ലാസിലെത്തി, പതിവുപോലെ ഷമീറും, കുറച്ചു പേരുമെ ക്ലാസ്സിൽ ഉണ്ടായിരുന്നുള്ളു, ഞാൻ അവന്റെ അടുത്തുവന്നു ചുമ്മാ ക്ലാസ്സു മുഴുവൻ ഒന്നുകൂടി ഓടിച്ചു നോക്കി, എന്റെ നോട്ടം ആരെ പരതിയാണെന്നുള്ളതു അവനു മനസ്സിലായിരുന്നു

” ഓള് എത്തിയിട്ടില്ല ഹിമാറെ, ഒറ്റ ദിവസംകൊണ്ടു അനക്ക് ഹൂറിയെ കാണാണ്ടിരിക്കാതിരിക്കാൻ പറ്റാതായോ.!” അവൻ എന്റെ ചുമലിൽ പിടിച്ചു കൊട്നു ചോദിച്ചു,
ഞാൻ പെട്ടെന്ന് അവന്റെ കൈ തട്ടി മാറ്റി

” ഒന്ന് പോയെടാ, ഞാൻ അവളെയൊന്നുമല്ല തേടിയത്, ചുമ്മാ ഇങ്ങനെ ഇരുന്നപ്പോൾ നോക്കിയെന്നെ ഉള്ളു..”

” ഹമ് ഹമ് ആയിക്കോട്ടെ, പറഞ്ഞപോലെ എന്റ പെണ്ണും ഇന്ന് വന്നട്ടില്ലല്ലോ.”

പിന്നെ ഞാനും അവനും കൂടെ ഒരുമിച്ചായി ക്ലാസ് റൂമിന്റെ വാതിലിലേയ്ക്ക് നോക്കിയിരിപ്പു, ശെരിക്കും ഈ പ്രണയത്തിന്റെ ഏറ്റവും സുഖമുള്ള ഒരു ഭാഗമാണ് ഈ കാത്തിരിപ്പ്, അത് ശെരിക്കും ആസ്വദിച്ചു തന്നെ അറിയണം

അരമണിക്കൂറൊക്കെ എനിയ്ക്കു ഒരു യുഗമായി ഫീൽ ചെയ്യാൻ തുടങ്ങിയിരുന്നു,

അവസാനം കലപിലയുമായി ഒന്ന് രണ്ടു കൂട്ടുകാരികളുടെ കൂടെ അനു ക്ലാസ്സിലേക്ക് കയറിവന്നു,

Leave a Reply

Your email address will not be published. Required fields are marked *