അതെനിക്ക് നല്ലൊരു അടി ആയിപ്പോയി. സത്യം പറഞ്ഞാൽ ആ പൈസ കണ്ടുകൊണ്ടാണ് ഞാൻ പഠിക്കാൻ ആയി വന്നത് തന്നെ… വീട്ടിൽ പൈസ ഒക്കെ ഉണ്ട്. പക്ഷെ നമ്മൾ നമ്മുടെ കയ്യിലെ പൈസക്ക് പഠിക്കുമ്പോൾ ഉള്ള ഒരു ഫീലിംഗ് ഉണ്ടല്ലോ… അത് വേറെ ആണ്. പിന്നെ വീട്ടിൽ നിന്നൊന്നും വാങ്ങിക്കാൻ ഞാൻ പോവാറുമില്ല. ഇതിപ്പോ താമസം ആന്റിയുടെ കൂടെ… മാസം 12000.. അടിച്ചുപൊളിച്ചു ജീവിക്കാം എന്നൊക്കെ ആണ് കരുതിയത്.
എന്റെ മുഖത്തെ ഭാവം മാറി സങ്കടം ആവുന്നത് കണ്ടിട്ടാവണം ജോൺ സാറിന് സന്തോഷം ആയി.. സാര് സന്തോഷത്തോടെ എണീറ്റ് റൂമിനു പുറത്തേക്കു നടന്നു.
ഞാനും പതുക്കെ പുറത്തോട്ടിറങ്ങി.. ശ്രീ ഓടിവന്നു എന്റെ കൈയിൽ പിടിച്ചു. അപ്പോഴേക്കും താടിക്കാരനും, വേറെ കുറെ കുട്ടികളും അടുത്തേക്ക് വന്നു…
” എന്തായി….? എന്ത് പറഞ്ഞു? ” ശ്രീ ആകാംഷയോടെ ചോദിച്ചു.
ഞാൻ കാര്യങ്ങൾ ഒക്കെ പറഞ്ഞു, ചിരിച്ചുകൊണ്ട് തന്നെ…. താടിക്കാരനും ബാക്കി ഉള്ളവർക്കും സമാധാനം ആയി. പക്ഷെ ശ്രീയുടെ മുഖം മാറി… അവൾ എന്റെ തോളിലേക്ക് മുഖം ചേർത്തുകൊണ്ട് ഞാൻ പറഞ്ഞെ അല്ലെ… ഞാൻ എറ്റോളാം എന്ന്.. എന്നിട്ട് വെറുതെ എന്തിനാ…. എന്നും പറഞ്ഞു കരയാൻ തുടങ്ങി.
ഞാൻ ചിരിച്ചുകൊണ്ട് താടിക്കാരനോട് ചോദിച്ചു.. ” നിങ്ങൾക്ക് ഇതിന്റെ മുമ്പ് സസ്പെൻഷൻ ഒക്കെ കിട്ടിയിട്ടില്ലേ?? ഇതത്ര വലിയ കാര്യം ആണോ?? അന്നും ഇവൾ ഇങ്ങനെ കരഞ്ഞോണ്ടിരിക്കായിരുന്നോ ??”
” എന്റെ ചേട്ടാ… ഞങ്ങൾക്ക് സസ്പെൻഷൻ അടിച്ചപ്പോൾ ഒക്കെ ആദ്യത്തെ പേര് ശ്രീലക്ഷ്മി എന്നായിരുന്നു. ആദ്യമായിട്ട് അവളുടെ പേരില്ലാതെ സസ്പെൻഷൻ ഓർഡർ കിട്ടിയതിന്റെ സങ്കടം ആണ് ഇത് ”
അവൾക്ക് വലിയമാറ്റം ഒന്നുമില്ല. എന്റെ കയ്യിൽ മുഖം ചേർത്ത് കയ്യിലൂടെ അവളുടെ കൈ ചുറ്റി എടുത്ത് ചാരി നിൽക്കുകയാണ്…
” ചേട്ടോയ്… ഇത്തിരി വിട്ടു നിന്നോ.. അല്ലേൽ പബ്ലിക് ആയിട്ട് കെട്ടിപ്പിടിച്ചു എന്നും പറഞ്ഞു അടുത്ത സസ്പെൻഷൻ കിട്ടും ”
” അതങ്ങനെ കിട്ടുവാണേൽ ഞാൻ സഹിച്ചെടാ… ഒന്നുല്ലെങ്കിലും നാലാളോട് പറയാലോ ഇവളെ ആണ് കെട്ടിപ്പിടിച്ചതെന്നു ” പറഞ്ഞു കൊണ്ട് ഞാൻ അവളുടെ കയ്യിൽ നിന്നും കൈ വിടുവിച്ചു അവളെ സൈഡിലൂടെ ചുറ്റിപ്പിടിച്ചു.
