ഞങ്ങൾ മൂന്നുപേരും ശ്വാസമടക്കിപ്പിടിച്ച് ആ പാറയുടെ മറവിൽ പതുങ്ങിയിരുന്നു.
കൃതികയോട് ചോദിക്കാൻ ഒരായിരം ചോദ്യങ്ങൾ എന്റെ തൊണ്ടയിൽ കുരുങ്ങി നിന്നിരുന്നു. പക്ഷേ, സാഹചര്യം അതല്ലെന്ന് ബോധ്യമുള്ളതുകൊണ്ട്, സംശയങ്ങളെല്ലാം തൽക്കാലത്തേക്ക് മാറ്റിനിർത്തി, ഞാൻ കണ്ണെടുക്കാതെ ആ വരുന്ന വണ്ടിയെത്തന്നെ നോക്കിയിരുന്നു.
നിമിഷങ്ങൾക്കുള്ളിൽ ആ കാഴ്ച തെളിഞ്ഞു.
കട്ടപിടിച്ച മഞ്ഞിനെ വകഞ്ഞുമാറ്റി, മദമിളകിയ ഒരു കൊമ്പനാനയെപ്പോലെ ആ കറുത്ത ഡിഫൻഡർ ഞങ്ങളുടെ കാഴ്ചയിലേക്ക് പാഞ്ഞു വന്നു!
പാഞ്ഞു വന്ന ആ വണ്ടി മലയിലേക്കുള്ള വഴി തുടങ്ങുന്നിടത്ത് തന്നെ സഡൻ ബ്രേക്കിട്ടു നിന്നു.
അത് നിന്നതും എന്റെ നെഞ്ചിലൊരു ആളൽ ഉണ്ടായി.
ഞങ്ങളെ കണ്ടിട്ടാണോ അവർ വണ്ടി നിർത്തിയത്…?
പാറയുടെ മറവിലായിരുന്നെങ്കിലും, ഹെഡ്ലൈറ്റിന്റെ ആ വെളിച്ചം ഞങ്ങളെ ഒറ്റിക്കൊടുത്തോ എന്നൊരു ഭയം എന്നെ പിടികൂടി.
കുറച്ചു നിമിഷങ്ങൾ…
കൊടും മൗനം തളം കെട്ടി നിന്ന നിമിഷങ്ങൾ. വണ്ടിയുടെ എൻജിൻ ഒച്ചയല്ലാതെ മറ്റൊന്നും കേൾക്കാനില്ല.
ആ നിശബ്ദതയെ കീറിമുറിച്ചുകൊണ്ട് പെട്ടെന്നാണ് കാറിന്റെ ഡോർ തുറക്കുന്ന ശബ്ദം കേട്ടത്.
ആ ശബ്ദം കേട്ടതും റോസ് ഒന്ന് ഞെട്ടിവിറച്ചു.പാവം ഇപ്പോൾ തന്നേ ഒരുപാടധികം പേടിച്ചിട്ടുണ്ട്.അതിനാൽ തന്നേ അവളുടെ തൊണ്ടയിൽ നിന്നും എന്തെങ്കിലും തരത്തിൽ ഒരു ശബ്ദം ഉയരുമോ എന്ന് ഞാൻ ഭയന്നു.
രണ്ടാമതൊന്ന് ആലോചിക്കാൻ നിൽക്കാതെ, ഞാൻ വേഗം അവളെ എന്നിലേക്ക് വലിച്ച് ചേർത്തു. എന്റെ കൈപ്പത്തികൊണ്ട് അവളുടെ വായ ഞാൻ പൊത്തിപ്പിടിച്ചു.അവളുടെ ഹൃദയത്തിന്റെ താളം എന്റെ കൈകളിൽ നിന്നും എനിക്ക് മനസ്സിലാക്കാമായിരുന്നു…
ഞാൻ കണ്ണിമ ചിമ്മാതെ, കാറിൽ നിന്നും പുറത്തേക്ക് ഇറങ്ങി വരുന്നത് ആരാണെന്നറിയാൻ ആ കാറിലേക്ക് തന്നെ നോക്കിയിരുന്നു….
