“വാ അകത്തേക്ക് പോകാം..സാവധാനത്തിൽ ആലോചിച്ചൊരു തീരുമാനം എടുക്കാം..”
കേട്ട പാതി ഹരി അകത്തേക്ക് കയറിപ്പോയി…
അവൻ പോകുന്നത് വഴിയേ അന്തംവിട്ടു നിൽക്കുന്ന ലളിതേച്ചിയെ ഒന്നുനോക്കി അമൃതയുടെ കൈ പിടിച്ചു അകത്തേക്ക് കയറ്റി മായ..
“മോളിവിടെ ഇരിക്ക്.. ആകെ ആ ഹാളിൽ കണ്ട രണ്ട് പ്ലാസ്റ്റിക് കസേരയിൽ ഒന്നിലേക്ക് ഇരുന്നു..
ഒരു ഗ്ലാസിൽ വെള്ളവും ആയി വന്നു മായ..
”ഇതു കുടിക്ക്..“ അവൾക്കു നേരെ നീട്ടി..
ആ നേരം വരെ ഒരു തുള്ളി വെള്ളം ചെല്ലാത്തതിനാൽ ആവും ആർത്തിയോടെ അവളത് കുടിച്ചു..
ഗ്ലാസ് തിരികെകൊടുത്തതും മായ കയ്യിലിരുന്ന ഒരു കഷ്ണം ശർക്കര നീട്ടി..
”ചടങ്ങൊന്നും ആയിട്ടല്ല…ആദ്യായിട്ട് വരുന്ന മോൾക് മധുരം തരുന്നതാണ്..“ ഒരു കഷ്ണം ഓടിച്ചെടുത്തു അവളുടെ വായിലേക്ക് വച്ചുകൊടുത്തു..
”പാലും പഴവും ഒകെ അല്ലെ മായേച്ചി കൊടുക്കണ്ടേ….ഇതെന്താ ശർക്കര…“അരുണാണ്.
”പാലും പഴവും….കുറ്റിചൂലിന് വീക്കുവാ വേണ്ടേ രണ്ടിനും…ഒരൊന്നൊപ്പിച്ചു നല്ലൊരു കൊച്ചിന്റെ ജീവിതോം കളഞ്ഞിട്ട് നിക്കണ നിൽപ് കണ്ടില്ലേ..“ ലളിതേച്ചി അരുണിനെ ചിറഞ്ഞു നോക്കി..
”ഇന്നാ ഇനി നിനക്കായിട്ട് കുറക്കണ്ട…ചടങ്ങൊന്നും അല്ലെന്നു പറഞ്ഞെങ്കിലും കയ്യിലെ ബാക്കി ശർക്കര കഷ്ണം ഹരിയുടെ കയ്യിലേക്ക് കൊടുത്തിട്ട് മായ അടുക്കളയിലേക്ക് നടന്നു..
അവളാ ഹാൾ ആകമാനം കണ്ണോടിച്ചു…
ചെറിയൊരു ഹാൾ ആണ്..ഒരു പഴയ തടിമേശയും അതിനു മുകളിൽ ഒരു ടീവിയും ഇരിപ്പുണ്ട്..രണ്ട് പ്ലാസ്റ്റിക് കസേരയും ഒരു ചെറിയ ഡൈനിങ് ടേബിളും ജനലിനോട് ചേർത്തിട്ടിരിക്കുന്ന തയ്യൽ മെഷീനും സ്റ്റൂളും…സാരികൊണ്ട് കവർ ഇട്ട ഒരു ദീവാൻകോട്ടും…കഴിഞ്ഞു…
ലളിതേച്ചി മായയോടൊപ്പം അടുക്കളയിൽ ആണ്..
അരുണും ഹരിയും മുറ്റത്തിന്റെ കോണിലും..