” വാ… എനിക്കെന്റെ ബാഗ് ഒക്കെ എടുക്കണം… ”
” അത് ഞാൻ എടുത്തോളാം.. ഇനീപ്പോ ക്ലാസ്സിൽ കേറണ്ട… ”
” അത് വേണ്ട.. നീ വിചാരിച്ച പോലെ ഒന്നും അല്ല… ഞങ്ങളുടെ ക്ലാസ് സൂപ്പർ ആണ്… ഞാൻ സസ്‌പെൻഷനും കൊണ്ട് അങ്ങോട്ട് ചെന്നാൽ ഉണ്ടല്ലോ, അവരെന്നെ കെട്ടിപ്പിടിച്ചു ഉമ്മ വെക്കും… അടിപൊളി ആൾക്കാരാ…. പിന്നെ ഓഫീസിൽ നിന്നും എനിക്ക് ആ ലെറ്ററും വാങ്ങണം… “, ഞാൻ അവളെയും കൊണ്ട് മുന്നോട്ട് നടന്നു… ബാക്കി എല്ലാവരും ആ പ്രശ്നം അവസാനിച്ച സമാധാനത്തോടെ അവരവരുടെ കാര്യം നോക്കി പോയി…
” നീയെന്താ ക്ലാസിൽ പോവാത്തത് ?? ” ബ്ലോക്കിലേക്ക് നടക്കുമ്പോൾ അവളോട് ചോദിച്ചു.
” ഓ… ഞാനായിട്ട് ഇനി ക്ലാസ്സിൽ കേറുന്നതെന്തിനാ…?? നമുക്ക് വീട്ടിൽ പോവാം… ”
” അതൊന്നും വേണ്ട… നീ ക്ലാസ്സിൽ കേറിക്കോ… പിന്നെ, പഠിക്കാൻ ഉള്ളതൊക്കെ നന്നായിട്ട് പഠിച്ചോ… നിങ്ങളുടെ കുറെ പോർഷൻസ് ഞങ്ങൾക്കും പഠിക്കാൻ ഉണ്ട്… രണ്ടാഴ്ച്ച കഴിഞ്ഞാൽ സീരീസ് എക്സാം ആണെന്ന് കേൾക്കുന്നുണ്ട്. ഏതായാലും ക്ലാസ് ഒക്കെ പോയതല്ലേ… ഒറ്റക്കിരുന്നു പഠിക്കേണ്ടി വരും. ”
അവൾ എന്നെ പിടിച്ചു നിർത്തി മുഖത്തേക്ക് നോക്കി ചോദിച്ചു… ” എന്നാ.. ഞാൻ പഠിപ്പിച്ചു തരട്ടെ?? നമുക്ക് ഫുൾ മാർക്ക് വാങ്ങി ആ പ്രൊഫെസ്സറുടെ മുന്നിൽ പോയി നിക്കണം… ”
” ആ… നീ തന്നെ പഠിപ്പിച്ചു തരേണ്ടി വരും… നീ വലിയ പുലി ആണ്, ടോപ്പർ ആണെന്നൊക്കെ ആരോ പറഞ്ഞു കേട്ടു. ”
” പുലി ഒന്നും അല്ല, കുഴപ്പം ഇല്ലാത്ത മാർക്ക് ഒക്കെ ഉണ്ട്.. ”
” നീയിത്രേം കളിച്ചു നടന്നിട്ട് നിനക്കെങ്ങനെയാടീ ഫുൾ ഒക്കെ കിട്ടുന്നത്?? ”
” ആ… എനിക്കറിയാവുന്ന ക്വസ്റ്റെയ്ൻ വരുന്നത് കൊണ്ടാവും… അതൊക്കെ പോട്ടെ…. ഞാൻ പഠിപ്പിച്ചു തരാം… പിന്നെ സസ്പെൻഷൻ എന്ന് പറഞ്ഞാൽ ക്ലാസ്സിൽ കേറണ്ട എന്നെ ഉള്ളൂ… രാവിലെ എന്റെ കൂടെ വരണം… ഇവിടെ എവിടെ എങ്കിലും ഒക്കെ കറങ്ങി നടന്നോ… എന്നിട്ട് വൈകുന്നേരം ഒന്നിച്ചു
പോവാം…. വീട്ടിൽ ആരോടും പറയണ്ട, അഭിയോട് പോലും…. ”
” പിന്നെ… ഞാൻ നിന്റെ ബോഡിഗാർഡ് അല്ലെ നിന്റെ പിറകെ നടക്കാൻ.. ഞാൻ സുഖായിട്ട് വീട്ടിൽ കിടന്നുറങ്ങും. ”
” അപ്പൊ അഭി ചോദിച്ചാലോ?? ”
