അച്ചായൻ ഞങ്ങളെ മൈൻഡ് ചെയ്യുന്നേയില്ല അന്നയോട് ഓരോന്നൊക്കെ ചോദിക്കുന്നുണ്ട്. അവൾ മറുപടിയൊക്കെ പറയുന്നുണ്ട്.
ഉച്ചക്ക് അവൾ റൂമിൽ കയറി വാതിലടച്ചിരുന്നു. ടി വി വെച്ച് നോക്കിയപ്പോൾ സിഗ്നൽ പോലുമില്ല. എന്ത് ദ്രാവിഡ് ആണ്. വൈകുന്നേരം ജേക്കബ് അച്ചായന് കാൾ വന്നു. ജീവയാണ് അപ്പുറത്തു എന്ന് മനസ്സിലായി. അച്ചായൻ എന്തോ പറഞ്ഞു തർക്കിക്കുന്നുണ്ട്. ഞങ്ങളുടെ കാര്യമാണ് എന്ന് വ്യക്‌തം കാരണം ഞങ്ങളുടെ മൂന്നു പേരുടെയും പേര് പറയുന്നത് കേട്ട്. എന്തായാലും കാൾ കഴിഞ്ഞതോടെ അച്ചായൻ അത്ര ഹാപ്പി അല്ല എന്ന് മനസ്സിലായി.
“നിങ്ങളോട് രണ്ട് പേരോടും രാവിലെ തന്നെ തിരിച്ചു ചെല്ലാൻ പറഞ്ഞിട്ടുണ്ട്. കൊണ്ട് പോകാനായി കാർ വരും. “
അപ്പോൾ അന്ന? എന്ന് ചോദിക്കണം എന്നുണ്ടായിരുന്നു , എങ്കിലും ഞങ്ങൾ രണ്ട് പേരും ചോദിച്ചില്ല. പക്ഷേ ജേക്കബച്ചായൻ ഇങ്ങോട്ട് പറഞ്ഞു.
“അവളുടെ കാര്യം നിങ്ങൾ അവിടെ ചെന്നിട്ട് തീരുമാനിക്കും. അത് വരെ അവളെ ഇവിടെ നിർത്താനാണ് പറഞ്ഞിരിക്കുന്നത്.”
പിന്നെ കൂടുതൽ സംസാരം ഉണ്ടായില്ല. രാഹുൽ സന്തോഷത്തിലാണ് എന്ന് എനിക്ക് മനസ്സിലായി. എനിക്ക് ഒരേ സമയം ആശ്വാസവും വിഷമവും തോന്നി. അവൾ ഒഴുവായി കിട്ടുന്നതിൽ ആശ്വാസവും ഇനി അവൾ എന്തു ചെയ്യും എന്നാലോചിച്ചപ്പോൾ വിഷമവും തോന്നി.
അന്നയോട് അച്ചായൻ കാര്യം പറഞ്ഞെന്ന് തോന്നുന്നു. മുഖത്തു ഒരു വിഷമം ഉണ്ട്. ഉച്ചക്കത്ത എനർജി ഒന്നുമില്ല. രാത്രിയായപ്പോൾ അടുത്ത പ്രശനം കിടക്കാൻ സ്ഥലമില്ല. ഞങ്ങൾ സാദാരണ ഉപയോഗിക്കുന്ന റൂമിൽ അന്ന കിടക്കുന്നത്. അവസാനം എവിടെന്നോ ബെഡ് ഒക്കെ ഒപ്പിച്ചു ലിവിങ് റൂമിൽ കടന്നു.
വെളുപ്പിന് തന്നെ വാഹനം വന്നു. പക്ഷേ ഈ തവണ ബെൻസ് G വാഗൺ ഒന്നുമല്ല ഒരു ഇന്നോവ ടാക്സി . ഡ്രൈവിംഗ് സീറ്റിൽ ദീപക്ക് തന്നെയാണ്. ഞങ്ങൾ ബാഗുമായി ഇറങ്ങിയപ്പോൾ അന്ന വരാന്തയിൽ നിൽക്കുന്നുണ്ട്. മുഖത്തു വിഷമം ഒക്കെ ഉണ്ട് എങ്കിലും കരയുന്നൊന്നുമില്ല.
ജേക്കബ് അച്ചായനും വലിയ സംസാരമൊന്നുമില്ല. ഞങ്ങളുടെ രണ്ട് പേരുടെയും ഫോൺ എടുത്തു തന്നു. എത്തിയിട്ട് വിളിക്കാൻ പറഞ്ഞു. പതിനൊന്നു മണിയോടെ കൊച്ചയിൽ എത്തി നേരെ ഫ്ലാറ്റിലേക്ക് ആണ് പോയത്. ഞങ്ങളെ കാത്തു ജീവയും അരുൺ സാറും ഫ്ലാറ്റിൽ ഉണ്ട്.
