ഈ രാജീവ് കുമാറിന്‌ ADGP യെ അറിയാമായിരിക്കും. അതായിരിക്കും ഓരോ പ്രവിശ്യവും തന്നെ തടഞ്ഞത്. എങ്കിലും ജോസിൻ്റെ ഗുണ്ടകളെ തല്ലിയതാരായിരിക്കും? ഒരു എത്തും പിടിയും കിട്ടുന്നില്ല. അവൾക്ക് അന്നയെ കുറിച്ചോർത്തപ്പോൾ പേടി തോന്നി. അർജ്ജുവിനെ കുറിച്ചും രാജീവ് കുമാറിനെ കുറിച്ചും രഹസ്യമായി അന്വേഷിക്കാൻ ലെന തീരുമാനിച്ചു.
MLA കുരിയനെക്കാൾ വാശി ജോസിന് ആയിരുന്നു. കാരണം ആദ്യമായിട്ടാണ് ഗുണ്ടായിസം ഇറക്കിയിട്ട് അയാൾ തോൽക്കുന്നത്.
“അച്ചായാ നമുക്ക് പുതിയ ടീമിനെ ഇറക്കിയാലോ. ലെന ലൊക്കേഷൻ പറഞ്ഞാൽ മാത്രം മതി. ഇരു ചെവിയറിയാതെ ആ ചെക്കനെ തീർത്തിട്ട് അന്നയെ കൊണ്ട് വരാം.”
കുരിയൻ അല്പമൊന്നു ആലോചിച്ചു. ചെറുതായി പാളിയാൽ തന്നെ നഷ്‌ടം മുഴവൻ തനിക്കായിരിക്കും. മാനനഷ്‌ടം പണം നഷ്‌ടം പിന്നെ ജയിലും എല്ലാം ഒരുമിച്ചു അനുഭവിക്കേണ്ടി വരും. മാർക്കോസറിഞ്ഞാൽ ഒരു പക്ഷേ കല്യാണം മുടങ്ങും എന്നാലും കുറച്ചു കാശ് കൂടുതൽ നൽകിയാൽ വിദേശത്തുള്ള ആരെയെങ്കിലും കൊണ്ട് അന്നയെ കെട്ടിക്കാം.
“അച്ചായാ നമുക്ക് സ്റ്റീഫനെ കൊണ്ട് അന്നയെ വിളിപ്പിച്ചാലോ? അവൻ വിളിച്ചാൽ അന്ന എന്തായാലും വരും. “
ലെനയാണ് അത് പറഞ്ഞത്. അത് നല്ല ഐഡിയ ആണെന്ന് ജോസിനും തോന്നി.
കുരിയൻ ഉടനെ സ്റ്റീഫനെ വിളിച്ചു അപ്പച്ചിയുടെ വീട്ടിലേക്ക് വരാൻ പറഞ്ഞു. അതിനു ശേഷം കുര്യൻ മാർക്കോസിനെ വിളിച്ചു നേരിൽ കാണണം എന്ന് ആവിശ്യപ്പെട്ട്.
******************
ജീവയുടെ നിർദേശ പ്രകാരം ദീപുവിൻ്റെ അടുത്തു നിന്ന് ഫോൺ വീണ്ടെടുക്കാൻ അരുൺ ഹോസ്റ്റലിൽ എത്തി. ബീന മിസ്സിനെ വീട്ടിൽ കൊണ്ട് പോയി ആക്കിയത് കൊണ്ട് അല്പം വൈക്കിയിരുന്നു.
“ദീപുവിനെ കിട്ടിയാൽ രണ്ടെണ്ണം പൊട്ടിക്കണം.”
അരുൺ മനസ്സിൽ കരുതി.
വാർഡനെ കണ്ട് ദീപുവിനെ ഉടനെ കാണണം എന്ന് പറഞ്ഞപ്പോൾ പുള്ളി സമ്മതിച്ചില്ല. പിന്നെ മീര മാഡത്തിൻ്റെ പേരൊക്കെ പറഞ്ഞു സ്വല്പം ഭീക്ഷിണി പോലെ പറഞ്ഞപ്പോൾ പുള്ളി വഴങ്ങി, നേരെ ദീപുവിൻ്റെ റൂമിലേക്ക്.
അവിടെ ചെന്ന് വാതിൽ തട്ടി വിളിച്ചപ്പോൾ രമേഷ് വന്ന് വാതിൽ തുറന്നു.
“ദീപു എവിടെ?”
“അവൻ രാവിലെ തന്നെ വീട്ടിൽ പോയല്ലോ.”
