അവൾ പിന്നെ ഒന്നും മിണ്ടിയില്ല, പുറത്തേയ്ക്ക് നോക്കി കൊണ്ടിരുന്നു. ഓഫീസിൽ എത്തി അവളുടെ കൂടെ ഉള്ളിലേക്ക് കയറി ചെന്നു.
പോണില്ലേ…, അശ്വതിയോട് സംസാരിക്കാൻ നിൽക്കെ ആയിരിക്കും അല്ലെ.
ഞാൻ ഒന്നും മിണ്ടാതെ എന്റെ ട്രാൻസ്ഫർ ഓർഡർ എടുത്ത് അവളുടെ മേശ പുറത്ത് വച്ചു, അത് എടുത്തു വായിച്ചു കൊണ്ടിരുന്നപ്പോൾ അവളുടെ മുഖത്ത് ഒരു സന്തോഷം മിന്നി മറഞ്ഞില്ലേ…എന്നൊരു സംശയം.പെട്ടെന്ന് മുഖത്ത് ഗൗരവം വരുത്തി കൊണ്ട്
ഇങ്ങോട്ട് ആണോ ട്രാൻസ്ഫർ,
ഞാൻ ഒന്നും മിണ്ടിയില്ല
നേരത്തെ എന്താ പറയാത്തത്…
ഒരു സസ്പെൻസ് ആയിക്കോട്ടെ എന്ന് കരുതി.
സസ്പെൻസ് എനിക്കോ അശ്വതിക്കോ….
ഇയാളോട് ഞാൻ സംസാരിക്കുന്നില്ല, സംസാരിച്ചാൽ ശരി ആകില്ല.
ഇതും പറഞ്ഞു പുറത്തിറങ്ങാൻ പോയ എന്നെ അവൾ വിളിച്ചു.
അതെ ഇത് നമ്മുടെ വീടല്ല, പിണങ്ങി പോകാൻ…, ഇന്ന് മെയിൽ ചെയ്യാനുള്ള കുറച്ചു വർക്ക് ഉണ്ട്. ആ റെക്കോർഡ് എടുത്ത് വച്ചു അത് കംപ്ലീറ്റ് ചെയ്യൂ…
ശരി മാഡം..,
മാഡം എന്നൊന്നും വിളിക്കണ്ട..
ഇത് നമ്മുടെ വീടല്ലല്ലോ, ഓഫീസല്ലേ.., ഇവിടെ ഇയാൾ എനിക്ക് മാഡം അല്ലെ.., അപ്പൊ അങ്ങനെ അല്ലെ വിളിക്കേണ്ടത്.
ആ…. അങ്ങനെ തന്നെയാ…?, എന്തെ…?, രാവിലെ തന്നെ ഉടക്കാനുള്ള ഭാവം ആണോ…?
ഞാൻ ഒന്നും മിണ്ടാതെ റെക്കോർഡ് എടുത്ത് കൊണ്ട് വന്നു ജോലി തുടങ്ങി. ഇടയ്ക്ക് എപ്പോഴോ അശ്വതി വന്നു,അവൾ എന്റെ അടുത്ത് വന്നു സംസാരിച്ചു,ഞാൻ ആണ് ഇങ്ങോട്ട് ട്രാൻസ്ഫർ ആയത് എന്നറിഞ്ഞ അശ്വതിയ്ക്കും വലിയ സന്തോഷം ആയി, പിന്നെ നമ്മൾ കളിച്ചും ചിരിച്ചും ഇരുന്നു ചെയ്യാൻ തുടങ്ങി, ട്രീസ ഇടയ്ക്ക് ഇങ്ങോട്ട് നോക്കുന്നുണ്ട്.ഒരു പതിനൊന്നര ആയപ്പോൾ ട്രീസ വന്നു അശ്വതിയോട് പറഞ്ഞു,
താഴെ തൈകൾ വന്നിട്ടുണ്ട് പോയി നോക്കി എടുത്ത് വയ്ക്ക്, ഇല്ലെങ്കിൽ അവർ കള്ള കണക്ക് പറയും.
ഞാനും കൂടെ പോകാം മേഡം, ഇതിപ്പോൾ തീരും.
ഞാൻ മാഡം എന്ന് വിളിച്ചതും അശ്വതി
അനൂപ്.., മാഡം എന്നാണോ വിളിക്കുന്നത്..
