“എന്റെയും സംശയം അതുതന്നെയാണ്. രാജീവിന്റെ വധത്തില് നമുക്ക് പങ്കുണ്ടെന്നാണ് അയാളുടെ ധാരണ…പോലീസ് യഥാര്ത്ഥ പ്രതിയെ കണ്ടെത്തുന്ന നാള്വരെ അയാളുടെ കണ്ണില് നമ്മള് ആയിരിക്കും പ്രതികള്..അതിന്റെ പക നമ്മുടെ വീട്ടുകാരോടും അവന് കാണിച്ചു തുടങ്ങിയതാണ്..എടാ അളിയാ സത്യത്തില് നിനക്കിതില് വല്ല മനസറിവും ഇക്കാര്യത്തില് ഉണ്ടോ?” ശിവന് സംശയത്തോടെ ചോദിച്ചു.
“അത് ശരി..അപ്പോള് നിനക്കും എന്നെ വിശ്വാസമില്ലേ?”
“നമ്മള് തമ്മില് അന്ന് രാത്രി കണ്ടിരുന്നില്ലല്ലോ..നീ തെറ്റിദ്ധരിക്കരുത്…ഞാന് ചുമ്മാ ചോദിച്ചെന്നെ ഉള്ളു….”
“ശിവാ നീ അറിയാത്ത വല്ല രഹസ്യവും എനിക്കുണ്ടോ…പിന്നെ നീ ഇങ്ങനെ സംസാരിച്ചാല് എനിക്ക് വിഷമമാകും..”
“ഒരു രഹസ്യവുമില്ല എന്ന് നീ പറയരുത്..ഒരെണ്ണം ഉണ്ട്…സമയമാകുമ്പോള് മാത്രം പറയാം എന്ന് നീ പറഞ്ഞ ആ രഹസ്യം..” കള്ളച്ചിരിയോടെ ശിവന് പറഞ്ഞു.
“അതിനു മതിയായ കാരണമുണ്ട് എന്നും ഞാന് നിന്നോട് പറഞ്ഞിട്ടുണ്ടല്ലോ…അത് വിട്…വീട്ടുകാരുടെ കാര്യം ഇങ്ങനെ അപകടത്തിലായാല് നമ്മളെങ്ങനെ ഇവിടെ സമാധാനത്തോടെ ജീവിക്കും….”
“ആ ഹംസ എന്ന തൊലിയന് പോലീസുകാരന് ഞങ്ങളുടെ അയല്ക്കാരനാണ്..അയാളും നമ്മളെ തിരയുന്ന സ്ക്വാഡില് അംഗമാണ്… അയാള് ഇടയ്ക്കിടെ വീട്ടില് ചെല്ലുന്നുണ്ടെന്ന് ഇന്നലെ വിളിച്ചപ്പോള് അച്ഛന് പറഞ്ഞിരുന്നു..അയാള് ഒരു പക്കാ പെണ്ണുപിടിയന് ആണ്..രാധയെ കാണാനാണ് അയാളുടെ സന്ദര്ശനം എന്നെനിക്ക് അറിയാം” ശിവന് പല്ല് ഞെരിച്ചു.
“നീ വീട്ടിലേക്ക് ഫോണ് ചെയ്തോ..” റോയ് ഞെട്ടലോടെ ചോദിച്ചു.
“എത്രയെന്നു കരുതിയാ അവരെ തീ തീറ്റിക്കുന്നത്..ഇന്നലെ ഒരു രണ്ടു മിനിറ്റ് നേരം ഞാന് അവരോടോന്നു സംസാരിച്ചു….”
“എടാ നീ കാണിച്ചത് വലിയ അബദ്ധമാണ്..നമ്മുടെ വീടുകളിലെ ഫോണുകള് പോലീസ് നിരീക്ഷണത്തില് ആയിരിക്കും..അവിടേക്ക് വരുന്ന ഓരോ കോളും അവര് പരിശോധിക്കും…മിക്കവാറും നമ്മള് ഈ ഭാഗത്താണ് എന്ന് ഇതിനകം ടോമിച്ചനും സംഘവും അറിഞ്ഞു കാണാനാണ് വഴി…” റോയി ഭീതിയോടെ പറഞ്ഞു.
