അമ്മു..!
വെറും നിലത്ത് ചുരുണ്ടു കൂടി കിടന്നുറങ്ങുന്നത് അവളാണ്.എത്ര തെറ്റിലാണെന്ന് പറഞ്ഞാലും ആ കിടപ്പ് കണ്ടപ്പോൾ എനിക്ക് പാവം തോന്നി.ഞാൻ ഉള്ളിൽ കിടക്കാത്തതു കൊണ്ട് പുറത്തേക്ക് വന്ന് കിടന്നതാണ് പാവം.അവളെ ഒന്ന് നോക്കികൊണ്ട് ഞാൻ മുറ്റത്തേക്കിറങ്ങി മൂത്രമൊഴിച്ചു തിരിച്ചു വന്നു.നല്ല ഉറക്കത്തിലാണ് പെണ്ണ്.
ഇതൊക്കെ നീയായിട്ട് വരുത്തി വെച്ചതല്ലേ കുഞ്ഞേ..?
അവളെ നോക്കി ഞാൻ മന്ത്രിച്ചു.
നല്ല ഉറക്കത്തിലാണെന്നു മനസ്സിലായ ഞാൻ പതിയെ അവളെ കോരിയെടുത്തു. ഉണർന്നാൽ ചമ്മി പോവും. പക്ഷെ അവളൊന്ന് ഞരങ്ങിയതേ ഒള്ളു. അവളെ കോരിയെടുത്തു കൊണ്ട് ഞാൻ ഉള്ളിലേക്ക് നടന്നു റൂമിലെത്തി.അവളെ കിടക്കയിലേക്ക് കിടത്തി.കുറച്ച് നേരം ആ കിടപ്പ് നോക്കി ഇരുന്നു.
അല്ലെങ്കിലും സ്വന്തം പെണ്ണ് എല്ലാം മറന്ന് ഉറങ്ങുന്നത് കാണാൻ ഒരു പ്രത്യേക ഫീലാണ്.
ഞാൻ കട്ടിലിൽ കയറി അവളുടെ അടുത്ത് കിടന്നു. ഇപ്പോൾ ചരിഞ്ഞു കിടക്കുന്ന പെണ്ണിന്റെ നിശ്വാസം എന്റെ മുഖത്തടിക്കുന്നുണ്ട്. ഞാൻ കുറ്റബോധത്തോടെ അവളുടെ കവിളുകളിൽ തഴുകി. പിന്നെ അടുത്തേക്ക് നീങ്ങി ഉമ്മവെച്ചു. പലകുറി.
തൊട്ടടുത്ത നിമിഷം അവൾ കണ്ണ് തുറക്കാതെഎന്റെ കഴുത്തിലൂടെ കയ്യിട്ട് മാറിലേക്ക് ചേർത്തു.
“കുറുമ്പ് കാണിക്കാതെ ഉറങ്ങിക്കെ…
അവൾ പിറുപിറുത്തു.
സാധാരണ എന്നുംപറയാറുള്ള ഡയലോഗാണ്.അല്ലാതെ ആള് ഉണർന്നിട്ടൊന്നും ഇല്ല.
ഞാൻ പതിയെ കൈ വേർപ്പെടുത്തി എണീറ്റു. പിന്നെ പുതപ്പെടുത്ത് പുതപ്പിച്ചു ഫാനും ഓണാക്കി റൂമിൽ നിന്ന് പോന്ന് ഉമ്മറത്തു വന്ന് കിടന്നു. ഒരുമ്മ കൊടുത്തപ്പോൾ തന്നെ എന്റെ പകുതി പിണക്കം മാറീട്ടുണ്ട്.
അല്ലെങ്കിലും ഇതൊക്കെ ഒരഭിനയമല്ലേ….സുഹറാ
രാവിലേ ആരോ ഷർട്ടിൽ പിടിച്ച് കുലുക്കിയതോടെ ആണ് ഞാൻ ഉണർന്നത്. കണ്ണ് തുറന്നപ്പോൾ ആരെയും കാണാനില്ല. എണീറ്റിരുന്നതും അച്ഛമ്മ ഉമ്മറത്തേക്ക് വന്നു. ഓഹ് അച്ഛമ്മ ഇതൊന്നും അറിയാതിരിക്കാൻ വേണ്ടി എന്നെ ഉണർത്തീട്ട് ഓടിയതാണ് അനുപമ മാഡം..
