രാത്രി മുഴുക്കെ ഇരുന്ന് എഴുതുവായിരുന്നു..പിറ്റേ ആഴ്ച കല്യാണം ആയതിനാൽ കുറച്ചുനാൾ ലീവ് ആയതുകൊണ്ട് assignments ഉം സെമിനാറുമെല്ലാം എഴുതിതീർക്കാൻ ഇരുന്നതാണ്….രാത്രി എപ്പോളോ ഉറങ്ങിപ്പോയി..തലേന്ന് രാത്രിയും വൈകികിടന്നതിനാൽ ഒന്നുമറിയാത്ത ബോധം പോയപോലെ ഉറങ്ങി…
രാവിലെ ആരുടെയൊക്കെയോ ഡോറിലുള്ള കനത്ത തട്ട് കേട്ടാണ് എണീക്കുന്നത്…ഡെസ്കിൽ നിന്നും മുഖമുയർത്തി എണീറ്റ് മുന്നോട്ട് നടക്കുമ്പോൾ ആണ് നിലത്തു കിടക്കുന്ന ആളെ കാണുന്നത്…പെയിന്റ് പുരണ്ട ഷർട്ടും അടിവസ്ത്രവും മാത്രം ഇട്ട് കമിഴ്ന്നു കിടക്കുന്ന ആൾ….നടുങ്ങിപ്പോയി…
പെട്ടെന്ന് മുറി തുറന്നു….പുറത്ത് അച്ഛനും ചെറിയമ്മയും ആമിമോളും വീട്ടിലെ ജോലിക്ക് നിക്കുന്ന ചേച്ചിയുമെല്ലാം ഉണ്ട്..
അകത്തെ കാഴ്ച കണ്ട് പകച്ചു നിൽക്കുവാണ് അച്ഛൻ…ചെറിയമ്മ ഓടി അകത്തേക്ക് കയറി..ചെവിയടക്കം കവിളത്തു കിട്ടിയപ്പോളാണ് തല്ലിയെന്ന് മനസ്സിലായത്…
“ഒരുമ്പെട്ടവളെ…..കാമുകനെ വിളിച്ചു കയറ്റിയിരിക്കുന്നോടി…..”
“അല്ലാച്ഛാ എനിക്കിയാളെ അറിയുക കൂടെ ഇല്ല….ഓടി അച്ഛനടുത്തേക്ക് പോകാൻ ആഞ്ഞതും
”പാതിരാത്രിക്ക് കാമുകനെ വിളിച്ചു കയ്യറ്റിയതും പോരാ കള്ളം പറയുന്നോടി….എന്റീശ്വരാ ഈ മനുഷ്യനിതെങ്ങനെ സഹിക്കുവോ….ഇക്കണ്ട പൊന്നും പണ്ടൊമെല്ലാം ഉണ്ടാക്കി വച്ചതിവൾക്കു വേണ്ടിയല്ലേ…നന്ദിയില്ലാത്തവളെ ഈ മനുഷ്യനിനി നാലാളുടെ മുഖത്തു എങ്ങനെ നോക്കും…“
അവർ അരങ്ങു തകർക്കുകയാണ്…
അച്ഛൻ പ്രതിമ പോലെ നിൽപ്പുണ്ട്..
നിലത്തു കിടന്നുറങ്ങുന്നവൻ എണീറ്റു…
”നീ…നീയാ പെയിന്റിംഗ്കാരുടെ കൂട്ടത്തിൽ ഉള്ളതല്ലേ…ഓഹ് സൗകര്യത്തിന് വേണ്ടി ആയിരിക്കും ഇതാകുമ്പോ ആരും അറിയില്ലലോ…“
ഒന്നും മിണ്ടാതെ കണ്ണും മിഴിച്ചു നില്കുന്നവനെ വെറുപ്പോടെ നോക്കി അവൾ…
”നീ എങ്ങനെയാ മുറിക്കുള്ളിൽ എത്തിയത്..“ ആരോ എടുത്തുകൊടുത്ത ഉടുമുണ്ട് വാരിചുറ്റുന്നവനെ നോക്കി അച്ഛൻ ചോദിച്ചു..