“ശരിയാണല്ലോ…ഛെ..ഞാന് അതോര്ത്തില്ല…വേണ്ടായിരുന്നു..” ശിവന് അപ്പോഴാണ് തനിക്ക് പറ്റിയ അബദ്ധം മനസിലായത്. അവന്റെ സ്വരത്തില് ഭയം നിഴലിച്ചിരുന്നു.
“ഈ ഫോണ് സ്വിച്ചോഫ് ചെയ്തേക്കാം..ആവശ്യമുള്ളപ്പോള് ഓണ് ചെയ്താല് മതി” വസീം നല്കിയ മൊബൈല് സ്വിച്ചോഫ് ചെയ്ത് റോയ് മാറ്റി വച്ചു.
“നമ്മുടെ ലൊക്കേഷന് അവര്
ക്ക് പിടികിട്ടിക്കാണും…ഇനി മിക്കവാറും ഇവിടെ അവന്മാര് എത്തി തിരച്ചില് തുടങ്ങും..നമ്മള് അധികമൊന്നും പുറത്ത് പോയിട്ടില്ലാത്തതിനാല് നാട്ടുകാര്ക്ക് നമ്മെ അറിയാന് വഴിയില്ല..എന്നാലും സൂക്ഷിക്കണം. നമ്മളെ ഇവിടെ നിന്നും പിടികൂടിയാല് അത് വസീം സാറിനെയും രേണു മാഡത്തെയും ദോഷമായി ബാധിക്കും…” ശിവന് പറഞ്ഞു.
“അതെ..നമ്മള് അഥവാ പിടിക്കപ്പെട്ടാലും അതിവിടെ വച്ചാകരുത്..” റോയ് ആലോചനയോടെ പറഞ്ഞു.
—–
“വസീമേ..ഞങ്ങള്ക്ക് രേണുവിനെ ഒന്ന് ചോദ്യം ചെയ്യണം…”
മുറിയിലേക്ക് കയറി വന്നു ടോമിച്ചന് പറഞ്ഞത് കേട്ടപ്പോള് വസീമിന്റെ ഉള്ളൊന്നു കാളി. അവര്ക്ക് വിവരം വല്ലതും ലഭിച്ചോ എന്നയാള് സംശയിച്ചു.
“എന്താ കാര്യം?”
“റോയിയും ശിവനും രേണുവിന്റെ വീട്ടില് ഇടയ്ക്കിടെ പോകുമായിരുന്നു എന്ന് ഞങ്ങള്ക്ക് വിവരം ലഭിച്ചിട്ടുണ്ട്. അതെപ്പറ്റി അറിയാനാണ്..അവര് ഒളിവില് പോയതില് രേണുവിന് ബന്ധം വല്ലതുമുണ്ടോ എന്ന് എനിക്ക് സംശയമുണ്ട്”
വസീം പുഞ്ചിരിച്ചു. പിന്നെ ബെല്ലില് സ്വിച്ചമര്ത്തി. ഒരു പോലീസുകാരന് വന്നു സല്യൂട്ട് നല്കി.
“രേണുവിനെ വിളിക്ക്..”
“സര്” അയാള് തിരികെപ്പോയി.
“ചോദ്യം ചെയ്യല് ഇവിടെ വച്ചല്ല..എന്റെ ഓഫീസില് വച്ചായിരിക്കും..” ടോമിച്ചന് പറഞ്ഞു.
“ഇവിടെ വച്ച് മതി..ഇയാള് ചെയ്യുന്ന പണി തന്നാ ഞാനും ചെയ്യുന്നത്”
വസീം അയാളെ രൂക്ഷമായി നോക്കിക്കൊണ്ട് പറഞ്ഞു. ടോമിച്ചന് ഇഷ്ടമാകാത്ത മട്ടില് ഒന്ന് മുരടനക്കി. അല്പം കഴിഞ്ഞപ്പോള് രേണു ഉള്ളില് കയറി വസീമിന് സല്യൂട്ട് നല്കി.
“എന്താ സര്” അവള് ചോദിച്ചു.
“ഇയാള്ക്ക് രേണുവിനെ ചോദ്യം ചെയ്യണമെന്ന്..വിഷയം റോയി ആന്ഡ് ശിവന്” വസീം പറഞ്ഞു.
“ചോദിച്ചോ സര്..” രേണു ടോമിച്ചന് നേരെ തിരിഞ്ഞു പറഞ്ഞു.
“രേണു ഇരിക്ക്…” അയാള് പറഞ്ഞു.
