” വരുന്നോ വരുന്നെങ്കിൽ വാ. ഇല്ലെങ്കിൽ ഞാൻ അങ്ങോട്ട് വരാം. വേണോ ഞാൻ വരണോ..?”
” വേണ്ട നാളെ ഒരു ദിവസം കൂടി കാത്തുനിൽക്കാം. എന്നിട്ട് രാത്രിയാക്കണ്ട ആദ്യ ദിവസം മുഴുവനും ആഘോഷിക്കാം.”
” വന്നു കിടക്ക് പെണ്ണേ… സമയം ഒരുപാട് ആയി. എന്റെ മോൻ കിടന്നു ഉറങ്ങിക്കോട്ടെ” മുത്ത് ഫിദയോട് പറഞ്ഞു . അതുകേട്ട് ഫിദ ചോദിച്ചു.
“ശ്രീയേട്ടാ ഞാൻ ഫോൺ വെച്ചോട്ടെ..? മുത്ത് വിളിക്കുന്നുണ്ട്. നീ രാവിലെ കാണാം.”
” എന്നാൽ ശരി എന്റെ സുന്ദരിക്കുട്ടി നല്ല സ്വപ്നങ്ങൾ കണ്ടു ഉറങ്ങിക്കോ.”
” ഗുഡ് നൈറ്റ്. ശ്രീയേട്ടാ.. ഐ ലവ് യു ശ്രീയേട്ടാ..ഉമ്മ ഉമ്മ ഉമ്മ. ”
” ഗുഡ് നൈറ്റ് ഫിദക്കുട്ടി.. ഐ ലവ് യു മൈ സ്വീറ്റ് ഫിദ കുട്ടി. ഉമ്മ ഉമ്മ ഉമ്മ ”
അങ്ങനെ ഫിദയോട് സംസാരിച്ചു കിടന്നുറങ്ങി. പിറ്റേദിവസം രാവിലെ എഴുന്നേറ്റു . വേഗം റെഡിയായി. അപ്പോഴാണ് അച്ഛൻ വന്ന് പറഞ്ഞത്.
” ഡാ മോനെ ശ്രീ. നീ രാവിലെ തന്നെ കൂട്ടുകാരന്റെ വീട്ടിലേക്ക് പോകുന്നുണ്ടോ ?.. നീ രാവിലെ തന്നെ പോകുകയാണെന്ന് നിന്റെ അമ്മ പറഞ്ഞു. ”
“ആ അച്ഛാ.. അവൻ വണ്ടിയുമായി വന്നു കാത്തു നിൽക്കും. രാവിലെ തന്നെ പോകണം.”
“അച്ഛൻ കൂടെ വരണോ? അതു വരെ.?”
“വേണ്ട അച്ഛാ. ഞാൻ പലപ്പോഴും പോയതല്ലേ. ഞാൻ തനിച്ചു പോയി കൊള്ളാം. ”
“എന്നാ ശരി. ഇന്നാ ഇത് കയ്യിൽ വച്ചോ..പൈസയുടെ എന്തെങ്കിലും ആവശ്യം ഉണ്ടെങ്കിൽ അവനെ ബുദ്ധിമുട്ടിക്കേണ്ട.”
കുറച്ച് പൈസ എന്റെ പോക്കറ്റിൽ വെച്ച് തന്നിട്ട് അച്ഛൻ പറഞ്ഞു. പിന്നെ ചോദിച്ചു..
” എന്നാ നീ തിരിച്ചുവരുന്നേ..” കുറേദിവസം അവിടെ നിൽക്കുമോ ?”
” അതൊന്നും തീരുമാനിച്ചിട്ടില്ല. എന്തായാലും കുറച്ചുദിവസം അവിടെ നിൽക്കാതെ അവൻ വിടില്ല. രണ്ടു മൂന്നാഴ്ച എങ്കിലും അവിടെ നിൽക്കേണ്ടിവരും.”
