ബാഗ് എടുത്തു ഫ്രണ്ടിൽ വച്ചു മായ പിന്നിലേക്ക് കയറിയിരുന്നു….
“അമ്മുമോൾ കുളിക്കുവാ ഞാനൊന്നു പറഞ്ഞിട്ടുണ്ട് ഇറങ്ങാൻ നേരത്ത്….
ഇന്നത്തേക്കുള്ളത് ഞാനുണ്ടാക്കി വച്ചിട്ടുണ്ട്….
നാളത്തേക്ക് കടേന്നോ മറ്റോ വാങ്ങിക്ക് രണ്ടുപേരും…”
ഹരി ബൈക്കോടിക്കുന്നതിനിടയിൽ മൂളി….
രണ്ടും കൂടെ അടികൂടരുതെന്ന് ബസിൽ കയറും മുന്നേ ഓർമിപ്പിച്ച മായയുടെ ബാഗിന്റെ കള്ളിയിലേക്ക് കുറച്ച് നോട്ടുകൾ തിരുകി വച്ചു സിബ്ബടച്ചു അവൻ….
ടൂറിസ്റ്റ് ബസിന്റെ സൈഡ് സീറ്റിലിരുന്നു നോക്കുമ്പോൾ ചിരിയോടെ കൈ വീശുന്നുണ്ട് ഹരി…
സാധാരണ താൻ പോകുമ്പോൾ അത്ര തെളിച്ചമില്ലാതെ നില്കുന്നവനാ….
ആ ചിരി കണ്ടിട്ട് അമ്മുവിന്റെ പല്ലും നഖവും എങ്കിലും ബാക്കിവച്ചേക്കണേയെന്ന് വഴിപാട് നേർന്നു പോയി മായ….
തിരികെ ബൈക്ക് ഓടിക്കുന്നതിനിടയ്ക്കാൻ അമ്മുവിന്റെ കാൾ വരുന്നത്…
പരിഭവത്തിൽ തന്നെയാണവൻ അറ്റൻഡ് ചെയ്തതും…..
വരുമ്പോൾ സ്വീറ്സ് എന്തെങ്കിലും വാങ്ങീട്ട് വരുമോയെന്ന പതിഞ്ഞ ശബ്ദം കേട്ടപ്പോൾ മനസ്സിൽ ബേക്കറിയിലെ ലഡ്ഡു മൊത്തം ഒരുമിച്ചു പൊട്ടി….
പിന്നൊരു ലോഡ് സ്വീറ്റ്സും വരുന്നവഴിക്ക് അമ്പലത്തിനു മുന്നിൽ പൂവിൽക്കുന്ന ചേച്ചിയുടെ കയ്യിൽ നിന്നും അഞ്ചുമുഴം മുല്ലപ്പൂവും വാങ്ങി….
സന്ധ്യയോടടുത്തിട്ടും ലൈറ്റ് ഇടാത്തതുകണ്ട് അവൻ പുറത്തെ ലൈറ്റിട്ട് അകത്തുകയറി….
ഇപ്പോളും ഇറങ്ങിവരാത്തവളെ തിരഞ്ഞു…..
നാണിച്ചുനിക്കുവാണെന്നോർത്ത് മറയ്ക്കാനാവാത്ത നറുചിരിയോടെ മുറിയിലേക്ക് കയറി….
കട്ടിലിൽ അട്ട ചുരുളുമ്പോലെ ചുരുണ്ടു കിടപ്പുണ്ടോരുത്തി……
“എന്താടി പറ്റിയെ…….” എല്ലാം മറന്ന് ആധിയോടാവാൻ അടുത്തേക്ക് ചെന്നു കട്ടിലിലേക്ക് ഇരുന്നു…..
“വയറുവേദനിക്കുന്നു…..”
വാടിതളർന്ന ശബ്ദം…
“അതെന്താ ഫുഡ് വല്ലോം പിടിച്ചില്ലേ നിനക്ക്…..”
“അല്ല….”
