” അളിയാ നീ ഏത് ഐറ്റത്തിനാ കർട്ടൻ വലിക്കുന്നത് എന്ന് പറഞ്ഞെ…. ”
അവരെ കണ്ടതും ശ്രീ എന്നെ തോണ്ടികൊണ്ട് ചോദിച്ചു…അതിന് ഞാൻ എന്തേലും തൊള്ള തുറക്കും മുൻപേ അഭിയുടെ മറുപടിയും വന്നു കഴിഞ്ഞിരുന്നു…
” മിക്കവാറും ചവിട്ട് നാടകം ആയിരിക്കും…. ”
അവൻ എന്നെ നോക്കി ഇളിച്ചുകൊണ്ട് പറഞ്ഞു….
” അളിയാ വീട്ട് മുറ്റത്ത് ഇടാനുള്ള പന്തല് സെറ്റപ്പ് MPS-ൽ പറയാം അല്ലേ… ”
ശ്രീ ആക്കിയ ചിരിയോടെ വീണ്ടും ചോദിച്ചതും ഞാനവന്മാരെ നോക്കി പല്ലിറുമ്മിയ ശേഷം ധൈര്യം സംഭരിച്ച് അവരുടെ അടുത്തേക്ക് നടക്കാനൊരുങ്ങി… ഒന്നാമത്തെ കോളേജിൽ നിന്ന് വെള്ളടിക്കരുതെന്ന ചേട്ടത്തിയുടെ ഉഗ്ര ശാസനം ഉണ്ട് അതാണ് എനിക്ക് ഏറ്റവും വലിയ പേടി….
” അളിയാ…. ”
മുന്നോട്ട് നടക്കാൻ തുടങ്ങിയ എന്നെ പുറകീന്ന് നന്ദു വിളിച്ചു…അതോടെ ഞാൻ തിരിഞ്ഞവനെ നോക്കി…
” ഈ അവസ്ഥയിൽ ചോദിക്കാൻ പാടുണ്ടോ എന്നറിയില്ല… പക്ഷേ ചോദിച്ചു പോകുവാ….നീ ഒഴിച്ചു വെച്ച ആ പെഗ്ഗ് ഞാൻ അടിച്ചോട്ടേ…അല്ല വല്ല ഈച്ചയും വീണ് അത് ചത്ത് പോകണ്ടാന്ന് കരുതിയാ…. ”
അവനെന്നെ നോക്കി ഒരു നിഷ്കളങ്ക ഭാവത്തിൽ ചോദിച്ചതും… ചോട്ടാ മുംബൈയിൽ കുപ്പി പൊട്ടിയപ്പൊ ഉള്ള ബിജുകുട്ടൻ്റെ അവസ്ഥ ആയിരുന്നു എനിക്ക്…അവനെ നോക്കി നാവ് നീട്ടി രണ്ട് തെറി വിളിച്ച ശേഷം ഞാൻ വേഗം ദിവ്യയുടേം ചേട്ടത്തിയുടേം അടുത്തേക്ക് നടന്നു…
” ഹാ നീയെന്താ ഇവിടെ… ”
അവരുടെ അടുത്തെത്തിയതും ഞാൻ ദിവ്യയെ നോക്കി ഇളിച്ചുകൊണ്ട് ചോദിച്ചു…പക്ഷെ അതിന് മറുപടി ഒന്നും കിട്ടിയില്ല…രണ്ടും എന്നെ ചൂഴ്ന്ന് നോക്കുന്നുണ്ട്…ചേട്ടത്തിയെ നോക്കാൻ തന്നെ പേടിയാകുന്നു…
” കണ്ടല്ലോ ഇതാ ഇവൻ്റെ പരിപാടി എത്ര പറഞ്ഞാലും കേൾക്കില്ല…അകത്തെന്താടാ പരിപാടി… ”
ഒരു നിമിഷത്തെ മൗനത്തിന് ശേഷം ചേട്ടത്തി ഫുൾ പവറിൽ ആയതോടെ ഏത് വഴി ഓടണം എന്ന ചിന്തയിൽ ആയി ഞാൻ…
” ഇനി നീ എന്താന്ന് വെച്ചാ ആകിക്കോ…എനിക്കൊന്നും ഇവനോട് സംസാരിക്കാൻ താൽപര്യം ഇല്ല… ”
പുള്ളിക്കാരി പറഞ്ഞത് ഒരു രീതിയിലും അനുസരിച്ചില്ല എന്ന് കണ്ടതും ചേട്ടത്തി എന്നെ കൽപ്പിച്ച് ഒന്നുകൂടി നോക്കിയ ശേഷം അവിടെ നിന്നും പോകാൻ ഒരുങ്ങി…അതോടെ ഞാൻ ഓടി ചെന്ന് പുള്ളിക്കാരിയുടെ വട്ടം നിന്നു…