” ആ സാരമില്ല. കുറച്ചുദിവസം അവിടെ നിന്നിട്ട് വന്നാൽ മതി. വല്ലപ്പോഴും ഇങ്ങനെയൊരു മാറ്റം ഒക്കെ നല്ലതാ. ഇടക്ക് വിളിക്കാൻ മറക്കണ്ട. ”
ഞാൻ അച്ഛനെ കെട്ടിപ്പിടിച്ചു. എനിക്ക് അച്ഛന്റെ കാൽ തൊട്ട് അനുഗ്രഹം വാങ്ങിക്കണമെന്ന് തോന്നി. പക്ഷേ അങ്ങനെ ചെയ്താൽ അച്ഛൻ ചോദിക്കും അത് എന്തിനാണെന്ന്. പെട്ടെന്നൊരു ഉത്തരം പറയാൻ കഴിഞ്ഞില്ലെങ്കിൽ പെട്ടുപോകും. അതുകൊണ്ട് മനസ്സിൽ അച്ഛന്റെ കാൽതൊട്ട് അനുഗ്രഹം വാങ്ങി.
അപ്പോഴേക്കും അമ്മ അവിടെ വന്നു. എന്നിട്ട് പറഞ്ഞു.
” മോനേ ശ്രീക്കുട്ടാ ചായ എടുത്തു വച്ചിട്ടുണ്ട് വന്ന് കുടിക്ക്. എന്നിട്ട് പോയാൽ മതി. ”
ഞാൻ അമ്മയുടെ കൂടെ അടുക്കളയിലേക്ക് പോയി ചായ കുടിച്ചു. അതിനുശേഷം അച്ഛൻ തന്ന പൈസ എടുത്ത് നോക്കുന്നത് പോലെയാക്കി അമ്മയുടെ കാലിന്റെ അടുത്ത ഇട്ടു. പിന്നെ അത് എടുക്കുന്നതുപോലെയാക്കി അമ്മയുടെ കാലിൽ തൊട്ടു. അമ്മ എന്നെ പിടിച്ച് എഴുന്നേൽപ്പിച്ചിട്ട് പറഞ്ഞു
” ആഹാ!!! നീ എന്താ രാവിലെ തന്നെ കാണിക്കുന്നേ.. പൈസയൊക്കെ കൃത്യമായി എടുത്തു പോക്കറ്റിൽ വെക്ക്. അവിടെയും ഇവിടെയും കൊണ്ട് കളയല്ല. ”
” ഇല്ലമ്മേ കളയില്ല. ഞാൻ കൃത്യമായി സൂക്ഷിച്ചോളാം. ഞാൻ ഇറങ്ങട്ടെ…? ”
” ഇറങ്ങാൻ വരട്ടെ അവിടെ നിൽക്ക്. ”
അങ്ങനെ പറഞ്ഞശേഷം അമ്മ എന്റെ വേറെയും കുറച്ച് പൈസ വെച്ച് തന്നു. എന്നിട്ട് എന്നെ കെട്ടിപ്പിടിച്ച് കവിളിൽ ഉമ്മ.
“ഇത് അമ്മയുടെ വക. ഇനി വേണമെങ്കിൽ പറഞ്ഞാൽ മതി അമ്മ അയച്ചുതന്നോളാം.”
“വേണ്ട അമ്മേ ഇത് തന്നെ ധാരാളം.”
“നിനക്ക് ബേഗ് ഒന്നും വേണ്ടേ..? ഡ്രസ്സ് ഒന്നും എടുത്തിട്ട് കാണുന്നില്ലല്ലോ? അവിടെ പോയി രാകേഷിന്റെ ഡ്രസ്സ് ഇടാൻ ആണോ.?”
” അതൊക്കെ ഞാൻ എടുത്തു വച്ചിട്ടുണ്ട്. ”
” ആ ശരി . കുറെ ദിവസമൊന്നും അവിടെ നിൽക്കേണ്ട. വേഗം തിരിച്ചു വരണം.. അപ്പോഴേക്കും അമ്മ പറഞ്ഞ സർപ്രൈസ് റെഡിയാക്കാൻ പറ്റുമോ നോക്കട്ടെ””