” ചോദിച്ചാലെന്താ.. സസ്പെൻഷൻ അടിച്ചെന്ന് പറയും”
” അത്.. അത് വേണ്ട… അന്ന് അവൾ പറഞ്ഞ പോലെ ഞാൻ കൊണ്ട് നടന്നു ചീത്ത ആക്കിയെന്നെ അവൾ പറയൂ…. ഒന്നും മനസ്സിൽ വെച്ചല്ല… എന്നാലും അവൾ അത് പറയുമ്പോ എനിക്കെന്തോ കുറ്റം ചെയ്ത പോലെയാ… അതുകൊണ്ട് അവളോട് പറയണ്ട… ”
ശെരി എന്നും സമ്മതിച്ചു ഞാൻ ക്ലാസ്സിലേക്ക് ചെന്നു. ക്ലാസ്സിൽ അപ്പോഴേക്കും കാര്യം അറിഞ്ഞിരുന്നു. ക്‌ളാസ് നടന്നുകൊണ്ടിരിക്കുന്നു. ഞാൻ ചെന്ന് എന്റെ ബാഗ് എടുത്തു. വിശാലിനോട് ബൈ പറഞ്ഞു. അവൻ പെട്ടെന്ന് അവന്റെ ഫോൺ എനിക്ക് നീട്ടി നമ്പർ ഡയല് ചെയ്യാൻ പറഞ്ഞു. ഞാൻ എന്റെ നമ്പർ ഡയല് ചെയ്ത എനിക്കൊരു മിസ് കാൾ അടിച്ചു ക്ലാസ്സിൽ നിന്നിറങ്ങി…
അപ്പൊ..ഇനി ഒരാഴ്ച്ച കഴിഞ്ഞു കാണാം… എന്തൊരു ഐശ്വര്യമുള്ള ക്ലാസ്… ഞാൻ ക്ലാസിലേക്ക് നോക്കി മനസ്സിൽ പറഞ്ഞു. അപ്പോഴേക്കും വിശാൽ ഒറ്റക്കിരിക്കാൻ വയ്യാഞ്ഞിട്ടാണെന്നു തോന്നുന്നു, ഞങ്ങളുടെ ക്ലാസ്സിലെ വെളുത്തു മെലിഞ്ഞ ഒരു പൂച്ചക്കണ്ണിയുടെ അടുത്തേക്ക് ബുക്കും കൊണ്ട് ഇരുന്നിരുന്നു.
* * * * * * * *
അന്ന് ഫുൾ അവിടെയും ഇവിടെയും ഒക്കെ കറങ്ങിത്തിരിഞ്ഞു. ഉച്ചക്ക് ശ്രീയുടെ കൂടെ പോയി ആന്റിയുടെ കടയിൽ നിന്നും ചോറ് കഴിച്ചു. അവളെ നിർബന്ധിച്ചു ക്ലാസ്സിൽ വിട്ടു, ക്യാമ്പസിലെ ഒരു മരത്തണലിൽ വന്നിരുന്നു… മാവ് ആണ്, സാധാരണ കാമ്പസ്സിൽ ഗുൽമോഹറും അശോകവും, ആലും ഒക്കെ ആണല്ലോ… ഇവിടെ എന്താ മാവൊക്കെ… മരത്തിനു ചുറ്റും സിമൻറ് കൊണ്ട് കെട്ടിയിട്ടുണ്ട് ഇരിക്കാൻ പാകത്തിൽ. പക്ഷെ കുറെ ഉറുമ്പും പേരറിയാത്ത കുറെ പ്രാണികളും ഒക്കെ നടക്കുന്നുണ്ട് അതിലെ… മരത്തിന്റെ ചുറ്റും കുറെ മിട്ടായിക്കവറും പേപ്പർ ഗ്ലാസും ഒക്കെ ഉണ്ട്… ഇവർക്കിതൊക്കെ ഒന്ന് വേസ്റ്റ് ബിന്നിൽ ഇട്ടൂടെ?? വെറുതെ ഭംഗി കളയാൻ ആയിട്ട്…
” താനെന്താടോ ഇവിടെ ഇരിക്കുന്നത്?? തനിക്ക് ഇവിടുന്നു ഇറങ്ങാൻ ഉള്ള പേപ്പർ കിട്ടിയില്ലേ… ?? ” ഘനഗാംഭീര്യം ആയ ശബ്ദം കേട്ടാണ് ഞാൻ തിരിഞ്ഞത്… അശോകൻ സാർ.
” അത് സാർ… വീട്ടിൽ എന്ത് പറയും എന്നാലോചിച്ചാ… ” ഞാൻ ഒരിത്തിരി സങ്കടം മുഖത്തു വരുത്തി ചെറിയ ചിരിയോടെ പറഞ്ഞു.
