നമുക്ക് നമ്മുടെ നിലയിലുള്ള വല്ല പെണ്ണിനെയും കിട്ടും, അതാണ് അതിന്റെ ഒരു ശരി.
ആ ഒരു തിരിച്ചറിവിലും, ചുണ്ടിൽ ഒരു ചെറുപുഞ്ചിരി ബാക്കി നിന്നു. അത്രയും വലിയൊരു പണക്കാരിയെ കെട്ടാനുള്ള യോഗമില്ലെന്നുള്ള ആശ്വാസത്തിലാണോ, അതോ ആ മുഖം മനസ്സിൽ ഉള്ളതുകൊണ്ടാണോ എന്നറിയില്ല, പതിയെ ഞാൻ ഗാഢമായ ഉറക്കത്തിലേക്ക് വഴുതി വീണു…
***********************
രാത്രിയിലെ ആലോചനയും കിനാവും ഒക്കെ കഴിഞ്ഞ് ബോധം കെട്ടുറങ്ങിയതുകൊണ്ട് നേരം വെളുത്തതറിഞ്ഞില്ല.
ഉച്ചവെയിൽ ജനലിലൂടെ അടിച്ചുകയറി എന്റെ ആസനം പൊള്ളിച്ചപ്പോഴാണ് കണ്ണ് തുറന്നത്.
മണി നോക്കിയപ്പോൾ 12 കഴിഞ്ഞു!
എന്റെ പൊന്നോ, ഇത്രേം നേരമായോ?
വേഗം എഴുന്നേറ്റ്, പല്ലും തേച്ച്, പേരിനൊരു കുളിയുമൊക്കെ പാസാക്കി ഫ്രഷായി.
വിശപ്പിന്റെ വിളി വന്നപ്പോൾ പതിവ് പോലെ “മമ്മീ… ചായേയ്…” എന്നും വിളിച്ച് ഞാൻ അടുക്കളയിലേക്ക് വച്ചുപിടിച്ചു.
അവിടെ നോക്കുമ്പോൾ ചേച്ചിയും ഏട്ടത്തിയും കൂടി എന്തോ ഗൂഢാലോചനയിലാണ്. കൗണ്ടർ ടോപ്പിൽ ചാരി നിന്ന് ഭയങ്കര സീരിയസ് ചർച്ച.
എന്നെ കണ്ടതും രണ്ടുപേരും സംസാരം നിർത്തി.
എന്നിട്ട് ഒരൊറ്റ നോട്ടം!
സാധാരണ എന്നെ കണ്ടാൽ എഴുന്നേറ്റോടാ കുമ്പകർണ്ണാ എന്ന് ചോദിക്കുന്നവരാണ്. ഇതിപ്പോ അന്യഗ്രഹജീവിയെ കാണുന്ന പോലെ ഒരൊറ്റ നോട്ടം! കണ്ണിൽ മൊത്തം അത്ഭുതം. വായടക്കാൻ പോലും മറന്ന് അവർ എന്നെത്തന്നെ ഉറ്റുനോക്കുകയാണ്.
‘ഇവർക്കിതെന്തുപറ്റി? എന്റെ മുഖത്ത് വല്ല കരിയും പിടിച്ചിട്ടുണ്ടോ?’
ഞാൻ ഒന്നും മനസ്സിലാവാതെ “എന്താ?” എന്ന് ചോദിക്കാൻ വായ തുറന്നതും…
പെട്ടെന്ന് എന്തോ ഓർമ്മ വന്ന പോലെ ചേച്ചി കയ്യിലിരുന്ന ദോശ തിരിച്ചിടുന്ന സ്റ്റീൽ ചട്ടുകം മുറുകെ പിടിച്ചു.
“ടപ്പേ!!”
ഒരൊറ്റ അടി! കൃത്യം എന്റെ ചന്തിക്ക് തന്നെ.
വേദന കൊണ്ട് ഞാൻ നിന്നയിടത്തുനിന്ന് രണ്ട് ചാട്ടം ചാടിപ്പോയി. തൊലി ഉരിഞ്ഞുപോയലത്തെ നീറ്റൽ!
