“അതെങ്ങനെയാ…ഈ ജീരകം ഇട്ട് തിളപ്പികുംപോലെ തിളപ്പിച്ചെടുത്താ മതിയോ….” പ്രത്യേക പാകം വല്ലതും ഉണ്ടോന്ന സംശയത്തിൽ അവൻ ചോദിച്ചു…
“മ്മ്മ്…”
“നല്ലോണം മഞ്ഞനിറം ആവണേ….” വാതിൽക്കലേക്ക് നടക്കുന്നവനെ വിളിച്ചോർമിപ്പിച്ചു….
മഞ്ഞനിറം എന്ന് പറഞ്ഞിട്ട് ഓറഞ്ച് നിറത്തിൽ ആത്മാർഥത അരച്ചുകലക്കിയിട്ട് ഹരി കട്ടൻചായ പോലൊന്ന് കൊണ്ടുകൊടുത്തു…..
നല്ലപോലെ കൈച്ചെങ്കിലും ചൂടുവെള്ളം വയറ്റിലേക്കിറങ്ങിയ സുഖത്തിൽ ആശ്വാസത്തിൽ അമ്മു പ്രാണ പ്രിയനെ കണ്ണിമ ചിമ്മാതെ നോക്കി…..
ഏട്ടായി കുറച്ചൊക്കെ ഗ്രീൻഫ്ലാഗ് തന്നെ….
മൊത്തത്തിലൊന്നു നോക്കി സമാധാനത്തിലങ്ങു വിലയിരുത്തി…..
അല്ലേലും വയറു പൊത്തി കരയുമ്പോൾ മായ ഒഴിച്ചു വേറൊരു മനുഷ്യനും കനിവ് കാണിച്ചിട്ടില്ലാത്തവൾക് ആ പാവം ചെക്കൻ എന്ത് കൊടുത്താലും നിധിയായിരുന്നു….
“എടീയിത് മുഖത്ത് മാത്രേ പറ്റുവോളു കാലിലും കയ്യിലും ഒന്നും പറ്റില്ലേ….എന്റെ സ്കിൻ നല്ലോണം ഡ്രൈ ആയി ” അലമാരിക്ക് മുന്നിൽ നിന്നും അവളുടെ ഫേസ് ക്രീം എടുത്ത് ഹരി തുറന്നു മണത്തു….
“പറ്റില്ലടാ….അതിനകത്തൊരു ബോഡി ലോഷൻ ഉണ്ട്…പക്ഷേ എന്റെ ഓയിലി സ്കിൻ ആയൊണ്ട് അത് നല്ലോം ലൈറ്റാ…നിനക്ക് സ്യുട് ആകില്ല…..”
എന്തേലും ആവട്ടിത് മതിയെന്നും പറഞ്ഞവൻ കുറച്ചെടുത്തു ഉള്ളംകയിലേക്ക് ചാടിച്ചു…
“നിക്ക്..നിക്ക്….” അമ്മു ഏന്തി എണീറ്റിരുന്നു….
“അതിനകത്ത് ഒരു ബോഡി ഓയിൽ ഉണ്ട്…രണ്ടും കൂടെ മിക്സ് ചെയ്ത് യൂസേയ്യ് അപ്പൊ കറക്റ്റാകും…..”
ഹരിയതും തപ്പിയെടുത്തു അമ്മുവിന്റെ കയ്യിൽ കൊടുത്തു അതവൾ ഏതാനും തുള്ളി ഒഴിച്ച് പാകത്തിന് മിക്സ് ചെയ്ത് കൊടുത്തു…..
“ഈ ബ്രാൻഡിനോക്കെ നല്ല കത്തി റേറ്റ് അല്ലെ…..”
chanel ന്റെ ബോഡി ഓയിൽ ബോട്ടിൽ വെളിച്ചതിനു നേരെ പിടിച്ച് ബാക്കി എന്തോരം ഉണ്ടെന്നു നോക്കി തിരികെ വച്ചു ഹരി…..
“മ്മ്മ് ഒരിരുപതിനായിരം ഒക്കെ വരും…..”
