” അപ്പൊ നിങ്ങളോ ? ”
” ഞങ്ങൾ സീനിയേഴ്‌സ് അല്ലേ ?? അവരും പഠിക്കണ്ടേ കാര്യങ്ങൾ ഒക്കെ. ”
” ആ… അങ്ങനെ.. അപ്പൊ നമുക്ക് വേറെ റോൾ ഒന്നുല്ലാത്തത് കൊണ്ട് നമുക്ക് പോയാലോ ?? ”
ശ്രീയുടെ മുഖത്തേക്ക് നോക്കി ഞാൻ ചോദിച്ചു.
” ആ.. എനിക്ക് ഒന്ന് മര്യാദക്ക് ഉറങ്ങണം… ഇന്നലെ രാത്രി ഇരുന്നു എഴുതിയതിന്റെ ക്ഷീണം മാറിയിട്ടില്ല. ” പറയലും അവൾ എണീക്കലും കഴിഞ്ഞു. എന്നിട്ട് വാച്ച് എന്റെ നേരെ നീട്ടി കെട്ടിക്കോ എന്ന് പറഞ്ഞു.
* * * * * * * *
ഉച്ചക്ക് ഫുഡ് ഒക്കെ കഴിച്ചു വീട്ടിൽ എത്തി ഡ്രെസ് മാറി ഞാൻ ബെഡിലേക്ക് ഇരുന്നു. പെട്ടെന്നാണ് ഡിസ്‌പ്ലേയിൽ സുജിത് കാളിങ്. ഓ.. ഇവന്റൊരു കാര്യം. ഞാൻ ഉച്ചക്ക് വിചാരിച്ചതേ ഉള്ളൂ… എന്തൊരു ആത്മബന്ധം ! ഫോണെടുത്തു.
” അളിയാ…. നീ ചത്തെന്നു കേട്ടു. “, ആദ്യത്തെ ചോദ്യം.
” അതേടാ.. ചത്തു. അല്ലെങ്കിലും ഞാൻ ചത്തോ ജീവനോടെ ഉണ്ടോ എന്ന് അന്വേഷിക്കാൻ നീയൊന്നും ഇല്ലല്ലോ… ”
” ക്ഷെമി അളിയാ… ജോലി ഇല്ലാത്ത ഒരു ഡിഗ്രിക്കാരന്റെ അവസ്ഥ നിനക്കറിയാലോ… മില്ലിൽ പോയി പൊടിപ്പിക്കൽ മുതൽ അമ്മൂമ്മയെ ആശുപത്രിയിൽ കൊണ്ട് പോകേണ്ടത് വരെ ഞാനാ… ”
” ആ..ആ.. ആയിക്കോട്ടെ.. പിന്നെ വേറെ എന്തുണ്ട് ?? ”
” എടാ ഞാനേ..ഒരു ട്രിപ്പ് പോവാണ്, ഊട്ടിക്ക്. ”
” ഊട്ടിയിൽ നിനക്കാരെങ്കിലും കൈവിഷം തന്നിട്ടുണ്ടോടാ ?? ഇതെത്രാമത്തെ പ്രാവശ്യമാ നീ പോവുന്നത്?? അതോ ഊട്ടി എന്നും പറഞ്ഞു വല്ല ഗുണ്ടൽപേട്ടിലേക്കും ആണോ നീ പോവുന്നത്?? ”
” അല്ലെടാ.. ഊട്ടി തന്നെയാ.. നമ്മടെ ഒരു പയ്യൻ ഗൾഫിന്നു വന്നിട്ടുണ്ട്.. അപ്പൊ അതിന്റെ കറക്കം. ”
” ആ.. നീയെങ്ങനാ പോവുന്നെ? ”
” കാറുണ്ട്.. ആ.. പിന്നെ, നിന്റെ ബൈക്ക് ഞാൻ കുട്ടപ്പനാക്കി വീട്ടിൽ കൊണ്ടിട്ടുണ്ട്. വീട്ടിൽ വിളിച്ചു ചോദിച്ചോ… പിന്നെ കുറച്ചു പൈസ ആയി. അത് നിന്റച്ഛൻ തന്നിട്ടുണ്ട്… “, അന്ന് ബൈക്ക് കൊടുത്തപ്പോൾ കുറച്ചു കൂടി വർക് ഉണ്ടായിരുന്നു. ഫൈബർ പാർട്സ് ഒക്കെ മാറ്റാനും അല്ലറ ചില്ലറ ശബ്ദങ്ങൾ ഇല്ലാതാക്കാനും.. ഞാൻ അവിടെ ഇല്ലാത്തത് കൊണ്ട് സുജിത് ആണ് ഇതൊക്കെ ചെയ്യുന്നത്.
