🌷 തങ്കി 🌷 1

നാട്ടിൽ പഞ്ചായത്തു ഗ്രൗണ്ടിൽ ചെറിയ സ്വീകരണമൊക്കെ ഉണ്ടായിരുന്നു. കാഴ്ചക്കാരുടെ കൂട്ടത്തിലവളും…
ഞാൻ പക്ഷെ സ്റ്റേജിൽ നിന്നും തങ്കിയെ മാത്രമായിരുന്നു നോക്കിയിരുന്നത്. അവൾ അഭിമാനത്തോടെ എന്നെ നോക്കി ചിരിക്കയും ചെയ്യുന്നുണ്ടായിരുന്നു..പൊട്ടിപെണ്ണ്!!!

ശേഷം കോളേജിലേക്ക് ചേരാനുള്ള പ്രെപ്രഷൻ ഒക്കെ ആയിരുന്നു. അതിനായി വീട്ടിൽ ഒരു ഡെസ്ക്ടോപ്പ് കമ്പ്യൂട്ടർ വാങ്ങിച്ചു. കോഴിക്കോട് മെഡിക്കൽ കോളേജിൽ ആയിരുന്നു എനിക്കും നീതുവിനും കിട്ടിയത്. ഞങ്ങൾ ഹോസ്റ്റലിൽ നിന്ന് പഠിക്കാൻ ആരംഭിച്ചു. കോളേജ് എനിക്ക് വല്ലാതെയിഷ്ടപ്പെട്ടു. നീതുവിനും എനിക്കും കുറെ ഫ്രെണ്ട്സ് നെ കിട്ടി. നീതു കൂടെയുള്ളത് കൊണ്ട് രണ്ടാൾക്കും പഠിക്കാനൊക്കെ എളുപ്പമായി എന്ന് വെണം പറയാൻ…

അച്ഛൻ അപ്പൊ എനിക്കൊരു കാർ വാങ്ങിച്ചു തന്നു. നാട്ടിലേക്ക് ഞാനും നീതുവും അതിലായിരുന്നു വന്നിരുന്നത്. അന്ന് ഫസ്റ് ഇയർ പരീക്ഷ കഴിയാൻ നേരം അമ്മയുടെ പിറന്നാളിനാണ് നീതു ആദ്യമായി വീട്ടിലേക്ക് വരുന്നത്. നീതുവിന്റെ കാര്യം ഞാൻ തങ്കിയോടെപ്പോഴോ പറഞ്ഞിരുന്നു. അവൾക്കെന്നോട് ഇഷ്ടമായിരുന്നു എന്നും. തങ്കിയോടുള്ള കാര്യമൊക്കെ അവളെ
പറഞ്ഞു മനസിലാക്കിയിട്ടുണ്ട് എന്നും. ഇത്തവണ അവൾ വീട്ടിലേക്ക് വരുന്നത് തങ്കിയെ കാണാൻ കൂടിയാണെന്നും…

അങ്ങനെ പിറന്നാൾ ദിവസം. ബിനോയും അരവിന്ദും ഒപ്പം നീതുവും വന്നു. നീതു ഒരു ജീൻസ് ആൻഡ് ടോപ് ആയിരുന്നു വേഷം. അവൾ അതിൽ നല്ല ഭംഗിയാണ് കാണാൻ. അമ്മയ്ക്കും അവളെ വലിയ കാര്യമാണ്. ഫോണിൽ രണ്ടാളും നല്ലപരിചയം ഇതിനോടകം ആയി കഴിഞിരുന്നു, ലഞ്ച് സ്‌പെഷ്യൽ ആക്കാനായി തങ്കിയെയും എന്റെയമ്മ സഹായത്തിനായി വിളിച്ചു.

ഞാനും നീതുവും സോഫയിൽ ഇരിക്കുമ്പോ തങ്കി ഞങ്ങളെ കടന്നു അടുക്കളയിലേക്ക് ചെന്നു, അവളൊരു പഴയ ചുരിദാർ ആയിരുന്നു ഇട്ടിരുന്നത്. നീതു അവളോടപ്പം അടുക്കളയിൽ ചെന്നു പരിചയപെട്ടു. പക്ഷെ അമ്മ നീതുവിനെ അവിടെ നില്കാനൊന്നും സമ്മതിച്ചില്ല. അതുകൊണ്ട് ഞങ്ങളുടെ ഒപ്പം നീതു വന്നിരുന്നു ടീവിയും കണ്ടിരുന്നു.