“പിന്നെ…..പീരിയഡ്സ് ആയോ……” ആവരുതേയെന്ന് മുപ്പത്തിമുക്കോടി ദൈവങ്ങളെയും വിളിച്ചുകൊണ്ടാണ് ചോദ്യം…..
“മ്മ്മ്…..”
മോഹഭംഗ മനസ്സിലേ…..ശാപപങ്കില നടകളിൽ……..
കയ്യിലെ വാഴയിലകീറിൽ പൊതിഞ്ഞ മുല്ലപ്പൂ തന്നെ നോക്കി പല്ലിളിക്കുന്നതായി തോന്നി ഹരിക്ക്……
“നല്ലപോലെ നോവുന്നുണ്ടോ…..”
“മ്മ്….നീയാ അലമാരി തുറന്നെന്റെ ഹീറ്റിംഗ് പാഡ് ഒന്നെടുത്തു തരാമോ…..”
ഹരിയതെടുത്തു കൊടുത്തു…
അമ്മു അവനെ തന്നെ നോക്കിക്കിടന്നു….
നോക്കിനോക്കിയിരുന്നു വന്നു കണ്ടിട്ട് തന്റെ അവസ്ഥ ഓർത്ത് അമ്മുവിന് കരച്ചിൽ വരുന്നുണ്ട്….
പീരിയഡ്സ് ആയാൽ ആദ്യത്തെ ഒരു ദിവസം വല്ലാത്ത വേദനയും ഫ്ലോയുമാണ് അവൾക്കു….
ഇത് പക്ഷേ എല്ലായിപ്പോളും ഉള്ളതിന്റെ മൂന്നിരട്ടിയാണ്…
സമയം തെറ്റി വന്നതുകൊണ്ടാണോന്നറിയില്ല….
“ഡേറ്റ് ആയിട്ടില്ലല്ലോ….ഇതെന്താപ്പോ നേരത്തെ വന്നേ…..” അവനതിന്റെ കവർ അഴിച്ചുകൊടുത്തിട്ടു ബെഡിലേക്കിരുന്നു….
അമ്മു അറിയില്ലെന്ന് തലയനക്കി…..
അല്ലാണ്ട് അവൻ വരുന്നെന് മുന്നേ ഒന്നു തുടുക്കണമെന്ന ആഗ്രഹത്തിന് പുറത്ത് ഉള്ള നെയ്യും ഡേറ്റ്സും നട്സും ഡ്രൈഫ്രൂട്ട്സുമെല്ലാം വാരികഴിച്ചു പീരിയഡ്സ് നേരത്തെയായി പോയതാണെന്ന് പറയാൻ പേടികാരണം മിണ്ടിയില്ല…..
വെറുതേ വന്ന വഴിക്ക് വായിലിരിക്കണത് വാങ്ങിച്ചുകൂട്ടണ്ടല്ലോ…..
സ്വീറ്റ്സും ചോക്ലേറ്റുമെല്ലാം അമ്മുവിനടുത്തു സ്റ്റൂളിൽ വച്ചിട്ട് അവൻ കുളിക്കാനായി പോയി…..
കുളി കഴിഞ്ഞു വരുമ്പോൾ കട്ടിലിൽ കിടന്നു ശയന പ്രദക്ഷിണം നടത്തുന്നുണ്ട് അമ്മു…..
അങ്ങോടൊന്നു ഉരുളുന്നു…പിന്നീങ്ങോടൊന്ന്….
“ഒട്ടും പറ്റുന്നില്ലേ……” തോർത്ത് തോളിലേക്കിട്ട് അവൻ അടുത്തേക്ക് ഇരുന്നു….
“ങ് ഹും….”
“ഇങ്ങനെ വരുമ്പോൾ നീയെന്താ ചെയ്യാറ് സാധാരണ…”
“ഹീറ്റിംഗ് പാഡ് വച്ചാ ആശ്വാസം കിട്ടാറുണ്ട്….പിന്നെ ഉലുവ വെള്ളോം കുടിക്കും…..” വരണ്ടുണങ്ങിപോയി ഒച്ചയൊക്കെ….