അരുണിന് ആദ്യം വിശ്വാസം ആയില്ല. അവൻ രമേഷിൻ്റെ ഫോൺ വാങ്ങി ദീപുവിനെ വിളിച്ചു. ഫോൺ സ്വിച്ചഡ് ഓഫാണ്. ദീപുവിൻ്റെ വീട് എവിടെയാണ് എന്ന് ചോദിച്ചു മനസ്സിലാക്കി.
എന്നിട്ട് അവൻ പുറത്തിറങ്ങിയ ഉടനെ ടെക്ക് ടീമിനെ വിളിച്ചു.
“ഞാൻ ഒരു നമ്പർ തരാം. ഫോൺ ഓൺ ആയാൽ ഉടനെ തന്നെ ലൊക്കേഷൻ എടുക്കണം. എന്നിട്ട് ഹരിയെ വേഗം തന്നെ അങ്ങോട്ട് വിടണം. “
“ജീവ സർ നിർദേശിച്ച പ്രകാരം ഈ നമ്പർ സ്പൈക്ക് ചെയ്‌തു. ഇനി സിം വേറെ മൊബൈലിൽ ഇടാതെ ലൊക്കേഷൻ എടുക്കാൻ സാധിക്കില്ല. പിന്നെ ഹരിയും ടീമും ഇവിടയില്ല. അർജ്ജുവിന് എസ്കോർട് ആയി ഇടുക്കി വരെ പോയിരിക്കുകയാണ്.”
വേറെ വഴിയില്ലാത്തത് കൊണ്ട് അരുൺ നേരിട്ട് പോകാൻ തീരുമാനിച്ചു.
*******************
കുമളി :
രാവിലെ 8 മണിയോടെ തന്നെ അർജ്ജുവും രാഹുലും അന്നയെയും കൊണ്ട് ജേക്കബ് അച്ചായൻ്റെ വീട്ടിലെത്തി. അവരെ കാത്തു ജേക്കബ് അച്ചായൻ അവിടെ നിൽക്കുന്നുണ്ടായിരുന്നു.
ദീപക്ക് അച്ചായൻ്റെ അടുത്തു എന്തോ പറഞ്ഞിട്ട് വേഗം തന്നെ അവിടന്ന് തിരിച്ചു പോയി. അച്ചായൻ അല്പം ഗൗരവത്തിലാണ് എന്നും കാണുന്ന ചിരി ഒന്നും മുഖത്തില്ല. ഇനി ഞാൻ പെണ്ണിനെ കടത്തി കൊണ്ട് വന്നു എന്ന് അച്ചായനും കരുതുന്നുണ്ടാകുമോ?
“അന്ന അല്ലേ ?”
അന്ന ഒന്നും മിണ്ടിയില്ല അതെ എന്ന് തലയാട്ടി.
“ഇവിടെ ചോദിച്ചാൽ വാ തുറന്നു ഉത്തരം പറയണം. അല്ലാതെ പാവ കളി ഒന്നും വേണ്ട”
പുള്ളി സ്വൽപ്പം ഗൗരവത്തിൽ അന്നയോടെ പറഞ്ഞു
“മൂന്നു പേരും മൊബൈൽ ഫോൺ സ്വിച്ച്ഓഫ് ചെയ്തിട്ട് ഇങ്ങോട്ട് തന്നേരെ. തിരിച്ചു പോകാൻ നേരം തന്നേക്കാം.”
അതും പറഞ്ഞു ഞങ്ങളുടെ മൊബൈൽ ഫോൺ ഒക്കെ വാങ്ങി വെച്ചു . “പോയി കുളിച്ചിട്ടു വാ അത് കഴിഞ്ഞു ബ്രേക്ക് ഫാസ്റ്റ് കഴിച്ചിട്ട് ബാക്കി കാര്യങ്ങൾ. “
ഞങ്ങൾ അകത്തേക്ക് കയറി. അച്ചായൻ അന്നക്ക് ഗസ്റ്റ് റൂം തന്നെ കൊടുത്തു.
ഞങ്ങളെ പുള്ളിയുടെ റൂമിലേക്കും ആനയിച്ചു. എന്നിട്ട് എന്നോട് സംഭവങ്ങൾ ഒക്കെ ചോദിച്ചു. ഞാൻ നടന്ന കാര്യങ്ങൾ അതേ പോലെ തന്നെ പറഞ്ഞു. ഞങ്ങളെ ചതിച്ചതാണ് എന്നറിഞ്ഞപ്പോൾ പുള്ളിയുടെ മുഖം കോപത്താൽ ചുവന്നു. ആ ദീപുവോ കീർത്തനയോ അവിടെ അപ്പോൾ ഉണ്ടായിരുന്നെങ്കിൽ അങ്ങേര് അപ്പോൾ തന്നെ വെടി വെച്ച് കൊന്നേനെ. രാഹുലും കാര്യങ്ങളൊക്കെ അപ്പോഴാണ് അറിഞ്ഞത്. അവനും ദേഷ്യത്തിലാണ്. എങ്കിലും അവൻ അന്നയെ പഴിച്ചു .
