🌷 തങ്കി 🌷 1

അങ്ങനെ 5ആം ക്ലാസ്സിൽ എത്തി. എനിക്ക് ഉയരം വച്ചില്ലെങ്കിലും തങ്കി എന്നെക്കാളും ഉയരം വരുന്നത് കണ്ടപ്പോള് എനിക്ക് അവളോട് അസൂയയും തോന്നി തുടങ്ങി…

ഈ അസൂയ എനിക്ക് മാത്രമല്ല അവളുടെ കൂടെയുള്ള മറ്റു പെൺകുട്ടികൾക്കും ഉണ്ടായിരുന്നു അതിനു കാരണം മറ്റൊന്നാണ്, അത്രയും നീളമുളള മുടി ക്‌ളാസ്സിലെ ആർക്കും തന്നെ ഉണ്ടായിരുന്നില്ല എന്നതാണ് കാര്യം. അത്രയും ഭംഗിയായി ചിരിക്കാനും ആർക്കും കഴിയുമോ…ഇല്ല !
എന്നും കുട്ടികളുടെ ഇടയിൽ അതെ കുറിച്ച് പറച്ചിലുണ്ടായിരുന്നു….
അപ്പോഴും സ്‌കൂളിലേക്ക് പോക്കും വരവുമെല്ലാം ഞങ്ങൾ ഒന്നിച്ചു തന്നെയായിരുന്നു കേട്ടോ. ഞാൻ അവളുടെ കൂടെ നടക്കുമ്പോ ചേച്ചിയും അനിയനും പോകുന്നെ…. എന്ന വിളിപ്പേര് എന്റെ മനസിനെ അന്നൊക്കെ വല്ലാതെ ഉലച്ചിരുന്നു.

അതുകൊണ്ട് അവളും ഞാനും തമ്മിൽ ഉള്ള മനസ് കൊണ്ടുള്ള അകലം വീണ്ടും കൂടുന്നതും ഞാൻ മനസിലാക്കി. ഒരിക്കൽ ഞാവല്പഴം പെറുക്കാൻ തങ്കിയെ കൂടാതെ ഞാൻ പോയപ്പോൾ വൈകീട്ട് എന്നോട് ഒന്നും മിണ്ടാതെ അവൾ സ്‌കൂളിൽ നിന്നുമെന്റെ കൂടെ വീട്ടിലേക്ക് വന്നു…. എനിക്കും മനസ്സിൽ അവളോട് മിണ്ടണം എന്ന് ഉണ്ടായിരുന്നു. അവളോട് പഴയപോലെ എന്തെ മിണ്ടാത്തെയെന്നു ലക്ഷ്മി ടീച്ചർ തുടരെ ചോദിയ്ക്കാൻ തുടങ്ങി.
ഞാനതിനു മറുപടി പറയാതെ മുങ്ങാനും തുടങ്ങി.

6 ആം ക്ലാസ്സിൽ വെച്ചാണ് ജീവിതത്തിലെ ഏറ്റവും മറക്കാനാവാത്ത ഒരു സംഭവം ഉണ്ടാകുനനത്. അതെ കുറിച്ച് പറയുമ്പോ മഞ്ജു നാഥിനെ കുറിച്ച് പറയണം. മഞ്ജു നാഥ്‌. ക്ലാസ്സിലെ ഏറ്റവും ഉയരമുള്ള ഒരു പയ്യൻ, അവനെന്നോട് അന്ന് പറഞ്ഞ ആ കാര്യമാണ് എന്റെ നെഞ്ചിനു ഏറ്റ ആദ്യത്തെ മുറിവ്.

നീളൻ മുടിയും എപ്പോഴും മുല്ലപ്പൂവും ചൂടി ചന്ദന കുറിയുമിട്ടു വരുന്ന എന്റെ തങ്കിയെ അവനു ഇഷ്ടമാണ് എന്നും. അത് അവളോട് ഞാൻ ചെന്നു പറയണമെന്നും. ചങ്ക് പിടഞ്ഞു പോയി…..ഞാനത് കേട്ടപ്പോൾ….