“ഇനിപ്പോ ക്ലാസ്സിനൊന്നും പോണ്ടല്ലോ ലെ.. കുട്ട്യേ..
“ന്നാലും എടക്കൊന്ന് പോണം അച്ചമ്മാ..
ഞാൻ കണ്ണ് തിരുമ്മിക്കൊണ്ട് മറുപടി നൽകി.
“അമ്മു ചായ എട്ത്ത് വെച്ചിട്ട്ണ്ട്
പോയി കുടിക്ക് ചെക്കാ…
അച്ഛമ്മ എന്റെ ചെവിയിൽ കളിയായി പിടിച്ച് വലിച്ച്കൊണ്ട് പറഞ്ഞു.
പല്ല് തേച്ചു ചായ കുടിക്കാനിരുന്നപ്പോഴേക്കും എല്ലാം വിളമ്പി വെച്ചിട്ടുണ്ട്.ഓരോ പലഹാരവും ഞാൻ എത്രയെണ്ണം കഴിക്കും എന്നടക്കം അവൾക്ക് മനപാഠമാണ്.
ഗ്ലാസ്സിലേക്ക് ചായ ഒഴിച്ച് തന്ന് അമ്മു എന്റെ ഓപ്പോസിറ്റ് വന്നിരുന്നു. കുളിയൊക്കെ കഴിഞ്ഞിട്ടുണ്ട് പക്ഷെ മുഖം ഇപ്പഴും വീർത്തു തന്നെയാണ് ഇരിക്കുന്നത്. എന്നെ തന്നെ കണ്ണെടുക്കാതെ നോക്കിയിരിക്കുകയാണവാൾ. ഇടക്ക് കണ്ണ് തുടക്കാനല്ലാതെ അവൾ നോട്ടം മാറ്റുന്നെ ഇല്ല. അവളെ നേരിടാനാവാതെ ഞാൻ പെട്ടന്ന് കഴിച്ച് തീർത്തു അവിടെ നിന്നും രക്ഷപെട്ടു. അവളുടെ ആറ്റിറ്റ്യൂടും നോട്ടവും കണ്ടാൽ ഞാനാണ് തെറ്റ് ചെയ്തത് എന്ന് തോന്നും. ഇനി അവള് തന്നെ അല്ലേ അമ്മയോട് എല്ലാം പറഞ്ഞത്?. ഏയ് ചിന്നു നുണ പറയാൻ സാധ്യത ഇല്ല…
ചായ കുടിച്ച് കഴിഞ്ഞ് ഉമ്മറത്തെത്തിയപ്പോൾ അച്ഛമ്മ തൊടിയിലൂടെ നടന്ന് തെങ്ങിന്റെ പട്ടകൾ വലിച്ച് കൊണ്ട് വന്ന് മുറ്റത്തെക്കിടുന്നുണ്ട്.
“ഈർക്കിളി ചൂല് ണ്ടാക്കാലോ…
ഏതായാലും വെറുതെ ഇരിക്കല്ലേ..?
എന്നെ കണ്ടതും അച്ഛമ്മ മോണ കാട്ടി ചിരിച്ചുകൊണ്ട് പറഞ്ഞു.
“ഞാനും കൂടാ അച്ഛമ്മേ..”
ഏതായാലും വെറുതെ ഇരിക്കാണ്. മിണ്ടാനും ആരും ഇല്ല. പിന്നെന്താ
അച്ഛമ്മയോടൊപ്പം കൂടി തെങ്ങിൻ പട്ട മുറ്റത്ത് തണലുള്ള സ്ഥലത്ത് കൊണ്ട് വന്നിട്ട് ചൂലിന്റെ പണി തുടങ്ങി.അച്ഛമ്മ ഓല ചീന്തി ഈർക്കിലെടുത്ത് തരും ഞാനത് ഒരുമിച്ച് കെട്ടി ചൂലാക്കി മാറ്റി വെക്കും. അങ്ങനെ പണി പുരോഗമിക്കുമ്പോൾ അമ്മു കയ്യിൽ ചെറു കത്തിയുമായി അമ്മു പതിയെ ഞങ്ങളുടെ അടുത്തേക്ക് വന്നു.