“ബാക്കി വേറെ ലോഡ് ആടാ….ഇവിടുത്തെ പണി തുടങ്ങി വെക്കാൻ തൽക്കാലം ഇത്രേം മതി..”
അങ്ങേരു പറഞ്ഞത് ഡും ഡും എന്നു ഇടിച്ചുകൊണ്ടിരിക്കുന്ന ചെവിയിൽ മൂളക്കം പോലെയാണ് വീണത്.
അതോടെ താഴെ ഇറങ്ങി ഒന്നു നേരെ നിന്നതും തലയാകെ ഒരു മിന്നൽ…കണ്ണു നിറയെ മഞ്ഞളിച്ചു പോയി….
താങ് പിടിച്ചില്ലെങ്കിൽ വീഴും എന്നു ഉറപ്പായതോടെ ലോറിയുടെ പിറകിൽ പിടിച്ചു നിന്നു.
അഞ്ചു മിനിറ്റു മുഴുവനെടുത്തു തല ഒന്നു നേരെ നിക്കാൻ…
“ഡാ ഇന്നാട വെള്ളം കുടിക്ക്….”
എനിക്ക് നേരെ നീട്ടിയ കുപ്പി വെള്ളം ഞാൻ വാങ്ങി അപ്പാടെ കുടിക്കുന്നത് കണ്ട മണിയേട്ടനും ഒന്നമ്പരന്നു കാണണം.
“ഡാ നിനക്ക് വല്ലതും പറ്റിയോ….കുഴപ്പം ഒന്നും ഇല്ലല്ലോ….”
ആകുലതയോടെ ആണ് മണിയേട്ടൻ ചോദിച്ചത്…
“ഏയ്‌ കുഴപ്പം ഒന്നുമില്ല മണിയേട്ട…”
ഞാൻ പറഞ്ഞത് കേട്ടു, മൂളി തലകുലുക്കി ആള് പോയി..
തിരികെ ലോറിയിൽ ഇരിക്കുമ്പോഴും എന്റെ മനസ്സിൽ ഓരോ ആലോചനയിൽ ചുറ്റി തിരിയുകയായിരുന്നു.
“മണിയേട്ട നാളെ മുതൽ ഞാനും വരട്ടെ നിങ്ങളുടെ കൂടെ പണിക്ക്…”
എന്റെ ചോദ്യം കേട്ട് കളിയാക്കിയതാണെന്നു കരുതിയിട്ടാവണം അങ്ങേരോന്നും മിണ്ടിയില്ല,
ഞാൻ പിന്നേം ചോദിച്ചപ്പോൾ അങ്ങേരു ഒന്നും മനസ്സിലാവാത്ത പോലെ എന്നെ ഒരു നോട്ടം നോക്കി.
“നീ ഇതെന്തൊക്കെ ആടാ ഈ ചോദിക്കുന്നെ….ഇത്രേം പഠിച്ചിട്ട് ഇനി എന്റെ സൈറ്റിൽ പണിക്ക് വരാനോ…നീ ഒന്നു പോയേ…”
“എന്ത് പണി ആയാലെന്താ മണിയേട്ട…എനിക്കിപ്പോൾ വീട്ടിലെ കാര്യം നടക്കണം…ടൈ ഉം കെട്ടി വെളുക്കും മുതൽ പാതിരാ വരെ കിടന്നു ചത്തലഞ്ഞാലും അവസാനം കയ്യിൽ കിട്ടുന്നത് വല്ല നക്കാപ്പിച്ചയും ആയിരിക്കും….”
“എന്നാലും…എനിക്ക് അതങ്ങു…ഉൾക്കൊള്ളാൻ പറ്റുന്നില്ലെടാ…”
മണിയേട്ടൻ പിന്നെയും നിന്നു മടിഞ്ഞപ്പോൾ എനിക്ക് നല്ലൊരു ജോലി കിട്ടും വരെ മതിയെന്നു അങ്ങേരോട് പറഞ്ഞു….പിന്നെയും കുറെ കെഞ്ചിയപ്പോൾ,…അവസാനം ഹെൽപർ ആയി കൂടെ കൂടിക്കൊള്ളാൻ, പറഞ്ഞു…
ദിവസം അറുന്നൂറ് രൂപ തച്ചും ഉറപ്പിച്ചു.
മണിയേട്ടന് സിറ്റിയിലെ കുറച്ചു ബില്ഡിങ്ങിലും ആളെ വിടുന്ന പണി ഉള്ളതുകൊണ്ട്, ആരും അറിയത്തും ഇല്ല…
എല്ലാം കണക്ക് കൂട്ടി ആണ് ഞാൻ ചോദിച്ചതും…
തിരികെ പോരും വഴി ഇന്ന് ലോഡിറക്കിയ വകയിൽ മണിയേട്ടൻ തന്ന അഞ്ഞൂറ് കയ്യിൽ ഉണ്ടായിരുന്നു.
