🌷 തങ്കി 🌷 1

രണ്ടാളും ഒന്നിച്ചിരിക്കുമ്പോ എന്റെ സ്ലേറ്റിൽ ഞാൻ ഓരോന്നു അവളെക്കൊണ്ട് എഴുതിക്കും പിന്ന കളറ് പുസ്തകം ഉണ്ട്. എനിക്കച്ഛൻ ഒത്തിരി വാങ്ങിത്തന്നിട്ടുണ്ടത്.
ഞാനതെല്ലാം തങ്കിയെകൊണ്ട് കളർ ചെയ്യിക്കും. എനിക്കത് കാണാൻ വലിയ ഇഷ്ടമായിരുന്നു… തലയും ചരിച്ചുകൊണ്ട് മൂളിപ്പാട്ടും പാടി അവളുടെ എലിവാൽ മുടിമുന്നിലേക്കിട്ടു
സ്വയം മറന്നവള്‍ കരടിക്കും പൂച്ചക്കും കളർ ചെയുന്നത്…

ഒന്നാം ക്ലാസ്സിലേക്ക് ചെല്ലുമ്പൊ, ഒരു കുട്ടി പാവാടയും ഷർട്ടുമാണ് അവളുടെ വേഷം. ഞാൻ നിക്കറും വെള്ള ഷർട്ടും. നഴ്സറിയുടെ എതിർ ദിശയിലാണു സ്‌കൂൾ ഉള്ളത്. റോഡ് സൈഡിൽ തന്നെ…

അമ്മ ആ വര്ഷമാണ്, സ്‌കൂളിൽ ടീച്ചറായി ചേരുന്നത്. ഞങ്ങൾ മുൻപിൽ നടക്കുമ്പോ അമ്മ പിറകിൽ ഉണ്ടാകും.
സ്ലെറ്റ് മായ്ക്കാൻ വേണ്ടി, ചെറു മുളയുടെ തുമ്പാണ് കുഞ്ഞുന്നാളിൽ അവൾ ഉപയോഗിക്കുക. അത് ഞാൻ അവൾക്കെവിടിന്നേലും പൊട്ടിച്ചു കൊടുക്കും. പക്ഷെ എനിക്കിഷ്ടം ഒരു ഇലയാണ് കട്ടിയുള്ള പച്ച നിറത്തിൽ ഉള്ള ഇല. അതുചുരുട്ടി സ്ലെറ്റ് മായ്കുമ്പോ ഒരു ശബ്ദവുമൊപ്പം വരും. രസമാണ്…

അന്നൊക്കെ അവൾക്ക് ചെറിയ തലവേദന വന്നാൽപ്പോലും ഞാൻ തന്നെയാണ് അവൾക്ക് വീട് വരെ എത്തിക്കാനുള്ള കൂട്ട്. പക്ഷെ തിരിച്ചു സ്‌കൂളിലേക്കൊന്നും
വരില്ല കേട്ടോ. അവളോടൊപ്പം വീട്ടിൽ തന്നെ അവൾ കിടക്കുന്ന ബെഡിന്റെ അരികിൽ കാവൽ ഇരിക്കും. വിജയമ്മ അടുക്കളയിൽ ചുക്ക് കാപ്പി ഇട്ടാലും ഞാൻ തന്നെയാണത് അവൾക്ക് കൊടുക്കാനും മറ്റും. അവരതും കണ്ടു ചിരിക്കുകയും ചെയ്യും.

പിന്നെ ശനി ഞായർ ദിവസം വീട്ടിൽ ഉള്ളപ്പോൾ ഞങ്ങൾ ദൂര ദർശനിൽ സിനിമ കാണുമെങ്കിലും കൊട്ടകയിൽ പോക്ക് നന്നേ കുറവാണു. കാരണം ടൗണിൽ നിന്നും ഒത്തിരി ദൂരം വീട്ടിലേക്കുള്ളതുകൊണ്ട് തന്നെ, എങ്കിലും ഇടക്ക് പോവാറൊക്കെ ഉണ്ട് താനും.