” എൻ്റെ പൊന്ന് ചേട്ടത്തി കൊച്ചേ…ഈ ഒറ്റത്തവണ കൂടി എന്നോട് ക്ഷമിക്ക്…ഇനി ഒരിക്കലും ഉണ്ടാവില്ല…സത്യം….എൻ്റെ പൊന്നല്ലേ… ”
ഞാൻ പിള്ളാരെ കണക്കെ സോപ്പിടാൻ തുടങ്ങി…
” നീ പോടാ…നീയെന്നോട് ഒന്നും പറയണ്ട…ഞാൻ പറഞ്ഞാ കേൾക്കാത്ത നീ എന്നോട് സംസാരിക്കാൻ വരണ്ട… ”
ചേട്ടത്തി അമ്പിനും വില്ലിനും അടുക്കില്ല എന്ന് കണ്ടതും അവസാന അടവിടാൻ തീരുമാനിച്ചു…
” അങ്ങനെ പറയല്ലേ…എൻ്റെ ഈ ചെറിയ തെറ്റക്കൊ ക്ഷമിക്കാനൊക്കെ എനിക്ക് വേറെ ചേച്ചിയൊന്നും ഇല്ലാത്തോണ്ടല്ലെ ഞാൻ ചോദിക്കുന്നെ…പ്ലീസ് ഇനി ഉണ്ടാവില്ല… “
ഞാൻ സങ്കടകലർന്ന ഭാവത്തോടെ അവതരിപ്പിച്ചതും ആള് ഫ്ലാറ്റ്…അല്ലേലും ഈ പെണ്ണുങ്ങളെ വീഴ്ത്താൻ പഴത്തൊലിയെകാളും നല്ലത് ഇമോഷണൽ ഡയലോഗ്സാണ്…
” ഉറപ്പാണോ… ”
പുള്ളിക്കാരി എന്നെ നോക്കി ചോദിച്ചതും ഞാൻ എൻ്റെ സ്വയം തലയിൽ കൈവച്ച് സത്യം ചെയ്യുമ്പോലെ കാണിച്ചു…
” ഇത്തവണ എന്നാൽ ക്ഷമിക്കാടി… ”
ചേട്ടത്തി ചിരിച്ചുകൊണ്ട് എൻ്റെ കൈയിൽ പിടിച്ച ശേഷം ദിവ്യയോടായി പറയാനൊരുങ്ങി…പക്ഷെ അപ്പോഴാണ് പുറകിൽ നിൽക്കുന്ന ഭദ്രകാളിയെ ഞങ്ങൾ ശ്രദ്ദിക്കുന്നത്…എൻ്റെയും ചേട്ടത്തിയുടേം കോപ്രായങ്ങൾ കണ്ട് കൈയ്യും കെട്ടി തുറിച്ചു നോക്കുകയായിരുന്നു കക്ഷി…
” കഴിഞ്ഞോ….. ”
അവൾ എന്നേയും ചേട്ടത്തിയേയും നോക്കി ആ ഭാവത്തിൽ നിന്നും ഒരു മാറ്റവും വരാതെ ചോദിച്ചു…അതിന് ഞങ്ങൾ രണ്ടും പരസ്പരം നോക്കുക അല്ലാതെ ഒന്നും പറഞ്ഞില്ല…
” മര്യാദയ്ക്ക് എൻ്റൊപ്പം വാ….പിന്നെ നിങ്ങൾക്കുള്ളത് ഞാൻ വീട്ടീന്ന് തരാം… ”
അവളെൻ്റെ കൈയ്യിൽ പിടിച്ചതിന് ശേഷം ആദ്യം എന്നോടും പിന്നെ ചേട്ടത്തിയോടുമായി പറഞ്ഞ ശേഷം നടക്കാനൊരുങ്ങി…
” എങ്ങോട്ട്…. ”
ഞാൻ ചുമ്മാ കാര്യം അറിയാൻ തിരക്കിയതും ദഹിപ്പിക്കുന്ന ഒരു നോട്ടമായിരുന്നു മറുപടി… അതോടെ ഞാൻ നൈസായി ചേട്ടത്തിയെ ഒന്ന് നോക്കി…അപ്പൊ അവിടെ നിന്നും ” നീ തീർന്നടാ…നീ തീർന്നു… ” എന്ന ആക്ഷൻ ആയിരുന്നു മറുപടി…അതോടെ കിളി പാറിയ കണക്കെ ഞാൻ അവളോട് നടന്നു…
” ഇയാള് വണ്ടി എടുത്തിട്ട് വാ… ”