പക്ഷെ എനിക്ക് അവനെ പേടിയായിരുന്നു. ഒരിക്കൽ അവൻ മറ്റൊരുകുട്ടിയെ സ്‌കൂളിലെ വാകമരത്തിന്റെ ചോട്ടിൽ വെച്ചു ചോര വരും വരെ തല്ലുന്നത് കണ്ടിട്ടുണ്ട്.
അവൻ സ്‌കൂൾ മാനേജരുടെ മകനാണ്.
കാശുകാരൻ ആണ്. പക്ഷെ അതല്ല വിഷയം….ഉയരം!!!!

ആദ്യമായി എനിക്ക് ഉയരം കുറവായതിന്റെ പേരിൽ ഞാൻ കരഞ്ഞു. പക്ഷെ എനിക്കത്
തങ്കിയോട് തുറന്നു പറയാൻ കഴിയുമായിരുന്നില്ല. അതിലും ബേധം കോമ്പസ് കൊണ്ട് നെഞ്ചിൽ കുത്തുന്നതാണ്…
സമാധാനമായി ഉറങ്ങിയിരുന്ന എന്റെ ഉറക്കമെല്ലാം ആകെ പോയ രാത്രികൾ ആയിരുന്നു അതെല്ലാം….
ഓരോ ദിവസവും മഞ്ചുനാഥ്‌ എന്നോട് ചോദിക്കുമ്പോ ഞാൻ എന്തേലും പറഞ്ഞു ഒഴിയും.

പക്ഷെ അവൻ എന്നെ നമ്പിയിട്ട് ഫലമില്ല എന്നറിഞ്ഞപ്പോൾ ഒരു ദിവസം രണ്ടും കല്പിച്ചിട്ട് ഞങ്ങൾ രണ്ടാളും സ്‌കൂളിലേക്ക് വരുന്ന വഴി ആ ചെന്താമര കുളത്തിന്റെ അരികിൽ വെച്ച് ഞങ്ങളെ തടഞ്ഞു നിർത്തി. എന്നോട് ക്ലാസ്സിലേക്ക് പോകാനും തങ്കിയെ അവിടെ നിൽക്കാനും വേണ്ടി പറഞ്ഞു. പക്ഷെ എനിക്ക് അവളെ വിട്ടു പോകാൻ മനസ് വന്നില്ല. ഞാനവളുടെ കൈത്തണ്ട പിടിച്ചു നിന്നു. ഞാൻ ഇല്ല പോകില്ലെന്ന് പറഞ്ഞപ്പോ, അവൻ എന്നെ അപ്പൊ കുളത്തിൽ തള്ളിയിട്ടു. എന്റെ യൂണിഫോം ബാഗ് എല്ലാം നനഞ്ഞുകൊണ്ട്
കുളത്തിൽ നിന്ന് ഞാൻ അലറിയായപ്പോ മഞ്ചുനാഥ്‌ ഗത്യന്തരമില്ലാതെ ഓടി. തങ്കി പക്ഷെ ചിരിയോടെ എന്നെ കുളത്തിൽ നിന്നും കൈപിടിച്ച് കയറ്റി….

നനഞ്ഞു കുളിച്ചു നിൽക്കുന്ന ഞാൻ അപ്പൊ തങ്കിയോട് പറഞ്ഞു അവനു നിന്നെ ഇഷ്ടമാണ് എന്ന് പറയാൻ പറഞ്ഞിരുന്നു എന്ന്. തങ്കി എന്നെ നോക്കി ചിരിച്ചുകൊണ്ട് പറഞ്ഞു. ഇനി ചോദിച്ചാൽ എനിക്ക് വേറെ ഒരാളെയാണ് ഇഷ്ടമെന്നു മാത്രം നീ മഞ്ജു നോട് പറഞ്ഞാൽ മതിയെന്ന്. കേട്ടോ…. ശരത്…..

അത് അവനോടു പറയാൻ പറഞ്ഞത് ആണെങ്കിലും, വിജയമ്മയുടെ ചേട്ടന്റെ മകൻ സന്ദീപേട്ടന്റെ മുഖം എനിക്ക് ആ നിമിഷം ഓർമവന്നു. തങ്കിയുടെ മുറച്ചെറുക്കൻ ആണ്. അങ്ങനെ ഉള്ളവർക്ക് തങ്കിയെ കെട്ടാം എന്ന് ഇന്നാള് കണ്ട സിനിമയിൽ പറയുന്നത് കേട്ടപ്പോൾ എന്റെ മനസ് വീണ്ടും പാളിപോയി.