പിൻസീറ്റിലെ വാതിൽ തുറന്ന് പുറത്തേക്ക് ഇറങ്ങിയ രൂപത്തെ കണ്ടതും എന്റെ ശ്വാസം ഒന്ന് നിലച്ചുപോയി.
കറുത്ത കോട്ടും സ്യൂട്ടും ഒക്കെ ഇട്ട്, ഒരു ഹോളിവുഡ് സിനിമയിലെ നായികമാരെ അനുസ്മരിപ്പിക്കുന്ന ഒരു ഒന്നൊന്നര ഐറ്റം!
ഈ കൂരിരുട്ടിലും തിളങ്ങുന്ന സൗന്ദര്യം.
ഭയത്തിൽ നിൽക്കുമ്പോഴും, മുന്നിൽ നിൽക്കുന്ന സൗന്ദര്യത്തെ ആസ്വദിക്കാൻ കാണിക്കുന്ന എന്റെ മനസ്സിന്റെ ആ ഒരു ഇത് ഉണ്ടല്ലോ, അത് സമ്മതിച്ചു കൊടുക്കണം.
തൊട്ടുപിന്നാലെ ഡ്രൈവിംഗ് സീറ്റിൽ നിന്നും മറ്റൊരാൾ ഇറങ്ങി. ഏകദേശം ഒരു മുപ്പത് വയസ്സ് തോന്നിക്കുന്ന, അതേ വേഷം ധരിച്ച ഒരുത്തൻ.
പണ്ടേ ആണുങ്ങളെ നോക്കി സമയം കളയാൻ എനിക്ക് വലിയ താല്പര്യമില്ലാത്തതുകൊണ്ട്, ഞാൻ അവനേ നൈസായിട്ടങ്ങ് ഒഴിവാക്കി. ശേഷം എന്റെ കണ്ണുകൾ ഒരു സ്കാനർ പോലെ ആ പെണ്ണിലേക്ക് തന്നെ ലോക്ക് ചെയ്തു.
എന്റെ ആ നോട്ടത്തെ സഹായിക്കാൻ എന്നവണ്ണം, അവൾ പെട്ടെന്ന് തന്റെ കറുത്ത കോട്ട് ഊരിമാറ്റി.
മുഖത്ത് എന്തോ വലിയ അസ്വസ്ഥതയും വെപ്രാളവും ഉള്ളതുപോലെ…
ഊരിയ കോട്ട് അവൾ ദേഷ്യത്തിൽ കാറിനുള്ളിലേക്ക് തന്നെ വലിച്ചെറിഞ്ഞു.
പക്ഷേ, ആ കോട്ട് മാറിയതും ഹെഡ്ലൈറ്റിന്റെ വെളിച്ചം അവളുടെ വെളുത്ത ഷർട്ടിൽ പതിച്ചു.
അത്രയും നേരം കണ്ട മാലാഖയുടെ രൂപം മാറി പകരം ചെകുത്താന്റെ രൂപം എന്റെ മനസ്സിലേക്ക് ചേക്കേറി…
വെളുത്ത ഷർട്ടിൽ നിറയെ അഴുക്കും ചെളിയും മാത്രമല്ല…
നല്ല ചുവന്ന ചോരപ്പാടുകളും ഉണ്ടായിരുന്നു!..
“ശേ… നിനക്ക് കുറച്ച് നേരത്തേ വരായിരുന്നില്ലേടാ…”
എന്റെ കയ്യിലെ മാംസത്തിൽ അമർത്തി നുള്ളിക്കൊണ്ട് കൃതിക ശബ്ദമമർത്തി ചോദിച്ചു….
സാഹചര്യം ഇതായിപ്പോയി… അല്ലെങ്കിൽ ഈ സാധനത്തിനെ കാലേ വാരി നിലത്തടിച്ചേനെ ഞാൻ!
വേദന കടിച്ചമർത്തിക്കൊണ്ട്, ശബ്ദം പരമാവധി താഴ്ത്തി ഞാൻ ചോദിച്ചു:
Yes thudaru
Keep going