കഴുത്തിനു പിന്നിൽ എന്തോ കുത്തുന്നപോലെ….തടവിനോക്കുമ്പോൾ ലോക്കറ്റ് ആണ്….
ഓഹ് താലി…പറഞ്ഞപോലെ അങ്ങനൊരു സംഭവം കഴിഞ്ഞായിരുന്നല്ലോ…
എഴുന്നേറ്റ് സ്റ്റീൽ അലമാരിക്ക് മുന്നിലെ മങ്ങിയ കണ്ണാടിയിലേക്ക് നോക്കി…മഞ്ഞ നിറത്തിലുള്ള ത്രെഡ് ഇൽ കോർത്ത ആലില താലി പോലുള്ള ലോക്കറ്റ്…ഫാൻസി കടയിൽ നിന്നു വാങ്ങിയതാണെന്ന് തോന്നുന്നു..പാറുവേച്ചിയുടെ കല്യാണത്തിന് ഡയമണ്ട് വച്ച ഡിസൈൻ താലി മതിയെന്ന് പറഞ്ഞ ചേച്ചിയെ പാരമ്പര്യ താലി തന്നെ മതിയെന്ന് പറഞ്ഞു കരയിപ്പിച്ചു വിട്ട അച്ഛനെ ഓർത്തതും കല്ലിച്ചൊരു ചിരി ഊറി ചുണ്ടിൽ…
ശ്രീദേവിയുടെ മാത്രം മകളല്ലേലെ…എന്ത് ആചാരം..എന്ത് അനുഷ്ടാനം…അനുസരണയില്ലാതെ കണ്ണ് വീണ്ടും നീറിതുടങ്ങിയതും അവൾ ആ ചരട് കണ്ണാടി നോക്കി അഴിച്ചെടുത്തു…അലമാരി തുറന്ന് അതിനുള്ളിലെക്ക് വച്ചു…ഒന്നു ദീർഘമായി നിശ്വസിച്ചു….
ഇതൊരു ഹോസ്റ്റലാ..അത്ര മാത്രം….
ആരുടെയോ കലപില കേട്ടാണ് കണ്ണുതുറന്നത്…
ഉറക്കെ സംസാരിച്ചുകൊണ്ട് ഹാളിൽ ആരോ ഇരിപ്പുണ്ട്…ഇറങ്ങിച്ചെന്നതും കസേരയിൽ കാലു മടക്കി വച്ചു മായയോട് സംസാരിക്കുന്നുണ്ട് ഒരു പെൺകുട്ടി….അവരുടെ മുഖത്തു നോക്കുമ്പോൾ കരഞ്ഞപോലെ കണ്ണും മുഖവും വീങ്ങി ഇരിക്കുന്നു…
“എന്റെ മായമ്മച്ചീ…..നിങ്ങടെ മോന് അങ്ങനേലും ഒരു പെണ്ണുകിട്ടീലോ….അങ്ങേര്ടെ ഒരു കാരക്റ്ററും നാട്ടുകാരുടെ ഇടയിലെ ആ സൽപേരും വച്ചിട്ട് ഈ കരേന്നല്ല ഈ രാജ്യത്തുന്ന് ഒരുത്തിയെ കിട്ടൂല….അതൊക്കെയോർത്തങ്ങ് ഹാപ്പി ആയിട്ട് ഇരിക്കാനുള്ളെന്….“ കയ്യും കാലും ഒക്കെ എടുത്തിട്ടാണ് സംസാരം…
ഒന്നു ചിരിക്കെന്റെ മുന്തിരിക്കള്ളേ….“ മായയുടെ കവിളിൽ പിടിച്ചു വലിച്ചു വിടുന്നുണ്ട്….
അമൃത അവർക്കിടയിലേക്ക് ചെന്നു…കാൽപെരുമാറ്റം കേട്ട് ആ പെൺകുട്ടി തിരിഞ്ഞുനോക്കി….