കൂടെ ബാങ്കിൽ നിന്ന് വലിച്ച അവസാന മുന്നൂറും…
വീട്ടിലേക്കുള്ള അത്യവശ്യം സാധനങ്ങളും വാങ്ങി…
ഞാൻ വീട്ടിലെത്തി.
“ബൈക്ക് എന്തേ….”
പതിവ് തെറ്റിച്ചു നടന്നു വരുന്ന എന്നെ കണ്ട്‌ കയ്യിൽ നിന്ന് കിറ്റുകൾ വാങ്ങുന്നതിനിടയിൽ അമ്മു ചോദിച്ചു.
“നാളെ തുടങ്ങി…അമ്മു ക്ലാസ്സിൽ പൊയ്ക്കോട്ടോ…ഫീസ് ഞാൻ അടച്ചിട്ടുണ്ട്…
നല്ലോണം പഠിച്ചു എക്സാം ക്ലിയർ ചെയ്തോണം…”
അവളുടെ ചോദ്യം തിരിച്ചു വിടാനാണ് ഞാൻ പറഞ്ഞതെങ്കിലും, പെണ്ണ് വീണ്ടും കറങ്ങി അവിടെ എത്തി.
“അതിന് ഏട്ടന്റയിൽ പൈസ ഉണ്ടായിരുന്നോ…”
“അത്…അതൊക്കെ ഞാൻ ഒപ്പിച്ചു…”
“എങ്ങനെ…..ബൈക്ക്…എവിടെ…”
അവള് വിടാനുള്ള ഒരു ഭാവവും ഇല്ലെന്ന് മനസ്സിലായി…
“ഞാൻ അത് കൊടുത്തു….
അങ്ങനെയാ…ഫീസടച്ചേ”
അവളുടെ മുഖം പെട്ടെന്നാണ് വാടിപോയത്.
മുഖവും കുനിച്ചു നിൽക്കുന്ന പെണ്ണ് കരയാനുള്ള പുറപ്പാടാണെന്നു മനസിലായതോടെ, ഞാൻ കവിളിൽ പതിയെ ഒന്നു തട്ടി.
“അമ്മു ഒന്നൂല്ല…എനിക്ക് ജോലി കിട്ടി…നീ കൂടെ നല്ലൊരു ജോലിക്ക് കേറിയാ നമുക്ക് പുതിയതൊരെണ്ണം വാങ്ങിച്ചൂടെ….പിന്നെന്താ…”
പെണ്ണ് കിടന്നു വിങ്ങിപ്പൊട്ടി മിണ്ടാട്ടം മുട്ടി നടക്കും മുന്നേ,ഞാൻ ഒന്ന് സമാധാനിപ്പിച്ചു.
“ജോലി കിട്ടിയോ…എവിടെയാ….”
പെട്ടെന്ന് തന്നെ അവൾ എന്നോട് ചോദിച്ചു.
“ഉം…. അക്കൗണ്ട്‌സ് ഇൽ ….കാക്കനാട് ഒരു സൂപ്പർ മാർക്കറ്റ് ഇൽ….”
മണിയേട്ടന്റെ കൂടെ ഉള്ള ജോലി തത്കാലം പറയേണ്ടെന്നു വെച്ചു,…അതൂടെ അറിഞ്ഞാൽ ചിലപ്പോ,…കരഞ്ഞു നാശമാക്കി,…ചിലപ്പോൾ എന്തൊക്കെ കാണിച്ചു കൂട്ടും എന്നു പോലും പറയാൻ പറ്റില്ല…
അതോടെ അവളുടെ മുഖം ഒന്ന് തെളിഞ്ഞു.
“നന്നായിട്ട് പഠിച്ചോണേ… അമ്മൂസെ….നിന്നെ ഒരു നിലയിലെത്തിച്ചിട്ട് വേണം എനിക്കൊന്നു വിശ്രമിക്കാൻ…”
ഞാൻ ഒരു കാരണവരെ പോലെ പറയുന്നത് കെട്ടിട്ടാവണം…
കുറുമ്പ് കുത്തിയ കളിയാക്കലാണ് ആദ്യം പെണ്ണിന്റെ വായിൽ നിന്ന് വന്നത്…
“ഞ ഞ്ഞ ഞ്ഞ…..”
ചിരിച്ചു തെറ്റിത്തെറിച്ചു അടുക്കളയിൽ എനിക്കുള്ള ചായ എടുക്കാൻ പോയ അമ്മുവിനെ ഞാൻ നോക്കി നിന്നു…
എന്റെ അനിയൻ നാറി, അറിയാതെ എനിക്ക് ചെയ്ത പുണ്യമാണ് ഇവളെന്ന് തോന്നിപ്പോയി..