ഫുഡ് വിളമ്പാൻ നേരമൊക്കെ എൻറെ അടുത്തിരുന്ന നീതുവിനെ നോക്കി ചിരിക്കാൻ ശ്രമിക്കുന്ന തങ്കിയുടെ മുഖം കാണുമ്പോ നെഞ്ചിന്റെ മേലെ കല്ല് കയറ്റിയ പോലെ ആയിരുന്നു. എല്ലാരും പോയി കഴിഞ്ഞപ്പോൾ ഞാൻ മേലെ ബെഡ്‌റൂമിൽ ഇരിക്കുന്ന സമയം തങ്കി വന്നിട്ട്… ആ കുട്ടിക്ക് ഇപ്പോഴുമിഷ്ടം ഉണ്ടോയെന്ന് ചോദിച്ചു. ഞാനില്ലെന്നു പറഞ്ഞെങ്കിലും തങ്കിയത് വിശ്വസിച്ചില്ല.
അവൾ പറഞ്ഞത് എനിക്ക് ചേർച്ച നീതുവാണ്‌… ആ കുട്ടിയെ തന്നെ കെട്ടിക്കോളാൻ ആണ്.അവളതും പറഞ്ഞു എന്റെ മറുപടിക്ക് കാത്തു നില്കാതെ വീട്ടിലേക്കോടി…ഞാനെത്ര വിളിച്ചിട്ടും കേട്ടില്ല…..

ആ രാത്രി എനിക്കും അവൾക്കും ഉറങ്ങാൻ കഴിയില്ലെന്ന്…
ഞാൻ മനസിലാക്കി….. എത്രവട്ടം കരഞ്ഞു കരഞ്ഞു ഞാൻ നേരം വെളുപ്പിച്ചെന്നു എനിക്ക് മാത്രമേ അറിയൂ…..ഇതുപോലെ ജീവന് തുല്യം സ്നേഹിച്ച പെണ്ണിന്റെ നാവിൽ നിന്നും ഒരിക്കലും വരാൻ പാടില്ലാത്തതാണ് തങ്കിയന്നു പറഞ്ഞത്. ഞാനവളെ മറക്കണം പോലും. അതിനൊരു പ്രധാന കാരണം എന്റെയമ്മയ്ക്ക് നീതുവിനെ മരുമകളായി കിട്ടാൻ ആഗ്രഹിക്കുന്നുണ്ടെന്നു കൂടെ അവൾ അറിഞ്ഞതായിരിക്കണം, പാവം, അവളുടെ കുഞ്ഞു ഹൃദയം നൊന്തു കാണും….വിട്ടുകൊടുക്കലിന്റെ മഹത്വം പേറി, പിടയുന്ന നെഞ്ചും കൊണ്ട് എന്റെ മുന്നിലവൾ എങ്ങനെ നോക്കും ? എനിക്ക് സഹിക്കാൻ കഴിയുന്നേയില്ല …..

പിറ്റേന്ന് കാലത്തു അമ്മ അച്ഛനെ ഫോൺ വിളിച്ചു നീതുവിനെ കുറിച്ച് സംസാരിക്കുന്നത് ഞാനും യാദൃശ്ചികമായി കേട്ടു. തിരികെ ഹോസ്റ്റലിലേക്ക് പോകാൻ നേരം തങ്കി സാധാരണ എന്തേലും അവളുടെ കൈകൊണ്ട് ഉണ്ടാക്കി തരാറുണ്ട്. ഇത്തവണ പക്ഷെ അതുണ്ടായില്ല. തങ്കിയുടെ വിശ്വാസത്തിൽ അവൾ ഉറച്ചു നിന്നു. ഞാനെത്ര ശ്രമിച്ചിട്ടുമവൾ പഴയപോലെ എന്നോട് സംസാരിക്കാൻ കൂട്ടാക്കിയില്ല….