അർച്ചന……….അമൃതയുടെ വാ തുറന്നുപോയി…
“എടിയമ്മൂ….ചാടിയേണീറ്റ് മുന്നിൽ വന്നു നിന്നു…
അല്ല….നീ…നീ എന്താ ഇവിടെ….” വായുംപൊളിചാണ് ചോദ്യം…
“അർച്ചന…”
“ടീ…നീ….നിന്നെയാണോ….” കണ്ണടച്ചു തലയൊന്ന് കുടഞ്ഞു അർച്ചന ചോദിച്ചു..
“മ്മ്മ്….” അമൃത മൂളി..
“എന്റെ പുഴക്കര കണ്ണാ……” ആ ഉണ്ടക്കണ്ണ് രണ്ടുമിപ്പോ താഴെ വീഴും…..
“ഇതൊക്കെ എങ്ങനെ സംഭവിച്ച്…..” അത്ഭുതം ആക്കിയ ഇളി ആയി മാറാൻ അധിക സമയം ഒന്നും വേണ്ടി വന്നില്ല….പിന്നതൊരു പൊട്ടിച്ചിരിയും…
“എന്നാലുമെന്റെ അമൃതേ…..നിനക്കിതിലും വലിയൊരു പണി……ബുവാഹഹ……” എളിക്ക് കയ്യും കുത്തി മേലോട്ട് നോക്കി കിണിക്കുന്നുണ്ട് അർച്ചന…
അവളുടെ വാരിവിതറൽ കണ്ടിട്ട് പെരുവിരലീന്ന് അരിച്ചു കയറുന്നുണ്ട് അമൃതക്ക്….മായ ഇരിക്കുന്നോണ്ട് ഒന്നും പറയാനും മേല….
“അല്ല ചിന്നുവേ…..നിനക്കറിയോ അമൃതമോളെ…..” പൊട്ടൻ ആട്ടം കാണുമ്പോലെ ഇത്രനേരം കണ്ടുനിന്ന മായ ചോദിച്ചു…
“പിന്നറിയുവോന്നോ……ഇവളപ്പുറത്തെ ഡിപ്പാർട്മെന്റ് ഞാൻ ഇപ്പുറത്തെ ഡിപ്പാർട്മെന്റ്…..എന്റതേ കോളേജാമ്മാ…..” അല്പം ഊന്നിയാണ് പറച്ചിൽ…..
“പിന്നതുമാത്രമല്ല……കഴിഞ്ഞ കൊല്ലത്തെ കോളേജ് ഇലക്ഷന് ഞാൻ 23 വോട്ടിനു തൂഫാനാക്കി വിട്ട മൊതലാ ഇത്…..അമൃത അനിൽ മേനോൻ…”
“ഉവ്വാടി മോളേ…..അതു നീയാ കോമേഴ്സ് ബ്ലോക്കിലെ ടോജോയേം ടീമിനേം കാലുവാരിച്ചിട്ട് എടുത്ത വോട്ടല്ലേ…..കുറച്ചെങ്കിലും ഉളുപ്പുണ്ടേൽ സ്വന്തമായിട്ട് വോട്ടു പിടിക്കണമായിരുന്നെടി….” ഇത്രെനേരം മിണ്ടാതിരുന്നെങ്കിലും അമൃതക്ക് ഇലക്ഷന്റെ കാര്യം എടുത്തിട്ടതും കയ്യീന്ന് പോയി…
“അയ്യോടാ…..ആരാ ഈ പറയുന്നേ…..ലിറ്ററേചറിലെ ഫസ്റ്റ് ഇയർ റെപ് പിള്ളേർക്ക് അറേബ്യൻ സ്റ്റോറീസ് ന്നു മന്തി വാങ്ങികൊടുത്തിട്ടല്ലെടി നീ വോട്ട് പിടിച്ചെ….ലേശം ഉളുപ്പ് മാഡത്തിനും ആകാം….”
“ഒന്ന് നിർത്തു പിള്ളേരെ…അതൊക്കെ ഏതോ കൊല്ലം കഴിഞ്ഞേ അല്ലെ…..നിങ്ങളത് വിട്ടേ….” പരസ്പരം പോരുകോഴികളെ പോലെ നിപ്പുണ്ട് രണ്ടും…