“നിനക്കെന്താടി രാവിലെതന്നെ വല്ല ബാധയും കയറിയോ…?”
ഞാൻ ചന്തി തടവിക്കൊണ്ട് അലറി…
“മിണ്ടിപ്പോകരുത് നീ!”
ചേച്ചി കയ്യിലിരുന്ന ചട്ടുകം എനിക്ക് നേരെ ചൂണ്ടി. കണ്ണൊക്കെ ദേഷ്യം കൊണ്ട് തള്ളി പുറത്തു വരുന്നുണ്ട്.
“ഇന്നലെ നീ എന്തൊക്കെയാ കാണിച്ചുകൂട്ടിയതെന്ന് നിനക്ക് വല്ല ബോധവുമുണ്ടോ?”
ചേച്ചിയുടെ ആ അലർച്ച കേട്ടപ്പോഴാണ് എനിക്ക് സംഗതി പിടികിട്ടിയത്….
പെട്ടെന്ന് ഇന്നലത്തെ കാര്യങ്ങൾ… ആ റോൾസ് റോയ്സ് കാറും, അനു ചൈതന്യയും, പിന്നെ ആ കേക്ക് തീറ്റിക്കലും… എല്ലാം കൂടി ഒരു സിനിമ പോലെ മനസ്സിലൂടെ ഓടി. ആ വിരലുകൾ എന്റെ ചുണ്ടിൽ തൊട്ടത് ഓർത്തപ്പോൾ ഇപ്പോഴും ഒരു ചെറിയ വിറയൽ.
പക്ഷെ അത് പുറത്തു കാണിക്കാൻ പറ്റില്ലല്ലോ. ഞാൻ പരമാവധി കൂളായി.
“ഓ… അതായിരുന്നോ കാര്യം? അതിനിയും നിങ്ങൾ വിട്ടില്ലേ?”
ഞാൻ വലിയ കാര്യമാക്കാതെ, ഒരു പുച്ഛം കലർന്ന ചിരിയോടെ ചോദിച്ചു.
“കഴിഞ്ഞ കാര്യമല്ലേ… അത് വിട്ടേക്ക്… എനിക്ക് വിശക്കുന്നു…”
ഇനിയും ഇവിടെ നിന്നാൽ ചട്ടുകം വെച്ച് വേറെ വല്ല പണിയും കിട്ടും എന്ന് ഉറപ്പുള്ളതുകൊണ്ട്, ഞാൻ പതിയെ അവിടെ നിന്നും വലിയാൻ നോക്കി.
തിരിഞ്ഞ് നടക്കാൻ തുടങ്ങിയതും…
“എങ്ങോട്ടാടാ ഓടുന്നേ?”
പെട്ടെന്ന് ഏട്ടത്തി എന്റെ കൈയിൽ കടന്നുപിടിച്ചു. സാധാരണ എന്റെ രക്ഷയ്ക്കെത്താറുള്ള ഏട്ടത്തി പോലും ഇത്തവണ കടുപ്പത്തിലാണ്. എന്നെ വലിച്ച് അവരുടെ മുന്നിൽ തന്നെ നിർത്തി.
“അങ്ങോട്ട് ഓടാൻ വരട്ടെ… കാര്യം കഴിയട്ടെ…”
ഏട്ടത്തിയുടെ പിടി മുറുകി. ഞാൻ പെട്ടു!
“നിനക്ക് അവളാരാന്ന് അറിയോ?”
ചേച്ചി ചോദിച്ചു…
“അനു ചൈതന്യ അല്ലേ…?”
ഞാൻ മറുപടി കൊടുത്തു…
“ദേ അഭി സത്യായിട്ടും ഞാൻ നിന്റെ തലമണ്ട അടിച്ചു പൊട്ടിക്കും.നീ അവളോട് അങ്ങനെയൊക്കെ പെരുമാറിയത് എന്ത് കണ്ടിട്ടാടാ…”
Continue bro nice story
Nice feel good story
Manassu niranju