അതേക്കുറിച്ചു പറയുമ്പോ…

തൂവാനത്തുമ്പികൾ എന്ന പടമാണ് ഞങ്ങൾ തീയറ്ററിൽ വെച്ച് ഒന്നിച്ചു ആദ്യമായി കണ്ടത്, മൂന്നു വയസ്സിലോ മറ്റോ ആണത്. അതിൽ മോഹൻലാൽ ബിയർ കഴിക്കുന്ന ഒരു സീൻ ഉണ്ട്, അത് കണ്ടപ്പോള് എനിക്കും ബിയർ വേണമെന്ന് പറഞ്ഞു ഞാൻ തീയറ്ററിൽ വെച്ച് അലറി കരഞ്ഞിട്ടുണ്ടെന്നു അമ്മ പറഞ്ഞു കേട്ടിട്ടുണ്ട്. അതും പറഞ്ഞു എന്റെ വല്യമ്മായി ഇപ്പോഴും കളിയാക്കൽ ഉണ്ട്. പക്ഷെ ഇന്നേവരെ അതിന്റെ രുചി എന്താന്ന് എനിക്കറിയില്ല കേട്ടോ..

രണ്ടാം ക്‌ളാസിൽ ആയപ്പോൾ തങ്കി കുളിച്ചു റെഡിയാവാൻ നല്ല സമയം എടുക്കുമായിരുന്നു. ഞാനാണെങ്കിൽ രാവിലെ തന്നെ കൂട്ടുകാർക്കോടോപ്പം ഓടിച്ചാടി കുളത്തിൽ മുങ്ങി തിമർത്തു വീട്ടിലേക്ക് വരും, അപ്പോഴും അവൾ എണീറ്റിട്ട് ഉണ്ടാവുല്ല. ഞാൻ സ്വയം റെഡിയായി കഴിഞ്ഞു അവളെ വിളിക്കാൻ അങ്ങോട്ട് ചെല്ലുമ്പൊ വിജയമ്മ തങ്കിയെ കുളിപ്പിക്കുകയാവും.

അവിടെ ബാത്രൂം അന്ന് പണിതിട്ടില്ല. ഉള്ളത് ഓല കൊണ്ടുള്ള ഒരു പുരയാണ്. അതിലാണ് കുളി. കുളി കഴിഞ്ഞു മുടിയൊക്കെ തോർത്തി, കുട്ടിക്കൂറ പൗഡറുമിട്ട്, പച്ച റിബ്ബൺ കൊണ്ട് മുടി രണ്ടു സൈഡിലേക്കും കെട്ടി വെച്ചു, കുട്ടി പാവാടയും ഷർട്ടുമിട്ട തങ്കിയെയും കൂട്ടി സ്‌കൂൾ ബെല്ലടിക്കും മുൻപേ അങ്ങെത്താനായി പാടവരമ്പത്തൂടെ
അവളുടെ കൈപിടിച്ചുകൊണ്ട് ഓടുന്നത് സ്‌ഥിരമാണ്.

അപ്പോഴും പൊതിച്ചോറ് ന്റെ പരിപാടി ഉണ്ട്. രണ്ടാളും ഒരേ പൊതിച്ചോർ തന്നെ. അത് പക്ഷെ ക്‌ളാസിൽ ഇരുന്നോണ്ട് അല്ല കഴിക്കുക, സ്‌കൂളിന്റെ അടുത്തൊരു താമര കുളമുണ്ട് കേട്ടോ, അവിടെയാണ് ഊണ് കഴിക്കൽ. കഴിച്ചു കഴിഞ്ഞാൽ കുളത്തിൽ നിന്നും ചെന്താമര പൂ ഞാൻ എത്തി വലിക്കും. അതവള് ഒരു മാലയാക്കി എന്റെ കഴുത്തിൽ ഇടും. അതിന്റെ അർത്ഥമെന്താണ് എന്നറിഞ്ഞിട്ടൊന്നുമല്ല. പക്ഷെ കൂട്ടുകാരൊക്കെ കാണുമ്പോ ചിരിക്കും.
തമാശയ്ക്ക് ആരോ ചോദിച്ചത് ഞാനോർക്കുന്നു. വലുതാകുമ്പോ രണ്ടാളും കല്യാണം കഴിക്കുമോന്നു… പക്ഷെ ആ ചോദ്യം കേട്ട് തങ്കിയും ഞാനും എന്താണ് കല്യാണമെന്നറിയാതെ മുഖത്തോടു മുഖം നോക്കുകയും അവൾ അവനോടു തന്നെ… ആ … കഴിക്കുമെന്ന് പറഞ്ഞിട്ടുമുണ്ട്…