”പറയെടാ ഇവൾ വിളിച്ചിട്ടല്ലേ നീ വന്നത്….“ ചെറിയമ്മയാണ്
അവൻ തലയാട്ടുന്നത് കണ്ടതും താൻ നടുങ്ങിപ്പോയി…
”ഇല്ലാച്ചാ….ഇവൻ കള്ളം പറയുവാണ്…എനിക്കിവനെ അറിയത്തുപോലും ഇല്ല..എന്നെ ഒന്ന് വിശ്വസിക്ക്…അച്ഛന്റെ മോൾ ഇന്നുവരെ കള്ളം പറഞ്ഞിട്ടില്ലലോ….എന്നെയൊന്നു കേൾക്ക്….“കാലിലേക്ക് വീണു കരഞ്ഞു….
”എല്ലാം ഒപ്പിച്ചു വച്ചിട്ടവളുടെ പൂങ്കണ്ണീര്……ഇനിയെങ്ങനെ കല്യാണം നടത്തും..അവരോടെന്ത് പറയും…ഒരുത്തന്റെ കൂടെ കഴിഞ്ഞ പെണ്ണിനെ കെട്ടാൻ അന്തസുള്ള പയ്യന്മാർ വരുവോ….“ കാര്യങ്ങളുടെ പോക്ക് അവൾക്കു മനസിലായി…തനിക്കായി അച്ഛൻ വാങ്ങിയ സ്വർണം കണ്ടു കണ്ണ് മഞ്ഞളിച്ചതാണവർക്ക്…അന്ന് തൊട്ട് തുടങ്ങിയ മുറുമുറുപ്പാണ്…കുഞ്ഞുനാളിലെ കണ്ടുവളർന്നത് ആയതുകൊണ്ട് കാര്യമാക്കിയില്ല….ഇപ്പോ അവസരം മുതലെടുകയാണവർ…
”പ്രസിഡന്റെ….എന്താ കാര്യം…അച്ഛനെ കാണാൻ രാവിലേ വീട്ടിലെത്തിയ ആളുകൾ കൂടി അവിടേക്ക് വന്നതും കാര്യങ്ങൾ കൈവിട്ടുപോയിരുന്നു….
അതോടെ പുറത്താളുകൾ അറിയുമെന്നും ചെറിയമ്മയുടെ നിലവിളിക്കും കള്ളക്കണ്ണീരിനും മുകളിൽ തന്റെ വാക്കുകൾ അച്ഛൻ വിശ്വസിക്കില്ലെന്നും മനസിലായി….
“ഈ കുഞ്ഞിനിത് എന്ത് പറ്റിയോ…അടുത്താഴ്ച വിവാഹം അല്ലാരുന്നോ…ഇങ്ങനൊരു ബന്ധം ഉണ്ടായിരുന്നേൽ അത് പറഞ്ഞൂടാർന്നോ…”
തനിക്കൊന്നും അറിഞ്ഞൂടെന്ന് അവൾ ഉള്ളിൽ ആർത്തു വിളിച്ചുകരഞ്ഞു….
ആമിമോൾ അടുത്തു വന്നിരുന്നു..കണ്ണീരു തുടച്ചു..എന്റെ ചേച്ചിയെ എനിക്കറിയാമെന്ന് ചുണ്ടനക്കി….അവൾ വേദന കലർന്നൊരു ചിരി ചിരിച്ചു….
“അതേയ് ഇത്രയൊക്കെ കാണിച്ചുകൂട്ടിയിട്ട് എങ്ങോട്ടാ…ഇനിയിതിനൊരു തീരുമാനം ഉണ്ടാക്കിയിട്ട് പോയ മതി…” പണിക്കാരുടെ കൂടെ പുറത്തേക്കിറങ്ങാൻ നോക്കുന്നവനെ തടയുന്നുണ്ട് ആരോ…അവൻ അയാളെ പിടിച്ചു തള്ളിയതും അങ്ങോടും ഇങ്ങോടും അടിയായി….