അത് കേട്ടതും ട്രീസ പാമ്പ് നോക്കുന്നത് പോലെ എന്നെ നോക്കി.
ഇത് ഓഫീസല്ലേ അശ്വതി, ഇവിടെ ട്രീസ എന്റെ ഉയർന്ന ഉദ്യോഗസ്ഥ അല്ലെ.
അശ്വതി വീണ്ടും…
എന്നാലും….
ഒരു എന്നാലും ഇല്ല, താൻ വന്നേ…
പെട്ടെന്ന് ട്രീസ , അശ്വതി മാത്രം പോയാൽ മതി, അനൂപേട്ടൻ ഇവിടെ നിന്നെ….
അനൂപേട്ടനാ…അതെപ്പ.. എന്റെ ആത്മഗതം ആണ്. അശ്വതി താഴേയ്ക്ക് പോയി.. ട്രീസ എന്റെ അടുത്ത് വന്നിട്ട്…
ദേ…. ഒരുമാതിരി വേഷം കെട്ട് എടുക്കരുത്.,
ഞാൻ എന്ത് ചെയ്തു…
നീ എന്തിനാ അവളെ മുമ്പിൽ വച്ചു എന്നെ മാഡം എന്ന് വിളിച്ചത്.
അത് മാഡം അല്ലെ നേരത്തെ പറഞ്ഞത്. അല്ല അവളുടെ മുമ്പിൽ വച്ചു വിളിച്ചതാണോ കുറ്റം.
അനൂപേട്ടാ ..എനിക്ക് ദേഷ്യം വരുന്നുണ്ട്, അന്നേരം ഞാൻ ചുമ്മാ പറഞ്ഞതാണ് എന്നെ വീട്ടിലെ പോലെ ട്രീസ എന്ന് വിളിച്ചാൽ മതി.
മാഡം എന്തിനാ അവളുടെ മുന്നിൽ വച്ചു അനൂപേട്ടാ എന്ന് വിളിച്ചത്, വീട്ടിലെ പോലെ പട്ടി, ചെറ്റേ.. അങ്ങനെ വിളിച്ചാൽ പോരെ..
അങ്ങനെയാണ് വിളിക്കേണ്ടത്, ഇതൊരു ഓഫീസ് അല്ലെ അതിന്റെ മാന്യതയ്ക്ക് വേണ്ടി വിളിച്ചെന്നെ ഉള്ളൂ…
മാഡം എന്ന വിളിക്ക് മാന്യത കുറവാണോ…. മാഡം.
അനൂപേട്ടാ.…. നീ മാഡം എന്ന വിളി നിർത്തിക്കോ…. അല്ലെങ്കിൽ പ്രശനം ആകും, ഞാൻ എന്റെ ദേഷ്യം പരമാവധി പിടിച്ചു നിർത്തിയേക്കുവാണ്.
മാഡം എന്നെ അനൂപേട്ടാ എന്ന് വിളിക്കുന്നത് നിർത്തിയാൽ ഞാൻ നിർത്തം.
എടാ…. ചെറ്റേ…. നീ നന്നാവാൻ.. സമ്മതിക്കില്ല…അല്ലെ.
എന്താണ് ഭാര്യയും ഭർത്താവും കൂടി ഒരു ബഹളം. അശ്വതി ആണ്.
അത് ഒന്നുമില്ല അശ്വതി, ട്രീസ പറയുകയാ…, അശ്വതി ജോലി ഒന്നും ചെയ്യുന്നില്ല.., ചുമ്മാ ലാത്തി അടിച്ചു നടപ്പാണ് എന്ന്.ഞാൻ പറഞ്ഞു അശ്വതി അങ്ങനെ ഒന്നുമല്ല അവൾ ജോലി ഒക്കെ ചെയ്യും എനിക്ക് പണ്ടേ അറിയുന്നതാണ് എന്ന്..
ഞാൻ ട്രീസയെ ഒളിക്കണ്ണിട്ട് നോക്കി കൊണ്ട് പറഞ്ഞു.
മതി മതി എനിക്കിട്ട് ഊതിയത് മതി.., ഇപ്പോ മാഡം ഒക്കെ പോയ…
ഞാൻ മാഡം എന്ന് വിളിച്ചപ്പോൾ ട്രീസയ്ക്ക് എന്തോ ഒരു കുറച്ചിൽ.