ഫ്രണ്ട് ഗേറ്റിനടുത്തെത്തിയതും അവളെന്നെ നോക്കി കൽപിച്ചു…ഇവളാര് ശിവകാമി ദേവിയൊ എന്നോട് കൽപ്പിക്കാൻ…ഒരെണ്ണം മോന്തയ്ക്ക് കൊടുത്താലോ..?? അല്ലേ വേണ്ട തിരിച്ച് കിട്ടുന്നത് ഒന്നിൽ ഒതുങ്ങില്ല…അതോടെ ഞാൻ പിള്ളേരെ വിളിച്ചു പറഞ്ഞു…ശേഷം വേഗം വണ്ടിയും എടുത്ത് വന്നു…അവൾ പുറകിൽ കേറിയതും ഞാൻ വണ്ടി മുന്നോട്ട് എടുത്തു… എങ്ങോട്ടേക്കാണാവോ മഹറാണിക്ക് പോകേണ്ടത്…തമ്പുരാനറിയാം…
” അല്ല എങ്ങോട്ടേക്കാടോ… ”
കുറച്ച് നേരത്തെ മൗനത്തിന് കർട്ടനിടാൻ ഞാൻ ചോദിച്ചു…
” എങ്ങോട്ടേലും പോ…. ”
അവൾ തൽപര്യമില്ലാത്ത മട്ടിൽ മറുപടി പറഞ്ഞു…അതോടെ കക്ഷി ഇപ്പോഴും കലിപ്പാണെന്ന് ഞാൻ ഉറപ്പിച്ചു…ഇതിനുമാത്രം ഒരു തെറ്റാണോ കൂട്ടുകാരെ ഈ മദ്യപാനം…ഉത്തരം നിങ്ങള് പറയേണ്ട… പോയി നിങ്ങടെ ലൗവർസിനോട് ചോദിക്കൂ…അപ്പൊ കിട്ടും ശരിക്കുള്ള ഉത്തരം…
” അങ്ങനാണേ നമ്മുക്കൊരു സിനിമയ്ക്ക് പോയാലോ കുഞ്ചൂസേ… ”
ഞാൻ ചുമ്മാ അവളുടെ വീക്ക്നെസിൽ പോയി പിടിക്കാൻ തീരുമാനിച്ചു…അതിലവള് വീഴും..
” എന്തിന് അവിടെ കെടന്ന് ഉറങ്ങാൻ ആയിരിക്കും… ”
അവളന്നത്തെ സംഭവം ഓർത്തതും മുഖം കൊണ്ട് ഗോഷ്ട്ടി കാണിച്ചു കൊണ്ട് പറയുന്നത് ഞാൻ മിററിലൂടെ കണ്ടു…അതോടെ ഞാൻ പിന്നൊന്നും പറയാതെ വേഗം വണ്ടി തീയേറ്ററിലേക്ക് വിട്ടു…
” പോയി ഇയാൾക്ക് ഇഷ്ട്ടമുള്ള പടത്തിന് ടിക്കറ്റെടുക്ക് ഞാൻ വണ്ടിയും പാർക്ക് ചെയ്യ്ത് വരാം… ”
തീയറ്റിൽ മുന്നിൽ എത്തിയതും ഞാനവളേയും ഇറക്കി എൻ്റെ കീശയിൽ നിന്നും പേഴ്സ് അവൾക്ക് നേരെ നീട്ടിക്കൊണ്ട് പറഞ്ഞു…പക്ഷെ പുള്ളിക്കാരിയുടെ ദേഷ്യം പൂർണ്ണമായും മാറിയില്ലാന്ന് തോന്നുന്നു…അതുകൊണ്ട് ഞാൻ നീട്ടിയ പേഴ്സ് വാങ്ങാതെ അവൾ മുഖം തിരിച്ചു…
” ശെടാ….ദേഷ്യം മാറീല്ലെ ഇതുവരെ…ക്ഷമിക്കടോ എൻ്റെ കുഞ്ചൂസല്ലേ…ഞാൻ അതികം കഴിച്ചിട്ടൊന്നുമില്ല…ചുമ്മാ കോളേജ് ലൈഫല്ലേടോ ഒരു രസത്തിന്…അതിനിങ്ങനെ ദേഷ്യപ്പെട്ടാലോ… ”
ഞാൻ അവളുടെ കൈയിൽ കേറി വിരലുകൾ കോർത്തു കൊണ്ട് പറഞ്ഞു…അതോടെ കക്ഷിയുടെ നോട്ടം വീണ്ടും എൻ്റെ നേർക്കായി…
” ഒന്ന് ചിരിക്കടോ… ”
ഞാൻ അവളെ നോക്കി ഒന്ന് കണ്ണിറുക്കി…അതോടെ കക്ഷി ഒന്നലിഞ്ഞു…അതിന് തെളിവായിരുന്നു നുണക്കുഴി വിടർന്നുള്ള അവളുടെ ചിരി…
