🌷 തങ്കി 🌷 1

അവൾക്കത് പെട്ടന്ന് താങ്ങാനായില്ല എന്നതാണ് സത്യം. അവൾ ഫോൺ കട്ട്ചെയ്തു, പാവം. ഞാൻ തിരിച്ചു വിളിച്ചപ്പോളൊന്നും അവളെടുത്തില്ല. പിറ്റേന്ന് ക്ലാസ്സിൽ വെച്ച് കണ്ടപ്പോൾ അവൾ എന്നെനോക്കി ചിരിക്കാൻ ശ്രമിച്ചു. അന്ന് ഉച്ചയ്ക്ക് ഞാൻ നീതുവിനെയും കൂട്ടീ ലഞ്ച് പുറത്തുന്നു കഴിക്കാൻ വേണ്ടി പോയി.
എത്രയായാലും നീതു ഒരു നല്ല കുട്ടിയാണ്.
നല്ല മനസാണവൾക്ക്, അവളെന്നോട് ഇതുവരെ പ്രണയമാണെന്ന് പറഞ്ഞിട്ട് പോലുമില്ല. പക്ഷെ കൂടുതൽ ആശിച്ചിട്ട് വേദനിപ്പിക്കുന്നതിൽ എന്തർഥമാണ്. അതുകൊണ്ട് മാത്രമാണവളോടെല്ലാം പറഞ്ഞത്. ഒടുക്കം നല്ലപോലെ ബുദ്ധിമുട്ടി ഞാൻ ഫ്രെണ്ട്സ് ആയിട്ടിരിക്കാമെന്നു പറഞ്ഞവളെ സമ്മതിപ്പിച്ചു.

ആ ആഴ്ച തങ്കിയും ഞാനും കൂടെ ടൗണിലേക്ക് ഒന്ന് പോകാമെന്നു വെച്ചിരികയായിരുന്നു. ഒരു ഫ്രണ്ടിന്റെ കല്യാണത്തിനും പിന്നെ അത് കഴിഞ്ഞൊരു സിനിമയ്ക്കും- ഡാർലിംഗ് ഡാർലിംഗ്. അവളെന്റെയൊപ്പം കൈകോർത്തു പിടിച്ചുകൊണ്ട് സിനിമ കണ്ടു. ഇടക്ക് ഇമോഷണലായി കരയുകയും ചെയ്തു.

പ്ലസ് ടു അതിലും സീരിയസ് ആയിരുന്നു. പഠിത്തവും ലാബും എൻട്രൻസ് കോച്ചിങ് എല്ലാം കൂടെ എനിക്കൊന്നിനും സമയമില്ല. ആയിടക്ക് ഒരു സെക്കൻഡ് ഹാൻഡ് ബൈക്ക് ഞാനൊപ്പിച്ചു. തങ്കിയെയും കൂട്ടി പഞ്ചവർണ്ണ പൈങ്കിളി പെണ്ണെ എന്ന പാട്ടിലെ ആ പാലം ഇല്ലേ 10km ഉണ്ട് വീട്ടിൽ നിന്നും അങ്ങോട്ടേക്ക് ഒന്ന് രണ്ടു തവണ പോയിരുന്നു. കുറെ നാൾക്കുശേഷം അവളൊന്നു ചിരിച്ചു കണ്ടു. അവൾക്ക് വല്ലാത്ത കുറ്റബോധം പോലെയാണ്. ഞാനവൾക്ക് ചേരില്ല എന്ന
തോന്നൽ അവളെ വേട്ടയാടാൻ ആരംഭിച്ചിരുന്നു. അതിനൊരു പ്രധാനകാരണം ഞാൻ പഠിച്ചൊരു നിലയിലെത്തുമെന്നു അവൾക്കുറപ്പായിരുന്നു. അവളെ സംബന്ധിച്ചിടത്തോളം, ഞാനവൾക്ക് ഒരു ഭാഗ്യം പോലെ കിട്ടിയ പ്രണയമാണെന്ന് പോലുമവൾ പറഞ്ഞിട്ടുണ്ട്. അവളുടെ പൊട്ട ബുദ്ധി അങ്ങനെയാണ്. സ്നേഹം എന്നത് ഉള്ളിൽ തട്ടി ഞാൻ അവൾക്ക് കൊടുക്കുമ്പോഴും അവളെന്നെ പലപ്പോഴും അകറ്റാൻ ശ്രമിച്ചതും അത് കൊണ്ടാവാം.

