കിതപ്പൊന്നാറിയ ആശാൻ വീണ്ടും പറഞ്ഞ് തുടങ്ങി..
“ഇനി കുമാരനും കുട്ടിരാമനും അഭിപ്രായം പറ… ഈ ഒടിവിദ്യയിലൂടെ നമുക്കോരോരുത്തരെയായി
തീർത്തൂടെ…?..ഏറ്റവും സുരക്ഷിതമായ മാർഗമിതാണ്… ഒരിക്കലുംപിടിക്കപ്പെടില്ല…”..
എന്തിനും തയ്യാറായി മുന്നിൽ നിൽക്കുന്ന കരുത്തൻമാരെ ആശാൻ നോക്കി…
“ആശാന്റെ അഭിപ്രായം അങ്ങിനെയാണെങ്കിൽ എനിക്ക് സമ്മതം… പക്ഷേ,എന്താണ് ഈ ഒടിവിദ്യ… ?..എങ്ങിനെ ഒരാൾക്ക് ഒടിയനാവാൻ കഴിയും… ?”..
കുമാരൻ അവന്റെ സംശയം ചോദിച്ചു..
“കുട്ടിരാമൻ ഒന്നും പറഞ്ഞില്ല…”..
ആശാൻ അവനെ നോക്കി..
“ആശാനും കുമാരനും എന്ത് തീരുമാനിച്ചാലും ഞാൻ ഒപ്പമുണ്ടാകും…”..
അതാണ് കുട്ടിരാമന്റെ നിലപാട്..
“ശരി… അത് നമുക്കുറപ്പിക്കാം… നമ്മൾ പകരം ചോദിക്കുന്നത് നേരിട്ട് ഏറ്റ്മുട്ടിയിട്ടല്ല.. അത് ഒടിവിദ്യയിലൂടെയായിരിക്കും… നമ്മുടെ അവസാന ശ്രത്രുവിനേയും നമ്മൾ ഈ വിദ്യയിലൂടെ അവസാനിപ്പിക്കും… ഇതിലൂടെ നമ്മുടെ കുലത്തിന് സമാധാനത്തോടെയുള്ള ഒരു ജീവിതം ഉണ്ടാകുമെന്ന് നമുക്ക് വിശ്വസിക്കാം…”..
ആശാൻ കണ്ണടച്ച് പ്രാർത്ഥിക്കുന്നത് പോലെ രണ്ട് നിമിഷം ഇരുന്നു..പിന്നെ കുമാരനെയും കുട്ടിരാമനെയും മാറിമാറി നോക്കി..
“വിചാരിക്കുന്നത് പോലെ ഇതത്ര എളുപ്പമുള്ള കാര്യമല്ല… വളരെ സങ്കീർണ പ്രക്രിയയാണിത്… നെറ്റിത്തടത്തിലും, ചെവിക്ക് പുറകിലും ഒരു മഷി പുരട്ടുക എന്നതാണ് ഇതിന്റെ മർമ്മം…ഇതിനാവശ്യമായ പദാർത്ഥങ്ങൾ ഒരുക്കുക എന്നത് തന്നെ വളരെ വലിയൊരു സാഹസമാണ്… അത് നിങ്ങൾക്ക് സംഘടിപ്പിക്കാനാകുമെന്ന് ഉറപ്പുണ്ടെങ്കിൽ മാത്രം ഞാനാ രഹസ്യം പറയാം…”..
“ഈ ഭൂമിയിൽ കിട്ടുന്നതാണെങ്കിൽ ഞങ്ങളത് കൊണ്ട് വന്നിരിക്കും…”..
ഉറച്ച ശബ്ദത്തിൽ കുമാരൻ പറഞ്ഞു..