“മോളെ…അവന്റെ മുറി ഉപയോഗിച്ചോളൂ…അതിനു മാത്രേ വാതിലുള്ളൂ…എന്റെ കൂടെ ലളിതേച്ചിയോ ചിന്നുവോ ഉണ്ടാകും മിക്കപ്പോളും..ഇവന്മാര് പണിക്ക് പോയാൽ പിന്നെ വരവോക്കെ കണക്കാ…ചിലപ്പോ ആഴ്ച പണി ഒക്കെ ആയിരിക്കും..”
അവളൊന്നും മിണ്ടാതെ കേട്ടിരുന്നു..
“അതാ മുറി..അങ്ങോടു കയറിക്കോ..”
പതിയെ എണീറ്റ് അവർ കണ്ണുകാണിച്ച മുറിക്ക് നേർക്കു നടന്നു…
അടച്ചിട്ടിരുന്ന മുറി തുറന്ന് അകത്തു കയറി….
ഒരു മുഷിഞ്ഞ വാട…
അവൾ മുഖം ചുളിച്ചു..
ഭിത്തിയിൽ ആണിയടിച്ചു കെട്ടിയിരിക്കുന്ന അഴയിൽ കുന്നുകൂട്ടിയിട്ടിരിക്കുന്ന മുഷിഞ്ഞ അവന്റെ ഡ്രെസ്സുകൾ…അതിൽ നിന്നും ആവും..
ഒരു സാദാ കട്ടിൽ..അതിനു മുകളിൽ പഴയൊരു ബെഡ്..ബെഡിനോട് ചേർന്ന് ഒരു സ്റ്റൂൾ ഇട്ട് അതിൽ എമർജൻസി ലാമ്പും മറ്റും വച്ചിരിക്കുന്നു…തുരുമ്പു പിടിച്ചു തുടങ്ങിയൊരു അലമാര..ഇത്രയും ആയപ്പോൾ തന്നെ ആ മുറി നിറഞ്ഞു…
അവൾ തന്റെ വീടോർത്തു…മുറിയോർത്തു…
ഒന്ന് ദീർഘമായി ശ്വസിച്ചു കട്ടിലിനടുത്തേക്ക് നടന്നു…
ബെഡിൽ അഴിച്ചിട്ടിട്ട് പോയ ഷർട്ടും മുണ്ടും…ഷഡ്ഢി ചുരുണ്ടു കൂടി കിടക്കുന്നു..
അറപ്പോടെ മുഖം തിരിച്ചു…
തിരിഞ്ഞതും കാറ്റ് പോലൊരുത്തൻ അകത്തേക്ക് കയറി..ബെഡിൽ കിടന്നതെല്ലാം പെറുക്കി എടുത്തുകൊണ്ടു അവളെ നോക്കിയൊന്നിളിച്ചു കാണിച്ചു പുറത്തേക്കിറങ്ങി…
“അലവലാതി…”
കിടക്കണോ ഇരിക്കണോ എന്നറിയാതെ അവൾ കുറച്ചുസമയം ഭിത്തിയിൽ ചാരി നിന്നു…ഒന്നും കഴിക്കാഞ്ഞിട്ടാവും ദേഹം തളരുമ്പോലെ…പിന്നെ രണ്ടും കല്പിച്ചാ അലമാരി തുറന്നു..അതിൽ നിന്നും തമ്മിൽ ഭേതമെന്നു തോന്നിയ ഒരു മുണ്ടെടുത്തു…ബെഡിൽ കിടന്ന ഷീറ്റും തലയിണയും വലിച്ചു താഴെക്കിട്ടു..മുണ്ട് ബെഡിന് മുകളിൽ വിരിച്ചു അതിലേക്ക് കയറികിടന്നു..
കൺകോണിലൂടെ മിഴിനീർ ഒഴുകിയിറങ്ങി…
മുഖം അമർത്തിവെക്കുമ്പോൾ അടികൊണ്ടതിന്റെ ആകാം കവിൾ ഒക്കെ വേദനിക്കുന്നു..