അങ്ങനെ രണ്ടാളും പ്ലസ് റ്റു പാസ് ആയി. എനിക്ക് എൻട്രൻസ് ന്റെ പ്രീപെറേഷൻ കൂടെ ഉള്ളതുകൊണ്ട് ഞാൻ കോച്ചിങ് സെന്റർഇൽ ഉള്ള ഹോസ്റ്റൽ ആയിരുന്നു. തങ്കിയെ കാണാൻ കഴിയാത്ത ആ രണ്ടു മാസം. എനിക്ക് എന്ത് ചെയുമെന്നറിയാതെ ഞാൻ. പക്ഷെ ഹോസ്റ്റലിൽ ഒരു കുട്ടിയുടെ ഫോണിൽ നിന്നും ഞാനെന്റെ വീട്ടിലേക്ക് വിളിക്കുമ്പോ അമ്മയോട് ചോദിച്ചിരുന്നു. അവൾക്ക് പനിയും ജലദോഷവുമൊന്നുമില്ലല്ലോ എന്ന്…

എൻട്രൻസ് എക്‌സാമിന് ബിനോയ് അരവിന്ദ് നീതു ഞങ്ങൾക്ക് ഒരേ സെന്റർ തന്നെ ആയിരുന്നു. എക്സാം എല്ലാര്ക്കും കുഴപ്പമില്ല എന്ന് പറഞ്ഞു. എനിക്ക് നല്ല ടെൻഷൻ ആയിരുന്നപ്പോൾ തങ്കി എനിക്കെന്തെയാലും നല്ല റാങ്ക് ഉണ്ടാകുമെന്ന് പറഞ്ഞു സമാധാനിപ്പിച്ചു. അവൾ ഇഷ്ടദേവനെ പ്രീതിപ്പെടുത്താൻ ആയി
അമ്പലത്തിലൊക്കെ പോയിവരുന്നതും
വൈകീട്ടുള്ള കാഴ്ചയായിരുന്നു..

റിസൾട്ട് വന്നപ്പോൾ എനിക്ക് 112മത്തെ റാങ്ക് ആയിരുന്നു. ഞാനന്ന് വീട്ടിൽ ടെന്ഷനടിച്ചിരിക്കുമ്പോ റിസൾട്ട് നോക്കാൻ അമ്മയായിരുന്നു പോയത്, റിസൾട്ട് അറിഞ്ഞശേഷം അമ്മയും വിജയമ്മയും കൂടെ വീട്ടിലേക്ക് വന്നു. അമ്മയെന്നെ കെട്ടിപിടിച്ചു കരഞ്ഞു. ഞാൻ വിജയമ്മയോടു തങ്കിയെവിടെന്ന് ചോദിച്ചപ്പോൾ അവൾ വീട്ടിൽ ആണെന്ന് പറഞ്ഞപ്പോൾ…. ഞാനവളെ കാണാൻ വേണ്ടി വേഗം അവളുടെ വീട്ടിലേക്ക് ഓടി….

അവൾ അറിഞ്ഞിരുന്നു. പക്ഷെയെന്തോ അവൾക്കെന്നെക്കാണാൻ കഴിഞ്ഞില്ല.. സന്തോഷം കൊണ്ട് അമ്മയുടെ മുന്നിൽ വെച്ച് അവളെന്നെ കെട്ടിപിടിച്ചു കരയുമെന്നു പേടിച്ചാണെന്നു എനിക്കറിയാമായിരുന്നു…..

പക്ഷെ അവളെ കണ്ടമാത്രയിൽ ഇറുകെ കെട്ടിപിടിച്ചു കരഞ്ഞത് ഞാനായിരുന്നു. നിറമിഴികളോടെ എന്റെ നെറ്റിയിൽ ചുംബിച്ചുകൊണ്ടവൾ..എന്നെ ഇറുക്കി പുണർന്നു. വിജയമ്മയുടെ കാലടി ശബ്ദം കേട്ടതും ഞാനകന്നു മാറി. ഇച്ചിരി നേരമവളുടെ കൂടെയിരുന്ന ശേഷം ഞാൻ പിന്നെ തിരികെ വീട്ടിലേക്ക് വന്നു.
നീതു എന്റെ റിസൾട്ട് അറിഞ്ഞശേഷം അവളും വിളിച്ചു, അവൾക്കും റാങ്കുണ്ട്. ഞങ്ങൾ രണ്ടാളും ഹാപ്പി.