“ഇനി എന്താണ് നിങ്ങളുടെ പരിപാടി ?”
ജീവയാണ് ചോദിച്ചത്. ഞാൻ ഒന്നും പറഞ്ഞില്ല.
“നാളെ മുതൽ കോളേജിൽ പോകണം.” പറഞ്ഞത് രാഹുലാണ്. തെണ്ടിക്ക് ജെന്നിയെ കാണാനായിരിക്കും ഞാൻ മനസ്സിലോർത്തു ?
“ഫോട്ടോസ് ?”
രാഹുൽ എന്നെ ഒന്ന് നോക്കി ഫോട്ടോസിൻ്റെ കാര്യം അവനോട് പറഞ്ഞിട്ടില്ല.
“ദീപുവിനെ പൊക്കിയിട്ടുണ്ട്. മൊബൈലും. ഫോട്ടോസ് പുറത്തു വരില്ല. പിന്നെ കോളേജിൽ നിന്ന് അവനെ സസ്‌പെൻഡ് ചെയ്‌തു “
“ഇനിയുള്ള പ്രശനം ആ പെൺകുട്ടി അന്നയാണ്. അവൾ എന്തിനാണ് അന്ന് നിങ്ങളുടെ കൂടെ കാറിൽ കയറി പോന്നത്. ജേക്കബ് സർ പലവട്ടം ചോദിച്ചു. അവൾ മറുപടിയൊന്നും പറഞ്ഞില്ല.”
അതിനൊരു ഉത്തരം എനിക്കുണ്ടായിരുന്നില്ല. ഭാഗ്യത്തിന് തമ്മിൽ ഇഷ്ടത്തിലാണോ എന്നൊന്നും ജീവ ചോദിച്ചില്ല.
“അത് അവളോട് ചോദിക്കേണ്ടി വരും.”
രാഹുൽ ചാടി കയറി പറഞ്ഞു.
“അന്ന വീട്ടിൽ തിരിച്ചു പോകത്തടത്തോളം കാലം MLA കുരിയനും കൂട്ടരും അടങ്ങിയിരിക്കില്ല.”
ഞാനും രാഹുലും ഒന്നും പറഞ്ഞില്ല.
അരുൺ സർ തത്ക്കാലം അവളുടെ അടുത്ത് സംസാരിക്കട്ടെ. നമുക്ക് വേണേൽ ഒരു പ്രൈവറ്റ് ഹോസ്റ്റലിൽ റൂം ശരിയാക്കി കൊടുക്കാം. ബാക്കി കാര്യങ്ങൾ അവൾ തന്നെ തീരുമാനിക്കട്ടെ.
“നിങ്ങൾ വിചാരിച്ചാൽ അവളെ വേറെ എവിടേക്കെങ്കിലും റീലൊക്കേറ്റ ചെയ്യാൻ പറ്റില്ലേ?”
എൻ്റെ ചോദ്യം കേട്ട് രാഹുൽ എന്നെ നോക്കുന്നുണ്ട്. ഇവനിത് എന്തിൻ്റെ സൂകേട്‌ ആണെന്ന മട്ടിൽ.
“അതൊക്കെ സാധിക്കും. പക്ഷേ നിങ്ങളും വേറെ എവിടേക്കെങ്കിലും മാറേണ്ടി വരും. കാരണം അന്നയെ മാറ്റിയാൽ അവൾ മിസ്സിംഗ് ആണെന്ന് ബാക്കിയുള്ളവർ കരുതും. അതിൻ്റെ ഉത്തരവാദികൾ നിങ്ങളും. അത് കൂടുതൽ പ്രശ്നമുണ്ടക്കും ഇപ്പോൾ തന്നെ കുരിയൻ ഒരു ഹേബീസ് കോർപസ് ഹർജി ഫയൽ ചെയ്താൽ കാര്യങ്ങൾ അവതാളത്തിലാകും. സ്വന്തം രാഷ്ട്രീയ ഭാവിയെ ഓർത്തിട്ടാണ് അയാൾ അതിനു മുതിരാത്തത് “
“ഇനി എന്താണ് ഒരു വഴി?”
“ഐഡിയൽ സിറ്റുവേഷൻ അന്ന തിരിച്ചു വീട്ടിൽ പോകുന്നതാണ്. അത് നടക്കുമെന്ന് തോന്നുന്നില്ല. അതല്ലെങ്കിൽ പുറത്തു താമസിച്ചോട്ടെ, നിങ്ങളുമായി അടുപ്പമില്ല എന്ന് കണ്ടാൽ കുരിയൻ അടങ്ങുമായിരിക്കും. അവളെ കൺവിൻസ് ചെയ്യാൻ പറ്റിയ ആരെങ്കിലും ഉണ്ടോ ?”
“ഒരാളുണ്ട് അവളുടെ അനിയൻ സ്റ്റീഫൻ.”
“കോൺടാക്ട് നമ്പർ ?”