“അവളുടെ കൈലിരിപ്പ് കൊണ്ട് നീയും പെട്ടു “
അത് പറഞ്ഞതെ അവന് ഓർമ്മയുണ്ടായിരുന്നുള്ളു. ജേക്കബ് അച്ചായൻ്റെ വക ചീത്ത . അടി കിട്ടിയില്ലന്നേ ഉള്ളു.
“ആ പാവം പിടിച്ച കൊച്ചിനെ വല്ലതും പറഞ്ഞാലുണ്ടല്ലോ @#%%*($@%”
രാഹുൽ ഞെട്ടി പോയി അവൻ അത് പ്രതീക്ഷിച്ചില്ല. സഹായത്തിന് എന്നെ നോക്കി. എന്തെങ്കിലും പറഞ്ഞാൽ എനിക്കും കിട്ടുമെന്ന് മനസ്സിലായി. അത് കൊണ്ട് ഞാൻ ഒന്നും മിണ്ടിയില്ല.
രാഹുൽ വേഗം തന്നെ കുളിക്കാനുള്ള ഭാവത്തിൽ ബാത്‌റൂമിൽ കയറി.
ജേക്കബ് അച്ചായൻ പുറത്തേക്ക്‌ പോയി. ഞാൻ ഓരോന്നാലോചിച്ചു അവിടെ കട്ടിലിൽ കിടന്നു. ഇതൊക്കെ അന്നക്കും അറിയാമെല്ലോ പിന്നെ അവൾ ഞങ്ങളുടെ ഒപ്പം ചാടി കയറി വന്നത് എന്തിനാണ് എന്ന് മാത്രം പിടികിട്ടിയില്ല.
രാഹുലിൻ്റെ അടുത്തു നിന്ന് തൊഴി കിട്ടിയപ്പോൾ ആണ് ഞാൻ ഉണർന്നത്. അവൻ കുളിച്ചിട്ട് നിൽക്കുന്നുണ്ട്. ഞാൻ ക്ഷീണം കാരണം മയങ്ങി പോയിരിക്കുന്നു. ജേക്കബ് അച്ചായൻ ചീത്ത വിളിച്ചപ്പോൾ രക്ഷക്ക് എത്താത്തതിന് അവൻ്റെ വക കുറച്ചു പ്രാക്ക് കേട്ടു. ഞാൻ അത് മൈൻഡ് ചെയ്യാതെ കുളിക്കാനായി പോയി.
“ഡാ നീ വരുമ്പോളേക്കും ഞാൻ ഫുഡ് എല്ലാം തീർക്കും”
അവൻ വിളിച്ചു പറഞ്ഞു. ഞാൻ കുളിച്ചിറങ്ങിയപ്പോൾ രാഹുൽ അവിടെ തന്നെ ഇരിക്കുന്നുണ്ട്. മുഖത്തു ഒരു വളിച്ച ചിരിയുണ്ട്. എന്തെ ഫുഡ് അടിക്കാൻ പോയില്ലേ എന്ന മട്ടിൽ ഞാൻ അവനെ നോക്കി. ഞങ്ങൾ പുറത്തിറങ്ങിയപ്പോൾ കാര്യം മനസ്സിലായി.
അന്ന അവിടെ ഇരുന്ന് അപ്പവും മുട്ടയും വലിച്ചു കയറ്റുന്നുണ്ട്. ജേക്കബ് അച്ചായൻ അടുത്തിരുന്ന ഓരോ തമാശ ഒക്കെ പറഞ്ഞു കൊണ്ടിരിക്കുന്നു. ഞങ്ങളെ കണ്ട ഭാവം ഒന്നുമില്ല. ഇങ്ങോട്ട് ഒന്ന് നോക്കുന്നു പോലുമില്ല. ഇന്നലെ അവൾ ഒന്നും കഴിച്ചിട്ടില്ല അതായിരിക്കും മൈൻഡ് ചെയ്യാതെ ഇരുന്ന് തിന്നുന്നത്.
ഒരു ബ്ലാക്ക് ഡ്രസ്സ് ആണ് അവളിട്ടിരിക്കുന്നത് ആദ്യമായിട്ടാണ് അന്നയെ മേക് അപ് ഒന്നുമില്ലാതെ കാണുന്നത്. എങ്കിലും അവളുടെ സൗന്ദര്യം കൂടിയതായി എനിക്ക് തോന്നി