“ ഇവിടെ കിട്ടുന്നത് തന്നെയാ കുമാരാ… പക്ഷേ, അതത്ര എളുപ്പമല്ല… നമുക്ക് വേണ്ട സാധനങ്ങൾ സംഘടിപ്പിക്കുമ്പോഴേക്കും ചുരുങ്ങിയത് രണ്ട് ജീവൻ നഷ്ടപ്പെടുത്തേണ്ടിവരും… അതാണ് ഈ ഒടിവിദ്യയിലെ ഏറ്റവും വലിയ പ്രശ്നം… “..
“ആരുടെ ജീവനാ ആശാനേ നഷ്ടപ്പെടുക…?”..
കുട്ടിരാമൻ ചോദിച്ചു..
“ പറയാം… ആദ്യം ഞാൻ ആ മഷിയുണ്ടാക്കാനുളള കൂട്ട് പറയാം… അത് കേട്ടിട്ട് നിങ്ങൾ തീരുമാനിച്ചാ മതി അതൊക്കെ സംഘടിപ്പിക്കാൻ കഴിയോന്ന്… ഇല്ലെങ്കിൽ നമുക്കിത് ഇവിടെ വെച്ച് നിർത്തി വേറെ വഴി നോക്കാം… “..
ഇത്ര അമൂല്യവും അപൂർവ്വവുമായ വസ്തുക്കൾ ഏതെന്നറിയാൻ അവർക്ക് ആകാംക്ഷയായി..
“ചുരുങ്ങിയത് ആറ് മാസം ഗർഭത്തിലിരിക്കുന്ന ഒരു കുഞ്ഞാണ് ഇതിന്റെ പ്രധാന ചേരുവ… ആ കുഞ്ഞിനെ ഗർഭിണിയുടെ വയറ് കീറി പുറത്തെടുത്ത് ഒരാഴ്ച വെയിലത്ത് വെച്ച് ഉണക്കിപ്പൊടിക്കുക… പിന്നെ ഗർഭിണിയുടെ രക്തം… പിന്നെ പ്രസവിച്ചിട്ടില്ലാത്ത,ആരോഗ്യവതിയായ ഒരു യുവതിയുടെ ലൈംഗിക ബന്ധം നടത്തി രതിമൂർഛയിലൂടെ വരുന്ന മദജലം… ഇത്രയുമാണ് ഇതിന് പ്രധാനമായി വേണ്ടത്… ബാക്കിയൊക്കെ ചില മരുന്നുകളാണ്… അത് നമുക്ക് വേഗത്തിൽ സംഘടിപ്പിക്കാൻ പറ്റും…”..
ആശാൻ പറഞ്ഞത് നടുക്കത്തോടെയാണ് മൂന്നാളും കേട്ടത്… ഇതൊരിക്കലും നടക്കാത്ത കാര്യമാണെന്ന് കുട്ടിരാമന് മനസിലായി..എന്നാൽ കുമാരന് ഇതത്ര വിഷയമായി തോന്നിയില്ല..
“അപ്പോ രണ്ട് നിരപരാധികളെ നമ്മൾ കൊല്ലേണ്ടിവരും അല്ലേ ആശാനേ… ?”..
അങ്ങിനെയാണ് കുമാരൻ ചോദിച്ചത്..
“ഉം… വേണ്ടിവരും… പക്ഷേ അവർ നിരപരാധികളാണോ, അപരാധികളാണോന്ന് നമ്മൾ തീരുമാനിക്കണം… നമ്മുടെ കുലത്തോട് കണ്ണിൽ ചോരയില്ലാത്ത ദ്രോഹങ്ങൾ ചെയ്ത തമ്പ്രാട്ടിമാരും എമ്പാടുമുണ്ട്… പിന്നെ, ധർമ്മയുദ്ധത്തിൽ നിരപരാധികളും കൊല്ലപ്പെട്ടേക്കാം… ഭഗവാൻ ഒരു ശിക്ഷയിറക്കുമ്പോൾ പോലും നിരപരാധികൾ പെട്ട് പോവാറുണ്ട്…”..
കുമാരൻ കുറച്ച് നേരം ഒന്നാലോചിച്ചു. പിന്നെ നീലിക്ക് നേരെ തിരിഞ്ഞു..