അവള് അയാള്ക്കെതിരെ ഇരുന്നു. അവളുടെ തുടുത്ത മുഖത്തേക്ക് നോക്കിയപ്പോള് ആത്മവിശ്വാസം കൈമോശം വരുന്നത് പോലെ ടോമിച്ചന് തോന്നി.
“റോയിയും ശിവനും നിങ്ങളുടെ വീട്ടില് സ്ഥിര സന്ദര്ശകര് ആയിരുന്നു എന്ന് ഞാനറിഞ്ഞു..എന്താണ് നിങ്ങളും അവരും തമ്മില് ബന്ധം?”
ടോമിച്ചന് അവളുടെ സൌന്ദര്യത്തില് പതറുന്നുണ്ടായിരുന്നു എങ്കിലും സ്വരം ലേശം കടുപ്പിച്ച് ചോദിച്ചു.
“അവര് സ്ഥിര സന്ദര്ശകര് ആയിരുന്നില്ല. ജോണ് അച്ചായനെ കാണാനാണ് അവരവിടെ ആദ്യം വന്നത്. വിഷയം ഗള്ഫില് എന്തെങ്കിലും ജോലി തരപ്പെടുത്തുക എന്നതായിരുന്നു. അച്ചായന് അവര്ക്ക് വിസിറ്റ് വിസ എടുത്ത് നല്കാമെന്ന് പറഞ്ഞതിന്റെ പേരില് ചില ഡോക്യുമെന്റ്സ് നല്കാന് വേണ്ടി രണ്ടോ മൂന്നോ തവണ അവരവിടെ വന്നിട്ടുണ്ട്” രേണു പറഞ്ഞു.
“ഞങ്ങള് അറിഞ്ഞത്, ഈ അടുത്തിടെയും അതായത് ജോണ് പോയ ശേഷവും അവരവിടെ വന്നു എന്നാണല്ലോ?”
“വന്നിരുന്നു..വിസ ശരിയായോ എന്നറിയാന് വന്നതാണ്…”
“ഇടയ്ക്കിടെ ഉള്ള അവരുടെ സന്ദര്ശനം നിങ്ങളും അവരും തമ്മില് ഒരു അടുപ്പം ഉണ്ടാക്കി എന്ന് ഞാന് പറഞ്ഞാല് രേണു നിരസിക്കുമോ?”
“ഇല്ല…”
“ഹും..ഈ തന്റേടം കൊള്ളാം..അവര് ഒളിവില് പോകാന് രേണു സഹായിച്ചു എന്ന് കൂടി ഞാന് പറഞ്ഞാല്..” ടോമിച്ചന് അല്പം പരിഹാസം കലര്ത്തിയാണ് അത് ചോദിച്ചത്.
“അതിന്റെ കാരണം കൂടി സാറ് തന്നെ പറ..” രേണു തിരിച്ചടിച്ചു. വസീം അവളെ നോക്കി അര്ത്ഥഗര്ഭമായി ചിരിച്ചു.
“എങ്കില് രേണു അറിഞ്ഞോ..ഞങ്ങള് ഏറെക്കുറെ അവന്മാരുടെ താവളം മനസിലാക്കിക്കഴിഞ്ഞു…കൂടിയാല് പന്ത്രണ്ടു മണിക്കൂര്..അതിനകം ടോമിച്ചന്റെ കൈയില് അവന്മാര് വീണിരിക്കും…അപ്പോഴും ഈ കാരണം എന്നോട് ചോദിക്കണം കേട്ടോ..ഇതേ ആത്മവിശ്വാസത്തോടെ..”
അയാള് എഴുന്നേറ്റ് വസീമിനെയും അവളെയും ഒന്ന് ഇരുത്തി നോക്കിയ ശേഷം പുറത്തേക്ക് പോയി. രേണു തോളുകള് മേലേക്ക് ഉയര്ത്തി ചുണ്ട് മലര്ത്തി വസീമിനെ നോക്കി. വസീമിന്റെ മുഖത്ത് പക്ഷെ ചെറിയ ആശങ്ക നിഴലിച്ചിരുന്നു.
“ബി കെയര്ഫുള്” വസീം ശബ്ദം തീരെ താഴ്ത്തി പറഞ്ഞു. രേണു തല കുലുക്കിയ ശേഷം പുറത്തിറങ്ങി.