പക്ഷെ അപ്പോഴേക്കും മനസ്സിൽ ഇരുന്നു വേറൊരു നാറി പണി തുടങ്ങി, ഒറ്റ ചോദ്യത്തിൽ അവനെന്റെ ട്യൂബ് ഊരി വിട്ടു,…
“അവൾ നിന്നെ ഒരു ആങ്ങളയെ പോലെയാണ് കാണുന്നതെങ്കിലോ….കിലോ കിലോ…”
അതോടെ ചിരിച്ചോണ്ടിരുന്ന ഞാൻ മൂഞ്ചിക്കുത്തി മനസ്സിൽ മൂന്നു തെറിയും വിളിച്ചു തോർത്തും എടുത്തു കുളിക്കാൻ പോയി…
***********************************
പിറ്റേന്ന് എന്റെ ഒപ്പം തന്നെ അവളും റെഡി ആയി ഇറങ്ങി,..
കവല വരെ ഓരോന്നു പറഞ്ഞും എന്നെ പിച്ചിയും വലിച്ചും ചിരിച്ചും കൂടെ നടന്നു ബസ് കേറിപ്പോയതോടെ
ഞാൻ വേഗം അടുത്ത ബസ് പിടിച്ചു മണിയേട്ടന്റെ വീട്ടിൽ എത്തി.
അങ്ങേരോട് പറഞ്ഞു ബാഗിൽ ചുരുട്ടി വെച്ച എന്റെ പഴയ ഒരു മുണ്ടും ഷർട്ടും എടുത്തിട്ട് അങ്ങേരുടെ കൂടെ സൈറ്റിലേക്കിറങ്ങി,….
ഒരു മൂന്നു നില കെട്ടിടത്തിന് മുന്നിലാണ് യാത്ര അവസാനിച്ചത്,…
ആദ്യം വന്ന അണ്ണന്മാർ ഇപ്പൊ സൂപ്പർവൈസർമാരാണ്, വരാൻ വൈകിയ ഭായിമാർ പണിക്കാരും,..
അവിടെ മണിയേട്ടൻ പറഞ്ഞതുവെച്ചു പതിയെ പണി തുടങ്ങി,ഭായിമാർ കൊണ്ടു വന്നു വെച്ചു കൊടുക്കുന്ന സിമന്റും മണ്ണും കൂട്ടിക്കൊടുക്കുന്ന പണി ആണ് മണിയേട്ടൻ എന്നെ ഏൽപ്പിച്ചത്,…
ആദ്യത്തെ ആവേശത്തിൽ കൈകോട്ടു കൊണ്ടൊന്നു അമ്മാനമാടി ഭായിമാരെ നാണിപ്പിക്കാൻ ഒരു കഠിന ശ്രെമം നടത്തി,…
പതിനഞ്ചു മിനിറ്റു കുനിഞ്ഞു നിന്ന് മരണ വെട്ട് വെട്ടിയതും അവൻ വന്നു,…
ഇന്നലെ വന്ന അതേ മഞ്ഞ വെളിച്ചവും ഈച്ചകളും തലയ്ക്ക് ചുറ്റും,…
എന്റെ വിയർത്തു മൂടിയ മുഖം കണ്ട മണിയേട്ടന് കാര്യം മനസ്സിലായിട്ടാണെന്നു തോന്നുന്നു,…
നൈസായി ഒരു ഭായിയെ വിളിച്ചു അതേൽപ്പിച്ചു എന്നെ ഒരു കട്ട കൂട്ടി വെച്ചതിന്റെ മേലെ കൊണ്ടു വന്നു പ്രതിഷ്ഠിച്ചു,…
ചെവിയിൽ ഇടിയും ഇടിച്ചു ശ്വാസം വലിച്ചു വിട്ട് കുറച്ചു ഒന്ന് ഇരുന്നു…
അപ്പോഴേക്കും മണിയേട്ടൻ വെള്ളം കൊണ്ട് തന്നു.
“ശരീരത്തിന് ശീലം ഇല്ലാത്തത് പെട്ടെന്ന് ചെയ്ത കൊണ്ടാ…നിന്റെ മരണ വെട്ട് കണ്ടപ്പോഴേ എനിക്ക് തോന്നിയതാ…”
എന്നെ നോക്കി തൊലിഞ്ഞ ഒരു ഇളിയുമായി മണിയേട്ടൻ പറഞ്ഞു,…
അങ്ങേരെ ചുമ്മാതാണേലും രണ്ടു തെറി പറയണം എന്നുണ്ട്, ശ്വാസം എടുക്കുന്നതും ഒന്നു തല നേരെ നിക്കുന്നതും എന്റെ ഇപ്പോഴത്തെ പ്രധാന മുൻഗണനാ വിഷയം ആയതുകൊണ്ട് ചുമ്മ നോക്കി ഇരുന്നു.
