ഏറെ സന്തോഷത്തോടെയാണ് ഞങ്ങടെ കൈയിൽ നിന്നും അവൻ വണ്ടി എടുത്തത്. അവൻ മനസ്സിൽ കണ്ടതിനേക്കാൾ നന്നായി ചെയ്തെന്നു പറഞ്ഞ് ഞങ്ങളെ അഭിനദിച്ചു. കിച്ചു ആണെങ്കിൽ കാറിന്റെ പലതരത്തിലുള്ള വീഡിയോസും ഫോട്ടോസും എടുത്ത് എഡിറ്റ് ചെയ്ത് സോഷ്യൽ മീഡിയയിൽ പോസ്റ്റ് ചെയ്തു. ഞങ്ങടെ വർക്കിന്റെ ഗുണം കൊണ്ടാണോ ദൈവ ഭാഗ്യം കൊണ്ടാണോ എന്നറിയില്ല വീഡിയോ കേറി വയറൽ ആയി. പിന്നെ പല ഇടങ്ങളിൽ നിന്നും വർക്ക് വന്നു തുടങ്ങി. ഒട്ടും പ്രതീക്ഷിക്കാത്ത ഒരു മാർക്കറ്റിലേക്ക് ഞങ്ങളുടെ ചുവട് വെപ്പ്. നല്ല രീതിയിൽ മോഡിഫിക്കേഷൻ വർക്ക് ചെയ്തു കൊടുത്തു. കഴിയുന്ന വർക്കിന്റെ വീഡിയോസ് കിച്ചു മാർക്കറ്റിംഗ് ചെയ്തതോടെ ഞങ്ങൾ പോലും അറിയാതെ ഞങ്ങൾ ഒരു ബ്രാന്റ് ആയി മറികഴിഞ്ഞു. ഇതിന്റെ ഇടക്ക് എല്ലാ സപ്പോർട്ടും തന്ന് ദേവനും ദേവൂവും കൂടെ ഉണ്ടായിരുന്നു. നല്ല വർക്ക് കിട്ടിയതോടെ വർക്ക്ഷോപ്പ് ഒന്ന് പുതുക്കി പണിയാമെന്ന് കരുതി. മാമനോട് സംസാരിച്ച് അതിന്റെ പണി തുടങ്ങി. കാർ ലോഞ്ച് ചെയ്യാൻ പറ്റിയൊരു റൂമൊക്കെ സെറ്റ് ചെയ്താണ് വർഷോപ്പിന്റെ പണി. വർക്ക്ഷോപ്പ് പണി നടക്കുന്നത് കൊണ്ട് തന്നെ ഞങ്ങൾക്ക് വർക്ക് ചെയ്യാനുള്ള സ്ഥലവും കുറഞ്ഞു. ഇപ്പൊ വളരെ കുറച്ചു വണ്ടികളുടെ വർക്ക് മാത്രമേ ഞങ്ങൾ എടുക്കാറുള്ളു.
“… ആശാനേ ഒരു പഴയ മോഡൽ ബുള്ളറ്റ് വർക്കിന് വന്നിട്ടുണ്ട്…”
“… അതിനെന്താ നീ നോക്കിയിട്ട് അകത്ത് കയറ്റി വയ്ക്ക്…” പണി തിരക്കിൽ ആയതോണ്ട് ഞാൻ പറഞ്ഞു.
“…ഇത് നല്ല പഴക്കം ചെന്നതാ ആശാൻ കൂടി ഒന്ന് നോക്കിയിട്ട് എടുക്കാം എന്ന് വെച്ചു…”
“… ഇവനെ കൊണ്ട്…”പിറുപിറുത്ത്കൊണ്ട് ഞാൻ പുറത്തേക്ക് ഇറങ്ങി. ബൈക്ക് കണ്ടതും എന്റെ കാലുകൾ നിലച്ചു ചങ്ക് പട പടാന്ന് ഇടിക്കാൻ തുടങ്ങി.
“… ഇതാ ആശാനേ വണ്ടി. ടെസ്റ്റ് ആയി അതോണ്ട് മാമൻ പിടിച്ച വർക്ക് ആണ്. നല്ല പഴക്കം ചെന്നത് ആയതോണ്ട് എനിക്കൊരു പേടി അതാ ഞാൻ ആശാനേ വിളിച്ചത്…” ഞാൻ ആ ബൈക്കിന് അരികിലേക്ക് നടന്നു പതിയെ ടാങ്കിന് മുകളിലൂടെ കൈയോടിച്ചു അറിയാതെ കണ്ണുകൾ നിറഞ്ഞൊഴുകി.