“ഫോൺ നമ്പർ ഇല്ല. അവിടെ സിവിൽ എഞ്ചിനീയറിംഗ് തേർഡ് ഇയർ ആണ് പഠിക്കുന്നത് എന്ന് മാത്രം അറിയാം.”
“ഓകെ, നമ്പർ ഞാൻ കണ്ടു പിടിച്ചോളാം
“ഞാൻ പറയാൻ വിട്ടു പോയി അവനും കമ്മീഷണറും കൂടിനിങ്ങളെ അന്വേഷിച്ചു ഇന്നലെ ഇവിടെ വന്നിരുന്നു”
“ഇവിടെയോ?”
“അതെ ഇവിടെത്തന്നെ.”
ഇതൊക്കെ ഒന്ന് കലങ്ങി തെളിയുന്നത് വരെ ക്ലാസ്സിൽ പോകാൻ നിൽക്കേണ്ട.”
പിന്നെ കൂടുതൽ സംസാരമൊന്നുമുണ്ടായില്ല ജീവയും അരുൺ സാറും പോയി.
“ഡാ എന്താണ് ഫോട്ടോസിൻ്റെ കാര്യമൊക്കെ നീ ചോദിച്ചത്. ദീപു നിങ്ങളുടെ ഫോട്ടോസും എടുത്തായിരുന്നോ ?”
ഞാൻ ഒന്നും മിണ്ടാതെ ഫോട്ടോസ് കാണിച്ചു കൊടുത്തു.
“ഡാ ഇത് പുറത്തായാൽ പ്രശ്നമാകുമെല്ലോ. “
ഞാൻ ഒന്നും മിണ്ടിയില്ല. അവിടെ തന്നെ ഇരുന്നു
രാഹുലാകട്ടെ ജെന്നിയെ വിളിച്ചു എന്തൊക്കയോ സംസാരിക്കുന്നുണ്ട്. ഞാൻ അത് ശ്രദ്ധിക്കാൻ പോയില്ല.
ജീവയും അരുണും പോയത് ത്രിശൂൽ ഓഫീസിലേക്കാണ്. ഇനിയുള്ള ഏതാനും വളരെ നിർണ്ണായകമാണ്. കാരണം കോളേജിൽ ഇന്ന് ഇത് സംസാര വിഷയമാകും. ഓൺലൈൻ മാധ്യമങ്ങൾ അറിഞ്ഞാൽ ന്യൂസ് ആക്കാൻ ചാൻസ് ഉണ്ട്. അത് കൊണ്ട് പ്രധാനപെട്ട ന്യൂസ് പോർട്ടലുകൾ നിരീക്ഷിക്കണം. ഇത് തന്നയാണ് കുരിയൻ്റെ ആളുകളും ചെയുന്നത് കുരിയനെതിരെ വാർത്ത കൊടുക്കാറുള്ള മഞ്ഞ പത്രങ്ങളൊക്ക ജോസിൻ്റെ ആൾക്കാരുടെ നിരീക്ഷണത്തിലാണ്. പിന്നെ കുരിയൻ മന്ത്രി അല്ലാത്തത് കൊണ്ടും ഇലെക്ഷൻ കാലം അല്ലാത്തത് കൊണ്ടും അത്ര വലിയ സംഭവം ആകാൻ ഇടയില്ല.
അന്നയുടെ കാൾ ലിസ്റ്റിൽ നിന്ന് ടെക് ടീം സ്റ്റീഫൻ്റെ ഫോൺ നമ്പർ തപ്പിയെടുത്തു . പിറ്റേ ദിവസത്തേക്ക് സ്റ്റീഫനെ നേരിൽ കാണണം എന്ന് പറഞ്ഞുറപ്പിച്ച.
പിന്നെ ബീന മിസ്സിനെ കൊണ്ട് അവരുടെ പരിചയത്തിലുള്ള കാക്കനാടു തന്നെയുള്ള ഒരു വിമൻസ് ഹോസ്റ്റലിൽ ഒരു റൂം തരമാക്കി. ഇനി അന്നയെ സമ്മതിപ്പിക്കുക എന്നൊരു കടമ്പ മാത്രമേ ഉള്ളു.
ജീവയുടെ നിർദേശ പ്രകാരം പിറ്റേ ദിവസം രാവിലെ തന്നെ ജേക്കബ് അച്ചായൻ അന്നയെ കൂട്ടികൊണ്ട് വന്നു. അന്ന മടി കാണിക്കുമെന്നാണ് അച്ചായൻ വിചാരിച്ചത്. എന്നാൽ അങ്ങനെ ഒന്നും ഉണ്ടായില്ല. ഒന്നും ചോദിക്കാതെ വണ്ടിയിൽ കയറി ഇരുന്നു. ജേക്കബ് അച്ചായന് അവളുടെ കാര്യത്തിൽ വിഷമം തോന്നി.