അവന്റെ കണ്ണുതള്ളിപ്പോയി…..
“എനിക്കമ്മേടെ എൻചാന്റർ തന്നെ മതിയേ…..” തൊഴുത്കൊണ്ടവൻ കട്ടിലിനപ്പുറം കയറികിടന്നു…..
നല്ല ക്ഷീണം കൊണ്ടാകും കയറിക്കിടന്നൊരു അഞ്ചുമിനുട്ട് തികഞ്ഞില്ല ഉറങ്ങി……
കുറച്ചുനേരം അവനെ നോക്കിക്കിടന്നു പിന്നെ ഫോണിൽ റീലും കണ്ടുകിടന്നു അവളും ഉറങ്ങിപ്പോയി….
സന്ധ്യ ആയപ്പോളേക്ക് ഫോണും ചാർജറും തിന്നാനുള്ള ചിപ്സും പിന്നമ്മുവിനൊരു പെയിൻ കില്ലറും ഒക്കെയായി പശുക്കിടാവ് തുള്ളുമ്പോലെ തുള്ളി ചാടി വന്ന ചിന്നു ഹരിയുണ്ടെന്നോർക്കത്തെ ഒന്ന് മുട്ടുക പോലും ചെയ്യാതെ ഒരു തള്ളിനു ഡോർ തുറന്നകത്തു കയറി…..
അകത്ത് അമ്മുവിന്റെ വയറിൽ മുഖം ചെരിച്ചുവച്ചു കിടന്നുറങ്ങുന്ന ഹരി…
ചിന്നു അബദ്ധത്തിൽ നാക്കുകടിച്ചു തറപോലും അറിയിക്കാതെ വച്ച കാല് പതിയെ പിൻവലിച്ചു പുറത്തേക്കിറങ്ങി….
പക്ഷേ ഡോറടക്കുന്നതിൽ കണക്കുകൂട്ടൽ തെറ്റി രണ്ടും ഞെട്ടിയുണർന്നു……
ഇനിയെന്നാ പിന്നെ ചളിപ്പും കൊണ്ടിരിക്കണ്ടന്ന് വച്ചിട്ട് അവൾ അകത്തേക്ക് തന്നെ കയറി….
ഹരിയെഴുന്നേറ്റ് ടിഷർട്ടും എടുത്തിട്ടു പോണവഴിക്ക് ചിന്നൂന്റെ ചെവിക്കും ഒന്നു കിഴുക്കി കവലക്ക് പോകാൻ ഒരുങ്ങി….
ക്രസിയിലേക്ക് തലയണ വച്ച് എണീറ്റിരിക്കുന്ന അമ്മുവിന്റെ കയ്യിലേക്ക് ഗുളിക വച്ചുകൊടുത്തു ചിന്നു….
“ഒരെണ്ണം കഴിച്ചാൽ മതി…..നാളേം ഉണ്ടേൽ രാവിലെ ഒരെണ്ണം കൂടെ…..”
കൊണ്ടുവന്ന ചിപ്സ് അവിടെ വച്ചിട്ട് ഹരികൊണ്ടുവന്ന തുറക്കാതെയിരുന്ന പൊതി അഴിച്ച് ജിലേബി പാക്കറ്റ് എടുത്തവൾ കട്ടിലിലേക്ക് കയറി…..
“ഫുഡ് കഴിച്ചിട്ട് വേണട്ടോ കഴിക്കാൻ ഇല്ലേൽ നെഞ്ഞെരിയും പോലെ തോന്നും…..”
“ഇതൊന്നും വേണ്ടടി…..കഴിച്ചാൽ കൊള്ളൂല…..”
“ആര് പറഞ്ഞു……”
“ബിന്ദു ചേച്ചി….പിന്നെന്റെ ഫ്രണ്ട്സും….”
“എന്നോടാരും പറഞ്ഞിട്ടില്ലല്ലോ…..” ആലോചിച്ചുകൊണ്ട് ജിലേബി വായിലേക്ക് വച്ചു….