” എടാ എത്രയായി? ”
” അയ്യായിരത്തി സംതിങ് ”
” എടാ.. നീയത് മൊത്തം മാറ്റിയോ?? ആകെ കുറച്ചു പണിയല്ലേ ഉണ്ടായിരുന്നുള്ളൂ?? ”
” അത് ഫുൾ സർവീസ് ഒക്കെ ചെയ്തു. പിന്നെ ഞാൻ അച്ഛന്റെ കയ്യിന്നു പത്തു വാങ്ങിയിട്ടുണ്ട്.. ട്രിപ്പ് ഒക്കെ ഉള്ളതല്ലേ… അപ്പൊ ശെരി.. ”
പറയലും വെക്കലും കഴിഞ്ഞു. ഇതാണവൻ.. സത്യസന്ധനായ കള്ളൻ എന്നൊക്കെ പറയില്ലേ… എക്സ്ട്രാ പൈസ വാങ്ങി, മാന്യമായിട്ട് എന്നെ വിളിച്ചു പറഞ്ഞു.
ദേ പിന്നേം വിളിക്കുന്നു…
” എന്താടാ നാറി ?? ”
” അതേയ്… എടാ ഇന്ന് നിന്റെ ബൈക്ക് കൊണ്ട് വെക്കാൻ പോയപ്പോ ഒരടിപൊളി ചിക് എന്നോട് എപ്പോഴാ വന്നെന്നും ചോദിച്ചു ഓടിവന്നു.. ”
” എവിടുന്ന്?? ”
” നിന്റെ വീടിന്റെ അവിടുന്ന്.. അപ്പുറത്തെ വീട്ടിൽ നിന്ന് ”
” എന്നിട്ട് ?? ”
” ഞാൻ ഹെൽമെറ്റ് ഊരിയപ്പോൾ ഒന്നും മിണ്ടാതെ സോറി പറഞ്ഞു പോയി, ഏതാടാ ആ ചിക്ക്?? ”
അങ്ങനെ ആളു മാറി മിണ്ടണമെങ്കിൽ അവിടെ ഗൗരി മാത്രമേ ഉള്ളൂ… ബൈക്ക് കണ്ടപ്പോ ഞാൻ ആണെന്നും വിചാരിച്ചു അവൾ വന്നതാവും.. അല്ല, അവളെ ഈ തെണ്ടി എന്താ വിളിച്ചേ..ചരക്കെന്നോ ?? എനിക്ക് ദേഷ്യം പിടിച്ചു.
” ചരക്ക് നിന്റെ അമ്മായി… കുടുംബത്തിൽ പിറന്ന പെങ്കൊച്ചുങ്ങളെ പറ്റി അനാവശ്യം പറയുന്നോടാ നാറി…. ”
“ചരക്കല്ലെടാ.. ചിക്…ചിക്.. സി.എച്.ഐ.സി.കെ. ചിക്ക്.. ചിക്.. “, അവൻ വിളിച്ചു പറഞ്ഞു…
വെച്ചിട്ട് പോടാ എന്നും പറഞ്ഞു ഞാൻ ഫോൺ കട്ട് ചെയ്തു ബെഡിലേക്കിട്ടു. എന്തോ മനസിന് ഒരു സന്തോഷം തോന്നുന്നു. അവൾ എന്നെ അപ്പോൾ ഓർക്കുന്നുണ്ട്. ഞാൻ ഓർക്കുന്നില്ലെങ്കിൽ കൂടി… ഇവിടെ വന്നതിന്റെ വിശേഷങ്ങൾ ഒക്കെ അവളോട് ഒന്ന് പറയണം എന്നുണ്ടായിരുന്നു. പക്ഷെ എങ്ങനെ ?? അവളുടെ ഫോൺ നമ്പറും ഇല്ല.. ഒന്നുമില്ല…. എഫ്.ബിയിൽ കാണില്ലേ?? തപ്പി നോക്കിയാലോ ??? ചുണ്ടിൽ ചെറിയൊരു ചിരി വന്നു… ഒരു മൂളിപ്പാട്ടും.
” ഇതെന്താ ചന്തയോ ?? ഫുൾ ഒച്ചപ്പാടും തെറിവിളിയും ആണല്ലോ “, ഗൗരി ആണ്.
ഒരു ത്രീ ഫോർത്തും ടീഷർട്ടും ആണ് വേഷം. ആദ്യമായിട്ടാണ് ഞാൻ അവളെ ഈ വേഷത്തിൽ കാണുന്നത്. ഒരു കുട്ടിത്തം തോന്നുന്നു.
” ഫ്രണ്ടാണ് ” ഞാൻ പറഞ്ഞു.
” മ്.. എനിക്ക് കിടന്നിട്ട് ഉറക്കം വരുന്നില്ല…”, അവൾ ചാടിക്കേറി എന്റെ ബെഡിലേക്ക് കമിഴ്ന്നു കിടന്നു.