“… എന്ത് പറ്റി ആശാനേ. വർക്ക് പാട് ആണെങ്കിൽ നമുക്ക് മാമനോട് പറഞ്ഞ് തിരിച്ചു കൊടുക്കാം…” എന്റെ നിൽപ്പും ഭാവവും കണ്ട് കിച്ചു പറഞ്ഞു.
“… വേണ്ട ഈ വർക്ക് ഞാൻ ചെയ്തോളാം…” ഉറച്ച ശബ്ദത്തോടെ ഞാൻ പറഞ്ഞു.
ഒരു തരം കുറ്റബോധം ആയിരുന്നു മനസ്സ് നിറയെ ഞാൻ ചെയ്ത തെറ്റിന്. അച്ഛന്റെ ജീവൻ ഇപ്പോഴും ഈ വണ്ടിയിൽ ഉണ്ട്. ഞാൻ ഇവിടെ പണിക്ക് കയറിയ ശേഷം ഇവനെ തിരിച്ചു വാങ്ങാൻ വിറ്റ ആളുടെ അടുത്തേക്ക് പോയെങ്കിലും പുള്ളിയുടെ കൈയിൽ നിന്നും കൈമറിഞ്ഞ് പോയിട്ടുണ്ടായിരുന്നു. ഒരുപാട് അന്വേഷിച്ചു ഇവനെ കണ്ടെത്താനായില്ല. അവസാനം കറങ്ങി തിരിഞ്ഞ് എന്റെ മുന്നിൽ തന്നെ വന്നു പക്ഷെ ഇവൻ ഇന്ന് എനിക്ക് സ്വന്തം അല്ലെന്ന് മാത്രം🥺.
“… കിച്ചു ഈ വണ്ടിയുടെ മുഴുവൻ പണിയും ഞാൻ ചെയ്തോളാം. തല്ക്കാലം ഞാൻ ചെയ്തോണ്ട് ഇരിക്കുന്ന വർക്ക് എല്ലാം നീ ചെയ്യണം…”
“… ആശാൻ വെറുതെ ബുദ്ധിമുട്ടണ്ട ഈ വണ്ടിയുടെ പണി ഞാൻ ചെയ്യാം ആശാൻ ഒന്ന് കൂടെ നിന്നാൽ മതി…”
“… വേണ്ട. ഞാൻ പറഞ്ഞത് നീ ചെയ്താൽ മതി 😠…” ഞാൻ ഇതുവരെ കിച്ചുവിനോട് ഇത്ര കടുപ്പിച്ചു പറഞ്ഞിട്ടില്ല. അതുകൊണ്ട് തന്നെ കൂടുതൽ ഒന്നും പറയാതെ അവൻ അകത്തേക്ക് പോയി.
ഞാൻ ബൈക്കിൽ കേറി കിക്കർ അടിച്ചു ഫസ്റ്റ് അടിയിൽ തന്നെ സ്റ്റാർട്ട് ആയി എന്റെ ചുണ്ടിൽ ചെറിയൊരു പുഞ്ചിരി വിരിഞ്ഞു. ചങ്ക് തുളക്കുന്ന പഴയ അതെ ശബ്ദം. അവനെയും കൊണ്ട് ഒരു റൗണ്ട് പോയി. എനിക്ക് ഈ ഭൂമിയിൽ ഏറ്റവുംകൂടുതൽ സന്തോഷം തരുന്ന സ്ഥലങ്ങളിൽ ഒന്നാണ് ഇവന്റെ ഡ്രൈവിംഗ് സീറ്റ്. മനസ് അറിഞ്ഞ് ഓടിച്ച ശേഷം തിരികെ എത്തിയതും മാമൻ എന്നെ രൂക്ഷമായി നോക്കി വാതിൽക്കൽ നിൽപ്പുണ്ടായിരുന്നു. എനിക്ക് അദ്ദേഹത്തെ നിവർന്നു നോക്കാനുള്ള ദൈര്യം ഇല്ലായിരുന്നു. ബൈക്കും എടുത്ത് ഉള്ളിലേക്ക് പോയി ഞാൻ എന്റെ പണി തുടങ്ങി.കുറച്ചു ദിവസങ്ങൾ മാത്രമേ ഇവൻ എന്റൊപ്പം ഉണ്ടാവു അതിനാൽ ഓരോ വർക്കും നല്ല ശ്രദ്ധയോടെ ആസ്വദിച്ചാണ് ചെയ്തത്.