ഞാൻ ബെഡിൽ കട്ടിലിൽ ചാരി ചരിഞ്ഞു കിടക്കാണ്.. അവൾ എൻറെ അടുത്തേക്ക് നീങ്ങിക്കിടന്നു തല ഓപ്പോസിറ്റ് സൈഡിലേക്ക് ചെരിച്ചു വെച്ചു. ഞാൻ കയ്യെത്തിച്ചു ഫോൺ എടുത്ത് നെറ്റ് ഓൺ ആക്കി… നെറ്റ്‌വർക്ക് പോയോ?? ഒരു തെറ്റടയാളം കാണിക്കുന്നു നെറ്റ് വർക്കിന്റെ അവിടെ. ഞാൻ ക്രോം ഓപ്പൺ ചെയ്തു ദിനോസർ ഓടുന്ന ഗെയിം കളിയ്ക്കാൻ തുടങ്ങി…
കുറച്ചു നേരം കഴിഞ്ഞിട്ടും എന്റെ അനക്കം ഒന്നും ഇല്ലാത്തത് കൊണ്ടാവണം അവൾ തലപൊക്കി നോക്കി. ഞാൻ ഫോണിൽ നോക്കി ഇരിക്കുന്നതാണ് കണ്ടത്.
” എനിക്ക് ഉറക്കം വരുന്നില്ലാന്നു പറഞ്ഞിട്ട്… എന്താ ഫോണിൽ കുത്തിക്കൊണ്ടിരിക്കുന്നത് ?? ”
പറച്ചിലും ഫോൺ പിടിച്ചു വാങ്ങലും കഴിഞ്ഞു. ഹൈ സ്കോറിലേക്ക് കുതിച്ചു കൊണ്ടിരുന്ന എന്റെ ദിനോസർ മൂക്കും കുത്തി താഴെ….
” കളഞ്ഞു… എന്റെ ഹൈ സ്‌കോർ പോയി… ” ഞാൻ സങ്കടപ്പെട്ട് പറഞ്ഞു അവളുടെ തോളിൽ ഒന്ന് തല്ലി.
ഔ എന്നും പറഞ്ഞു അവൾ ചെരിഞ്ഞു കിടന്നു എന്റെ വയറിനു ഒരു കുത്ത് തന്നു.
” ഇതൊക്കെ സിമ്പിൾ അല്ലെ… ഇതിനൊക്കെ എന്റെ കയ്യിൽ ഒരു ഐഡിയ ഉണ്ട്.. ” അവൾ വലിയ കാര്യത്തിൽ പറഞ്ഞു..
” എന്താണാവോ?? ”
” അതൊക്കെ പറയാം… ഇപ്പൊ തല്ക്കാലം എന്നെ ഉറക്ക്, ഇയാൾ കോളേജിൽ നാറാതിരിക്കാൻ വേണ്ടി ഞാൻ ഇന്നലെ രാത്രി മൊത്തം എന്റെ ഉറക്കം കളഞ്ഞതാ.. പരീക്ഷക്ക് പോലും ഞാൻ ഇത്ര കഷ്ടപ്പെട്ടിട്ടുണ്ടാവില്ല… ” അവൾ ചിണുങ്ങിക്കൊണ്ട് പറഞ്ഞു….
” ഓ… ആയിക്കോട്ടെ..ഞാൻ ഉറക്കാം… ” കയ്യെത്തിച്ചു എ.സി.യുടെ സ്വിച്ച് ഓൺ ആക്കിക്കൊണ്ട് ഞാൻ താഴേക്ക് ഇറങ്ങിക്കിടന്നു. അവൾ തല എടുത്ത് എന്റെ നെഞ്ചിലേക്ക് വെച്ചു മലർന്നു കിടന്നു.
” അതേയ്…. അന്നെന്താ ഫസ്റ്റ് ഡേ എന്നെ വിളിക്കാതെ കോളേജിന്ന് പോന്നത്?? അമ്മ എന്നെ ഏൽപ്പിച്ചതായിരുന്നു സൂക്ഷിച്ചു കൊണ്ട് നടക്കണം എന്നും പറഞ്ഞു” അവൾ ഫോണിലേക്ക് നോക്കിക്കൊണ്ട് ചോദിച്ചു.
” നിന്നെ അവിടെ കണ്ടില്ല… പിന്നെ കുറച്ചു കഴിഞ്ഞപ്പോ ആ പെണ്ണും പോയി… ഞാൻ ആകെ പോസ്റ്റ് ആയില്ലേ… അതാ പിന്നെ പോന്നത്… ”
” ഛെ…. ഞാൻ ആ തിരക്കിൽ പെട്ട് അവിടെ നിർത്തിയ കാര്യം മറന്നു. അല്ല… വല്ല കുടയോ വടിയോ ആണോ ചാരി വെച്ചിടത്ത് തന്നെ നില്ക്കാൻ…. കുറച്ചു കഴിഞ്ഞു എന്നെ കണ്ടില്ലെങ്കിൽ ക്ലാസിനു പൊയ്ക്കൂടായിരുന്നോ ?? ”
